Ol Pikinini Blong Yumi—Wan Sas Presen

“Ol pikinini ya blong yumi, hemia wan presen we Hae God i givim long yumi, wan gudfala samting we hem i givim blong leftemap yumi.”​—OL SAM 127:3.

1. ?OIsem wanem faswan pikinini i kam long wol?

 FASIN we Jeova God i putum long faswan man mo woman, i mekem rod blong plante narafala merikel oli save kamaot. Tingbaot: Wan haf blong Adam i joen wetem wan haf blong Iv, nao i gru insaed long bel blong Iv gogo i kam wan pikinini​—hemia faswan bebi long wol. (Jenesis 4:1) Kam kasem tede, yumi sapraes bigwan long nambawan fasin ya we pikinini i save gru long bel blong mama blong hem mo i save bon i kam long wol ya. Plante man oli talem se hemia wan merikel stret.

2. ?From wanem wok we i gohed insaed long woman we i gat bel i wan merikel stret?

² Faswan sel * we man mo woman i mekem taem tufala i slip tugeta, i tekem 270 dei blong kam wan bebi we i gat plante milian sel long hem. Insaed long faswan sel ya, i gat ol nambawan save we sel ya i nidim blong wokem 200 defren kaen sel bakegen. Ol man oli no naf blong kasem save long ol nambawan save ya. !Long tingting blong olgeta, i wan samting blong sapraes nomo! !Wan sel i save wokem ol narafala sel ya long fasin we i stretgud olgeta mo folem stret oda we i nidim blong mekem wan laef man!

3. ?From wanem plante man oli agri se God nao i mekem we pikinini i bon i kam long wol ya?

³ ?Yu ting se hu nao i rili mekem bebi ya? Yes, God nomo i Stamba blong laef. Man we i raetem wan Sam long Baebol, i singsing se: “Yumi mas tingbaot we Hae God [Jeova], hem i God. Hem nomo i mekem yumi.” (Ol Sam 100:3) Ol papa mama, yufala i savegud se i no from wan spesel paoa blong yufala we yufala i wokem sas pikinini ya we yufala i holem long han blong yufala. God ya we i gat olgeta waes, hem nomo i naf blong mekem wan merikel olsem. Long plante taosen yia we i pas finis, ol man we oli yusumgud tingting blong olgeta oli presem Bigfala Man we i Wokem Olgeta Samting from pikinini we i gru insaed long bel blong mama blong hem. ?Olsem wanem? ?Yu tu yu presem God from merikel ya? ​—Ol Sam 139:​13-16.

4. ?Wanem slak fasin blong sam man we Jeova i no save gat?

⁴ ?Olsem wanem? ?Jeova i mekem samting ya i kamaot olsem nomo, sem mak long ol narafala wok we bodi i mekem? ?Filing blong hem i joen long bisnes ya? I tru se sam man oli no mekem samting wetem filing, be Jeova i no olsem. (Ol Sam 78:​38-40) Ol Sam 127:3 i talem se: “Ol pikinini ya blong yumi, hemia wan presen we Hae God i givim long yumi, wan gudfala samting we hem i givim blong leftemap yumi.” Naoia bambae yumi tokbaot presen ya mo samting we presen ya i soemaot long yumi.

Presen Mo Gudfala Samting

5. ?Olsem wanem pikinini i olsem wan presen?

⁵ Wan presen i wan gudfala samting we wan man i givim long narafala man. Ol papa mama oli wok strong blong hivimap sam samting we oli save givim olsem presen long ol pikinini blong olgeta. Maet oli hivimap mane, graon, no sam narafala sas samting bakegen. Nating se oli hivimap wanem, be presen ya i blong soemaot se oli lavem ol pikinini blong olgeta. Baebol i talem se God i givim ol pikinini olsem wan presen long papa mama blong olgeta. Presen ya i soemaot se God i lavem yumi. ?Ol papa mama, fasin blong yufala i soemaot se yufala i tingbaot ol pikinini blong yufala olsem wan presen we i kam long God ya we i wokem heven mo wol?

6. ?From wanem God i mekem se ol man mo woman oli save gat pikinini?

⁶ Jeova i givim presen ya blong mekem se wol i kam fulap long ol pikinini blong Adam mo Iv.  (Jenesis 1:​27, 28; Aesea 45:18) Jeova hem wan i no wokem ol wanwan man, olsem hem i mekem long ol milian enjel. (Ol Sam 104:​4, NW; Revelesen 4:11) God i jusum blong givim wan bodi long man mo woman we i naf blong wokem ol pikinini we oli luk olsem tufala mo oli gat fasin olsem tufala. !Ol mama papa oli gat nambawan blesing ya blong bonem ol niufala laef samting mo blong lukaotgud long olgeta! ?Ol papa mama, yufala i talem tangkiu long Jeova from we hem i mekem rod blong yufala i save kasem sas presen ya?

Eksampol Blong Jisas i Tijim Yumi

7. ?Olsem wanem fasin blong Jisas blong soem intres mo sore long ‘ol pikinini blong ol man’ i defren long fasin blong sam papa mama?

⁷ Sore tumas, i no olgeta papa mama evriwan we oli ting se pikinini i wan gudfala samting we i leftemap olgeta. Plante papa mama oli no gat sore nating long ol pikinini blong olgeta. Olgeta ya oli no folem fasin blong Jeova mo Pikinini blong hem. (Ol Sam 27:10; Aesea 49:15) Tingbaot fasin blong Jisas blong intres long ol pikinini. Baebol i talem se, taem Jisas i no kamdaon long wol yet, taem i stap long heven olsem wan spirit man we i gat bigfala paoa, be hem i “hapi tumas blong luk [“ol pikinini blong,” NW ] ol man.” (Ol Proveb 8:31) Hem i lavem tumas ol man, mekem se hem i rere blong givim laef blong hem blong pem rod blong olgeta, blong oli save kasem laef blong olwe.​—Matiu 20:28; Jon 10:18.

8. ?Olsem wanem Jisas i givim gudfala eksampol long ol papa mama?

⁸ Taem Jisas i stap long wol, hem i givim wan nambawan eksampol long ol papa mama. Tingbaot olsem wanem Jisas i tektaem blong joen wetem ol pikinini, nating se maet hem i bisi tumas no tingting blong hem i trabol. Hem i tektaem blong wajem ol pikinini we oli stap pleplei long maket ples, mo hem i yusum sam fasin blong ol pikinini ya long ol tijing we hem i givim long ol man. (Matiu 11:​16, 17) Long laswan taem we Jisas i wokbaot i go long Jerusalem, hem i save se bambae hem i mas safa mo i mas ded. Taswe taem ol man oli karem ol pikinini blong olgeta i kam long hem, ol disaepol blong hem oli traem blokem olgeta. Maet oli mekem olsem from we oli save se tingting blong Jisas i trabol, ale oli no wantem se ol pikinini ya oli mekem noes. Be Jisas i tok long ol disaepol ya. Hem i soem se hem i “hapi tumas” blong luk ol smosmol pikinini ya, i se: “!Yufala i no blokem ol pikinini ya! Yufala i letem olgeta oli kam long mi.”​—Mak 10:​13, 14.

9. ?From wanem ol samting we yumi mekem i moa impoten i bitim ol samting we yumi talem?

⁹ Eksampol blong Jisas i save tijim yumi. ?Taem ol pikinini oli kam luk yu, maet long taem we yu bisi, yu yu mekem wanem? ?Yu mekem olsem Jisas? Ol pikinini oli nidim samting ya we Jisas i givim​—oli nidim we narafala i spenem taem wetem olgeta mo lesin long olgeta. Oli nidim moa we papa mama blong olgeta i mekem samting ya. I tru, ol tok olsem “mi mi lavem yu” oli impoten. Be ol tok ya i no gat bigfala paoa olsem ol samting we yu yu mekem. Yumi soemaot lav tru long ol toktok blong yumi, be yumi soemaot lav moa tru long ol samting we yumi mekem. Hemia ol samting olsem taem blong yumi we yumi spenem wetem olgeta, fasin blong lesingud long olgeta, mo ol samting we yumi mekem blong lukaotgud long olgeta. Be nating se yufala i mekem ol samting ya, maet yufala i no luk gudfala frut i kamaot, no maet i no kamaot kwik olsem yufala i wantem. Yufala i mas gat longfala tingting. Blong lanem fasin ya, yumi mas folem fasin we Jisas i mekem long ol disaepol blong hem.

Longfala Tingting Mo Lav Blong Jisas

10. ?Jisas i mekem wanem blong tijim ol disaepol blong hem se oli mas gat tingting daon? ?Olgeta oli kwik blong lanem fasin ya?

¹⁰ Jisas i savegud wan slak fasin blong ol disaepol blong hem se oli wantem kam hae moa long narafala. Wan dei Jisas mo ol disaepol blong hem oli kamtru long Kapaneam, nao hem i askem long olgeta se: “ ‘?Wanem samting ya we yufala i stap rao from long rod?’ Be olgeta oli no save ansa long hem, from we long rod, oli stap rao se hu long olgeta i hae moa.”  Jisas i no tok raf long olgeta blong stretem olgeta, be hem i soem longfala tingting. Hem i yusum wan pikinini olsem wan eksampol, blong tijim olgeta se oli mas gat tingting daon. (Mak 9:​33-37) ?Olsem wanem? ?Oli lanem fasin ya? Oli no kwik blong lanem. Sikis manis biaen, Jemes mo Jon tufala i sanem mama blong tufala i go luk Jisas blong askem long hem blong i givim nambawan posisen long tufala long Kingdom blong hem. Bakegen Jisas i gat longfala tingting mo i stretem olgeta long gudfala fasin.​—Matiu 20:​20-28.

11. (a) ?Wanem wok we ol aposol blong Jisas oli no mekem taem oli mit long wan rum antap long wan haos? (b) ?Jisas i mekem wanem? ?Biaen ol aposol oli folem fasin blong hem no nogat?

¹¹ Smoltaem biaen, Jisas i joen wetem ol aposol blong hem blong mekem lafet blong Pasova, hemia long yia 33 K.T. Taem oli mit long wan rum antap long wan haos, i no gat wan long ol 12 aposol ya we oli girap mo wasem leg blong ol narafala. Hemia wan wok we man blong wok no haos gel i stap mekem long ol man we oli kam long haos, wan wok we i daon we i daon. (1 Samuel 25:41; 1 Timoti 5:10) !Ating Jisas i harem nogud tumas taem hem i luk we ol disaepol blong hem oli wantem yet blong kam hae moa long narafala! Ale, Jisas nao i girap i wasem leg blong olgeta evriwan. Biaen hem i toktok long olgeta long kaen fasin, i talem se olgeta tu oli mas mekem wok blong narafala olsem we hem i jes mekem blong olgeta. (Jon 13:​4-17) ?Olsem wanem? ?Oli folem eksampol ya blong Jisas? Baebol i talem se long sem naet ya nomo “oli rao from tingting ya se hu nao i hae moa.”​—Luk 22:24.

12. ?Olsem wanem ol papa mama oli save folem fasin blong Jisas taem oli tijim ol pikinini blong olgeta?

¹² Ol papa mama, taem ol pikinini blong yufala oli no folem advaes blong yufala, ating yufala i kasem save long filing blong Jisas. Be makemgud se Jisas i no lego ol aposol blong hem we oli slo blong stretem ol slak fasin blong olgeta. Sloslo, longfala tingting blong hem i karem frut. (1 Jon 3:​14, 18) Ol papa mama, yufala i mas folem lav mo longfala tingting blong Jisas, yufala i mas gohed nomo blong traehad blong tijim ol pikinini blong yufala.

13. ?From wanem papa mama i no mas tok strong long pikinini we i askem kwestin long tufala?

¹³ Ol pikinini oli mas haremsave se papa mama blong olgeta i lavem olgeta mo i intres long olgeta. Jisas i wantem save wanem i stap long tingting blong ol disaepol blong hem, ale hem i lesingud taem oli askem kwestin long hem. Mo hem i askem kwestin long olgeta tu, blong faenemaot tingting blong olgeta. (Matiu 17:​25-27) Tru ya, wan gudfala tija i lesingud mo i rili intres long studen blong hem. Ol papa mama oli mas blokem fasin ya blong tok strong long pikinini we i askem kwestin long olgeta, oli no mas talem se: “!Yu gowe! ?Yu no luk se mi mi bisi?” Sipos tufala i rili bisi, tufala i mas talem long pikinini se bambae tufala i tokbaot bisnes ya wetem hem biaen. Nao tufala i mas meksua se tufala i tokbaot bisnes ya. Olsem nao, pikinini bambae i haremsave se papa mama blong hem tufala i rili intres long hem, nao bambae hem i no save fraet blong tokbaot sam samting wetem tufala.

14. ?Olsem wanem eksampol blong Jisas i tijim ol papa mama blong soemaot lav long ol pikinini blong olgeta?

¹⁴ ?I stret we papa mama i putum han blong tufala i goraon long pikinini mo holem hem blong soem se tufala i lavem hem? Bakegen, eksampol blong Jisas i save tijim ol papa mama. Baebol i talem se Jisas i “putum han blong hem i goraon long ol pikinini ya, mo i putum han blong hem long olgeta, i blesem olgeta.” (Mak 10:16) ?Yu ting se ol pikinini ya oli glad? !Yes, lav we Jisas i soem long olgeta i tajem hat blong olgeta nao oli wantem stap klosap long hem! Ol papa mama, sipos yufala i rili lavem ol pikinini blong yufala mo yufala i soemaot lav ya long olgeta, bambae oli glad moa blong lesin taem yufala i stretem olgeta mo tijim olgeta.

 ?Spenem Hamas Taem Wetem Pikinini?

15, 16. ?Wanem tingting long saed blong tijim pikinini we samfala oli leftemap? ?From wanem oli leftemap tingting ya?

¹⁵ Samfala oli talem se maet ol papa mama oli no nidim blong spenem plante taem mo soemaot plante lav long ol pikinini blong olgeta. Sam man oli leftemap wan tingting long saed blong tijim pikinini, se i no impoten blong spenem plante taem wetem pikinini, be i moa impoten blong yusumgud smoltaem we yumi gat wetem pikinini. Oli ting se papa mama i no nidim blong spenem plante taem wetem pikinini, nomo se tufala i mas tingting gud fastaem mo mekem plan olsem wanem blong yusumgud smoltaem we tufala i gat, nao bambae pikinini i haremgud tumas long sot taem ya. ?Olsem wanem? ?Tingting ya i stret? ?Ol man oli leftemap tingting ya blong mekem i gud moa long pikinini no olsem wanem?

¹⁶ Wan man we i raetem buk, i toktok fastaem wetem plante pikinini, nao oli talem long hem se samting we oli “wantem moa, hemia blong papa mama blong olgeta i spenem moa taem wetem olgeta,” mo blong “tufala i lesin fulwan taem oli toktok long tufala.” Profesa blong wan kolej i talem wan impoten poen, i se: “Ol papa mama we oli leftemap tingting ya [yusumgud smoltaem] oli stap mekem eskius nomo from we oli no spenem naf taem wetem ol pikinini blong olgeta. Oli wantem harem se i stret we oli spenem smoltaem nomo wetem ol pikinini blong olgeta.” ?Ale, i stret we ol papa mama oli spenem hamas taem wetem ol pikinini blong olgeta?

17. ?Ol pikinini oli nidim we papa mama blong olgeta i mekem wanem?

¹⁷ Baebol i no talem stret. Be loa blong God i talem long ol papa mama long Isrel bifo se oli mas toktok long pikinini blong olgeta taem oli stap long haos, taem oli wokbaot, taem oli go blong slip, mo taem oli girap bakegen. (Dutronome 6:7) Loa ya i soemaot klia se ol papa mama oli mas toktok oltaem wetem pikinini blong olgeta mo tijim pikinini evri dei.

18. ?Olsem wanem Jisas i tekem evri janis blong tijim ol disaepol blong hem? ?Ol papa mama oli save lanem wanem from?

¹⁸ Jisas i tekem janis blong tijim ol disaepol blong hem taem hem i stap kakae wetem olgeta, wokbaot wetem olgeta, mo taem oli stap wanples blong spel. Hem i tekem evri janis blong tijim olgeta. (Mak 6:​31, 32; Luk 8:1; 22:14) Long sem fasin, ol Kristin papa mama oli mas tekem evri janis blong wokem mo holemtaet fasin ya blong storian gud wetem ol pikinini blong olgeta mo blong tijim olgeta long ol rod blong Jeova.

?Wanem Tijing Mo Oli Mas Tij Olsem Wanem?

19. (a) ?Ating yu yu stap spenem taem wetem ol pikinini blong yu, be wanem moa we yu mas mekem? (b) ?Ol papa mama oli mas tijim ol pikinini blong olgeta long saed blong hu fastaem?

¹⁹ Ating yu yu stap spenem taem wetem ol pikinini blong yu mo yu stap tijim olgeta. Be hemia i no naf yet. Narafala samting we i impoten, hemia tijing we yu givim long olgeta. Baebol i talem wanem tijing we yu mas givim i se: “Ol tok ya we mi mi stap givim long yufala tede . . . yufala i mas tijim ol pikinini blong yufala long hem [“putum i stap long hat blong ol pikinini blong yu,” NW ].” ?Wanem “ol tok ya” we yu yu mas tijim ol pikinini blong yu long hem? Hemia ol tok we i stap long vas 5, se: “Yufala i mas lavem [Jeova] long olgeta tingting blong yufala,  mo long olgeta laef blong yufala, mo long olgeta paoa blong yufala.” (Dutronome 6:​5-7) Jisas i talem se loa ya i hae moa long ol narafala loa blong God. (Mak 12:​28-30) Taswe, fastaem, ol papa mama oli mas tijim ol pikinini blong olgeta long saed blong Jeova, mo oli mas eksplenem from wanem i stret we oli lavem hem long olgeta laef blong olgeta mo we oli mekem ol fasin we hem nomo i wantem.

20. ?God i talem long ol papa mama bifo blong oli tijim ol pikinini blong olgeta long wanem samting?

²⁰ Be “ol tok ya” we ol papa mama oli mas tijim pikinini long hem, oli no long saed blong lavem God long olgeta tingting, laef, mo paoa blong olgeta nomo. Long Dutronome japta 5, Moses i talem bakegen ol loa we God i bin raetem long ston​—hemia Tenkomanmen. Sam long ol loa ya oli talem se man i no mas giaman, i no mas stil, i no mas kilim man i ded, mo i no mas slip wetem woman blong narafala man. (Dutronome 5:​11-22) Ol tok ya i makemgud long tingting blong ol papa mama bifo se oli mas tijim ol pikinini blong olgeta blong folem ol gudfala fasin long laef. Tede tu, ol Kristin papa mama oli mas givim semfala tijing long ol pikinini blong olgeta sipos oli wantem givhan long olgeta blong oli stapgud mo oli gat wan hapi laef.

21. ?I minim wanem se ol papa mama oli mas ‘putum tok blong God i stap long hat’ blong ol pikinini blong olgeta?

²¹ Makemgud olsem wanem ol papa mama oli mas tijim ol pikinini blong olgeta long “ol tok ya” no ol loa ya: “Yu mas putum i stap long hat blong ol pikinini blong yu.” (NW ) Mining blong tok ya “putum i stap long hat” se “oli mas talem ol tok no ol advaes bakegen mo bakegen blong tijim mo makem long tingting blong pikinini: oli mas pulum pikinini wetem tok ya mo oli mas putum i stapgud long tingting blong hem.” Ale, God i stap talem long ol papa mama se oli mas gat wan program blong tijim ol pikinini blong olgeta long Baebol, mo bigfala tingting biaen long program ya i blong putum ol samting long saed blong spirit i stap long tingting blong ol pikinini blong olgeta.

22. ?Ol papa mama long Isrel oli mas mekem wanem blong tijim ol pikinini blong olgeta? ?Wanem mining blong tok ya?

²² Blong stanemap mo folem wan program olsem, ol papa mama oli nidim strong tingting mo fasin traehad. Baebol i talem se: “Yufala i mas fasem ol tok ya [mo ol loa blong God] long han blong yufala, mo long fored blong yufala, blong yufala i save tingbaot olgeta oltaem. Mo yufala i mas raetem olgeta long tufala  pos blong doa blong ol haos blong yufala, mo long ol get blong yufala.” (Dutronome 6:​8, 9) Hemia i no min se ol papa mama oli mas raetem ol loa blong God long prapa doa blong haos mo long prapa get blong olgeta, mo se oli mas fasem wan kopi blong hem long prapa han blong ol pikinini blong olgeta mo long fored blong olgeta, nogat. Bigfala tingting long vas ya se oltaem ol papa mama oli mas mekem ol pikinini blong olgeta oli tingbaot ol tok blong God. Oli mas tijim ol pikinini blong olgeta oltaem, evri dei, nao bambae i olsem we ol tok blong God i stap stret long fored blong ol pikinini ya olwe.

23. ?Long nekis stadi bambae yumi tokbaot wanem?

²³ ?Wanem sam bigbigfala samting we ol papa mama oli mas tijim ol pikinini blong olgeta long hem? ?From wanem i impoten we ol papa mama tede oli tijim mo soem long ol pikinini blong olgeta olsem wanem blong protektem olgeta bakegen? ?Ol papa mama oli gat wanem samting naoia blong givhan long olgeta blong tijimgud ol pikinini blong olgeta? Long nekis stadi, bambae yumi faenem ansa blong ol kwestin ya wetem sam narafala kwestin we oli stap long tingting blong plante papa mama.

[Futnot]

?Bambae Yu Yu Ansa Olsem Wanem?

• ?From wanem ol papa mama oli mas tingbaot ol pikinini blong olgeta olsem wan sas presen?

• ?Eksampol blong Jisas i save tijim ol papa mama mo ol narafala long wanem samting?

• ?Ol papa mama oli mas spenem hamas taem wetem pikinini blong olgeta?

• ?Ol papa mama oli mas tijim ol pikinini blong olgeta long wanem samting? ?Mo oli mas tijim olgeta olsem wanem?

[Kwestin]

[Tok blong pija long pej 10]

?Ol papa mama oli save lanem wanem taem oli tingting gud long fasin blong Jisas blong tij?

[Tok blong pija long pej 11]

?Ol papa mama long Isrel bifo oli mas tijim ol pikinini blong olgeta wetaem mo olsem wanem?

[Tok blong pija long pej 12]

Oltaem ol papa mama oli mas mekem ol pikinini blong olgeta oli tingbaot ol tok blong God