Ripot Long Wok Blong Kingdom

Traem Faenem Ol Man We Oli Wantem Harem Gud Nius Long Outback Blong Ostrelia

I GAT wan bigfala eria long medel blong Ostrelia we ol manples oli singaot hem se outback. Twelef yia finis ol Witnes blong Jeova oli no moa go prij long sam ples long eria ya we i gat smol man nomo long hem. Taswe ol Witnes long bigfala taon blong Northern Territory, nem blong hem Darwin, oli mekem plan blong prij blong naen dei long eria ya, blong traem faenem ol man we oli wantem harem gud nius.​—Matiu 10:11.

Oli stat mekem plan 12 manis bifo we oli aot. Mo tu, oli mekem ol map blong eria ya we i kavremap 800,000 skwea kilometa​—hemia tri taem moa big long kantri ya Niusilan. !Blong kasem save se eria ya i bigwan olsem wanem, tingbaot se, taem yu pas long get blong go insaed long wan plantesen blong buluk, be blong kasem haos, yu mas draevem trak 30 kilometa yet! Mo maet wan plantesen i stap bitim 300 kilometa longwe long nekis plantesen.

I gat 145 Witnes we oli joen blong karem gud nius i go long ol man ya. Sam long olgeta oli kam long ol ples farawe, olsem Tasmania. Samfala oli kam long ol fo wil blong olgeta, mo oli karem ol haos tapolen blong slip long olgeta, ol pat blong trak we maet oli nidim sipos trak i brokdaon, mo bensin. Sam narafala oli kam long trak we i pulum wan kat biaen. Mo tu, ol Witnes we oli no gat ol fo wil, oli rentem tu bas we i gat 22 jea long wan. Olgeta we oli kam long tufala bas ya oli prij long ol man we oli stap long ol smosmol taon long eria ya.

Bifo we oli aot blong go, ol brata oli mekem ol tok mo pleplei blong soemaot olsem wanem blong talemaot gud nius long ol man long spesel teritori ya. Olsem nao, oli lanem se blong karem frut long ol vilej blong ol Abroijinis, oli mas folem sam rul mo oli mas save kastom blong olgeta. Oli tokbaot tu ol fasin we oli mas folem blong oli no spolem ples blong ol anamol blong bus.

Grup ya i glad blong faenem plante man we oli wantem harem gud nius. Long wan vilej blong ol Abrojinis, ol brata oli putum wan stret taem blong givim pablik tok long saed blong Baebol. Woman we i hed blong vilej ya, i goraon blong  singaot ol man oli kam long pablik tok ya. Afta, ol Witnes oli givimaot 5 buk mo 41 buklet long olgeta we oli kam lesin. Long wan narafala vilej blong ol Abrojinis, oli mitim wan man we hem i gat prapa Baebol blong hem, hemia King James Version. Be Baebol ya i olfala mo ol pej blong hem oli brobrok. Taem oli askem long man ya sipos hem i save nem blong God, hem i talem yes. Nao hem i pusum han blong hem i go long poket blong kot blong hem, i pulumaot wan olfala Wajtaoa. Hem i ridimaot sam tok long magasin ya we i talem vas blong Mak 12:30. Vas ya i se: “Yufala i mas lavem Hae God ya [Jeova] we i God blong yufala long olgeta hat blong yufala.” Nao man ya i talem se: “Mi mi laekem tumas vas ya.” Oli storian longtaem wetem hem long saed blong Baebol, mo hem i karem wan niufala Baebol wetem sam narafala buk we oli eksplenem Baebol.

Klosap long Gulf blong Carpentaria, ol Witnes oli storian wetem bos blong wan plantesen blong buluk we i kavremap 400,000 hekta graon. Man ya i laekem tumas gud nius blong Kingdom we hem i harem. Oli soem long hem tufala buk ya My Book of Bible Stories mo Save Blong Lidim Yu Long Laef We i No Save Finis, * nao hem i askem sipos oli gat sam buk long lanwis Kriol. Oli sapraes long kwestin ya from we plante Abrojinis oli save toktok lanwis ya, be oli no save ridim. Be oli jes faenemaot biaen se 50 wokman long plantesen ya oli save ridim lanwis ya Kriol. Bos i haremgud tumas blong kasem ol buk long lanwis Kriol, mo hem i glad blong givim telefon namba blong hem long ol Witnes blong oli save ring long hem.

Long ol naen dei blong hadwok ya blong prij long ol man long bigfala eria ya, ol Witnes oli givimaot 120 Baebol, 770 buk, 705 magasin, mo 1,965 buklet. Mo tu, oli gobak bakegen blong luk 720 long ol man ya, mo oli stat blong stadi Baebol wetem 215 long olgeta.

Tru ya, plante man long bigfala eria ya, fastaem oli hanggri from trutok, be naoia oli haremgud blong kasem gud nius ya we oli wantem tumas.​—Matiu 5:6.

[Futnot]

[Map blong pija long pej 30]

(Lukluk niuspepa)

OSTRELIA

Darwin

Gulf blong Carpentaria

NORTHERN TERRITORY

Sydney

TASMANIA