Wan Kwestin

?Wan Kristin i save givim presen no mane long wan man blong gavman from wok we hem i mekem blong hem, no fasin ya i olsem kruked fasin?

Long evri ples we ol Kristin oli stap long hem, oli mas waes oltaem, taem oli stap dil wetem ol trabol blong ples we oli stap long hem. Oli mas rimemba se samting we loa blong wan kantri i agri long hem maet long nara kantri sem samting ya nomo, be loa i no agri long hem. (Ol Proveb 2:​6-9) Yes, wan Kristin i mas tingbaot oltaem se eniman we i wantem ‘go long haos tapolen blong Jeova’ i mas sakemaot kruked fasin.​—Ol Sam 15:​1, 5; Ol Proveb 17:23.

?Wanem ya kruked fasin? The World Book Encyclopedia i talem se, “kruked fasin i minim we man i givim wan samting we i sas long wan . . . hae man we ol man oli trastem hem, nao hae man ya i no mekem wok blong hem long fasin we i stret, no i brekem loa blong mekem i gud long man we i givim sas samting ya long hem.” Taswe, long eni ples we man i stap, sipos man i givim mane no wan presen long wan jaj no wan polisman blong pulum hem blong twistim loa, no i givim mane long wan man blong gavman blong hem i haedem wan rabis fasin no wan wok we i go agensem loa, hemia wan kruked fasin ya. Mo sipos wan man i givim wan presen long wan nara man blong pulum man ya blong mekem i gud moa long hem, hemia wan kruked fasin tu. Olsem, maet i gat wan lis blong ol nem, ale wan man i givim mane long hemia we i lukaot long lis ya blong i putum nem blong hem i faswan long lis, no maet i gat wan longfala laen blong ol man oli stap wet long wan samting, ale wan we i stap biaen i givim mane long narawan blong i letem hem i go fastaem long ol narafala. Fasin ya i soemaot klia we man ya i no gat lav.​—Matiu 7:12; 22:39.

?Be olsem wanem? ?Hem i wan kruked fasin tu sipos yumi givim wan presen no wan mane long wan man blong gavman blong hem i mekem wan gudfala wok no blong blokem ol fasin we i no stret? Long sam ples, maet ol man blong gavman oli no letem pikinini i go long skul, no oli no wantem se wan sikman i slip long hospital, no oli no wantem saenem wan pepa, kasem taem we narafala i givim wan mane long olgeta. Maet oli slo blong wokem ol pepa olsem ol pemit blong stap long kantri.

Wanwan kantri i gat defren tingting long fasin ya blong givim mane long ol man blong gavman from wok blong olgeta. Long ol ples we fasin ya blong givim mane i wan kastom blong olgeta, no oli stap wet blong kasem mane olsem tu, sam Kristin maet oli harem se sipos fasin ya i no brekem loa blong kantri ya, oli no brekem ol loa blong Baebol tu. Ale, oli givim mane blong soem tangkiu long wan man blong gavman from wok blong hem mo blong givhan long hem blong kamgud moa long wok blong hem. Long sam ples, ol man oli save luk ol mane ya olsem wan presen blong givhan long wan man blong gavman blong kasem moa mane, antap long smol mane we hem i stap kasem. Yumi mas tingbaot se fasin ya blong givim wan presen no mane blong man i mekem wan gudfala wok i defren long fasin ya blong givim wan presen no mane long man blong i mekem wan kruked fasin.

Samtaem, taem ol man blong gavman, olgeta we oli wok long kastom dipatmen, no sam narafala man bakegen oli askem mane blong mekem wok we i folem loa, sam Witnes blong Jeova oli no wantem givim mane long olgeta. Samtaem ol manples oli savegud we ol Witnes oli gat stret fasin mo oli tok tru, ale oli mekem i gud long olgeta mo oli no askem mane long olgeta olsem we oli mekem long ol narafala man.​—Ol Proveb 10:9; Matiu 5:16.

Wanwan man blong Jeova i mas tekem disisen hem wan sipos hem i wantem givim mane long wan man blong gavman blong mekem wan wok we i folem loa no blong blokem wan fasin we i no stret. Be, samting we i impoten, se oltaem nomo wan man blong Jeova i mas folem rod we tingting blong hem i no jajem hem from, we i no spolem nem blong Jeova, mo we i no mekem narafala i foldaon.​—Matiu 6:9; 1 Korin 10:​31-33; 2 Korin 6:3; 1 Timoti 1:5.