Halpem Ol Man Long Masedonia

“PLIS yu kamkros long Masedonia, yu givhan long mifala.” (Ol Wok 16:9) Long wan vison, aposol Pol i luk wan man we i talem ol toktok ya long hem. Toktok ya i soemaot se i nidim man blong talemaot gud nius blong Kingdom blong God long wan niufala teritori, hemia long ol taon we tede oli mekemap kantri blong Gris.

Yes. Long Masedonia blong tede, i gat 1 Witnes blong Jeova nomo long evri 1,840 man. Plante man oli neva harem wan man i tokbaot Jeova God. I klia we ol man long kantri ya oli nidim tumas blong harem gud nius blong pis.​—Matiu 24:14.

God i openem wan rod blong halpem ol man we oli nidim help long kantri ya. Long Novemba 2003, ol brata long ofis blong ol Witnes blong Jeova long Skopje oli sapraes tumas. Ol man long wan ofis we oli kolem Macedonian Center for International Cooperation i ring i kam long olgeta. Oli wantem singaotem ol Witnes oli kam long wan kaen eksibisen we bambae i stat long Novemba 20, mo i gohed blong tri dei. Ol Witnes oli save wokem wan stol blong olgeta, blong eksplenem ol bilif blong olgeta long ol man we i kam. !Hemia wan nambawan janis blong kasem plante taosen man we oli neva harem gud nius blong Kingdom!

Ol Witnes oli wokhad blong reremgud mo setemap ol defdefren buk blong olgeta long lanwis blong ol man Masedonia. Oli putum ol buk oli stap gud long tebel, blong ol man oli save tekem ol buk we oli laekem. From samting ya, plante man oli gat janis blong tekem smol wota blong laef long saed blong spirit.​—Revelesen 22:17.

Ol man we oli kam long ples ya oli laekem tumas ol buk we oli save halpem olgeta long laef blong olgeta, olsem tufala buk ya Ol Kwestin We Ol Yangfala Oli Askem​—Ol Ansa We Oli Wok Gud mo Spesel Rod Blong Mekem Famle i Hapi. * Naenti eit man oli givim adres blong olgeta, mo oli askem ol Witnes blong oli kam luk olgeta. Plante man oli toktok gud long saed blong wok we ol Witnes blong Jeova oli mekem, mo oli presem ol Witnes from ol nambawan buk we oli wokem.

Wan man i kam wetem smol boe blong hem long stol ya. Papa ya i askem sipos i gat sam buk blong ol pikinini. Ol Witnes oli soem wan buk long hem, hemia My Book of Bible Stories. * Hem i  tanem ol pej blong buk ya mo i glad long hem, nao hem i askem praes blong buk. Taem hem i harem se wok blong tij we ol Witnes blong Jeova oli mekem i stanap long presen mane nomo, hem i glad moa. (Matiu 10:8) Hem i soem buk ya long smol boe blong hem mo i talem se: “!Hemia wan naesfala buk! !Bambae Papa i ridim wan stori long yu evri dei!”

Wan tija blong Philosophy i kam long eksibisen ya. Hem i intres tumas long ol bilif blong jos, be hem i intres speseli long bilif blong ol Witnes blong Jeova. Hem i lukluk buk ya Mankind’s Search for God, * mo hem i talem se: “!Buk ya i klia nomo! Fasin we buk ya i eksplenem samting, i laenap stret wetem wanem we mi stap lukaotem.” Biaen, sam studen blong skul blong hem oli kam, mo oli askem sem buk ya we tija blong olgeta i bin karem. Oli wantem stadi long semfala buk ya. Oli ting se bambae hem i yusum buk ya long ol kos blong hem.

Eksibisen ya i givim janis long sam man blong oli harem mo ridim ol trutok blong Baebol fastaem long laef blong olgeta. Wan grup blong yangfala we sora blong olgeta i fas, oli kam lukluk stol blong ol Witnes. Wan long ol Witnes i toktok wetem olgeta, mo wan gel i tanem tok blong hem i go long saen lanwis. Hem i yusum ol pija blong buk ya Man We i Hae Moa Long Olgeta Man, * mo hem i eksplenem we bifo, Jisas i mekem ol man we oli sik wetem ol man we sora blong olgeta i fas tu, oli kamgud bakegen. Ol yangfala oli glad blong “harem” promes blong Baebol we i talem se i no longtaem, bambae Jisas i mekem olgeta man long wol oli kamgud bakegen. Plante long olgeta oli glad blong tekem sam buk we oli tokbaot Baebol, mo oli agri blong wan Witnes we i save toktok saen lanwis i go luk olgeta.

Antap long ol buk long lanwis blong ol man Masedonia, i gat sam buk long lanwis blong ol man Albania mo Teki, mo long Inglis tu. Wan man we i no toktok lanwis blong ol man Masedonia i askem sam buk long Inglis. Hem i kasem sam Wajtaoa mo Wekap! mo biaen hem i talem se hem i toktok lanwis blong Teki. !Hem i sek taem ol Witnes oli soem long hem sam buk long prapa lanwis blong hem! Hem i luksave se ol Witnes blong Jeova oli wantem halpem olgeta man.

!Tru, eksibisen ya i givim janis long ol brata blong oli serem bilif blong olgeta, mo oli haremgud tumas taem oli luk we plante man oli intres long ol trutok blong Baebol! Yes, Jeova i openem rod blong plante moa man Masedonia oli harem gud nius blong Kingdom.

[Ol Futnot]

[Bokis/Foto blong pija long pej 9]

!WAN IMPOTEN STEP!

Long Mei 17, 2003, ol Witnes oli mekem wan bigfala samting blong mekem se wok blong talemaot gud nius blong Kingdom i gohed moa. Oli openem wan niufala ofis blong ol Witnes blong Jeova long Skopje. I tekem tu yia blong mekem ofis ya i kam bigwan moa, we saes blong hem i fo taem antap long saes blong hemia blong bifo.

Long tri defren bilding, i gat ofis blong lukaot long wok, ofis blong translesen, mo ol rum blong man i slip long hem, wan kijin, mo wan rum blong wasem ol klos. Guy Pierce, wan memba blong Hed Kampani blong ol Witnes blong Jeova, i givim tok blong opening blong ol niufala haos ya. Ol fren oli kam long 10 defren kantri blong lesin long opening ya. Mo oli glad tumas blong luk ol niufala bilding ya we oli naes tumas.

[Map blong pija long pej 8]

BULGARIA

MASEDONIA

Skopje

ALBANIA

GRIS

[Tok blong pija long pej 8]

Skopje, Masedonia