Kasem Plante Save Naoia Mo Blong Olwe

ULRICH STRUNZ we i wan dokta blong Jemani, i raetem sam buk we nem blong olgeta Forever Young. Insaed long ol buk ya, hem i talem se sipos ol man oli mekem eksasaes, oli tekem gudfala kakae, mo oli gat wan fasin blong laef we i klingud, bambae helt blong olgeta i kam moagud mo bambae laef blong olgeta i longfala moa. Be hem i no promes long ol man we oli ridim ol buk blong hem, se bambae oli laef blong olwe sipos oli folem advaes blong hem.

Be i gat wan save we i givim promes ya blong laef we i no save finis. Sipos yu yu laef blong olwe, yu save gohed blong karem ol defren save gogo i no gat en blong hem. Jisas i prea long God se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Fastaem, yumi mas save mining blong tok ya ‘laef we i no save finis,’ nao biaen, yumi mas faenemaot wanem save ya stret mo olsem wanem yumi save kasem save ya.

Folem tok blong Baebol, klosap nao God ya we i Wokem olgeta samting bambae i mekem wol ya i kam wan paradaes, mo bambae i givhan long ol man blong oli laef longtaem. I nidim we wan bigfala samting i hapen blong mekem Paradaes ya i kamtru, olsem Bigfala Wota ya we i klinim wol long taem blong Noa. Long Matiu japta 24, vas 37 kasem 39 (NW ), Jisas i talem se taem blong yumi i sem mak long “dei blong Noa,” we ol man oli “no wantem save” long trabol taem we oli stap long hem. Oli no wantem lesin tu long woning we Noa i stap talemaot. Nao “dei we Noa i go insaed long bigfala sip blong hem” i kam, mo Bigfala Wota i spolemgud evriwan we oli sakemaot  save ya. Noa nomo wetem olgeta we oli stap insaed long bigfala sip, oli laef.

Jisas i soemaot se long taem blong yumi, i gat wan “dei” olsem we i stap kam. Olgeta we oli lesin long save we i joen wetem taem ya, bambae oli sef, mo tu bambae oli gat hop ya blong kasem laef we i no save finis. Antap moa, ol dedman we God i tingbaot olgeta, bambae oli laef bakegen wetem hop ya blong neva ded bakegen. (Jon 5:​28, 29) Makem olsem wanem Jisas i soemaot tufala tingting ya. Taem hem i toktok long Mata long saed blong laef bakegen long ded, hem i talem se: “Man we i bilif long mi, nating we bambae i ded, hem bambae i mas laef. Mo man we i laef, i bilif long mi, hem bambae i no save ded samtaem.” Evri samting i soemaot se “dei” ya i klosap tumas, mo hemia i min se maet yu “no save ded samtaem.”​—Jon 11:​25-27.

Biaen Jisas i askem long Mata se: “?Yu bilif long tok ya blong mi?” Mata i ansa se: “Yes Masta.” ?Sipos Jisas i askem semfala kwestin ya long yu tede, bambae yu yu talem wanem? Maet yu faenem i had blong bilivim se bambae yumi no save ded samtaem. Nating sipos yu yu tingting olsem, be i sua se yu wantem bilivim tok ya. !Sipos yu “no save ded samtaem,” tingbaot olgeta samting we bambae yu save lanem! !Traem tingbaot wan taem we yu yu save haremgud blong lanem mo mekem olgeta samting we yu wantem mekem tede, be yu neva gat taem blong mekem! !Mo traem tingbaot wan taem we yu yu save joen bakegen wetem olgeta ya we yu yu laekem tumas we oli ded! ?Wanem save nao we i save mekem olgeta samting ya oli kamtru, mo olsem wanem yu save kasem save ya?

Save Ya We i Givim Laef—Yumi Naf Blong Kasem

?Olsem wanem? ?Yumi naf blong kasem save long saed blong God mo Jisas? Yes yumi naf. I tru se ol defren save long saed blong ol samting we God i wokem, oli plante tumas mo i no gat en blong olgeta. Be taem Jisas i talem se “save” i joen wetem ‘laef we i no save finis,’ hem i no stap tokbaot fasin blong stadi long ol sta no ol narafala save blong ol saentis. Ol Proveb japta 2, vas 1 mo 5 (NW ), i soemaot se ol “tok” mo “loa” we oli stap long Baebol, oli ol impoten samting long “save blong God.” Mo long saed blong Jisas, Jon 20:​30, 31 i soemaot se ol tok we oli raetem daon long Baebol oli naf blong mekem se yumi “save kasem laef.”

Taswe, save ya long saed blong God mo Jisas Kraes we i stap long Baebol nomo, hem i naf blong soemaot long yu olsem wanem blong kasem laef we i no save finis. I no gat wan narafala buk we i olsem Baebol. Wetem kaen fasin, God ya we i Wokem yumi i pusum ol man blong oli raetem tok blong hem long fasin we olgeta man, wetem olgeta ya tu we oli no skulgud, oli naf blong kasem save ya mo kasem laef we i no save finis. Long sem fasin, wan man we i kwik blong lanem samting mo we i gat plante taem mo rod blong lanem samting, oltaem bambae hem i lanem ol niufala save long saed blong Baebol. From we yu yu naf blong ridim haf ya, hemia i pruvum se yu yu naf blong lanem ol defren samting. ?Be wanem stret rod blong yusum fasin ya blong lanem samting?

Long ful wol, ol man oli luk se wan gudfala rod blong gat save ya, hemia blong oli stadi Baebol wetem wan man we i kasem save finis long Baebol. Sem mak olsem Noa bifo we i bin traehad blong givimaot save long ol man long taem blong hem, ol Witnes blong Jeova tede oli glad blong kam long haos blong yu blong storian long saed blong Baebol. Maet oli yusum smol buk ya ?Wanem Samting We God i Wantem Yumi Blong Mekem? Sipos no, ating oli yusum buk ya we nem blong hem i talem i stret nomo se, Save Blong Lidim Yu Long Laef We i No Save Finis. * Naoia ating i had long yu blong bilif se olgeta we oli stap tru  long God bambae oli laef long Paradaes long wol we oli “no save ded samtaem.” Be taem yu gohed olsem blong storian long Baebol, yu save lanem blong trastem promes ya. ?Taswe, wanem samting we yu yu mas mekem sipos yu wantem laef olwe, no sipos yu jes wantem luk se i stret blong bilivim promes ya no nogat? Yu mas akseptem janis ya blong stadi long Baebol.

?Stadi ya bambae i tekem hamas taem? I gat 16 sotfala stadi insaed long smol buk ya blong 32-pej we yumi jes tokbaot mo we i stap long plante handred lanwis. Be sipos yu yusum buk ya Save Blong Lidim Yu Long Laef We i No Save Finis, mo yu spenem samwe wan aoa long wan wik blong stadi, bambae yu nidim sam manis nomo blong lanem ol impoten poen long Baebol. Tufala buk ya oli givhan long plante man finis, blong oli gat fulap save mo blong oli wokem dip lav long God. God we i Wokem yumi bambae i blesem olgeta we oli rili lavem hem, bambae hem i mekem we oli kasem laef we i no save finis.

Yes, i gat save ya we i save givim laef, mo eni man i save kasem save ya. Ful Baebol no sam haf blong hem, i stap long bitim 2,000 lanwis. Ol Witnes blong Jeova we oli stap long bitim 235 kantri, oli glad blong givhan long yu mo blong givim ol buk long yu we oli tokbaot Baebol, blong mekem se save blong yu long saed blong Baebol bambae i kam antap moa.

Traehad Blong Stadi

Fasin fren blong yu wetem God i wan samting blong yu wetem God nomo. Yu nomo yu save mekem se fasin fren ya i gohed mo i kam strong, mo God nomo i save givim laef we i no save finis long yu. Taswe, yu mas gohed blong stadi long Tok blong hem. Blong mekem i moa isi blong holem wan stret taem blong stadi, maet i gud we yu mekem plan wetem wan man se hem i kam mekem stadi long yu.

From we Baebol mo ol buk mo magasin we oli stanap long hem oli karem “save blong God,” i stret nomo we yumi lukaotgud long ol buk ya. (Ol Proveb 2:5) Long rod ya, bambae oli stapgud blong plante yia. Sipos yu yu laef long wan kantri we i pua, maet long skul yu no bin yusum ol buk. Ating yu bin lanem ol samting nomo taem yu lesin mo luklukgud ol samting raonabaot long yu. Tingbaot kantri ya Benin we i gat bitim 50 lanwis long hem. Plante man long kantri ya oli savegud fo no faef lanwis wantaem, nating we oli neva gat wan buk long ol lanwis ya. Sipos yu yu naf blong lanem sam samting taem yu lesin, yu lukluk, mo yu yusum tingting blong yu, yu yu gat wan bigfala blesing. Be bambae yu luk se ol buk tu oli save givhan bigwan long yu taem yu stadi.

Nating sipos haos blong yu i smol tumas, be i gud sipos yu gat wan gudfala ples we yu save putum Baebol blong yu long hem mo ol buk mo magasin we oli tokbaot Baebol. Putum olgeta long wan ples we i isi blong yu yu faenem olgeta, mo we i no gat samting i save spolem olgeta.

Stadi Wetem Famle Blong Yu

Sipos yu yu wan papa no wan mama, yu mas wantem givhan long ol pikinini blong yu blong oli kasem sem save ya we yu yu stap lanem. Long ol pua kantri, ol papa mama oli tijim pikinini blong olgeta blong oli save mekem ol defren wok blong evri dei. Maet ol wok ya hemia kuk, katem faea wud, kasem wota, wokem garen, kasem fis, mo salem samting long maket. Ol samting ya we oli lanem oli rili givhan long olgeta blong stap laef. Be plante papa mama oli no stap tijim ol pikinini blong olgeta long save ya we i moa impoten, hemia save blong lidim olgeta i go long laef we i no save finis.

Nomata se laef blong yu i olsem wanem, be maet yu harem se yu no gat taem. God ya we i wokem yumi, hem i kasem save long samting ya tu. Makem wanem samting hem i bin talem long saed blong fasin blong tijim ol pikinini long ol rod blong hem: “Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.” (Dutronome 6:7) Folem ol tingting ya, i gud we yu traem blong mekem wan program blong yu blong tijim pikinini, olsem hemia biaen:

1. ‘Taem yufala i stap long haos’: Traehad blong stadi Baebol wetem ol pikinini blong yu taem yufala i stap long haos, maet evri wik, olsem we wan i bin mekem long yu. Ol Witnes blong  Jeova oli stap givimaot ol buk we oli stanap long Baebol, we oli stret blong tijim ol pikinini nomata wanem yia blong olgeta.

2. ‘Taem yufala i stap wokbaot’: Toktok long ol pikinini blong yu long isi fasin long saed blong Jeova, olsem we yu tijim olgeta long isi fasin long saed blong ol impoten samting long laef, no yu givim advaes we i save lidim olgeta.

3. ‘Taem yufala i go blong slip’: Prea evri naet wetem ol pikinini blong yu.

4. ‘Taem yufala i girap bakegen’: Plante famle oli luk se i givhan bigwan long olgeta taem oli ridim wan vas blong Baebol tugeta evri moning. Blong mekem olsem, ol Witnes blong Jeova oli yusum smol buk ya Ridimgud Ol Tok Blong Baebol Evri Dei. *

Long ol kantri we oli pua, plante papa mama oli traehad blong mekem se wan long ol pikinini blong olgeta i kasem gudfala edukesen long skul. Long rod ya, pikinini ya bambae i naf blong lukaotgud long papa mama blong hem taem tufala i kam olfala. Be sipos yu stadi long Baebol mo yu givhan long ol pikinini blong yu blong oli mekem sem mak, bambae yufala i kasem save ya we i save givhan long yu mo ful famle blong yu blong laef olwe.

?Olsem wanem? ?Wan dei bambae yumi save evri samting? Nogat. Taem wol blong yumi i stap tantanem hem i goraon long ol ples long yunivas ya we i no gat en blong hem, bambae yumi gohed nomo blong lanem plante samting. Yes, Prija 3:11 (NW ) i talem se: “Olgeta samting, hem [God] i wokem oli naes long stret taem blong olgeta. Laef we i no save finis hem i putum long hat blong olgeta, blong bambae olgeta man oli no save faenemaot olgeta wok we trufala God i mekem, long stat blong olgeta i go kasem en blong olgeta.” Yumi harem gud blong kasem plante save, mo bambae yumi harem gud long samting ya blong olwe.

[Ol Futnot]

[Tok blong makem poen long pej 5]

“Laef ya [we i no save finis] i min se man i save yu . . . ”

[Tok blong pija long pej 7]

Halpem famle blong yu blong oli kasem plante save naoia mo blong olwe