Wan Kwestin

?From wanem Pol i talem long fored blong Sanhedrin se: “Mi mi wan Farisi”? ?Hem i haedem Kristin bilif blong hem blong mekem ol Farisi oli glad long hem?

Blong kasem save long tok ya blong Pol long buk blong Ol Wok 23:​6, yumi mas ridim ol vas we oli stap raonabaot.

Afta we wan grup blong ol man Jiu long Jerusalem oli agensem Pol, Pol i toktok long ol man ya. Hem i talem se: “Mi gruap long ples ya, long Jerusalem, mi skul long nambawan tija ya Gamaliel. Hem i tijimgud mi long Loa ya blong ol olfala blong yumi, blong mi holemstret.” I tru se blong smoltaem, ol man ya oli lesin long ol tok we Pol i talem be biaen oli kam kros bakegen. Ale wan komanda blong ol soldia, wetem ol soldia blong hem oli tekem Pol i go insaed long barik. Taem oli wantem wipim Pol, Pol i talem se: “!E! Mi mi sitisen blong Rom ya. Yufala i no jajem mi yet. ?Olsem wanem yufala i wantem wipim mi?”​—Ol Wok 21:27–22:29.

Long nekis dei, komanda ya i tekem Pol i go long kaonsel blong ol man Jiu we nem blong hem Sanhedrin. Pol i lukluk gud ol memba blong kaonsel ya mo hem i luk we ol Sadusi mo ol Farisi nomo oli mekemap kaonsel ya. Nao hem i talem long olgeta i se: “Ol brata. Mi mi wan Farisi, mo papa blong mi mo ol bubu blong mi, olgeta tu oli Farisi. Be olgeta ya oli wantem traem mi long ples ya tede, from we mi mi putum tingting blong mi long tok ya blong yumi we i talem se man we i ded, bambae i save laef bakegen.” Taem hem i talem tok ya, wantaem nomo ol Farisi mo ol Sadusi oli rao, “from we ol Sadusi oli stap talem se ol dedman oli no save laef bakegen. Mo oli stap talem se i no gat enjel, mo i no gat spirit tu. Be ol Farisi oli bilif se trifala samting ya i tru ya.” Samfala man we oli joen long grup blong ol Farisi, oli girap oli talemaot strong se: “Mifala i no faenem sam poen long man ya nating.”​—Ol Wok 23:​6-10.

Ol memba blong Sanhedrin oli no save bilivim tok blong Pol se hem i wan Farisi from we ol man long taem ya oli savegud we Pol i wan Kristin man we i wok strong. Ol Farisi we oli stap jajem Pol oli no save agri long wan Farisi we i no bilif long olgeta tijing blong olgeta. Taswe, toktok blong Pol se hem i wan Farisi, i mas gat stret mining blong hem. Mo ol Farisi we oli stap long taem ya, ating oli kasem save mining blong tok ya blong Pol folem olgeta samting we hem i talem finis.

Taem Pol i talem se oli jajem hem from we hem i bilif se man we i ded bambae i save laef bakegen, i klia we Pol i wantem soem se long saed blong bilif ya hem i sem mak long ol Farisi. Nating se ol man oli agiu long saed blong bilif ya, be bilif blong Pol long saed blong laef bakegen i sem mak long bilif blong ol Farisi be i defren long bilif blong ol Sadusi from we ol Sadusi oli no bilif long laef bakegen long ded.

Sam long ol bilif blong Pol we i wan Kristin oli no agensem bilif blong ol Farisi long saed blong laef bakegen long ded, ol enjel mo sam haf blong Loa. (Filipae 3:5) Taswe, Pol i save talem se hem i wan Farisi from ol bilif ya nomo mo samting ya i mekem se ol memba blong Sanhedrin oli kasem save ol tok blong hem. Taswe, Pol i yusum save we hem i gat olsem man Jiu blong toktok long ol man blong hae kot blong ol man Jiu ya we oli stap jajem sam man long fasin we i gud moa i bitim narafala.

Nating se i olsem, yumi luksave se Pol i no lego bilif blong hem blong mekem ol man oli glad long hem, from we Jeova i gohed nomo blong yusum hem. Long naet afta we Pol i talem tok ya se hem i wan Farisi, Jisas i talem long hem se: “Yu no fraet. Yu yu talemaot mi finis long ples ya long Jerusalem, mo bambae long Rom yu mas mekem olsem bakegen.” God i glad long Pol, taswe yumi save talem se Pol i no talem tok ya blong haedem Kristin bilif blong hem blong mekem narafala man i glad.​—Ol Wok 23:11.