Ded i Save Hapen Kwiktaem Nomo

OWEN i wan smol boe we i gat tu yia haf blong hem. Hem i stap pleplei long ples blong swim long haos blong hem. Ale hem i faenem rod blong klaem i go kasem wan kabod we oli stap putum ol meresin long hem. Papa mama blong hem oli ting se kabod ya i hae tumas, neva bambae Owen i save kasem. Be Owen i kasem kabod ya, mo i luk wan botel we i pulum ae blong hem. Hem i openem botel ya mo i dring wota we i stap insaed. Bigfala trabol i kamaot.

Wota insaed long botel ya oli kolem asid, hem i wan konkon wota we i save kakae skin. Sore tumas asid ya i kilim smol Owen i ded. Papa mama blong hem oli harem nogud bigwan. Papa blong hem, nem blong hem Percy, i go luk lida blong jos blong hem blong harem sam gudfala toktok. Hem i askem se: “?From wanem samting ya i hapen?” Lida blong jos i ansa se: “God i [tekem Owen from we hem i] wantem wan smol enjel long heven.” Hat blong papa ya i soa we i soa bigwan. Hem i harem se i no stret nating we God i mekem fasin ya. ?Be i tru se God nao i mekem trabol ya i kamaot? Tingting blong Percy i foldaon olgeta, hem i no moa wantem go long jos blong hem.

Taem Percy i stap tingbaot wanem we i bin hapen, hem i wantem save se: ‘?Smol boe blong mi i stap safa yet? ?Bambae mi save luk hem bakegen samtaem?’

Ating yu tu yu wantem save wanem i hapen long man taem hem i ded mo sipos yu save luk bakegen ol fren mo famle blong yu we oli ded. Tok blong God, Baebol, i givim save long saed ya. Baebol i givim ol ansa we oli klia mo we oli leftemap tingting blong olgeta we oli fesem trabol olsem. Be samting we i moagud yet se, Baebol i talemaot nambawan hop ya we God i givim se ol dedman bambae oli save laef bakegen.

Plis ridim haf we i kam biaen blong lanem moa long saed blong nambawan hop ya.