Hem i Win Long Wan Spesel Rod

?YU YU fesem traem we i agensem bilif blong yu​—maet long wok, insaed long famle, no from we gavman i putum tabu long wok blong prij long ples blong yu? Ale, yu no mas letem tingting blong yu i foldaon. Plante Witnes blong Jeova oli fesem ol semfala traem, be nating se i olsem, oli win. Tingbaot stori blong Erna Ludolph.

Erna i bon long 1908 long Lübeck, hemia long Jemani. Long famle blong hem, hem wan nomo i wan Witnes blong Jeova. Long 1933, taem Hitler i stat rul long gavman, laef blong ol Witnes blong Jeova i kam had. Ol fren blong Erna long wok oli tok strong long hem from we hem i no wantem mekem salut blong Hitler. Ale, from samting ya, ol Nasi oli holem hem. Hem i spenem eit yia long plante presin mo long ol rabis kalabus ya Hamburg-Fuhlsbüttel, Moringen, Lichtenburg mo Ravensbrück. Taem Erna i stap long Ravensbrück, wan samting i hapen we i mekem se hem i winim ol man we oli agensem hem.

Wan Haosgel We i Spesel Olgeta

Profesa Friedrich Holtz mo waef blong hem Alice, oli stap long Berlin. Tufala i no joen long pati blong Nasi mo tufala i no sapotem tingting blong olgeta tu. Be, tufala i famle wetem wan haeman blong ol SS (Schutzstaffel, ol spesel polis blong Hitler) we wok blong hem i blong lukaot long ol man we oli stap insaed long ol rabis kalabus. Taem profesa ya wetem waef blong hem, tufala i lukaotem wan haosgel, haeman ya i givim raet long tufala blong tufala i jusum wan woman presina. Long Maj 1943, Alice i go long kalabus we i stap long Ravensbrück blong jusum wan haosgel blong hem. ?Hem i jusum hu? Hem i jusum Erna Ludolph. Ale, Erna i go stap wetem famle Holtz mo olgeta oli lukaotgud long hem. Taem wo i finis, hem i folem famle ya mo oli go stap long Halle, hemia klosap long Reva Saale. Long ples ya, ol haeman blong Sosialis pati long Is blong Jemani nao oli agensem hem. Long 1957, oli sanem famle Holtz i go long Wes blong Jemani, mo Erna i go wetem olgeta tu. Long ples ya, Erna i fri blong wosip.

?From wanem yumi talem se Erna i win long wan rod we i spesel? Erna i gat gudfala fasin mo i wok strong blong talemaot mesej blong Baebol. From samting ya, Alice Holtz wetem ol faefala pikinini blong hem oli kam ol Witnes blong Jeova. Antap long hemia, eleven smol bubu blong Alice oli ol Witnes tu. I gat tu long ol smol bubu blong Alice we naoia oli mekem wok long branj ofis blong ol Witnes blong Jeova long Selters, long Jemani. Wan long ol gel blong Alice, nem blong hem Susanne i talem se: “Bighaf blong famle blong mi i stap long trutok from eksampol blong Erna.” Erna i kasem bigfala blesing from fasin blong hem blong stanap strong. ?Olsem wanem long yu? Yu tu yu save kasem blesing olsem Erna sipos yu stanap strong mo obei long Jeova long eni hadtaem we yu fesem long laef blong yu. Yes, sipos yu gat gudfala fasin mo yu wok strong long wok blong prij, samting ya bambae i halpem yu blong win long wan rod we i spesel. *

[Futnot]

[Tok blong pija long pej 31]

Erna Ludolph (i stap sidaon) wetem famle Holtz