?Hu Bambae i Laef Bakegen Long Ded?

“I nogud yufala i sapraes long samting ya, from we i gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.”​—JON 5:​28, 29.

1. ?Wanem nambawan toktok we Moses i harem i kamaot long wan smol tri, mo hu i talem bakegen ol tok ya we Moses i bin harem?

 KLOSAP 3,500 yia bifo, wan narakaen samting i hapen. Moses i stap lukaot long ol sipsip blong olfala Jetro, palika blong hem. Hem i stap klosap long Hil ya Horeb, nao enjel blong Jeova i kamtru long hem long faea we i laet olbaot long wan smol tri. Buk blong Eksodas i talem se: “Hem i luk we faea ya i stap laet olbaot long tri ya, be i no kakae ol lif blong hem nating.” Nao, Moses i harem wan voes i kamaot long medel blong tri ya, i stap singaot hem. Voes ya i talem se: “Mi mi God blong ol bubu blong yu bifo. Mi mi God blong Ebraham, mo mi God blong Aesak, mo mi God blong Jekob.” (Eksodas 3:​1-6) Long faswan handred yia K.T., Jisas, stret Pikinini blong God, i talem bakegen ol tok ya, taem hem i stap long wol.

2, 3. (a) ?Wanem fiuja blong Ebraham, Aesak, mo Jekob? (b) ?Wanem ol kwestin we yumi wantem kasem ansa blong olgeta?

² Jisas i stap storian wetem sam Sadusi. Ol man ya oli no bilif se dedman i save laef bakegen. Jisas i talem long olgeta se: “Buk blong Moses tu i soemaot we ol dedman bambae oli save laef bakegen, long stori ya blong wan smol tri we faea i stap laet olbaot long hem. Long taem ya, Moses i singaot Hae God i . . . se, ‘Yu yu God blong Ebraham, mo yu God blong Aesak, mo yu God blong Jekob.’ God ya i God blong man we i laef, hem i no God blong man we i ded. Mo hem i stap luk olgeta man se oli no ded, oli stap laef.” (Luk 20:​27, 37, 38) Taem Jisas i tok olsem, hem i soemaot klia se, ol man olsem Ebraham, Aesak, mo Jekob we oli ded longtaem finis, oli laef yet long tingting no memori blong God. Oli olsem Job, oli stap wet gogo kasem we, taem blong olgeta long “kalabus” long ded, bambae i finis. (Job 14:​14, NW ) Olgeta ya bambae oli laef bakegen long niufala wol blong God.

³ ?Be olsem wanem long ol bilian narafala man we oli ded longtaem finis i kam? ?Olgeta ya tu bambae oli laef bakegen? Bifo we yumi save ansa long kwestin ya, yumi mas luk wanem we Baebol i talem long saed blong ded. ?Baebol i talem se taem man i ded, hem i go wea?

?Ol Dedman Oli Stap Wea?

4. (a) ?Ol man oli go wea taem oli ded? (b) ?Wanem ya Seol?

⁴ Baebol i talem se ol dedman “oli no save wan samting nating.” Taem man i ded, hem i no safa long wan helfaea, hem i no go wet mo harem nogud long wan ples we oli kolem Limbo, be hem i gobak nomo long graon. Taswe, Baebol i givim advaes ya long ol man we oli laef i stap, se: “Olgeta samting we han blong yu i save mekem, i gud yu  mekem wetem paoa blong yu. From we i no gat wok no plan no save no waes long Seol, ples ya we bambae yu yu go long hem.” (Prija 9:​5, 10, NW; Jenesis 3:19) I no gat plante man oli save long tok ya “Seol.” Hem i wan Hibru tok we ol man oli no save stret se hem i kamaot long wea. Plante skul oli tijim se taem man i ded, hem i laef yet samples. Be Tok blong God i soem se ol man we oli stap long Seol, oli ded we oli no gat save long wan samting nating. Seol, hem i beregraon we olgeta man oli go long hem.

5, 6. ?Taem Jekob i ded hem i go wea, mo oli berem hem long sem ples we oli bin berem hu?

⁵ Faswan taem we tok ya “Seol” i kamaot long Baebol, hemia long Jenesis 37:35 (NW ). Taem olfala Jekob i harem giaman nius ya se Josef i ded, hem i harem nogud we i harem nogud. Ol man oli traem mekem hem i harem gud bakegen, be nogat. Hem i se: “Bambae mi mi krae long pikinini blong mi, gogo bambae mi mi godaon, mi go stap wetem hem long Seol.” Jekob i ting se pikinini blong hem i ded, taswe hem tu i wantem ded, i wantem go long Seol. Biaen, naen narafala boe blong Jekob oli wantem tekem lasbon brata blong olgeta, Benjamin, i go wetem olgeta long Ijip. Oli wantem go longwe blong tekem kakae, from we kakae blong olgeta i sot. Be Jekob i no wantem we oli tekem Benjamin, hem i se: “!Nogat! Pikinini ya blong mi bambae i no save go wetem yufala. Stret brata blong hem i ded finis, hem wan nomo i stap. Maet wan samting bambae i kasem hem long rod. Mi mi olfala tumas, mo sipos yu mekem mi mi harem nogud tumas, bambae mi ded [“mi go long Seol,” NW ] from.” (Jenesis 42:​36, 38) Tufala vas ya oli joenem ded wetem Seol, be oli no joenem ded wetem wan ples we dedman i go laef long hem.

⁶ Stori blong Jenesis i soem se Josef i stap long Ijip, nao oli putumap hem i kam bos long wok ya blong givimaot kakae long ol man. From samting ya, Jekob i gat janis blong go mitim Josef long ples ya, mo tufala i glad we i glad bigwan. Ale, Jekob i stap long kantri ya Ijip kasem taem we hem i gat 147 yia blong hem, nao hem i ded. Ol boe blong hem oli go berem hem long kantri blong Kenan, long wan hol blong ston long ples ya Makpela, olsem we hem i bin talem long olgeta blong mekem. (Jenesis 47:28; 49:29-31; 50:​12, 13) Oli berem Jekob long sem ples we oli bin berem Aesak, papa blong hem, mo Ebraham, bubu man blong hem.

‘Hem i Go Stap Wetem Ol Olfala Bubu Blong Hem’

7, 8. (a) ?Ebraham i go wea taem hem i ded? Eksplenem. (b) ?Wanem i soem se i gat plante narafala man tu we oli go long Seol taem oli ded?

⁷ Taem Jeova i mekem kontrak wetem Ebraham mo i promes long hem se ol pikinini we bambae oli kamaot biaen long hem bambae oli plante we oli plante, hem i talem wanem bambae i hapen long Ebraham biaen. Jeova i talem olsem se: “Yu bambae yu save stap longtaem, gogo kasem we yu olfala gud, nao bambae yu ded we tingting blong yu i stap kwaet, mo bambae oli berem yu long gudfala fasin.” (Jenesis 15:15) Hemia nao samting we i hapen long Ebraham. Jenesis 25:8 i talem se: “Nao Ebraham i ded, i go stap wetem ol olfala bubu blong hem bifo, we oli ded finis. Hem i gat gudfala laef, mo taem hem i ded, hem i olfala we i olfala, i gat wan handred seventi faef yia blong hem.” ?Hu ya ol olfala bubu ya? Jenesis 11:​10-26 i givim wan lis blong olgeta olfala bubu blong Ebraham, stat long Sem we i pikinini blong Noa. Taem Ebraham i ded, hem i ledaon wetem ol olfala bubu ya we oli stap slip long Seol.

⁸ Yumi save faenem tok ya “go stap wetem ol olfala bubu” plante taem long Hibru haf blong Baebol. Taswe yumi sua se pikinini blong Ebraham, hemia Ismael, mo brata blong Moses, hemia Eron, tufala tu, tufala i go long Seol taem tufala i ded. Tufala i stap wet long ples ya, blong bambae God i mekem tufala i laef bakegen. (Jenesis 25:17; Namba 20:​23-29, NW ) Moses tu i go long Seol, nating se i no gat man i save se gref blong hem i stap wea. (Namba 27:​13, NW; Dutronome 34:​5, 6) Mo Josua, we i tekem ples blong Moses blong lidim Isrel, mo ol man we oli gruap wetem hem, olgeta tu oli go long Seol taem oli ded.​—Jajes 2:​8-10, NW.

9. (a) ?Olsem wanem Baebol i soem se Hibru tok ya “Seol” i sem mak long Grik tok ya “Hades”? (b) ?Wanem hop blong olgeta we oli stap long Seol, no Hades?

⁹ Plante handred yia afta long taem blong ol olfala ya, Deved i kam king blong ol 12 laen blong Isrel. Taem hem i ded, hem “i go ledaon wetem ol olfala bubu blong hem.” (1 King 2:​10, NW ) ?Hem i stap long Seol tu? Long dei blong lafet blong Pentekos long yia 33 K.T., aposol Pita i tokbaot ded blong Deved mo tok we hem i raetem long Ol Sam 16:10 (NW ) se: “Bambae yu no save livim sol blong mi long Seol.” Pita i talem se Deved i stap yet long beregraon, ale, hem i yusum ol tok ya we Deved i raetem,  blong tokbaot Jisas. Biaen, Pita i talem se Deved “i luksave samting ya we God bambae i mekem i kamtru long fiuja, nao hem i tok. Taem hem i talem se, ‘God i no livim hem i stap long [“Hades,” NW ], bodi blong hem i no roten blong i sting,’ hem i stap tokbaot Mesaea ya, we i laef bakegen. God i mekem Jisas i laef bakegen finis, mo mifala evriwan ya i stap talemaot samting ya.” (Ol Wok 2:​29-32) Long ples ya, Pita i yusum tok ya “Hades” long lanwis Grik, we i sem mak long tok ya “Seol” long lanwis Hibru. Taswe, olgeta ya we Baebol i talem se oli stap long Hades i sem mak nomo long olgeta we oli stap Seol. Oli slip nomo mo oli stap wet blong bambae God i mekem olgeta oli laef bakegen.

?I Gat Rabis Man Long Seol?

10, 11. ?Olsem wanem yumi save se sam rabis man tu oli stap long Seol no Hades taem oli ded?

¹⁰ Moses i lidim nesen blong Isrel i goaot long Ijip, nao taem oli stap wokbaot long draeples, sam long olgeta oli mekem stronghed. Moses i talem long olgeta man se oli mas seraot long olgeta we oli lidim rebelian ya, hemia Kora, Datan, mo Abiram. Ol stronghed ya bambae oli ded. Be God nao bambae i kilim olgeta oli ded. Moses i talem se: “Sipos olgeta ya oli ded long prapa taem blong ded blong olgeta, we Hae God i no panisim olgeta, hemia i min se hem i no bin sanem mi. Be sipos hem i mekem wan samting we i narafala olgeta, we i no gat man yet i luk, we graon i open bigwan, nao olgeta ya oli foldaon i go long hol ya wetem olting blong olgeta, mo graon i berem olgeta we oli laef yet, nao oli godaon wantaem long . . . [“Seol,” NW ], nao bambae yufala i save se olgeta ya oli tanem baksaed long hem.” (Namba 16:​29, 30) Graon i open, i solemdaon sam long olgeta, mo ol narafala, hemia Kora wetem ol 250 Livaet we oli biaenem hem, faea i kakae olgeta. Be olgeta stronghed ya evriwan oli go long Seol, no Hades.​—Namba 26:10.

¹¹ Simei tu, we i singaot trabol i kam long King Deved, God i panisim hem long taem we Solomon i rul. Deved i bin givim oda ya se: “I nogud yu yu letem hem i go fri, yu mas panisim hem. Yu yu waes, mo yu savegud rod blong stretem bisnes ya. I wok blong yu, blong kilim hem i ded [“putum hem long Seol,” NW ].” Solomon i talem long Benaea blong mekem wok ya. (1 King 2:​8, 9, 44-46) Wan narafala man we Benaea i kilim i ded, hemia Joab, we fastaem hem i komanda blong ol soldia blong Isrel. Benaea i ‘no letem Joab i ded olsem nomo, be hem i kilim Joab i ded [“i putum hem long Seol,” NW ].’ (1 King 2:​5, 6, 28-34) Tufala stori ya oli soemaot se ol tok long singsing ya blong Deved oli tru nomo se: “Ol nogud man, mo olgeta nesen we oli fogetem God tu, olgeta evriwan bambae oli godaon long Seol.”​—Ol Sam 9:​17, NW.

12. ?Hu ya Ahitofel, mo hem i go wea taem hem i ded?

¹² Ahitofel i man blong givim advaes long Deved. Deved i tekem olgeta toktok mo advaes blong man ya olsem se oli tok blong Jeova stret. (2 Samuel 16:23) Be sore tumas, man ya we Deved i trastem hem, hem i kam nogud. Hem i lego Deved, i go sapotem rebelian blong Absalom, pikinini blong Deved. Ating Deved i tokbaot Ahitofel ya taem hem i raetem se: “Sipos i wan enemi we i stap laf long mi, bambae mi no save harem nogud from. Mo sipos i wan narafala man we i agens long mi, we i stap tok flas long mi, bambae mi save haed long hem.” Deved i gohed i se: “Mi wantem ol enemi blong mi oli ded we i no taem blong olgeta yet, mi wantem oli go long [“Seol,” NW ] long taem we oli no tingbaot nating blong go. Rabis fasin i stap finis long hom blong olgeta mo long tingting blong olgeta.” (Ol Sam 55:​12-15) Taem Ahitofel mo ol man long kampani blong hem, oli ded, oli go long Seol.

 ?Hu Olgeta We Oli Stap Long Gehena?

13. ?From wanem Jisas i talem se Judas i “man blong lus”?

¹³ Samting ya we i hapen long Deved, i hapen tu long Jisas. Judas Iskariot we i wan long ol 12 aposol blong Jisas, i tanem baksaed long Jisas mo i agensem hem, olsem we Ahitofel i mekem long Deved. Be rong blong Judas i nogud moa i winim rong blong Ahitofel. Judas i go agensem Stret Pikinini ya blong God. Klosap long taem we Jisas i finisim wok blong hem long wol ya, hem i prea long God from ol man blong hem, i se: “I stat bifo kam kasem naoia, mi mi stap wetem olgeta, mo mi stap holem olgeta oli sef long paoa blong nem ya blong yu, we yu yu givim long mi. Mi stap lukaot gud long olgeta, mi no lusum wan long olgeta. Wan nomo i lus, hemia man ya we i man blong lus, mo samting ya i kamaot olsem, blong mekem ol tok blong Baebol i kamtru.” (Jon 17:12) Taem Jisas i talem se Judas i “man blong lus,” hem i minim se taem we Judas i ded, bambae hem i no save laef bakegen samtaem. Judas i no stap long memori blong God. Taswe, Judas i no go long Seol. Hem i go long Gehena. ?Wanem ya Gehena?

14. ?Gehena i pija blong wanem?

¹⁴ Jisas i tok agens long ol lida blong skul long taem blong hem, from we taem olgeta ya oli pulum wan man i folem bilif blong olgeta, oli mekem man ya i kam nogud “we i blong go long Gehena nomo.” (Matiu 23:​15, NW ) Long taem blong Jisas, ol man oli savegud ples ya we oli kolem Vali blong Hinom. Hem i wan ples blong sakem doti long hem, mo oli stap sakem dedbodi blong ol rabis man tu long hem. Oli mekem olsem long ol rabis man, we i no stret nating blong ona long olgeta mo blong berem olgeta olsem ol narafala man. Jisas tu i bin tokbaot ples ya Gehena long Bigfala Toktok blong hem antap long Hil. (Matiu 5:​29, 30, NW ) Ol man we oli harem ol tok ya blong Jisas, oli kasem save mining blong hem. Gehena i pija blong samting we i blong go lus olgeta, i no gat hop blong laef bakegen. Judas Iskariot long taem blong Jisas i go long Gehena. ?Be olsem wanem? ?I gat sam narafala man tu we, taem oli ded, oli no go long Seol no Hades, be oli go long Gehena?

15, 16. ?Hu samfala we oli go long Gehena taem oli ded? ?From wanem oli go long ples ya?

¹⁵ Taem God i wokem faswan man mo woman, Adam mo Iv, hem i mekem tufala i stretgud olgeta. Tufala nomo i jusum blong mekem sin. Tufala i save laef olwe no tufala i save ded. Ale, tufala i no obei long God, tufala i folem Setan. Taem tufala ya i ded, tufala i no gat janis blong kasem blesing ya se ransom sakrefaes blong Kraes bambae i pemaot tufala. Yes, tufala ya i go long Gehena.

¹⁶ Fasbon pikinini blong Adam, hemia Ken, i kilim brata blong hem Ebel i ded. Biaen, hem i ronwe, mo i laef olbaot olsem man we i no gat ples blong hem. Aposol Jon i talem se Ken i “wan man blong Setan.” (1 Jon 3:12) Taswe, yumi kasem save se taem Ken i ded, hem tu i go long Gehena olsem papa mama blong hem. (Matiu 23:​33, 35, NW ) !Long saed blong gudfala man ya Ebel, i defren olgeta! Pol i tokbaot Ebel, i se: “From we Ebel i stap bilif strong long God, taswe hem i givim wan presen i  go long God, we i gud moa, i winim presen blong Ken. Mo from we hem i stap bilif strong long God olsem, taswe God i soemaot long hem se hem i wan stret man, nao i glad blong tekem presen blong hem.” Nao Pol i gohed se: “Mo nating we man ya i ded finis, be fasin ya blong bilif blong hem i stap toktok long yumi yet.” (Hibrus 11:4) Yes, Ebel i stap slip long Seol, i stap wet blong bambae God i mekem hem i laef bakegen.

“Laef Bakegen Long Ded Fastaem” Mo “Laef Bakegen Long Wan Laef We i Gud Moa”

17. (a) ?Long “taem blong en” hu olgeta we oli go long Seol? (b) ?Wanem fiuja blong ol dedman long Seol mo long Gehena?

¹⁷ Maet sam long yumi oli wantem save se olsem wanem long ol man we oli ded naoia, long “taem blong en.” (Daniel 8:​19, NW ) Revelesen japta 6 i tokbaot fofala hos we oli stat ron long taem blong en. I gud blong makem we, laswan blong ol fofala hos ya, nem blong hem Ded, mo biaen long hem, i gat wan man i kam we nem blong hem Hades. Taswe, plante man we oli ded tede from wok blong hos ya we nem blong hem Ded, oli stap go nomo long Hades. Hemia i min se, ol man ya oli wet blong bambae God i mekem olgeta oli laef bakegen long niufala wol. (Revelesen 6:​8, NW ) ?Ale, wanem fiuja blong ol man we oli stap long Seol (Hades) mo ol man we oli stap long Gehena? I klia nomo. Ol man long Seol (Hades) bambae oli laef bakegen. Ol man long Gehena oli go lus blong olwe, oli no moa save laef samtaem.

18. ?Olgeta we oli “laef bakegen long ded fastaem” oli go wea?

¹⁸ Aposol Jon i raetem se: “Olgeta ya we God i mekem olgeta oli laef bakegen long ded fastaem, oli stap harem gud. God i mekem i gud tumas long olgeta, from we seken ded i no gat paoa long olgeta. Olgeta ya bambae oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.” Olgeta we bambae oli rul wetem Jisas Kraes oli “laef bakegen long ded fastaem.” ?Be olsem wanem long ol narafala man long wol?​—Revelesen 20:​6, Niutesteman wetem Ol Sam long Bislama.

19. ?Olsem wanem samfala bambae oli “laef bakegen long wan laef we i gud moa”?

¹⁹ Ol man olsem Elaeja mo Elisa, we tufala i profet blong God, oli wokem ol merikel blong mekem dedman i laef bakegen. Pol i talem se: “I gat sam woman we oli bilif strong long God, taswe hem i mekem ol pikinini blong olgeta oli laef bakegen long ded. Be sam narafala man we oli stap bilif strong long God, oli letem ol enemi blong olgeta oli stap mekem olgeta oli harem nogud tumas long bodi blong olgeta, be oli no tingbaot samting ya. Oli no wantem lego bilif blong olgeta, blong oli save go fri, oli bilif se God bambae i mekem olgeta oli laef bakegen long wan laef we i gud moa.” Yes, ol gudfala man ya we oli holemstrong long God, oli tingbaot gudfala fiuja we bambae oli gat, taem oli save laef bakegen long ded. Mo hop blong olgeta i no se bambae oli girap bakegen blong laef smoltaem nomo nao oli ded bakegen. Nogat. !Hop blong olgeta se bambae oli girap bakegen blong laef olwe! Tru ya, oli “laef bakegen long wan laef we i gud moa.”​—Hibrus 11:35.

20. ?Nekis stadi bambae i tokbaot wanem?

²⁰ Sipos yumi holemstrong long bilif, nao yumi ded bifo we Jeova i finisim rabis wol blong naoia, yumi save sua se bambae yumi “laef bakegen long wan laef we i gud moa.” Hemia i min se yumi gat hop blong laef bakegen long ded mo blong laef gogo i no save finis. Jisas i promes se: “I nogud yufala i sapraes long samting ya, from we i gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.” (Jon 5:​28, 29) Nekis stadi bambae i tokbaot sam risen from wanem God i mekem ol dedman oli laef bakegen. Stadi ya bambae i soem olsem wanem hop blong laef bakegen i save mekem yumi strong moa blong stap tru long God, mo olsem wanem bilif ya i save halpem yumi blong wokem tingting we yumi rere blong lego samting we yumi nomo i wantem.

Yu Yu Tingbaot?

• ?Olsem wanem Jeova i “God blong man we i laef”?

• ?Olsem wanem long olgeta we oli stap long Seol?

• ?Wanem fiuja blong olgeta we oli stap long Gehena?

• ?Olsem wanem samfala bambae oli “laef bakegen long wan laef we i gud moa”?

[Kwestin]

[Tok blong pija long pej 15]

Olsem Ebraham, olgeta we oli go long Seol bambae oli laef bakegen

[Tok blong pija long pej 16]

?From wanem Adam mo Iv, Ken, mo Judas Iskariot, oli go long Gehena?