?Laef Bakegen Long Ded i Mekem Wanem Long Yu?

“Yu openem han blong yu, nao yu mekem we olgeta samting we i laef oli harem gud.”​—OL SAM 145:​16, NW.

1-3. ?Wanem hop we samfala oli gat long saed blong fiuja? Talem sam eksampol.

 CHRISTOPHER i gat naen yia blong hem. Long wan moning, hem wetem smol brata blong hem, tufala i go prij wetem angkel mo anti mo tufala kasen brata blong tufala. Oli stap prij klosap long Manchester, Inglan. Wan Wekap! i tokbaot stori blong olgeta ya. “Nao long aftenun, olgeta ya oli wokbaot long trak blong go kasem Blackpool, hemia wan naesfala ples blong spel klosap long solwota. Be i gat wan bigfala aksiden long rod, nao olgeta 6 oli ded wetem 6 narafala man bakegen. Ol polis oli talem se aksiden ya i nogud olgeta, faea i kakae ol trak ya wetem olgeta we oli stap insaed.”

² Long naet bifo long aksiden ya, famle ya i bin joen long Buk Stadi blong kongregesen blong olgeta. Mo long buk stadi ya, oli bin tokbaot ded. Papa blong Christopher i talem se: “Christopher i wan boe we i tingting plante. Long naet ya, hem i toktok long klia fasin long saed blong niufala wol mo hop we hem i gat long fiuja. Taem mifala i stap storian i go, wantaem nomo Christopher i talem se: ‘I gud we yumi Witnes blong Jeova, from we, nating se ded i mekem yumi harem nogud be yumi save se wan dei bambae yumi save luk yumi bakegen long wol ya.’ Long naet ya, mifala i no save nating se ol tok ya blong Christopher bambae oli stap olsem wan memori.” *

³ Long 1940, wan Witnes blong Jeova long Ostria, nem blong hem Franz, i no wantem lego bilif blong hem long Jeova, blong obei long oda blong ol haeman blong kantri. From samting ya, oli talem long hem se bambae oli katemaot hed blong hem. Ale taem hem i stap long kalabus long Berlin, hem i raetem wan leta i go long mama blong hem. Hem i se: “Save we mi kasem finis i soem klia se sipos mi agri blong joen long ami, hemia wan sin we i stret blong mi ded from. Mi no save mekem samting ya we i nogud tumas long ae blong God. Sipos mi mekem, bambae God i no save mekem mi mi laef bakegen. . . . Mi wantem talemaot long yu, gudfala Mama blong mi, mo long yufala ol brata mo sista blong mi, se oli ridimaot panis blong mi tede. Yufala i no mas fraet. Panis blong mi hemia ded. Bambae oli kilim mi mi ded tumora moning. Mi mi strong, God i givim paoa long mi olsem we hem i givim paoa long ol trufala Kristin bifo. . . . Sipos yufala i stanap strong gogo kasem ded, bambae yumi luk yumi bakegen taem God i mekem ol dedman oli girap. . . . Bambae yumi mit bakegen.” *

4. ?Tufala stori ya i mekem wanem long yu, mo bambae yumi tokbaot wanem?

⁴ Hop ya blong laef bakegen long ded i givhan bigwan long Christopher mo Franz. Long tingting blong tufala, laef bakegen hem i wan samting we i tru. !Ating stori blong tufala ya i tajem hat blong yumi! Sipos yumi wantem gat moa tangkiu long Jeova mo mekem bilif blong yumi long hop ya i kam strong moa, i gud yumi tingbaot risen from wanem God bambae i mekem ol dedman oli laef bakegen, mo olsem wanem samting ya i save gat paoa long yumi wanwan.

Wan Vison Blong Laef Bakegen Long Wol

5, 6. ?Vison blong aposol Jon long Revelesen 20:​12, 13 i soemaot wanem?

⁵ Aposol Jon i luk wan vison blong taem we Jisas Kraes bambae i rul blong Wan Taosen Yia. Hem i luk se, long taem ya olgeta dedman oli laef bakegen long wol. Hem i tokbaot samting ya i se: “Nao mi luk olgeta dedman, olgeta we bifo oli haeman wetem olgeta we oli no gat nem. . . . Olgeta man we oli ded long solwota, oli aot long solwota oli kam. Mo olgeta narafala dedman tu oli kam. Ded wetem  [“Hades,” NW ] tufala i no moa save holem olgeta, olgeta evriwan oli aot long tufala, oli kam.” (Revelesen 20:​12, 13) Olkaen man we Hades (Seol), hemia beregraon, i stap holem olgeta, nomata we oli “haeman” no “oli no gat nem,” be bambae oli kamaot. Ol man ya tu we oli ded long solwota bambae oli laef bakegen long taem ya. Nambawan taem ya i stap insaed long plan blong Jeova.

⁶ Taem Kraes i statem rul blong hem blong wan taosen yia, bambae hem i fasem Setan mo i sakem hem i go long bigfala hol ya we i godaon we i godaon olgeta. From we Setan i stap kalabus, bambae hem i no save spolem olgeta ya we oli laef bakegen long ded mo olgeta ya we oli pastru long bigfala trabol. (Revelesen 20:​1-3) Maet long tingting blong yu, wan taosen yia i longtaem tumas, be long Jeova, hem i olsem “wan dei” nomo.​—2 Pita 3:8.

7. ?Long Wan Taosen Yia Rul blong Kraes bambae oli jajem ol man folem wanem?

⁷ Vison blong Jon i soemaot se Wan Taosen Yia Rul blong Kraes bambae i wan taem blong jajmen. Aposol Jon i talem se: “Nao mi luk olgeta dedman, olgeta we oli haeman mo olgeta we oli no gat nem, oli stanap fored long bigfala jea blong King. Nao i gat sam buk oli open. Mo wan narafala buk tu i open, hemia buk blong laef. Nao oli jajem ol dedman long ol samting we i stap long ol buk ya, stret long ol wok blong olgeta. . . . Oli jajem olgeta dedman ya, stret long ol wok we olgeta wanwan oli mekem.” (Revelesen 20:​12, 13, NW ) Yumi mas makemgud we long ples ya, God i no jajem ol dedman ya folem samting we oli mekem, no oli no mekem, bifo we oli ded. Nogat. (Rom 6:7) Ol “buk” ya we Revelesen i tokbaot, bambae oli open nomo long fiuja. Ol samting we man i mekem afta we hem i kasem save ya we i stap long ol buk ya, samting ya nao bambae i soemaot sipos nem blong hem i save stap long “buk blong laef” no nogat.

Oli “Girap Bakegen Blong Kasem Laef” No Oli ‘Girap Bakegen Blong Bigfala Kot i Jajem Olgeta’

8. ?Wanem tu defren samting we i save hapen long ol man we bambae oli laef bakegen long ded?

⁸ Long fashaf blong vison blong Jon, Jon i luk we Jisas i “holem ol ki blong ded mo blong Hades.” (Revelesen 1:​18, NW ) Jisas hem i “Bigfala Man we God i yusum blong givim laef,” mo God i givim paoa long hem blong “jajem olgeta man, olgeta we bambae oli laef, wetem olgeta we bambae oli ded.” (Ol Wok 3:​15, NW; 2 Timoti 4:1) ?Bambae Jisas i mekem samting ya olsem wanem? Bambae hem i mekem samting ya taem hem i wekemap olgeta man we oli slip long ded. Taem Jisas i prij long ol man, hem i talem long olgeta se: “Yufala i no sapraes long samting ya, from we aoa i stap kam we ol dedman we oli stap long ol gref blong olgeta, bambae oli harem voes blong hem, nao bambae oli kamaot.” Ale hem i gohed i se: “Olgeta we oli mekem ol gudfala samting, oli girap bakegen blong kasem laef. Mo olgeta we oli mekem ol rabis samting, oli girap bakegen blong bigfala kot bambae i jajem olgeta.” (Jon 5:​28-30, NW ) ?Taswe, wanem fiuja blong ol man mo woman blong bifo, we oli bin holemstrong long bilif?

9. (a) ?Plante man we oli laef bakegen, bambae oli lanem wanem? (b) ?Wanem bigfala wok blong tij we bambae ol man oli joen long hem?

⁹ Taem ol olfala man mo woman blong bilif oli laef bakegen, bambae oli luk se olgeta promes ya we oli bin trastem fulwan, oli kamtru. !Bambae oli wantem tumas blong save hu ya Laen blong woman ya blong God we faswan profet tok blong Baebol i tokbaot long Jenesis 3:15! !Bambae oli glad tumas blong harem gud nius se Mesaea ya, Jisas, we oli bin wet long hem, i stanap strong go kasem ded, mo i givim laef ya blong hem olsem wan ransom sakrefaes! (Matiu 20:28) Ol man bambae oli welkamem olgeta we oli laef bakegen, mo bambae oli halpem olgeta blong kasem save olsem wanem ransom ya i soemaot kaen fasin mo sore blong Jeova. Taem olgeta we oli laef bakegen oli harem nius blong ol bigbigfala wok we Kingdom blong God i stap mekem blong fulwol ya i kam olsem we Jeova i wantem, bambae oli glad we oli glad tumas, mo bambae oli wantem presem Jeova. Olgeta ya bambae oli gat janis blong soemaot se oli stap tru long Papa blong olgeta long heven mo long Pikinini blong hem. Evri man we oli laef long taem ya, bambae oli glad tumas blong joen long bigfala wok blong tijim ol bilian dedman we oli laef bakegen. Ol dedman ya tu oli mas bilif long ransom sakrefaes we God i yusum blong pemaot ol man long sin.

10, 11. (a) ?Wan Taosen Yia Rul blong Kraes bambae i givim janis long ol man long wol blong oli mekem wanem? (b) ?Janis ya i mas mekem wanem long yumi?

¹⁰ Taem Ebraham i laef bakegen, bambae hem i harem gud tumas blong luk wetem prapa ae blong  hem, se laef i olsem wanem aninit long rul blong “taon” ya we hem i bin putum tingting blong hem i stap strong long hem. (Hibrus 11:10) !Gudfala man ya Job, bambae i glad tumas blong harem se fasin blong hem i bin givhan long plante narafala man blong Jeova, blong oli stanap strong taem oli fesem traem! !Mo ating Daniel bambae i wantem tumas blong save mining blong olgeta profet tok ya we tabu spirit i bin pulum hem blong raetem!

¹¹ Olgeta man we oli laef long niufala wol, maet oli man we oli laef bakegen long ded no maet oli man we oli pastru long bigfala trabol, be evriwan bambae oli gat plante samting blong lanem long saed blong stamba tingting we Jeova i gat long wol ya mo long ol man. Janis ya blong laef olwe mo blong presem Jeova gogo i no save finis, bambae i mekem se olgeta man oli harem gud tumas long program blong edukesen we bambae i gohed long Wan Taosen Yia Rul blong Kraes. Be, samting we i rili impoten, hemia wanem we yumi wanwan bambae yumi mekem, taem yumi lanem ol samting we oli stap long ol buk ya. ?Bambae yumi folem wanem we yumi lanem? ?Bambae yumi tingting dip long ol save ya mo putum oli stapgud long hat blong yumi? Ol samting ya nao bambae oli mekem yumi strong naf blong winim laswan traem we Setan bambae i mekem blong pulum yumi blong lego trutok.

12. ?Wanem bambae i mekem se evriwan oli save joen fulwan long wok blong tij mo blong mekem wol ya i kam wan paradaes?

¹² Yumi no mas fogetem ol narafala blesing we bambae oli kamaot from ransom sakrefaes blong Kraes. Ol dedman we oli laef bakegen, bambae oli no gat sik mo olkaen handikap we yumi luk tede. (Aesea 33:24) Evri man long niufala wol ya bambae oli gat strong bodi mo oli no moa sik. Taswe, bambae oli save joen fulwan long wok blong tijim ol bilian man ya we oli laef bakegen, blong oli wokbaot long rod blong laef. Mo tu, bambae oli mekem wan wok we i bigfala moa long ol narafala wok we ol man long wol ya oli bin mekem. Hemia wok blong mekem ful wol ya i kam wan paradaes we i leftemap nem blong Jeova.

13, 14. ?From wanem God bambae i letem Setan i gofri blong traem ol man laswan? ?Mo wanem samting we bambae i save hapen long yumi?

¹³ Taem Setan i kamaot long bigfala hol ya we i godaon we i godaon, bambae hem i traehad laswan blong pulum ol man oli gowe long God. Revelesen 20:​7-9 i talem se “ol man blong olgeta kantri long wol” we oli biaenem Setan, bambae oli kasem jajmen blong olgeta, hemia ded blong olwe: ‘Faea bambae i aot long heven, i kamdaon, i kakae olgeta, nao bambae oli ded evriwan.’ Ol dedman we oli laef bakegen long Wan Taosen Yia Rul blong Kraes, nao oli foldaon long trap blong Setan long laswan traem ya, i olsem se oli girap bakegen blong bigfala kot i jajem olgeta. Be olgeta we oli laef bakegen mo oli holemstrong long God, bambae oli kasem presen ya we God bambae i givim, hemia laef we i no save finis. Yes, i olsem we olgeta ya oli “girap bakegen blong kasem laef.”​—Jon 5:​29, NW.

¹⁴ ?Olsem wanem hop blong laef bakegen i save mekem yumi harem gud naoia? ?Yumi mas mekem wanem blong meksua se bambae yumi kasem gudfala blesing long fiuja?

Sam Lesen We Yumi Mas Lanem Naoia

15. ?Olsem wanem bilif we yu gat se ol dedman bambae oli laef bakegen, i save halpem yu naoia?

¹⁵ Maet yu yu lusum wan fren no famle long ded i no longtaem. Maet yu stap mekem sam bigfala jenis long laef blong yu from fren no famle ya we i ded. Be taem yu tingbaot se ol dedman bambae oli save laef bakegen, yu save kasem pis long tingting, mo paoa we ol narafala man oli no kasem from we oli no save trutok. Pol i leftemap tingting blong ol Kristin long Tesalonaeka, i se: “Mifala i wantem we bambae yufala i savegud olsem wanem long ol Kristin man we oli ded finis. Mifala i no wantem we bambae yufala i stap harem nogud from olgeta, olsem we ol man we tingting blong olgeta i no stap long God, oli stap harem nogud from ol ded man blong olgeta.” (1 Tesalonaeka 4:13) ?Yu yu tingbaot finis se bambae i olsem wanem taem yu stap long niufala wol nao yu luk ol dedman oli girap? I gud yu traem tingbaot taem ya we bambae yu mitim ol fren no famle blong yu bakegen. Samting ya bambae i mekem yu yu harem gud naoia.

16. ?Bambae yu harem olsem wanem taem ol dedman oli laef bakegen?

¹⁶ From we Adam i mekem sin, yumi evriwan i kasem sik, mo maet yu stap safa naoia from wan bigfala sik we yu save se bambae yu ded from. I nogud yu yu harem nogud bitim mak, nao yu fogetem gudfala hop ya blong laef bakegen long niufala wol wetem wan bodi we i strong gud mo i no moa  sik. Taem bambae yu openem ae blong yu, bambae yu luk plante man i stap we oli glad blong welkamem yu. I sua se bambae yu tangkiu bigwan long God from lav mo kaen gud fasin blong hem.

17, 18. ?Wanem tu impoten lesen we yumi mas lanemgud?

¹⁷ Be bifo long ol samting ya, i gat tu lesen we yumi mas lanem. Faswan, hemia se i impoten tumas we naoia yumi stap yusum ful laef blong yumi blong mekem wosip long Jeova. Yumi mas folem eksampol blong Masta blong yumi Jisas Kraes. Yumi mas rere blong lego samting we yumi nomo i wantem. Hemia i soemaot se yumi lavem Jeova mo ol man raonabaot long yumi. Taem ol man oli agensem yumi no oli kilim yumi, maet yumi lusum wok blong yumi mo fasin fri blong yumi. Be nomata wanem traem yumi fesem, yumi mas mekem tingting blong yumi i strong blong no lego bilif. Sipos ol man oli agensem yumi mo oli wantem kilim yumi i ded, ale hop blong laef bakegen long ded i save mekem yumi harem gud, mo yumi gat paoa blong stap tru long Jeova mo Kingdom blong hem. Yes, taem yumi wok strong blong talemaot Kingdom mo pulum man i kam disaepol, yumi save holemtaet hop blong kasem ol blesing ya we Jeova i promes blong givim long ol stret man.

¹⁸ Namba tu lesen, hemia taem yumi fesem ol traem we oli kamaot from ol slak fasin blong yumi. Save we yumi gat se ol dedman bambae oli laef bakegen, mo tangkiu we yumi gat long kaengud fasin blong Jeova, oli mas mekem we yumi wantem moa blong holem bilif. Aposol Jon i givim woning ya se: “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi. Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo. Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:​15-17) Taem yu skelem ol sas samting we wol ya i wantem givim, wetem “laef ya we i prapa wan,” bambae yumi luk se ol sas samting oli nating nomo. (1 Timoti 6:​17-19) Sipos narafala i traem pulum yumi blong mekem rabis fasin long saed blong seks, bambae yumi strong blong agensem traem ya. Bambae yumi tingbaot se sipos yumi stap mekem ol fasin we Jeova i no laekem, nao yumi ded bifo we  Amagedon i kam, maet Jeova bambae i jajem yumi wetem olgeta we oli no gat hop blong laef bakegen.

19. ?Wanem nambawan blesing we yumi no mas fogetem?

¹⁹ Antap long olgeta samting ya, yumi no mas fogetem bigfala blesing ya we yumi gat blong mekem hat blong Jeova i glad naoia mo blong olwe. (Ol Proveb 27:11) Taem yumi holemstrong long bilif go kasem ded, no taem yumi stap tru long God go kasem en blong wol ya, yumi soem long Jeova se yumi sapotem hae rul blong hem. !Tingbaot glad we bambae yu kasem taem yu pastru long bigfala trabol no taem yu laef bakegen long ded, nao yu yu stap long wol ya we i kam Paradaes finis!

Bambae Yumi Kasem Ol Samting We Yumi Wantem Tumas

20, 21. ?Wanem bambae i halpem yumi blong holem bilif, nating se yumi no kasem ansa long evri kwestin blong yumi? Eksplenem.

²⁰ Storian blong yumi long saed blong laef bakegen long ded, i no givim ansa long evri kwestin. I gat sam kwestin yet we maet yumi wantem save. ?Olsem wanem long olgeta we oli mared? ?Jeova bambae i mekem wanem long olgeta taem oli laef bakegen? (Luk 20:​34, 35) ?Ol dedman bambae oli laef bakegen stret long ples we oli bin ded long hem? ?Ol dedman ya bambae oli girap bakegen long ples we famle blong olgeta i stap long hem? I gat plante narafala kwestin olsem, we yumi no save stret ansa blong olgeta. Be yumi mas tingbaot ol tok ya we Jeremaea i raetem se: “[Jeova] i gud tumas long olgeta we oli stap trastem hem, mo we oli wantem tumas blong savegud hem. Taswe yumi mas gat longfala tingting, yumi mas stap kwaet, mo yumi wet long hem blong hem i sevem yumi.” (Ol Krae 3:​25, 26) Long stret taem we Jeova i jusum, bambae yumi kasem ansa blong evri kwestin we yumi gat. ?From wanem yumi sua long samting ya?

²¹ Tingbaot ol tok ya we man blong raetem Sam i singim i go long Jeova: “Yu openem han blong yu, nao yu mekem we olgeta samting we i laef oli harem gud, from we oli kasem ol samting we oli wantem tumas.” (Ol Sam 145:​16, NW ) Taem yumi gruap mo yumi kam olfala, ol samting we yumi wantem oli jenis. Ol samting we yumi wantem taem yumi pikinini oli no sem mak long ol samting we yumi wantem tede. Tingting we yumi gat long saed blong laef i jenis, folem ol samting we oli hapen long yumi mo ol samting we yumi putum tingting blong yumi i strong long olgeta. Be yumi save sua long samting ya se, Jeova bambae i givim olgeta samting we yumi wantem, we oli stret long laef blong yumi long wol ya.

22. ?From wanem i stret we yumi presem Jeova?

²² Samting we yumi wanwan i mas tinghevi long hem naoia, hemia blong holem bilif. “[Man blong wok] bambae i mas lukaot gud blong mekem ol samting we masta blong hem i talem long hem.” (1 Korin 4:2) Yumi ol man blong wok, blong karem nambawan gud nius blong Kingdom blong God i go long ol man. Sipos yumi wok strong blong talemaot gud nius long olgeta man, samting ya i save holem yumi i stap long rod blong laef. Yumi no mas fogetem se “samting we yumi no tingbaot, i save kamaot long yumi enitaem nomo.” (Prija 9:​11, NW ) Sipos bilif blong yu i strong oltaem se ol dedman bambae oli save laef bakegen long fiuja, bambae yu no wari bitim mak taem sam trabol i kasem yu. Sipos yu ded bifo we Kraes i statem Rul blong hem blong Wan Taosen Yia, yu save harem gud long trufala hop ya se bambae yu kasem gudfala laef yet long fiuja. Long stret taem we Jeova i jusum, bambae yu save talem sem toktok we Job i bin talem long Bigman we i Wokem hem, se: “Yu bambae yu singaot long mi, nao mi bambae mi ansa long yu.” !Yes, yumi presem Jeova we i wantem tumas blong givim laef bakegen long olgeta ya we oli stap long memori blong hem!​—Job 14:​15, NW.

[Ol Futnot]

?Yu Yu Tingbaot?

• ?Long Wan Taosen Yia Rul blong Kraes, bambae God i jajem ol man folem wanem samting?

• ?From wanem samfala oli “girap bakegen blong kasem laef,” mo samfala “oli girap bakegen blong bigfala kot bambae i jajem olgeta”?

• ?Olsem wanem hop blong laef bakegen long ded i save leftemap tingting blong yumi naoia?

• ?Olsem wanem ol tok blong Ol Sam 145:16 i save halpem yumi blong no harem nogud, sipos yumi no save yet ansa blong sam kwestin long saed blong laef bakegen?

[Kwestin]

[Tok blong pija long pej 21]

?Olsem wanem bilif long laef bakegen i save halpem yumi tede?