Laef Bakegen​—Wan Tijing We i Mas Gat Paoa Long Yu

“Mi putum tingting blong mi long God . . . [we] bambae i mekem olgeta man we oli ded oli laef bakegen, ol man we oli stret, wetem ol man we oli no stret.”​—OL WOK 24:15.

1. ?Wanem i mekem se Kaonsel blong ol man Jiu i tokbaot tijing ya blong laef bakegen?

 TAEM aposol Pol i finisim namba tri misinari trip blong hem long yia 56 K.T., * hem i stap long Jerusalem. Afta we ol soldia blong Rom oli arestem hem, oli letem hem i toktok long fes blong Kaonsel blong ol man Jiu, we oli kolem Sanhedrin. (Ol Wok 22:​29, 30) Taem Pol i luklukraon long ol man blong Kaonsel ya, hem i luk se sam long olgeta oli Sadusi mo sam oli Farisi. I gat wan bigfala samting we i mekem se tufala grup ya, tufala i defren. Ol Sadusi oli no bilif long laef bakegen. Be ol Farisi oli bilif long hem. Pol i soemaot klia bilif we hem i gat long saed ya, i se: “Ol brata. Mi mi wan Farisi, mo papa blong mi mo ol bubu blong mi, olgeta tu oli Farisi. Be olgeta ya oli wantem traem mi long ples ya tede, from we mi mi putum tingting blong mi long tok ya blong yumi we i talem se man we i ded, bambae i save laef bakegen.” !Taem hem i talem olsem, wantaem nomo bigfala rao i kamaot long Kaonsel ya!​—Ol Wok 23:​6-9.

2. ?From wanem Pol i strong blong talemaot bilif blong hem se ol dedman oli save laef bakegen?

² Sam yia bifo, taem Pol i stap wokbaot i go long Damaskes, hem i luk wan vison mo i harem voes blong Jisas. Long taem ya, Pol i askem long Jisas se: “?Masta, bambae mi mekem olsem wanem?” Jisas i ansa long hem se: “Yu girap, yu wokbaot, yu go long Damaskes. Nao long ples ya, bambae wan man i talemaot long yu olgeta samting we God i makemaot finis, blong bambae yu yu mekem.” Taem Pol i kamtru long Damaskes, wan Kristin disaepol we nem blong hem Ananaeas i faenem hem. Disaepol ya i talem long Pol se: “God ya blong ol olfala blong yumi, hem i jusumaot yu finis, blong yu bambae yu save ol samting we hem i wantem, mo blong yu luk Stret Man ya blong hem [Jisas we i laef bakegen long ded], mo blong yu harem tok blong hem long maot blong hem nomo.” (Ol Wok 22:​6-16) Samting ya nao i mekem we Pol i strong blong talemaot bilif blong hem se ol dedman oli save laef bakegen.​—1 Pita 3:15.

Talemaot Hop Blong Laef Bakegen Long Ded

3, 4. ?Olsem wanem Pol i strong blong sapotem tijing ya blong laef bakegen, mo eksampol blong hem i save tijim yumi long wanem?

³ Biaen, Pol i go stanap fored long hedgavman ya Filiks. Long taem ya, i gat wan man we nem blong hem Tetalas, hem i “loea” blong ol man Jiu we oli agensem Pol. Tetalas i talem se Pol i lida blong wan krangke kampani, mo i stap mekem plante bigfala rao i kamaot long ol laen blong Isrel. Pol i ansa stret long loea ya i se: “Mi mi save talemaot long yu, se i tru we mi mi stap mekem wosip long God ya blong ol olfala blong mifala, long Rod ya blong Jisas, we olgeta ya oli stap talem se i krangke.” Nao Pol i tokbaot samting we i olsem stamba blong rao ya, i se: “Mi putum tingting blong mi long God blong luk sem samting ya nomo we olgeta ya oli stap tingbaot. Hemia samting ya, we God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”​—Ol Wok 23:​23, 24; 24:​1-8, 14, 15.

⁴ Raonabaot tu yia biaen, wan narafala man i tekem ples blong Filiks ya, nem blong hem Posias Festas. Festas i singaot King Herod Agripa i kam sidaon wetem hem blong harem toktok blong Pol we  long taem ya hem i presina blong olgeta. Festas i eksplenem se ol man we oli tok agens long Pol oli no agri long toktok ya we Pol i stap talemaot se “wan dedman ya, we nem blong hem Jisas, . . . hem i laef bakegen.” Nao Pol i talemaot bilif blong hem fored long olgeta ya, hem i statem toktok blong hem wetem wan kwestin se: “?From wanem i strong tumas long yufala blong bilif we God i save mekem man we i ded i laef bakegen?” Nao hem i gohed long toktok blong hem i se: “God i stap givhan long mi oltaem, taswe kam kasem tede, mi mi stap talemaot Jisas long fes blong olgeta man, long ol haeman mo ol man we oli no gat nem. Tok ya we mi stap talem, i sem tok nomo we ol profet mo Moses tu oli talemaot fastaem bifo, se bambae i olsem. Olgeta oli talemaot we Mesaea ya, hem i mas harem nogud long bodi blong hem gogo i ded. Mo biaen, hem i mas faswan blong i laef bakegen. Long fasin ya, hem i save soemaot wan laet long ol laen blong Isrel mo long ol narafala man tu, we laet ya i rod blong God i sevem olgeta.” (Ol Wok 24:27; 25:​13-22; 26:​8, 22, 23) !Tru ya, Pol i strong blong sapotem tijing ya blong laef bakegen! Yumi save mekem olsem Pol. Yumi save talemaot wetem strong bilif se ol dedman bambae oli laef bakegen. ?Be taem yumi mekem olsem, ol man oli save mekem wanem? Maet bambae oli mekem sem mak olsem ol man ya long taem blong Pol.

5, 6. (a) ?Taem ol aposol oli talemaot bilif long laef bakegen, ol man oli mekem wanem? (b) ?Taem yumi talemaot bilif blong yumi long laef bakegen, i impoten we yumi gat wanem?

⁵ Tingbaot wanem we i hapen long namba tu misinari trip blong Pol (raonabaot long yia 49-52 K.T.). Hem i stap long Atens mo i traem pulum ol man long ples ya we oli bilif long plante god, blong oli luksave se God i gat plan blong putumap wan man we bambae hem i jajem wol long stret fasin. Man ya hemia Jisas. Pol i talem se God i soem se plan ya i save kamtru, taem hem i mekem Jisas i laef bakegen long ded. ?Ol man oli mekem wanem taem oli harem samting ya? Baebol i talem se: “Nao taem olgeta oli harem tok ya we God i mekem wan man we i ded i laef bakegen, sam man oli laf nomo long hem. Be sam man oli talem se, ‘Mifala i wantem harem tok blong yu bakegen long samting ya.’ ”​—Ol Wok 17:​29-32.

⁶ Ol man ya oli mekem i sem mak nomo olsem ol man we Pita mo Jon i toktok long olgeta, smoltaem biaen long Pentekos 33 K.T. Long taem ya tu, ol Sadusi oli stap insaed long trabol we i kamaot. Ol Wok 4:​1-4 i storebaot samting we i hapen i se: “Taem Pita mo Jon, tufala i stap toktok yet long ol man, ol pris, mo kapten blong ol soldia blong haos blong God, wetem ol Sadusi, oli kamtru. Olgeta ya oli kros tumas, from we tufala i stap tijim ol man, se Jisas i ded mo i laef bakegen, mo hemia i min se man we i ded i save laef bakegen.” Be i gat samfala we oli mekem i defren: “Plante man we oli harem tok blong tufala, oli bilif long hem. Mo namba blong ol man nomo we oli bilif, klosap i kasem faef taosen man.” Samting ya i soem se ol man oli save gat defdefren tingting taem yumi talemaot long olgeta se ol dedman bambae oli laef bakegen long fiuja. From samting ya, i impoten we yumi mekem bilif blong yumi long tijing ya i kam strong moa.

Bilif Mo Laef Bakegen

7, 8. (a) ?Leta we Pol i raetem i go long Kristin kongregesen blong Korin i talem se bilif i olsem nating nomo sipos i no gat wanem? (b) ?Olsem wanem stret save long saed blong laef bakegen i mekem we ol trufala Kristin oli defren long ol narafala?

⁷ Plante man oli kam Kristin long faswan handred yia K.T., be i no evriwan we oli bilif wantaem nomo long laef bakegen long ded. Sam long olgeta we oli faenem i had blong bilif long tijing ya, oli stap long kongregesen blong Korin. Pol i raet i go long olgeta ya i se: “Ol prapa tok ya blong bilif blong yumi, we mi mi kasem fastaem, hem i nambawan olgeta, mo mi mi talemaot olgeta finis long yufala. Ol tok ya i olsem. Kraes i ded blong tekemaot ol sin blong yumi, olsem we Baebol i talem.” Nao Pol i pruvum se tok blong hem i tru, taem hem i talem se Kraes ya we i laef bakegen i bin kamtru long “wan kampani blong ol man blong hem we oli moa long faef handred man.” Mo Pol i talem se bighaf blong ol man ya oli laef yet. (1 Korin 15:​3-8) Nao hem i gohed i se: “Long ol tok blong mifala, mifala i stap talemaot se Kraes i laef bakegen finis. ?Be from wanem sam long yufala i stap talem se ol dedman oli no save laef bakegen? Sipos tok ya blong yufala i tru, hemia i min se Kraes i no laef bakegen. Mo sipos hem i no laef bakegen, hemia i min se mifala i stap talemaot gud nius ya, be blong nating nomo, mo yufala i stap bilif, be blong nating nomo tu.”​—1 Korin 15:​12-14.

 ⁸ Tru ya, tijing ya long saed blong laef bakegen hem i impoten tumas. Kristin bilif i nating nomo sipos man i no bilif long laef bakegen long ded. Yes, stret save long saed blong laef bakegen, samting ya nao i mekem we ol trufala Kristin oli defren long ol giaman Kristin. (Jenesis 3:4; Esikel 18:4) Taswe Pol i talem se tijing blong laef bakegen, hem i wan long ol “stamba tijing” blong Kristin skul. Be yumi mas gat strong tingting blong “kam bigman long Kraes.” Pol i talem olsemia i se: “Sipos God i glad blong yumi mekem olsem, bambae yumi gohed.”​—Hibrus 6:​1-3.

Hop Ya Blong Laef Bakegen

9, 10. ?Baebol i minim wanem taem hem i tokbaot laef bakegen?

⁹ Blong mekem bilif blong yumi long laef bakegen i kam strong moa, i gud yumi tingbaot ol kwestin olsem: ?Baebol i minim wanem taem hem i tokbaot laef bakegen? ?Olsem wanem tijing blong laef bakegen i soemaot lav blong Jeova? Ansa blong tufala kwestin ya i save mekem we yumi kam klosap moa long God. Mo tu, i save halpem yumi blong tijimgud ol narafala.​—2 Timoti 2:2; Jemes 4:8.

¹⁰ Long Grik lanwis, tok ya “laef bakegen” i minim “stanap no girap bakegen.” ?Wanem narafala mining we i joen wetem tok ya? Folem wanem we Baebol i soemaot, laef bakegen hemia strong bilif se olgeta we oli ded oli save pulum win mo stanap bakegen. Baebol i soemaot tu se sam man bambae oli laef bakegen wetem bodi blong man from we oli blong laef long wol ya, mo sam man oli laef bakegen wetem spirit bodi, from we oli blong laef long heven. Yumi sapraes tumas long bigfala lav, waes, mo paoa blong Jeova we hop ya blong laef bakegen i soemaot.

11. ?Wanem hop blong laef bakegen we ol tabu man blong God oli gat?

¹¹ Taem Jisas mo ol tabu brata blong hem oli laef bakegen, oli gat spirit bodi we i stret blong oli mekem wok blong olgeta long heven. (1 Korin 15:​35-38, 42-53) Olgeta ya bambae oli ol king long Kingdom blong Mesaea, we bambae i mekem wol ya i kam wan Paradaes. Ol tabu brata ya bambae oli wok olsem ol pris, aninit long Hae Pris ya Jisas. Bambae oli mekem we ransom sakrefaes blong Kraes i karem blesing i kam long ol man, long niufala wol we stret fasin nomo i stap long hem. (Hibrus 7:​25, 26; 9:24; 1 Pita 2:9; Revelesen 22:​1, 2) Be bifo long samting ya, taem ol tabu man ya oli laef yet long wol, oli mas traem bes blong olgeta blong stap klin long fes blong God. Ale, taem oli ded, oli ‘kasem wanem i stret’ long olgeta, hemia se oli laef bakegen long heven wetem spirit bodi we i no save ded samtaem. (2 Korin 5:​1-3, 6-8, 10; 1 Korin 15:​51, 52; Revelesen 14:13) Pol i raetem se: “Yumi bilif we yumi joen finis long Kraes. Hem i ded, mo i olsem we yumi tu i ded. Be hemia i min se yumi save joen tu long hem, blong God i givim niufala laef ya long yumi, olsem we i givim niufala laef long Kraes, i mekem hem i laef bakegen.” (Rom 6:5) ?Olsem wanem long olgeta ya we oli laef bakegen long wol? ?Olsem wanem laef bakegen i save mekem olgeta oli kam klosap moa long God? Stori blong Ebraham i save tijim yumi moa long saed ya.

Laef Bakegen Mo Fasin Fren Wetem Jeova

12, 13. ?Wanem strong pruf we i mekem bilif blong Ebraham i strong se laef bakegen i save kamtru?

¹² Ebraham ya we Baebol i kolem hem “Fren blong God”, i wan nambawan eksampol blong bilif. (Jemes 2:23) Taem Pol i tokbaot olgeta man mo woman blong bilif long Hibrus japta 11, hem i tokbaot Ebraham tri taem. (Hibrus 11:​8, 9, 17) Namba tri taem we hem i tokbaot Ebraham, hemia blong soemaot bilif we Ebraham i gat, taem hem i rere blong obei long God mo kilim pikinini boe blong hem Aesak i ded olsem wan sakrefaes. Ebraham i sua fulwan se Jeova bambae i holem promes ya we  hem i mekem, se bambae i gat wan spesel man i bon long laen blong Aesak. Ebraham i sua fulwan se, nating sipos Aesak i ded olsem wan sakrefaes, be ‘God i save mekem hem i laef bakegen long ded.’

¹³ Jeova i luk we bilif blong Ebraham i strong, nao hem i talem long Ebraham blong i no moa kilim Aesak i ded, be i givim wan anamol olsem sakrefaes long ples blong hem. Be samting ya we i hapen long Aesak i olsem pija blong laef bakegen. Pol i eksplenem samting ya taem hem i talem se: “Hem [Ebraham] i kasem pikinini ya blong hem [Aesak] bakegen, klosap olsem we hem i laef bakegen long ded.” (Hibrus 11:19) Antap long hemia, Ebraham i gat wan strongfala pruf finis se laef bakegen i wan samting we i save kamtru. Yes, paoa blong Ebraham mo Sera blong wokem pikinini i ded finis from we tufala i olfala tumas, be i olsem we Jeova i mekem paoa ya i laef bakegen long tufala nao tufala i gat wan pikinini, hemia Aesak.​—Jenesis 18:​10-14; 21:​1-3; Rom 4:​19-21.

14. (a) ?Ol tok blong Hibrus 11:​9, 10 oli soem se Ebraham i stap wet long wanem? (b) ?Blong kasem ol blesing blong Kingdom long niufala wol, wanem bambae i mas hapen long Ebraham? (c) ?Olsem wanem yumi save kasem ol blesing blong Kingdom?

¹⁴ Pol i talem se Ebraham i wan man we i stap olbaot long evri ples olsem wan strenja, mo i stap long ol haos tapolen nomo, from we hem i stap wet “long wan taon we fandesen blong hem i save stap oltaem nomo. Taon ya, God i mekem ol plan blong hem, mo i wokem finis i stap.” (Hibrus 11:​9, 10) Hemia i no minim wan trufala taon, olsem taon ya Jerusalem we tempol blong God i stap long hem. Nogat. Hem i wan pijatok we i minim Kingdom blong God long heven, we Jisas Kraes mo ol 144,000 man nao oli rul long hem. Mo tu, Baebol i tokbaot ol 144,000 man ya taem oli kasem heven finis, se oli olsem “bigfala taon ya we i tabu, we hemia niufala Jerusalem ya,” no “woman we bambae i mared” long Kraes. (Revelesen 21:2) Long 1914, Jeova i putumap Jisas olsem Mesaea King long Kingdom blong heven, mo i givim oda blong hem i rulum ol enemi blong hem. (Ol Sam 110:​1, 2; Revelesen 11:15) Ebraham, we i “fren blong God,” bambae i mas laef bakegen long ded blong kasem ol blesing blong Kingdom ya. Yumi tu, sipos yumi wantem kasem ol blesing blong Kingdom, yumi mas stap long niufala wol blong God. Maet yumi stap long bigfala kampani we bambae i laef tru long faet blong Amagedon, no maet yumi wan long olgeta we bambae oli laef bakegen long ded. (Revelesen 7:​9, 14) ?Be wanem samting i olsem stamba blong laef bakegen long ded?

Lav Blong God Hem i Stamba Blong Laef Bakegen

15, 16. (a) ?Olsem wanem faswan profet tok blong Baebol i olsem fandesen blong bilif ya se bambae ol dedman oli save laef bakegen? (b) ?Olsem wanem bilif long laef bakegen i save mekem yumi kam klosap moa long Jeova?

¹⁵ Sipos yumi fren gud wetem Papa blong yumi long heven we i gat lav, sipos bilif blong yumi i strong olsem bilif blong Ebraham, mo sipos yumi obei long wanem we God i talem, yumi save kam stret man long fes blong Jeova mo yumi save kam fren blong hem tu. Hemia i givim janis long yumi blong kasem ol blesing aninit long rul blong Kingdom. Yes, faswan profet tok blong Baebol, long Jenesis 3:15 (NW ), i olsem fandesen blong bilif ya se ol man bambae oli save laef bakegen long ded mo oli save fren wetem God. Profet tok ya i talemaot we bambae Pikinini blong woman blong God i smasem hed blong Setan, mo bakegen i tokbaot wan taem we Setan i kakae leg blong Pikinini ya. Taem Jisas i ded long pos, hemia nao taem we Snek i kakae leg blong Pikinini. Taem Jisas i laef bakegen long namba tri dei, i olsem we kil long leg blong Pikinini i kamgud. Ale, Jisas i laef bakegen long ded mo i wokem rod blong ‘brekem paoa blong Setan we i gat paoa blong mekem man i ded.’​—Hibrus 2:​14, NW.

¹⁶ Pol i mekem yumi tingbaot se “God i lavem yumi tumas, mo i soemaot samting ya long yumi  long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) Yumi sinman nomo, mo yumi no stret nating blong kasem kaengud fasin blong God. Taswe yumi mas gat bigfala tangkiu from kaen fasin ya we God i soem long yumi. Samting ya bambae i mekem we yumi kam klosap moa long Jisas mo long Papa blong yumi long heven we i gat lav.​—2 Korin 5:​14, 15.

17. (a) ?Wanem hop we Job i tokbaot? (b) ?Job 14:15 i soemaot wanem long saed blong Jeova? ?Mo samting ya i mekem yu yu harem olsem wanem?

¹⁷ Job i laef bifo we Jisas i kam long wol, mo hem i holemstrong long God. Hem tu i bilif long laef bakegen long ded. Setan i mekem hem i safa bigwan. Ol giaman fren blong Job oli no tokbaot laef bakegen long ded nating. Be Job i no olsem olgeta ya. Hop ya i mekem Job i harem gud. Hem i askem se: “?Sipos wan man we i strong gud i ded, hem i save laef bakegen?” Nao hem i ansa i se: “Evri dei long wok kalabus ya we mi mas mekem, bambae mi mi wet gogo kasem taem we bambae mi mi fri bakegen.” Hem i toktok long God blong hem Jeova i se: “Yu bambae yu singaot long mi, nao mi bambae mi ansa long yu.” Nao, Job i talemaot filing blong God ya we i wokem yumi, i se: “Bambae yu yu wantem tumas we wok blong ol han blong yu i kambak.” (Job 14:​14, 15, NW ) Yes, Jeova i wantem tumas blong luk taem ya we olgeta man blong hem bambae oli laef bakegen long ded. !Taem yumi tingbaot lav mo kaengud fasin ya we hem i soemaot long yumi, nating se yumi sin man, samting ya i mekem we yumi kam klosap moa long hem!​—Rom 5:21; Jemes 4:8.

18, 19. (a) ?Olsem wanem yumi sua se Daniel bambae i laef bakegen? (b) ?Bambae yumi tokbaot wanem long nekis stadi?

¹⁸ Enjel blong God i talem se profet Daniel i wan man we ‘God i lavem hem tumas.’ Daniel i stap strong blong mekem ol wok blong God long ful laef blong hem. (Daniel 10:​11, 19) Hat blong hem i fulwan long Jeova nomo, stat taem hem i go kalabus long 617 B.K.T., * gogo kasem we hem i ded smoltaem afta we hem i luk wan vison long 536 B.K.T., hemia long namba tri yia we Sirus i rul olsem king blong Pesia. (Daniel 1:1; 10:1) Sam taem long namba tri yia ya blong rul blong Sirus, Daniel i kasem wan vison. Long vison ya, hem i luk ol defdefren politik paoa we bambae oli rulum wol, gogo kasem taem we bigfala trabol bambae i kamaot blong finisim rul blong man. (Daniel 11:​1–12:13) Daniel i no kasem save gud mining blong vison ya, taswe hem i askem long enjel we i karem vison ya i kam long hem i se: “?Masta, be bambae en blong ol samting ya i olsem wanem?” Taem enjel i ansa, hem i tokbaot “en blong wol ya,” i se long taem ya “olgeta ya nomo we oli waes bambae oli luksave.” ?Wanem fiuja blong Daniel? Enjel ya i talem long hem se: “Bambae yu yu ded, be bambae yu laef bakegen blong kasem pei blong yu . . .  [“long en blong ol dei ya,” NW ].” (Daniel 12:​8-10, 13) Daniel bambae i girap bakegen “taem we ol stret man oli laef bakegen,” hemia taem we Kraes i rul blong Wan Taosen Yia.​—Luk 14:14.

¹⁹ Naoia, yumi stap klosap tumas long en blong wol ya mo yumi kam moa klosap long taem we Kraes bambae i statem Wan Taosen Yia Rul blong hem. Taswe, yumi mas tingting gud long kwestin ya se, ‘?Bambae mi mi stap long niufala wol, blong mitim Ebraham, Job, Daniel, mo ol narafala man mo woman we oli bin holemstrong long bilif?’ Yumi save stap long taem ya, sipos yumi stap klosap long Jeova oltaem mo yumi obei long ol tok blong hem. Long nekis stadi, bambae yumi tokbaot moa, hop ya blong laef bakegen, blong traem kasem save se hu nao ol man we bambae oli laef bakegen.

[Ol Futnot]

?Yu Yu Tingbaot?

• ?Taem Pol i talemaot bilif blong hem se ol dedman bambae oli laef bakegen, wanem defdefren tingting we ol man oli gat long saed ya?

• ?From wanem bilif ya long laef bakegen i makemaot ol trufala Kristin long ol giaman Kristin?

• ?Olsem wanem yumi save se Ebraham, Job, mo Daniel, trifala i bilif long laef bakegen long ded?

[Kwestin]

[Tok blong pija long pej 9]

Pol i stanap fored long Hedgavman ya Filiks, i talemaot bilif blong hem se ol dedman bambae oli laef bakegen

[Tok blong pija long pej 10]

?From wanem Ebraham i bilif se ol dedman oli save laef bakegen?

[Tok blong pija long pej 12]

Hop ya blong laef bakegen i leftemap tingting blong Job

[Tok blong pija long pej 12]

Daniel bambae i girap bakegen taem God i mekem ol stret man oli laef bakegen