Klosap Nao Bambae i No Moa Gat Fasin Pua

OL MAN we oli pua oli laekem tumas ol pija blong Paradaes, olsem hemia long fored blong magasin ya. Paradaes nao we fas man mo woman, Adam mo Iv, tufala i laef long hem. Hom blong tufala hemia garen blong Iden. (Jenesis 2:​7-23) Nating se faswan Paradaes ya i lus, bilif long wan Paradaes long fiuja​—long wan niufala wol we i no gat fasin pua—​i no wan drim nomo. Bilif ya i stanap long wan strong fandesen, hemia ol promes long Baebol.

Tingbaot promes we Jisas Kraes i talem long laswan dei blong laef blong hem long wol ya. Wan long tufala rabis man we tufala i ded wetem Jisas, hem i bilif se God i naf blong stretem ol problem blong ol man. Hem i se: “Jisas, taem we bambae yu yu kam insaed long kingdom blong yu, plis yu tingbaot mi bakegen.” Ol tok ya i soemaot se rabis man ya i bilif se Jisas bambae i rul olsem King, mo we bambae hem i mekem ol man we oli ded oli laef bakegen. Nao Jisas i ansa long hem se: “Tru mi mi talem long yu tede, se bambae yu yu stap wetem mi long Paradaes.”​—Luk 23:​42, 43, NW.

Baebol i tokbaot olgeta we bambae oli laef long Paradaes se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya.” (Aesea 65:21) Yes, “olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet. Hae God i gat olgeta paoa, mo hemia tok blong hem.”​—Maeka 4:4.

?Be, from wanem God i letem fasin pua i stap tede? ?God i stap givhan olsem wanem long ol puaman? ?Wetaem fasin pua bambae i finis olgeta?

?From Wanem God i Letem Fasin Pua i Stap?

From we rabis enjel ya Setan i girap agens long God, Paradaes we Adam mo Iv i laef long hem bifo i lus. Setan i yusum wan snek blong toktok long Iv, blong pulum hem blong brekem loa blong God, mo blong kakae frut blong wan tri we God i putum tabu long hem. Hem i giaman long Iv, i mekem hem i ting se laef blong hem bambae i moa gud sipos hem i kam independen long God. Taem Iv i givim frut ya long Adam, Adam tu i kakae. Adam i tekem saed blong waef blong hem, mo i tanem baksaed long God.​—Jenesis 3:​1-6; 1 Timoti 2:14.

I stret nomo we God i ronemaot tufala rebol ya long Paradaes, mo stat long taem ya, tufala i mas wokhad blong stap laef. Kam kasem tede, Jeova i letem Setan i rul long ol man we oli gat sin. Samting ya i soemaot klia ol nogud frut we i kamaot taem man i no obei long God. Laef blong ol man long ol yia we i pas i soemaot se ol man oli no naf nating blong putum Paradaes long wol ya. (Jeremaea 10:23) Taem oli kam independen  long God samting ya i mekem plante problem i kamaot, wetem fasin pua tu.​—Prija 8:9.

Be ol man we oli pua oli no stap olsem nomo, we oli no save kasem help, long wol ya we i fulap long trabol. Tok blong God Baebol, i gat ol gudfala advaes blong givhan long olgeta.

“I Nogud Yufala i Stap Tingting Tumas”

Taem Jisas i toktok long wan bigfala hip blong man, i gat plante puaman tu i stap, nao Jisas i talem long olgeta se: “Yufala i traem tingbaot ol pijin ya we oli stap flae olbaot. Olgeta oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. Mo long fes blong hem, yufala i gud moa i winim ol pijin. . . . Nao from samting ya, i nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya. Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.”​—Matiu 6:​26-33.

Wan puaman i no nidim blong go stil. (Ol Proveb 6:30, 31) Sipos hem i putum God long fasples long laef blong hem, hem i save kasem ol samting we hem i nidim. Tingbaot stori blong Tukiso, wan man Lesotho, long Saot Afrika. Long 1998, ol ami blong narafala kantri oli kam long Losotho blong blokem wan grup blong ol man we oli agens long gavman. From faet ya, ol man oli stilim olting long ol stoa, plante man oli lusum wok blong olgeta, mo kakae tu i sot bigwan.

Tukiso i laef long wan eria blong taon ya we ol man oli pua tumas, mekem se plante man raonabaot long hem oli go stil long ol stoa blong oli save stap laef. Taem Tukiso i kambak long smol rum we hem i slip long hem, hem i luk se Meseiso, woman we i stap wetem hem, i gat plante kakae we hem i bin stilim. Tukiso i talem long woman ya se: “Yu karem olting ya oli go afsaed,” mo i talem long hem se fasin stil i agensem loa blong God. Maseiso i obei. Ol man raonabaot oli jikim tufala mo oli go karem ol kakae ya we tufala i sakem.

Tukiso i stanap strong long wanem we hem i lanem long Baebol wetem ol Witnes blong Jeova. ?Olsem wanem? ?From we hem i obei long loa blong God, hem i stap hanggri nomo? Nogat. Sam taem biaen, ol elda long kongregesen blong ol Witnes blong Jeova we Tukiso i joen long hem, oli kam givim kakae long hem. Ol Witnes blong Jeova long nekiswan kantri ya Saot Afrika, oli sanem 2 tan long ol samting we ol brata mo sista long Losotho oli nidim. Maseiso i glad long Tukiso from we hem i obei long God, mo hem i glad from lav we kongregesen i soemaot. Ale Maseiso tu i stadi Baebol. Sloslo tufala i stretem mared blong tufala folem loa, nao tufala i naf blong tekem baptaes blong kam Witnes blong Jeova.  Tufala i stanap strong yet blong mekem wok blong God.

Jeova God i kea long ol puaman. (Lukluk bokis ya “?Wanem Tingting Blong God Long Ol Puaman?”) Wetem lav, God i mekem rod blong givhan long ol man olsem Tukiso mo Maseiso, blong oli save kasem moa save long saed blong hem. Mo long Tok blong hem, hem i givim ol advaes we i stret long laef blong yumi evri dei.

Wan Nambawan Samting

Oltaem ol Witnes blong Jeova oli traem blong soemaot kea long ol puaman, olsem Jeova i mekem. (Galesia 2:10) Taem wan disasta i spolem wan kantri mo ol Kristin tu oli kasem trabol, ol Witnes oli mekem plan blong givhan long olgeta. Samting we i moa impoten, ol Witnes oli tingbaot samting we olgeta man oli nidim long saed blong spirit, wetem ol puaman tu. (Matiu 9:​36-38) Long 60 yia we i pas finis, plante taosen man we oli kasem trening, oli mekem wok blong misinari long ol defren kantri. Olsem nao, wan man mo woman blong hem we tufala i blong Finlan, tufala i kam misinari, tufala i lanem lanwis Sesotho, mo tufala ya nao i tijim Tukiso mo Maseiso blong tufala i kam man blong Jisas. (Matiu 28:​19, 20) Blong mekem misinari wok, plante taem man i mas lego wan rij kantri we i gat plante samting blong mekem laef blong hem i isi, mo i mas muv i go long wan kantri we i pua.

Ol trufala Kristin oli no save stil blong stap laef. Oli gat strong bilif long Jeova God se hem i naf blong givhan long olgeta. (Hibrus 13:​5, 6) Wan rod we Jeova i stap yusum blong givhan long ol man blong hem, hemia kampani blong ol man we oli wosip long hem long fulwol, we oli givgivhan long olgeta.

Wan narafala rod we Jeova i yusum blong givhan long ol puaman, hemia ol gudfala advaes we hem i givim long saed blong laef blong yumi evri  dei. Eksampol, Baebol i talem se: “Man we i man blong stil, hem i mas lego fasin ya. Hem i mas wok had long stret fasin, blong i save gat plante samting blong givhan long hem, nao bambae i save givhan long ol puaman tu.” (Efesas 4:28) Plante man we bifo oli no gat wok, naoia oli naf blong statem wan kampani blong olgeta nomo, oli mekem ol strongfala wok, maet wan wok olsem planem mo wokem garen. Mo tu, Baebol i halpem ol puaman blong lego ol nogud fasin, olsem fasin blong dring bitim mak, nao oli save sevem smol mane.​—Efesas 5:18.

I No Moa Gat Fasin Pua Long Wol​—?Wetaem?

Baebol i talemaot se yumi stap long “ol las dei” blong rul blong Setan. (2 Timoti 3:​1, NW ) Klosap nao bambae Jeova God i sanem Jisas Kraes blong i jajem ol man. ?Wanem bambae i hapen long taem ya? Jisas i ansa long kwestin ya long wan parabol blong hem se: “Long taem ya we mi, mi Pikinini blong Man bambae mi King mi gat olgeta paoa, bambae mi kamtru wetem olgeta enjel blong heven, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i stap seraot ol sipsip blong hem long ol nani blong hem.”​—Matiu 25:​31-33.

Ol sipsip long parabol ya, hemia ol man we oli wantem se Jisas i rul long olgeta. Jisas i tokbaot olgeta olsem sipsip, from we oli folem hem olsem man we i lukaot long olgeta. (Jon 10:16) Ol man ya we oli olsem sipsip bambae oli kasem laef aninit long rul blong Jisas we i stret gud olgeta. Bambae hemia i wan gudfala laef long niufala wol, we i no moa gat puaman. Ol man we oli olsem nani, oli agens long rul blong Jisas, mo bambae oli lus blong olwe.​—Matiu 25:46.

Kingdom blong God bambae i finisim ol rabis fasin. Fasin pua bambae i no moa stap. Wol ya bambae i fulap long ol man we oli laeklaekem olgeta mo oli givgivhan long olgeta. Yumi luksave se niufala wol i rili save kamtru, taem yumi luk ol Witnes blong Jeova long fulwol we lav i joenemgud olgeta olsem ol brata mo sista. Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.”​—Jon 13:35.

[Bokis blong pija long pej 6]

?WANEM TINGTING BLONG GOD LONG OL PUAMAN?

Baebol i singaot God ya we i wokem olgeta man se Man we “i stap givim kakae long olgeta we oli hanggri.” (Ol Sam 146:7) I gat bitim wan handred vas long Baebol we oli soem se God i tingbaot ol puaman.

Eksampol, taem Jeova i givim Loa blong hem long neson blong Isrel bifo, hem i talem long ol man Isrel we oli wokem garen se, oli no mas tekemaot ol kakae long saed blong garen. Oli no mas gobak blong tekemaot ol frut we oli mestem, olsem frut blong olif mo grep. Ol loa ya i blong soem lav long ol strenja, ol pikinini we papa mo mama blong olgeta i ded, ol wido, mo ol narafala we oli kasem trabol.​—Levitikas 19:​9, 10; Dutronome 24:​19-21.

Antap long hemia, God i talem long ol man Isrel se: “Bambae yufala i no mas spolem ol widowoman mo ol pikinini we papa blong olgeta i ded. . . . Sipos yufala i mekem i strong long olgeta, nao oli krae i kam long mi blong mi givhan long olgeta, bambae mi mi save harem olgeta. Nao bambae mi kros long yufala, mi mekem faet i kam, we bambae yufala i ded long hem. Nao ol woman blong yufala bambae oli kam wido, mo ol pikinini blong yufala bambae oli no moa gat papa blong olgeta.” (Eksodas 22:​22-24) Sore tumas, plante man Isrel we oli rij, oli no wantem obei long ol tok ya. From samting ya mo from plante narafala rong bakegen, Jeova i givim woning tru long ol profet blong hem long ol man Isrel ya. (Aesea 10:​1, 2; Jeremaea 5:28; Amos 4:​1-3) Biaen, God i mekem se ol man Asiria, mo afta ol man Babilon, oli kam winim ples blong ol man Isrel. Plante man Isrel oli ded, mo olgeta we oli stap laef oli go kalabus long ol narafala kantri.

Jisas Kraes, Pikinini blong God we hem i laekem tumas, i tingbaot ol puaman olsem Papa blong hem. Taem Jisas i eksplenem from wanem hem i mekem wok blong hem long wol, hem i se: “Hae God i jusumaot mi, mo paoa blong [spirit] blong hem i kam fulap long mi blong mi talemaot gud nius long ol puaman.” (Luk 4:18) Samting ya i no min se Jisas i prij long ol puaman nomo, nogat. Wetem lav, hem i givhan tu long ol rijman. Be taem hem i stap givhan long ol rijman, plante taem hem i soemaot se hem i tingbaot ol puaman tu. Eksampol, hem i givim advaes ya long wan rula we hem i rijman se: “Yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat ol gudgudfala samting blong yu long heven. Mo yu kam, yu biaen long mi, yu man blong mi.”​—Luk 14:​1, 12-14; 18:​18, 22; 19:​1-10.

Jeova God mo Pikinini blong hem, tufala i rili kea long ol puaman. (Mak 12:​41-44; Jemes 2:​1-6) Jeova i tingbaotgud ol plante milian puaman we oli ded tu. Bambae olgeta ya oli laef bakegen long niufala wol we bambae i no moa gat fasin pua.​—Ol Wok 24:15.

[Foto]

Ol Witnes blong Jeova long fulwol we oli joengud olsem ol brata, oli soemaot se i rili save gat wan niufala wol

[Tok blong pija long pej 5]

Tukiso mo Maseiso, wetem misinari we i mekem Baebol stadi long Tukiso

[Tok blong pija long pej 5]

Maseiso, long doa long haos blong hem, wetem misinari we i mekem stadi long hem