‘Jeova i Stap Givhan Long Mi’

Ol Famle We Oli Haremgud From Save Blong God

“STONWOL blong Berlin.” !Hemia nem we wan man mo woman blong hem long Ajentina, tufala i putum long wan wol we tufala i wokem blong seraotem haos blong tufala long tu haf! Tufala i gat ol problem we tufala i no save stretem, nao tufala i no moa laekem tufala.

Sore tumas be i no tufala ya nomo we oli gat ol problem olsem. Laef blong plante famle i fulap long trabol, i no moa gat fasin blong stap tru long narafala mo faet i kam antap bigwan. Yumi harem nogud blong luk samting ya, from we bifo olgeta, God nao i stanemap plan blong famle. (Jenesis 1:​27, 28; 2:​23, 24) Famle i olsem wan Presen we God i givim. Hem i wan nambawan rod blong man i soemaot dip lav long narafala. (Rut 1:9) Taem wanwan memba blong famle i mekem wok we God i wantem hem blong mekem insaed long famle, famle i save givim ona long Jeova mo olgeta evriwan oli save haremgud. *

Taswe, from we God nao i stanemap plan blong famle, yumi mas letem Hem i givim save long yumi olsem wanem blong lukaotgud long famle blong yumi. Baebol i givim plante gudfala advaes we i save givhangud long ol famle speseli taem oli fesem sam problem. Baebol i tokbaot wok blong ol hasban se: “Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo.” Taem wan hasban i folem advaes ya blong Baebol, bambae waef blong hem i glad blong ‘ona gud long hem.’​—Efesas 5:​25-29, 33.

Aposol Pol i tokbaot fasin fren we ol papa mama oli mas mekem long ol pikinini blong olgeta i se: “Ol papa mo mama. Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.” (Efesas 6:4) Taem papa mo mama i folem advaes ya, samting ya i mekem se famle i joengud mo i gat lav long hem. Mo tu, samting ya i mekem se i moa isi long ol pikinini blong oli obei long papa mo mama blong olgeta.​—Efesas 6:1.

Ol poen ya we yumi tokbaot finis oli ol waes advaes we Baebol i givim long saed blong famle laef. Plante famle oli haremgud taem oli mekem ol rul ya blong God i wok long laef blong olgeta. Tingbaot tufala ya blong Ajentina we yumi tokbaot long stat blong haf ya. Afta tri manis we tufala i stadi Baebol wetem ol Witnes blong Jeova, tufala tugeta i stat blong mekem ol waes advaes ya long saed blong mared i wok long laef blong tufala. Tufala i traehad blong kamgud moa long fasin ya blong toktok tugeta, blong kasemsave ol nid blong tufala, mo blong fofogivim tufala. (Ol Proveb 15:22; 1 Pita 3:7; 4:8) Tufala i lanem blong bos long tingting mo blong prea long God blong i givhan long tufala taem tufala i no moa save holem kros blong tufala. (Kolosi 3:19) !Smoltaem biaen, tufala i tekemaot “Stonwol blong Berlin” ya!

God i Save Givhan Long Wan Famle

Save mo fasin ya blong mekem ol loa blong God i wok long laef, i save givim paoa long wan famle blong stanap strong agensem ol traem. Samting ya i impoten tumas, from we ol profet tok blong Baebol oli talem finis se long taem ya we yumi stap long hem naoia, bambae famle i kasem plante trabol. Pol i talem se bambae fasin mo laef blong ol man i kam nogud olgeta. Hem i talem se long ‘ol lasdei,’ bambae ol man oli no moa stap tru long ol narafala, bambae ‘oli no man blong sore,’ mo bambae ol pikinini oli no moa obei long papa mama blong olgeta. Ol fasin ya bambae oli kamaot tu long ol man we ‘oli stap folem fasin  blong Kristin man long fes blong ol narafala man.’​—2 Timoti 3:​1-5.

Taem famle i traehad blong mekem God i glad, samting ya i save halpem olgeta blong fesem ol traem we oli save spolem famle. Plante famle oli faenem se ol advaes blong God oli halpem olgeta blong winim eni trabol we oli fesem. Sipos ol memba blong famle oli wantem gat wan gudfala fasin fren wetem God, olgeta evriwan oli mas mekem ol rul blong Baebol i wok long laef blong olgeta mo oli mas luksave se ‘sipos [Jeova] i no givhan long man blong wokem haos, wok blong man ya i blong nating nomo.’ (Ol Sam 127:1) Bigfala samting we bambae i karem glad long famle hemia taem famle i putum God fasples long laef blong olgeta.​—Efesas 3:​14, 15.

Long Hawai, wan man we nem blong hem Dennis i faenemaot se samting ya i tru. Nating se hem i talem se hem i wan Kristin be hem i gat fasin ya blong tok nogud long narafala man mo blong faet. Hem i joen long ami blong smoltaem, mo taem hem i kambak, fasin blong hem i moa nogud. Hem i wantem faet oltaem mo i no laekem ol narafala man. Hem i talem se: “Mi mi faet oltaem. Mi no wantem save wanem i hapen long mi mo mi mi no fraet blong ded. Mi gohed nomo blong tok nogud long narafala man mo blong faet. Waef blong mi we i wan Witnes blong Jeova i leftemap tingting blong mi blong mi stadi long Baebol.”

Dennis i no wantem lesin long waef blong hem. Be, hem i jenisim tingting ya blong hem from we hem i luk gudfala Kristin fasin blong waef blong hem. Ale, Dennis i go long ol Kristin miting wetem waef blong hem mo ol pikinini blong tufala. Smoltaem afta, Dennis i stat blong stadi Baebol mo hem i gohed gud long saed blong spirit. Hem i bin stap smok blong 28 yia be taem hem i stadi, hem i stopem fasin ya. Mo hem i no moa joen wetem ol fren blong hem we oli gat ol fasin ya we hem i stap traehad blong stopem. Dennis i talem se: “Mi talem tangkiu long Jeova. Famle laef blong mi i kam moa gud. Mifala i go long ol miting mo long wok blong prij tugeta olsem wan famle. Tufala pikinini blong mi, tufala i no moa fraet long mi from we mi lanem blong kontrolem kros blong mi mo mi no moa yusum ol nogud tok. Mifala i save storian tugeta mo haremgud blong tokbaot ol samting long saed blong Baebol. Sipos mi no bin stadi long Baebol ating bambae mi no save stap tede from we, bifo, mi mi wan man we mi save kros kwik.”

Ol famle oli save glad bigwan taem oli wokhad blong mekem samting we Jeova i wantem. Plante stori oli soemaot se sipos wan nomo long famle i mekem ol loa blong God i wok long laef blong hem, famle i save harem gud yet i bitim we i no gat wan nating we i mekem olsem. I nidim save mo taem blong bildimap wan Kristin famle. Be ol memba blong ol famle olsem oli sua se Jeova bambae i blesem ol traehad blong olgeta mo bambae i gat gudfala frut i kamaot from ol traehad ya. Oli save talem ol semfala tok olsem man blong raetem Sam ya se: ‘Jeova i stap givhan long mi.’​—Ol Sam 121:2.

[Futnot]

[Tok blong makem poen pija long pej 9]

God “nomo i givim nem long olgeta famle long heven mo long wol.”​—EFESAS 3:​15, NW

[Bokis blong pija long pej 8]

JEOVA I LUK OL FAMLE OLSEM SAMTING WE I SAS TUMAS

“[God] i blesem tufala, mo i talem long tufala se, ‘I gud yutufala i gat plante pikinini blong yutufala, blong . . . oli save go stap long olgeta ples long wol.’ ”​—Jenesis 1:28.

“Ol man we oli stap ona long Hae God . . . bambae oli save harem gud. Long hom blong yu, woman blong yu bambae i olsem rop ya grep we i gat plante frut blong hem.”—Ol Sam 128:​1, 3.