Wan Kwestin

?From wanem oli no kilim Deved mo Batseba i ded taem tufala i mekem rabis fasin long saed blong seks, be pikinini blong tufala nao i ded?

Loa blong Moses i talem se: “Sipos yufala i luk we wan man i slip wetem woman blong narafala man, bambae yufala i mas stonem tufala, gogo tufala i ded, blong tekemaot rabis fasin ya i gowe long ples blong yufala.” (Dutronome 22:22) Sipos Jeova God i letem blong ol jaj nomo oli jajem Deved mo Batseba folem Loa ya, bambae oli mas kilim tufala ya i ded. Ol jaj ya bifo oli olsem yumi nomo, oli no save luk wanem we i stap long hat blong man taswe oli jajem ol man nogud folem aksin we ol man ya oli mekem. Loa i talem se man we i mekem rabis fasin long saed blong seks i mas ded. Ol jaj blong Isrel oli no gat raet blong fogivim wan man we i mekem rabis fasin ya.

Be, trufala God ya Jeova, hem i save luk ol samting we i stap long hat blong man mo hem i save fogivim ol sin sipos hem i luk se i stret blong hem i mekem olsem. Deved i man ya we Jeova i mekem kontrak wetem hem long saed blong Kingdom. Taswe, taem Deved i mekem sin, Jeova i jusum blong jajem bisnes ya long fasin we i defren mo blong dil wetem bisnes ya hem wan. (2 Samuel 7:12-16) “Man blong jajem olgeta man blong wol” i gat raet blong mekem wan desisen olsem.​—Jenesis 18:25.

?Jeova i luk wanem long hat blong Deved? Smol stamba tok long stat blong Ol Sam 51 i talem se sing ya i tokbaot ol filing blong Deved taem “profet Natan i tok long hem from we hem i slip wetem Batseba.” Ol Sam 51:​1-4 i talem se: “God, oltaem yu yu lavem man tumas, plis yu sore long mi. Fasin blong yu blong gat sore long man i bigwan tumas, plis yu ravemaot ol sin blong mi. Yu wasemaot ol fasin nogud ya long laef blong mi, yu tekemaot ol sin blong mi, yu mekem mi mi klin. Mi mi luksave ol rabis fasin blong mi, oltaem mi mi savegud ol sin blong mi. Sin ya we mi mekem i agens long yu nomo, mi mi mekem ol samting ya we i nogud tumas long fes blong yu.” Jeova i mas luk dip filing ya long hat blong Deved olsem wan pruf se hem i rili tanem tingting blong hem from sin blong hem. From samting ya, Jeova i soem sore long hem. Antap long hemia, Deved hem wan, i wan man we i gat fasin sore. Yes, Jeova i soem sore long ol man we oli gat fasin sore tu. (1 Samuel 24:​4-7; Matiu 5:7; Jemes 2:13) Ale, taem Deved i luksave sin blong hem, Natan i talem long hem se: “Oraet, naoia Hae God i fogivim yu, i tekemaot sin ya blong yu. Bambae yu no save ded from.”​—2 Samuel 12:13.

Deved mo Batseba tufala i no save ronwe long ol frut blong sin blong tufala. Natan i talem long Deved se: “Be from we yu bin mekem i nogud tumas long [Jeova] long samting ya we yu mekem, pikinini blong yu bambae i ded.” Nating se Deved i livim kakae mo i stap harem nogud blong seven dei be pikinini blong tufala i sik mo biaen i ded.​—2 Samuel 12:​14-18.

Samfala oli faenem i had blong kasem save from wanem pikinini ya i mas ded from we Dutronome 24:16 i talem se: “Sipos papa mo mama, tufala i mekem wan samting olsem [we i brekem loa], bambae yufala i no save kilim pikinini blong tufala i ded from.” Be yumi mas tingbaot se sipos bisnes ya i bin stap long han blong ol jaj blong oli jajem, papa, mama mo pikinini ya tu we i stap yet long bel blong mama blong hem, olgeta evriwan bambae oli ded. Maet taem pikinini ya i ded, samting ya i halpem Deved blong luksave klia moa olsem wanem sin we hem i mekem wetem Batseba i mekem Jeova i harem nogud. Yumi save sua fulwan se Jeova i dil wetem bisnes ya long fasin we i stret from we “fasin blong hem i stret gud olgeta.”​—2 Samuel 22:31.

[Tok blong pija long pej 31]

Deved i soem se hem i rili tanem tingting from sin blong hem