Jeova i Mekem Olgeta We Oli Stap Wet Long Hem Oli Sef
Jeova i Mekem Olgeta We Oli Stap Wet Long Hem Oli Sef
“Fasin blong yu we yu stap lavem mi tumas, mo we tingting blong yu i stap strong long mi, oltaem bambae i stap mekem mi mi sef.”—OL SAM 40:11.
1. ?King Deved i wantem se Jeova i mekem wanem? ?Naoia, olsem wanem Jeova i stap mekem olsem Deved i wantem?
DEVED we i king blong Isrel bifo, i ‘wet long Jeova blong i givhan long hem.’ Mo hem i talem se, Jeova ‘i lesin long prea blong hem, i harem krae blong hem.’ (Ol Sam 40:1) Plante taem Deved i luk wetem prapa ae blong hem olsem wanem Jeova i mekem olgeta we oli lavem hem oli sef. From samting ya, hem i save askem long Jeova blong i mekem hem i sef oltaem. (Ol Sam 40:11) Nem blong Deved i stap long lis blong ol man mo woman blong bilif we Baebol i promes se bambae oli “laef bakegen long wan laef we i gud moa.” Taswe naoia, Deved i stap sef long tingting blong Jeova, wetem ol narafala we bambae oli kasem blesing ya. (Hibrus 11:32-35) I no gat wan narafala rod we i save mekem fiuja blong Deved i sua moa, i bitim we hem i stap sef long tingting blong Jeova. Jeova i ‘raetemdaon nem blong hem long wan buk,’ buk ya we i karem nem blong ol man we Hem i stap tingbaot olgeta.—Malakae 3:16.
2. ?Olsem wanem Baebol i givhan long yumi blong kasem save mining blong tok ya se Jeova i mekem man i sef?
2 Ol man mo woman blong bilif we Hibrus japta 11 i tokbaot, oli stap laef bifo we Jisas Kraes i kam long wol. Nating se i olsem, oli mekem laef blong olgeta i laenap wetem tijing ya blong Jisas se: “Man we i tinghae tumas long laef blong hem long wol ya, hem bambae i lusum laef blong hem. Be man we i no tingbaot tumas laef blong hem olsem, hem bambae i holem laef blong hem gogo hem i kasem laef ya we i no save finis.” (Jon 12:25) From samting ya, yumi luksave se, taem Jeova i mekem man i sef, hemia i no min se man ya i no save safa mo se ol man oli no save mekem i nogud long hem. Nogat. Taem Jeova i mekem man i sef, hem i lukaotgud long man ya long saed blong spirit, nao man ya i save gat gudnem long fes blong hem.
3. ?Wanem samting i pruvum se Jeova i mekem Jisas Kraes i sef? ?Mo wanem i kamaot from?
3 Jisas tu, ol man oli mekem i nogud tumas long hem mo tok nogud long hem. Ol enemi blong hem oli kilim hem i ded long fasin we i mekem bigfala sem mo soa long hem. Be hemia i no min se God i brekem promes blong hem blong mekem Mesaea i sef. (Aesea 42:1-6, NW ) Jisas i laef bakegen tri dei afta we oli kilim hem i ded. Samting ya i pruvum se Jeova i harem krae blong hem olsem we i harem krae blong Deved. Blong ansa long Jisas, Jeova i givim paoa long hem blong stanap strong mo holem bilif. (Matiu 26:39) From we Jeova i mekem Jisas i sef olsem, Jisas i kasem laef long heven we i no save kam nogud samtaem, mo i mekem rod blong plante milian man we oli bilif long ransom sakrefaes blong hem, oli save kasem laef we i no save finis.
4. ?Wanem promes i go long ol tabu Kristin mo long “ol narafala sipsip”?
4 Yumi save trastem Jeova se hem i gat sem fasin naoia olsem we hem i gat long taem blong Deved mo Jisas. Hem i naf yet blong mekem ol man blong hem oli sef, mo hem i wantem mekem samting ya tu. (Jemes 1:17) Smol grup blong ol tabu brata blong Jisas we oli stap yet long wol, oli save trastem promes ya blong Jeova se: “Bambae [yufala i] kasem ol gudgudfala samting ya we God i putumgud olgeta oli stap long heven, . . . oli no save kam nogud, mo oli no save kam roten, mo oli no save lus, from we God i stap lukaot gud long olgeta. . . . hem i stap yusum bilif ya blong yufala blong lukaot long yufala long paoa blong hem, gogo bambae i sevem yufala. Hem i mekem ol samting oli rere finis blong sevem yufala, mo bambae hem i soemaot ol samting ya long Lasdei.” (1 Pita 1:4, 5) “Ol narafala sipsip” we oli gat janis blong laef olwe long wol ya, olgeta tu oli save trastem God mo trastem promes ya we hem i talem long Ol Sam, se: “Yufala we tingting blong yufala i stap strong long Hae God, yufala i mas lavem hem. Hae God i stap lukaot gud long ol man we tingting blong olgeta i stap strong long hem, hem i stap sevem olgeta.”—Jon 10:16; Ol Sam 31:23.
Sef Long Saed Blong Spirit
5, 6. (a) ?Olsem wanem God i mekem ol man blong hem oli stap sef long taem blong yumi? (b) ?Olgeta we tabu spirit i makemaot, oli gat wanem fasin fren wetem Jeova? ?Mo olsem wanem long olgeta we oli gat janis blong laef olwe long wol?
5 Long taem blong yumi, Jeova i givim plante samting long ol man blong hem blong mekem oli sef long saed blong spirit. Hem i no blokem ol man blong hem blong ol narafala oli no mekem i nogud long olgeta. Mo hem i no blokem olgeta blong oli no kasem hadtaem mo aksiden olsem olgeta man oli stap kasem. Be hem i stap klosap long olgeta, i givhan long olgeta, mo i leftemap tingting blong olgeta, olsem oli nidim, blong mekem fasin fren we oli gat wetem hem i sef oltaem. Fandesen blong gudfala fasin fren ya, hemia bilif long ransom sakrefaes, plan ya we God i stanemap from lav blong hem. Sam long ol trufala Kristin, tabu spirit blong God i makemaot olgeta blong oli rul wetem Kraes long heven. Oli kam stret man long fes blong God olsem ol spirit pikinini blong hem. Ol tok ya i stret long olgeta ya: “God i tekemaot yumi finis long paoa blong tudak, i putum yumi long paoa blong Pikinini ya blong hem we i lavem hem tumas. Nao yumi stap singaot Pikinini ya blong hem se King blong yumi. Yumi ya we yumi joen long Kraes, hem i mekem yumi i fri finis, we hem i fogivim yumi, i tekemaot ol sin blong yumi.”—Kolosi 1:13, 14.
6 Plante milian trufala Kristin bakegen, promes i go long olgeta tu se oli save kasem blesing from plan ya blong ransom we God i stanemap. Yumi ridim se: “Mi mi Pikinini blong Man, mi . . . no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.” (Mak 10:45) Ol Kristin ya oli stap wet long stret taem blong God blong mekem olgeta “oli fri olgeta, olsem ol pikinini blong hem.” (Rom 8:21) Go kasem taem ya, oli tinghae long fasin fren we olgeta wanwan oli gat wetem God, mo oli traehad wetem fulhat blong olgeta blong kam klosap moa long hem.
7. ?Olsem wanem Jeova i mekem ol man blong hem tede oli sef long saed blong spirit?
7 Wan rod we Jeova i yusum blong mekem ol man blong hem oli sef long saed blong spirit, hemia tru long program we hem i stanemap blong trenem olgeta sloslo. Hemia i mekem se oli kasem save moa long trutok, mo trutok i kam klia moa long olgeta. Mo tu, Jeova i gohed oltaem blong lidim olgeta. Hem i yusum Tok blong hem, ogenaesesen blong hem, mo tabu spirit blong hem blong mekem olsem. ‘Slef we i stret mo waes’ i lukaot long ol man blong God, olsem wan bigfala famle raon long wol. Nomata se ol memba blong famle ya oli blong wanem kantri mo nomata se oli skulgud no nogat, grup ya we i olsem slef i givim ol samting we oli nidim long saed blong spirit, mo sam samtaem i givim samting we oli nidim long saed blong bodi tu.—Matiu 24:45, NW.
8. ?Olsem wanem Jeova i trastem ol man we oli stap tru long hem, mo hem i promes blong mekem wanem long olgeta?
8 Jeova i no blokem Jisas blong ol enemi blong hem oli no kilim hem mo mekem nogud long hem. Long sem fasin, hem i no blokem ol Kristin tede tu. !Samting ya i no min se God i no glad long olgeta! Defren olgeta, samting ya i soemaot se hem i trastem olgeta, se bambae oli stanap strong long saed blong hem olsem hae Rula blong heven mo wol. (Job 1:8-12; Ol Proveb 27:11) Jeova i no save lego olgeta we oli stap tru long hem, “from we Hae God i laekem ol fasin we i stret, mo i no save lego ol stret man ya we tingting blong olgeta i stap strong long hem. Hem bambae i stap lukaot gud long olgeta gogo i no save finis.”—Ol Sam 37:28.
Sef From Lav Mo Tingting Blong God We i Stap Strong Long Yumi
9, 10. (a) ?Olsem wanem Jeova i mekem ol man blong hem oli sef taem i putum tingting blong hem i stap strong long olgeta? (b) ?Olsem wanem Baebol i soem se lav we Jeova i gat long ol man blong hem i mekem olgeta oli sef?
9 Long prea we i stap long Sam 40, Deved i talem se hem i sef from we Jeova i lavem hem tumas mo from we tingting blong Jeova i stap strong long hem. From we Jeova i lavem stret fasin mo tingting blong hem i stap strong long ol man blong hem, hem i talem klia ol rul blong hem. Taem yumi folem ol rul ya long laef blong yumi, samting ya i halpem yumi bigwan blong stap sef. Yumi no kasem bigfala wari, fraet, mo trabol, olsem ol man we oli no wantem folem ol rul ya. Tingbaot ol man we oli harem nogud tumas long ol trabol we i kasem olgeta from we oli tekem drag, dring bitim mak, slip olbaot, mo mekem raf fasin. Be taem yumi no folem ol fasin ya, yumi blokem yumi mo ol famle blong yumi long ol trabol ya. Wanwan taem, Deved i bin gowe long Jeova. Mo samfala tede tu oli mekem olsem, nao tingting blong Jeova i no moa stap strong long olgeta. Be sipos oli tanem tingting blong olgeta from sin we oli mekem, olgeta tu oli save trastem yet promes ya, se God i olsem “ples blong haed” blong olgeta. Oli save singaot long hem wetem glad se: “Yu stap blokem ol trabol oli no kasem mi.” (Ol Sam 32:7) !Hemia i soemaot klia se God i lavem yumi tumas!
10 Wan narafala samting we i soemaot se God i lavem ol man blong hem, hemia woning we hem i givim long olgeta. Hem i talem se oli mas stap longwe long ol rabis fasin blong wol ya, from we i no longtaem bambae hem I spolem olgeta. Yumi ridim se: “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi. Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo.” Sipos yumi lesin mo obei long woning ya, laef blong yumi i save sef blong olwe. Nekis haf blong vas ya i talem olsem, i se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:15-17.
Fasin Luksave, Waes, Mo Tingting Dip i Save Mekem Yumi Sef
11, 12. Eksplenem olsem wanem fasin blong yusum tingting, luksave, mo waes, i save mekem yumi sef.
11 God i pulum Solomon, pikinini blong Deved, blong raetem tok i go long olgeta we oli wantem mekem Hem i glad. Hem i se: “Fasin ya we yu luksave ol samting mo we yu savegud ol mining blong hem [“yusum tingting,” NW ], hem bambae i stap lukaot long yu.” Hem i talem tu se: “Yu mas kasem waestok . . . Sipos yu holem waestok ya, bambae hem i stap lukaot gud long yu. Sipos yu laekem hem, hem bambae i holem yu yu stap gud oltaem.”—Ol Proveb 2:11; 4:5, 6.
12 Yumi yusum tingting blong yumi taem yumi tingting dip long ol save we yumi kasem long Tok blong God. Taem yumi mekem olsem, yumi luksave plante moa samting, nao yumi putum ol stret samting oli stap long fasples long laef blong yumi. Hemia i impoten, from we bighaf blong yumi i save finis—maet from wan samting we i hapen long prapa laef blong yumi—se trabol i stap kamaot taem ol man oli putum ol rong samting long fasples long laef blong olgeta, nating se oli minim blong mekem olsem no nogat. Wol ya blong Setan i pulum yumi blong traehad blong kam rijman, haeman, mo blong kasem paoa antap long ol narafala man. Be Jeova i wantem se yumi traehad from ol samting long saed blong spirit. Sipos yumi putum ol rong samting long fasples long laef blong yumi, yumi save mekem se famle i seraot, yumi no moa gat ol gudfala fren, mo yumi no moa traehad blong kasem ol mak long saed blong spirit. Frut we i kamaot biaen, hemia nogud frut we i mekem yumi harem nogud nomo. Jisas i tokbaot frut ya i se: “?Sipos wan man i kasem olgeta samting blong wol, be i lusum laef blong hem, hem bambae i save winim wanem?” (Mak 8:36) Sipos yumi waes, bambae yumi folem advaes ya blong Jisas se: “Yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya tu long yufala.”—Matiu 6:33, NW.
Denja Blong Tingbaot Yumi Wan Nomo
13, 14. ?Tingbaot yumi wan i minim wanem? ?From wanem i no waes blong tingbaot yumi wan nomo?
13 Yumi bon wetem fasin ya blong intres long yumi wan. Be sipos ol samting we yumi wantem mo laekem oli kam moa impoten long tingting blong yumi i bitim ol narafala samting, trabol i save kamaot. Taswe Jeova i talem long yumi se sipos yumi wantem se fasin fren blong yumi wetem hem i sef, yumi no mas tingbaot yumi wan nomo. Tok ya tingbaot yumi wan, i min se “tingbaot ol samting we yumi nomo i wantem, nidim, mo laekem.” ?Yu ting se hemia fasin blong plante man tede? Yes, Baebol i talem se long “ol las dei” blong wol ya blong Setan, “bambae ol man oli save laekem olgeta nomo,” hemia i min se oli tingbaot olgeta nomo.—2 Timoti 3:1, 2, NW.
14 Ol Kristin oli luksave se i waes blong obei long tok ya blong Baebol, se oli mas intres long ol narafala man mo lavem ol narafala olsem we oli lavem olgeta nomo. (Luk 10:27; Filipae 2:4) Maet plante man oli ting se advaes ya i no save wokgud long laef blong yumi tede. Be i impoten tumas we yumi folem advaes ya sipos yumi wantem se mared blong yumi i stapgud, famle blong yumi i hapi, mo sipos yumi wantem gat plante gudfala fren. From samting ya, wan trufala man blong Jeova i no mas letem fasin ya blong intres long hem wan, we hem i bon wetem, i kam bos long laef blong hem, nao hem i no moa tingbaot ol samting we oli moa impoten. Faswan samting we yumi mas tingbaot, hemia ol samting long saed blong wosip we yumi mekem i go long God blong yumi, Jeova.
15, 16. (a) ?Man we i tingbaot hem wan nomo i save kam wanem kaen man? ?Hu i gat fasin ya? (b) ?Man we i hareap nomo blong jajem narafala i rili mekem wanem?
15 Man we i tingbaot hem wan nomo i save kam flas, hem i save ting se hem i moa stret i bitim ol narafala man. Mo samting ya i save lidim hem blong no moa wantem lesin long tingting mo advaes blong narafala, hem i save kam flas, mo i save mekem samting we hem i no gat raet blong mekem. Baebol i talem stret se: “Ol fren. ?From wanem yufala i stap jajem ol narafala man? Taem yufala i stap mekem olsem, i nating we yufala i wanem man, be yufala i no gat wan tok blong talem. Taem yufala i jajem sam narafala man be yufala tu i stap mekem sem samting nomo we olgeta oli stap mekem, tok ya blong yufala i stap jajem yufala stret.” (Rom 2:1; 14:4, 10) Long taem blong Jisas, ol lida blong skul oli ting se oli moa stret i bitim ol narafala man, ale oli ting se oli gat raet blong tok long Jisas mo ol man blong hem from sam samting we oli mekem. Taem oli mekem olsem, oli putumap olgeta olsem ol jaj. Be oli no luksave se olgeta tu oli gat plante slak fasin, taswe oli rili stap pulum jajmen i kam long olgeta bakegen.
16 Judas, man blong Jisas we i putum Jisas i go long han blong ol enemi blong hem, i kam wan man blong jajem ol narafala. Wan taem long Betani, Meri, sista blong Lasaros, i wasem leg blong Jisas long wan naesfala senta. Judas i tok strong long hem from. Hem i kros i talem se: “?From wanem hem i no salem senta ya blong kasem mane blong givim long ol puaman? !Hemia i naf blong kasem tri handred taosen vatu ya!” Be Baebol i talem from wanem Judas i sakem tok ya, i se: “Hem i tok olsem, i no from we hem i kea long ol puaman, be from we hem i man blong stil. Hem i stap holem basket blong mane blong olgeta, mo samtaem hem i save stil long hem.” (Jon 12:1-6) Yumi neva mas kam olsem Judas mo ol lida blong skul, we oli hareap nomo blong jajem ol narafala, be long rod ya oli rili jajem olgeta bakegen.
17. Talem wan eksampol we i soem se man we i letem tingting blong hem i go antap tumas mo i tok flas i save kasem trabol.
17 Ol narafala faswan Kristin oli no man blong stil olsem Judas. Be sore tumas, sam long olgeta oli kam flas mo tingting blong olgeta i go antap tumas. Jemes i tok long olgeta ya, i se: “Taem yufala i stap tok flas olsem, tingting blong yufala i go antap tumas.” Nao hem i talem se: “Ol tok flas olsem i nogud.” (Jemes 4:16) Sipos yumi tok flas from samting we yumi mekem long wok blong Jeova no from wan spesel wok we yumi kasem, samting ya bambae i no mekem ol narafala oli tinghae long yumi nating. (Ol Proveb 14:16) I gud blong tingbaot wanem i hapen long aposol Pita. Wan taem, hem i letem tingting blong hem i go antap tumas nao i tok flas se: “Maet bilif blong olgeta ya evriwan i save foldaon, be mi, bilif blong mi bambae i no save foldaon samtaem. . . . Nating sipos olgeta oli wantem kilim mi mi ded wetem yu, be bambae mi no save talem se mi no save yu.” Blong talem stret, yumi no gat wan risen nating blong tok flas mo leftemap yumi wan. Evri samting long saed blong yumi, i kamaot from lav mo kaen fasin blong Jeova nomo. Sipos yumi tingbaot samting ya oltaem, yumi no save letem tingting blong yumi i go antap tumas.—Matiu 26:33-35, 69-75.
18. ?Wanem tingting blong Jeova long saed blong fasin praod?
18 Baebol i talem se: “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.” ?From wanem i olsem? Jeova i ansa long kwestin ya, i se: “Mi mi no laekem nating fasin blong praod, mo fasin blong luklukdaon long narafala man.” (Ol Proveb 8:13; 16:18) !Yumi luksave from wanem Jeova i kam kros long ‘king blong Asiria we i tok flas mo i praod tumas’! (Aesea 10:12) Jeova i panisim king ya. I no longtaem bambae Jeova i panisim wol blong Setan tu, wetem ol lida blong hem we yumi save luk mo olgeta we yumi no save luk. Bambae hem i panisim olgeta from we oli praod mo oli tinghae tumas long olgeta. !Yumi neva mas tekem fasin ya blong ol enemi blong Jeova we oli wantem folem prapa tingting blong olgeta nomo!
19. ?Olsem wanem ol man blong God oli save praod mo holem tingting daon tu?
19 I stret nomo we ol trufala Kristin oli praod blong stap olsem ol man blong Jeova. (Jeremaea 9:24) Be oli mas holem tingting daon tu. ?From wanem? From we “olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23) Taswe, blong mekem se yumi holem wok ya we Jeova i givim long yumi olsem ol man blong hem, yumi mas gat sem tingting olsem aposol Pol, we i se: “Jisas Kraes i kam long wol ya blong sevem ol man nogud.” Mo hem i gohed i talem se: “Mi mi nambawan long ol man nogud ya.”—1 Timoti 1:15.
20. ?Olsem wanem Jeova i mekem ol man blong hem oli sef tede? ?Mo olsem wanem Jeova bambae i mekem olgeta oli sef long fiuja?
20 Ol man blong Jeova oli putum ol wok blong God i stap long fasples long laef blong olgeta, mo oli putum ol samting long saed blong prapa laef blong olgeta oli stap long seken ples. From samting ya, yumi save se Jeova bambae i gohed blong mekem olgeta oli sef long saed blong spirit. Yumi save tu se, taem bigfala trabol i kamaot blong finisim rabis fasin blong wol ya, Jeova bambae i mekem se ol man blong hem oli sef, i no long saed blong spirit nomo, be long saed blong bodi tu. Taem oli go insaed long niufala wol we God bambae i mekem, oli save singaot wetem glad se: “![Jeova] i God blong yumi! Yumi stap trastem hem, mo hem i sevem yumi. Oltaem yumi stap trastem hem, mo yumi save harem gud, yumi save glad, from we hem i sevem yumi.”—Aesea 25:9.
Yu Yu Tingbaot?
• ?Olsem wanem King Deved mo Jisas Kraes tufala i sef?
• ?Olsem wanem ol man blong Jeova oli sef tede?
• ?From wanem yumi no mas tingting tumas long yumi wan?
• ?From wanem yumi mas praod mo gat tingting daon tu?
[Kwestin]
[Tok blong pija long pej 9]
?Olsem wanem Jeova i mekem Deved mo Jisas tufala i sef?
[Tok blong pija long pej 11]
?Olsem wanem ol man blong God oli sef long saed blong spirit tede?
[Tok blong pija long pej 12]
Yumi praod blong mekem wok blong Jeova, be yumi mas holem tingting daon tu