No Kam Slak Blong Mekem Ol Gudfala Fasin

APOSOL Pita i talem se: “Yufala i mas mekem fasin blong yufala i stret gud long fes blong olgeta [man].” (1 Pita 2:12) Grik tok long Baebol we oli tanem i kam ‘fasin we i stret gud’ no gudfala fasin i minim samting we i “naes, i leftemap man, i givim ona, mo i nambawan.” Long taem blong yumi, yumi no luk se plante man oli stap traehad blong gat ol fasin we i givim ona mo we i nambawan. Nating se i olsem, ol man blong Jeova tede oli folemgud advaes ya blong Pita. Tru ya, ol man raon long wol oli savegud olgeta from ol gudfala fasin blong olgeta.

Yumi luk ol gudfala fasin ya i klia nomo taem yumi fesem ol wari mo trabol long ‘taem ya we laef blong wol ya i kam strong tumas.’ (2 Timoti 3:1) Evri dei long laef blong yumi, yumi fesem ol traem. Ol fasin we oli no blong Kristin man oli fulap raonabaot long yumi. Antap long samting ya, sam traem oli stap sot taem nomo, be sam narafala traem oli gohed nomo mo oli stap kam antap moa. Nating se i olsem, aposol Pol i givim advaes se: “Bambae yumi no kam slak blong mekem ol gudfala fasin, from we sipos yumi mekem olsem, bambae long stret taem blong hem, yumi save kasem kakae from ol hadwok ya blong yumi.” (Galesia 6:9) ?Be olsem wanem blong mekem​—mo gohed blong mekem—​ol gudfala fasin taem yumi stap harem nogud long ol trabol we oli no save stop nating?

Ol Samting We Oli Save Halpem Yumi Blong Mekem Ol Gudfala Fasin

Ol fasin we i “leftemap man, i givim ona, mo i nambawan,” oli kamaot long hat blong man. Man we i naf blong holem fasin we i stretgud taem hem i fesem ol traem mo trabol, hem i no mekem samting ya nomo taem trabol no traem ya i kamaot. Hem i naf blong mekem olsemia from we evridei hem i stap folem mo wokem ol rul blong Baebol long evri haf blong laef blong hem. ?Wanem sam samting we i save halpem yumi blong mekem ol gudfala fasin? Tingbaot ol haf ya we oli kam biaen.

Wokem tingting blong Kraes. I nidim tingting daon blong stanap strong taem ol man oli mekem i no stret long yumi from nating nomo. Wan man we i tinghae tumas long hem wan, i no wantem blong winim fasin nogud. Be Jisas “i mekem tingting blong hem i stap daon blong i obei long God gogo i ded.” (Filipae 2:​5, 8) Taem yumi tingbaot eksampol blong Jisas, bambae yumi no kam ‘taed mo foldaon’ long tabu wok blong yumi. (Hibrus 12:​2, 3, NW ) Yumi save wokem tingting daon mo fasin obei taem yumi glad nomo blong wok wetem olgeta we oli stap lidim kongregesen. (Hibrus 13:17) Lanem blong tingbaot ol narafala man olsem we oli “gud moa” long yu mo tingbaot ol narafala fastaem.​—Filipae 2:​3, 4.

Tingbaot se Jeova i laekem yu. Yumi mas tingbaot se Jeova ‘i stap, mo i stap mekem i gud long olgeta we oli stap traem faenem hem.’ (Hibrus 11:6) Hem i kea bigwan long yumi mo i wantem we yumi kasem laef we i no save finis. (1 Timoti 2:4; 1 Pita 5:7) Rimemba se i no gat wan samting we i save tekemaot yumi long lav ya blong God mo samting ya i save halpem yumi blong no kam slak taem yumi kasem traem.​—Rom 8:​38, 39.

Putum ful tras blong yu long Jeova. Fasin blong trastem Jeova i impoten tumas speseli taem i luk olsem se ol traem oli no save finis no oli spolem laef blong yumi. Yumi mas gat ful tras long Jeova se Hem bambae i no letem yumi kasem traem “we i strong tumas long yumi,” mo se oltaem bambae Jeova i “mekem rod blong yumi, blong yumi winim samting ya.” (1 Korin 10:13)  Taem yumi putum tras blong yumi long Jeova, yumi save stanap strong nating se klosap yumi ded.​—2 Korin 1:​8, 9.

Prea oltaem. I impoten blong mekem prea we i kamaot long hat. (Rom 12:12) Prea i wan rod blong kam moa klosap long Jeova. (Jemes 4:8) Ating long laef blong yumi, yumi lanem se “sipos yumi askem samting long hem . . . , hem bambae i harem prea blong yumi.” (1 Jon 5:14) Sipos Jeova i letem ol traem ya oli gohed nomo blong traem fasin blong yumi blong holemstrong long hem, yumi mas prea long Jeova blong i halpem yumi blong yumi stanap strong. (Luk 22:​41-43) Fasin ya blong prea i tijim yumi se yumi neva stap yumi wan nomo, mo se taem Jeova i stap klosap long yumi, bambae yumi save win oltaem.​—Rom 8:​31, 37.

Ol Gudfala Wok​—‘God Bambae i Presem Mo Ona Long Yumi From’

Oltaem ol Kristin oli stap ‘harem nogud from plante samting we oli stap kam blong traem olgeta.’ Be nating se i olsem, yumi mas “no kam slak blong mekem ol gudfala fasin.” Taem yu wari, yu save gat paoa sipos yu tingbaot se from fasin blong yu blong holem bilif, ‘God bambae i ona long yu, i presem yu.’ (1 Pita 1:​6, 7) Tekem gud olgeta kakae long saed blong spirit we Jeova i givim long yu blong mekem yu yu strong. Taem yu nidim we wan man i givhan long yu, go luk ol elda long Kristin kongregesen we oli olsem ol man blong lukaot long sipsip, ol tija mo ol man blong givim advaes. (Ol Wok 20:28) Go long ol Kristin miting blong kongregesen oltaem. Ol miting ya oli ‘givhan long yumi blong mekem yumi strong blong lavem ol man, mo blong mekem ol gudfala fasin.’ (Hibrus 10:24) Wan gudfala program blong ridim Baebol evri dei mo blong stadi yu wan bambae i halpem yu blong wekap gud mo kam strong long saed blong spirit; mo tu yu save kam strong taem yu joen oltaem long Kristin wok blong prij.​—Ol Sam 1:​1-3; Matiu 24:14.

Moa yu haremsave fasin lav mo kea blong Jeova, moa bambae yu wantem stap ‘strong blong mekem ol gudfala samting.’ (Taetas 2:14) Rimemba se “man we i stanap strong gogo olgeta samting ya i finis, bambae God i sevem hem.” (Matiu 24:13) !Yes, ol man oli mas luk yumi olsem man we i “no slak blong mekem ol gudfala fasin”!

[Tok blong makem poen pija long pej 29]

Yumi mas gat ful tras long Jeova se Hem bambae i no letem yumi kasem traem “we i strong tumas long yumi,” oltaem bambae hem i “mekem rod blong yumi, blong yumi winim samting ya”

[Tok blong pija long pej 30]

Taem yumi bisi oltaem long ol tiokratik wok, samting ya i halpem yumi blong rere blong fesem ol traem