Wan Kwestin
Wan Kwestin
?Taem ol disaepol oli harem se Pita ya we i stap long presin i stanap afsaed long doa, from wanem oli talem se: “Enjel blong hem ya”?—Ol Wok 12:15.
Maet ol disaepol oli ting se wan enjel we i olsem man blong karem mesej blong Pita nao i stanap afsaed long doa. I gud yumi lukluk long ol vas raonabaot long vas ya.
Herod i kilim Jemes i ded mo i holem Pita, i putum hem long kalabus. Ol disaepol oli gat gud risen blong ting se bambae ol soldia oli mekem sem samting long Pita tu olsem we oli bin mekem long Jemes. Taem Pita i stap long kalabus, oli fasem hem long tu jen mo fo grup blong soldia oli gad long hem, we i gat fo soldia long wan grup. Ale long wan naet, tufala jen ya i kamaot long han blong Pita, i foldaon. Wan enjel i tekemaot hem long kalabus. Taem Pita i luksave wanem we i hapen long hem, hem i talem se: “Man, naoia mi jes luksave we samting ya i tru ya. Masta blong mi i sanem enjel blong hem blong tekemaot mi long paoa blong King Herod.”—Ol Wok 12:1-11.
Wantaem nomo hem i go long haos blong Meri, mama blong Jon Mak. I gat plante disaepol oli kam finis long haos ya. Taem hem i kilkilim doa blong yad blong haos ya, wan haosgel we nem blong hem Roda i kam blong openem doa. Taem Roda i harem save voes blong Pita, hem i no moa openem doa blong letem Pita i kam insaed. Hem i resis i gobak insaed long haos blong talemaot long olgeta we oli stap se Pita i stap stanap afsaed long doa. Fastaem, ol disaepol oli no bilif long samting ya. Oli girap oli talem se: “Enjel blong hem ya.”—Ol Wok 12:12-15.
?Olsem wanem? ?Ol disaepol oli ting se ol soldia oli kilim Pita i ded finis mo se spirit blong hem nao i stap stanap long doa? Nogat, from we ol man blong Jisas oli savegud ol vas blong Baebol long saed blong ol dedman, se oli “no moa save wan samting.” (Prija 9:5, 10) ?Ale sipos i olsem, be ol disaepol oli minim wanem taem oli talem se: “Enjel blong hem ya”?
Ol disaepol blong Jisas oli savegud se ol enjel oli bin givhan long plante man blong God bifo. Tingbaot Jekob. Hem i tokbaot ‘wan enjel we i tekemaot hem long olgeta samting we oli stap spolem hem.’ (Jenesis 48:16) Mo, wan taem Jisas i putum wan pikinini i stanap long medel blong ol man blong hem nao hem i talem long olgeta se: “Yufala i mas lukaot gud blong yufala i no tingting nating long wan long ol pikinini ya. Tru mi talem long yufala, ol enjel we oli stap lukaot long olgeta oli stap long heven, mo oli stap oltaem long fes blong Papa blong mi.”—Matiu 18:10.
Yumi intres blong luk se Young’s Literal Translation of the Holy Bible i tanem tok ya agʹge·los (“enjel”) i kam “man blong karem mesej.” I luk olsem se ol man Jiu oli bilif se wanwan man blong God i gat enjel blong hem—we oli kolem se “enjel we i lukaot long man.” I klia we Baebol i no tijim samting ya. Be i sua se taem ol disaepol oli talem se, “enjel blong hem ya”, oli mas ting se wan enjel we i karem mesej blong Pita i stanap afsaed long doa.