?Yu Yu Storian Wetem Famle Blong Yu?

WAN niuspepa blong Polan (Polityka) i talem se: “Fasin blong yumi blong storian tugeta wetem famle i godaon bigwan.” Long Yunaeted Stet, ol man oli faenem se ol hasban mo waef oli spenem sikis minit nomo long wan dei blong storian tugeta long ol impoten samting long laef. Sam man we oli gat save, oli ting se haf blong ol divos mo fasin seraot insaed long famle i kamaot from problem ya nao.

?Olsem wanem long fasin storian bitwin ol papa mama mo ol pikinini? Semfala niuspepa ya i talem se, “plante taem, ol papa mama oli no storian wetem ol pikinini, be, oli askem ol kwestin long pikinini nomo se: ?Olsem wanem long skul? ?Olsem wanem long ol fren blong yu?” Taswe niuspepa i askem wan kwestin se, “?Sipos hemia nomo storian blong yumi ol papa mama, ale, olsem wanem ol pikinini blong yumi bambae oli lanem blong soemaot filing taem oli fren wetem ol narafala?”

Fasin ya blong storiangud wetem narafala i no kamaot olsem nomo, hem i wan fasin we yumi lanem mo we yumi mas wokhad blong hem. ?Taswe olsem wanem yumi save kamgud moa long fasin ya? Kristin disaepol Jemes i talem impoten advaes ya long yumi se: “Yufala evriwan i mas rere oltaem blong lesin, be yufala i no mas hareap blong toktok. Mo yufala i no mas hareap blong kros.” (Jemes 1:19) Yes blong storiangud wetem ol famle, yumi mas rere blong lesin, mo yumi no mas kwik blong katem toktok blong narafala, no jajem narawan. Lukaot blong no tok daonem narafala, from we samting ya i save blokem storian. Mo tu, Jisas i askem ol gudfala kwestin, i no ol kwestin blong fosem man blong toktok. Be hem i askem ol kwestin blong faenemaot wanem we i stap long tingting blong ol man we oli lesin, mo blong mekem fasin joengud we hem i gat wetem olgeta, i kam strong moa.​—Ol Proveb 20:5; Matiu 16:​13-17; 17:​24-27.

Taem yumi folem ol rul we i stap long Baebol, samting ya bambae i givhan long yumi blong traehad blong storiangud wetem olgeta long famle blong yumi we yumi laekem olgeta tumas. Nao, yumi save gat wan gudfala fasin fren we i save stap blong plante yia​—no blong ful laef blong yumi.