Hem i “Kasem Trabol From Bilif Blong Hem”

LONG taon ya Cernobbio, we i stap long not blong Itali, oli jusum wan smol ples long wan naesfala garen blong putum sam saen blong tingbaot ol man we oli bin ded from narafala i no respektem raet blong olgeta. Wan long ol saen we oli putumap long ples ya i blong tingbaot Narciso Riet. Narciso i bon long Jemani. Papa mama blong hem oli blong Itali. Narciso i kam wan Witnes blong Jeova long ol yia 1930. Long taem blong rul blong Hitler, ol Witnes blong Jeova oli kasem trabol from we oli no wantem leftemap Hitler se hem i hae moa long trufala God, Jeova.

Taem ol Gestapo (polis blong ol Nasi) oli faenemaot se Narciso i stap karem ol Wajtaoa i go long ol brata we oli stap long ol rabis kalabus, Narciso i ronwe i go long Cernobbio. Long ples ya, ol brata oli askem hem blong tanem Wajtaoa i go long lanwis blong Itali mo blong seremaot magasin ya long ol narafala Witnes we oli stap klosap. Ol polis oli faenemaot wok ya blong hem. Wan SS (Schutzstaffel, impoten gad blong Hitler) mo ol man blong hem oli go insaed long haos blong Narciso mo oli arestem hem. Oli karemaot tu Baebol mo sam leta blong hem. Oli talem se ol Baebol ya mo ol leta ya oli ol “pruf” se Narciso i wan man blong brekem loa. Oli sanem Narciso i go long Jemani mo oli putum hem long wan rabis kalabus hemia long Dachau mo biaen oli kilim hem i ded jes bifo we Wol Wo Tu i finis. Saen ya we oli putumap long Cernobbio blong tingbaot Narciso i talem se hem i “kasem trabol from bilif blong hem.”

Bilif blong Narciso Riet wetem plante narafala Witnes tu we ol Nasi oli mekem i nogud long olgeta, i leftemap tingting blong ol Kristin tede blong oli holem strong long Jeova, we hem wan nomo i stret blong ol man oli wosipim hem. (Revelesen 4:11) Jisas i talem se: “Olgeta we ol man oli stap mekem i nogud long olgeta, from we oli stap mekem ol samting we God i wantem, oli save harem gud.” God bambae i tingbaot ol wok blong olgeta mo bambae i givim pei long olgeta from strong tingting we oli gat blong folem rod blong Hem.​—Matiu 5:10; Hibrus 6:10.