Papa Mama​—Givim Samting We Famle Blong Yu i Nidim

“Man we i no . . . lukaot long olgeta famle blong hem, . . . hem i soemaot we hem i no moa holem fasin blong bilif.”​—1 TIMOTI 5:8.

1, 2. (a) ?From wanem ol famle we oli kam long ol Kristin miting tugeta oli leftemap tingting blong ol narafala? (b) ?Wanem sam smosmol trabol we famle i winim blong kam long miting long stret taem?

 TAEM yu lukluk raon long Kristin kongregesen bifo we wan miting i stat, ating yu luk plante pikinini oli stap we oli jenis gud mo oli sidaon klosap long papa mama blong olgeta. I naes tumas blong luk lav we i stap long ol famle ya. Hemia lav we oli gat long Jeova mo bitwin long olgeta. Be maet yumi no tingbaot bigfala wok we ol famle ya oli mas mekem blong kam long ol miting long stret taem.

² Plante papa mama oli bisi ful dei. Mo long dei we i gat miting, famle i bisi moa. I gat kakae blong rerem, sam wok blong mekem long haos, mo sam homwok blong finisim. Wok blong papa mama nao i bigwan moa from we oli mas lukluk se evriwan i swim, i kakae, mo i rere long stret taem. Mo tu, taem i gat ol smosmol pikinini, sam samting i save kamaot long las minit we i tekem moa taem bakegen. Maet fasbon i pleplei nao i terem traoses blong hem. Lasbon, maet i mestem kakae blong hem i foldaon long floa. No maet ol pikinini oli stat raorao. (Ol Proveb 22:15) ?Wanem i kamaot from ol smosmol problem ya? Yes, maet oli save mekem we ol gudfala plan blong papa mama oli no rongud oltaem. Be, nating se ol smosmol samting olsem i save spolem plan blong olgeta, klosap oltaem, famle i stap long Haos Kingdom bifo we miting i stat. !I leftemap tingting blong yumi blong luk ol famle ya oli stap long miting evri wik mo evri yia, gogo kasem we ol pikinini oli gruap mo olgeta tu oli mekem wok blong Jeova!

3. ?Olsem wanem yumi save se Jeova i tinghae long ol famle?

³ Samtaem wok blong yu olsem papa no mama bambae i had mo i mekem yu yu taed. Be yu mas tingbaot se Jeova i tinghae tumas long ol traehad blong yu. Jeova i Stamba blong ol famle. Baebol i talem se Jeova i “givim nem” long olgeta famle long wol ya. Hemia i min se hem nao i wokem fasin ya we i gat papa mama mo pikinini we oli mekemap wan famle. (Efesas 3:​14, 15, NW ) Taswe taem yu papa no mama yu traem mekemgud wok blong yu insaed long famle, yu givim ona i go long Haefala Masta blong heven mo wol. (1 Korin 10:31) ?Yu no ting se hemia wan nambawan blesing ya we yu yu gat? Taswe i stret we yumi tingbaot wanem wok stret we Jeova i givim long ol papa mama. Long stadi ya bambae yumi luk olsem wanem ol papa mama oli save givim samting we famle blong olgeta i nidim. Bambae yumi tokbaot tri samting we God i wantem se ol papa mama oli givim long famle blong olgeta.

Givim Samting Long Saed Blong Bodi

4. ?Jeova i putum hu insaed long famle blong givim samting we ol pikinini oli nidim long saed blong bodi?

⁴ Aposol Pol i raetem se: “Man we i no wantem lukaot long olgeta famle blong hem, mo antap long hem, hem i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timoti 5:8) ?Taem Pol i tokbaot “man” ya long ples ya hem i minim hu? Hem i minim hed blong famle, we plante taem hemia papa. God i givim wan impoten wok tu long woman, hemia blong halpem man blong hem.  (Jenesis 2:18) Plante taem, ol woman long Baebol oli halpem ol man blong olgeta blong givim samting we famle i nidim. (Ol Proveb 31:​13, 14, 16) Tede bitim bifo, i gat plante moa famle we wan papa no wan mama nomo i lukaot long hem. * Plante Kristin mama, no Kristin papa, oli stap mekemgud bigfala wok ya blong lukaot long famle blong olgeta, olgeta wan nomo. Be i tru se, i moagud sipos long wan famle i gat papa mo mama tugeta, mo papa nao i lidim famle ya.

5, 6. (a) ?Wanem samting we i mekem i had long ol papa blong givim samting we famle blong olgeta i nidim? (b) ?Wanem tingting long saed blong wok we bambae i halpem ol Kristin papa blong oli no kam slak long wok ya blong lukaot famle?

⁵ ?Long 1 Timoti 5:​8, Pol i stap talem se ol man oli mas lukaot long famle blong olgeta long saed blong wanem? Ol tok raonabaot long vas ya oli soemaot klia se hem i stap tokbaot ol nid blong bodi. Long wol tede, i gat plante samting we oli mekem i had long ol papa blong givim samting we famle blong olgeta i nidim long saed blong bodi. Trabol long saed blong mane i givim hadtaem long ol man long evri ples long wol, man i trabol from we oli sakemaot hem long wok, no from we hem i no save faenem wok, no from we praes blong ol samting i hae tumas. ?Wanem i save givhan long wan papa blong hem i naf yet blong lukaot long famle blong hem taem hem i fesem ol trabol ya?

⁶ Wan papa i mas tingbaot se wok ya we hem i holem, hemia Jeova we i givim long hem. Ol tok we tabu spirit i pulum Pol blong raetem, oli soem se sipos wan man i naf blong obei long oda ya be hem i no wantem mekem, hem i sem mak nomo long man we i “no moa holem fasin blong bilif.” Wan Kristin bambae i traehad oltaem blong no kam man olsemia long fes blong God. Be, sore tumas, plante man long wol tede “oli no gat filing long ol narafala.” (2 Timoti 3:​1, 3, NW ) Yes, plante papa oli ronwe long wok blong olgeta. Oli no lukluk long nid blong famle. Oli no kea, mo oli ting se i nating nomo sipos oli no wok blong givim samting we famle blong olgeta i nidim. Ol Kristin hasban oli no mas gat olkaen tingting mo fasin olsem. Tingting blong olgeta i mas defren long tingting blong ol narafala man long ples blong wok. Nating se wan wok i daon no i smol nomo, be wan Kristin papa i mas luk se hemia wan wok we i karem ona mo i impoten tumas long hem, from we wok ya i givhan long hem blong lukaot long famle blong hem, mo samting ya nao we i mekem Jeova God i glad.

7. ?From wanem i stret we ol papa mama oli tingbaot eksampol blong Jisas?

⁷ Wan narafala samting we i save halpem ol hed blong famle, hemia sipos oli tingbaot eksampol blong Jisas we i stretgud olgeta. Wan profet tok long Baebol i tokbaot Jisas se hem i “Papa we bambae i Stap Oltaem.” (Aesea 9:​6, 7) Jisas i “las Adam” ya we i tekem ples blong “fas man ya Adam” nao hem i kam papa blong olgeta man we oli soemaot bilif long hem. (1 Korin 15:45) Jisas i no olsem Adam. Adam ya i wan papa we i tingbaot hem wan nomo, mo i lukaot rod blong mekem hem wan nomo i harem gud. Jisas nao hem i nambawan papa ya we yumi nidim. Baebol i tokbaot Jisas i se: “Taem Kraes i letem laef blong hem blong sevem yumi, hem i soemaot fasin ya blong lavem narafala man.” (1 Jon 3:16) Yes, Jisas i rere nomo blong lego prapa laef blong hem from ol man. Be long ol smosmol samting tu, long laef evri dei, Jisas i tingbaot nid blong narafala fastaem long ol nid blong hem wan. I gud we ol papa mama, yufala tu i folem fasin ya blong hem, blong rere blong lego samting we yufala nomo i wantem.

8, 9. (a) ?Ol papa mama oli save lanem wanem long fasin blong ol pijin we oli tingbaot pikinini blong olgeta fastaem? (b) ?Olsem wanem plante Kristin papa mama oli soemaot se oli mekem bigfala sakrefaes?

⁸ Ol papa mama oli save lanem plante samting taem oli tingbaot lav we Jisas i gat, we i mekem i gud long narafala fastaem long hem wan. Oli save mekem olsem taem oli tingbaot toktok ya we Jisas i talem long ol man blong God we oli gowe long stret rod. Hem i se: “Plante taem, mi mi wantem putum han blong mi i goraon long yufala, olsem we faol i pulum ol pikinini blong hem oli kam haed aninit long wing blong hem.” (Matiu 23:37) Long ples ya, Jisas i yusum wan naesfala pijatok blong wan mama faol we i stap haedem ol pikinini blong hem aninit long wing long hem. Wan mama pijin i gat strong tingting we God i putum insaed long hem, blong i mas protektem ol pikinini blong hem. Hem i rere blong lusum prapa laef blong hem blong blokem ol pikinini blong hem long trabol. Yes, ol papa mama oli save lanem bigfala lesen long fasin blong ol pijin ya. Be i gat wan narafala samting we ol mama pijin oli mekem evri dei we yumi save sapraes long hem. Oli flae i go i kam bakegen mo bakegen blong lukaot kakae. Nating se oli taed we oli taed, be oli putum kakae i go long maot blong ol smosmol pijin blong olgeta. Taem ol smosmol pijin ya oli  solemdaon kakae ya finis, oli askem moa bakegen. Plante long ol anamol we Jeova i wokem, “oli waes we i waes” long fasin blong olgeta blong lukaot long nid blong ol pikinini blong olgeta.​—Ol Proveb 30:24.

⁹ Long fasin we i sem mak lelebet, ol Kristin papa mama raon long wol oli rere blong lego samting we olgeta nomo i wantem. Ating yufala i rere nomo blong kasem kil bitim we pikinini blong yufala i kasem kil. Evri dei yufala i lego sam samting we yufala nomo i wantem from we yufala i mas givim samting we pikinini blong yufala i nidim. Plante long yufala i wekap eli moning blong go long wok blong yufala we i had mo we maet yufala i no laekem. Yufala i wokhad blong mekem se famle blong yufala i gat stret kakae we hem i nidim. Yufala i wokhad blong meksua se ol pikinini blong yufala oli gat gudfala klos, wan ples blong slip, mo oli go long skul. Mo samting ya, yufala i stap mekem evri dei, evri yia. !I sua se samting ya we yufala i mekem we i olsem wan sakrefaes mo we yufala i gohed oltaem blong mekem wetem strong tingting, Jeova i glad long hem! (Hibrus 13:16) Be long semtaem, ating yufala i stap tingbaot se i gat sam samting we famle blong yufala i nidim we i moa impoten bitim ol samting blong bodi.

Givim Samting We Oli Nidim Long Saed Blong Spirit

10, 11. ?Wanem nid we i moa impoten? ?Ol Kristin papa mama oli mas mekem wanem fastaem sipos oli wantem givim samting ya long ol pikinini blong olgeta?

¹⁰ Samting we i moa impoten i bitim bodi, hemia ol samting long saed blong spirit. Jisas i talem se: “Man i no save laef long kakae nomo. Evri tok we God i talem, hemia nao samting blong mekem man i laef.” (Matiu 4:4; 5:3) ?Ol papa mama, yufala i save mekem wanem blong givim samting we pikinini i nidim long saed blong spirit?

¹¹ Long saed ya, ating i gat wan vas blong Baebol we plante taem yumi tokbaot, hemia Dutronome 6:​5-7. Plis openem Baebol blong yu mo ridim ol vas ya. Makem gud we fastaem ol papa mama nao oli mas wokem fasin fren blong olgeta wetem Jeova. Oli mas lavem Jeova mo tinghevi long ol tok blong hem. Yes, papa mo mama, yu yu mas wan man blong stadi long Baebol we yu tinghevi long fasin ya. Yu mas ridim Baebol evri dei mo tingting dip long hem blong mekem se yu kasem stret save long ol tingting blong Jeova, ol rul mo ol loa blong hem, mo blong yu lanem tu blong lavem ol samting ya. Taem yu mekem olsem, yu stap fulumap hat blong yu wetem ol nambawan trutok blong Baebol, we biaen bambae oli mekem yu yu harem se yu hapi, yu ona long Jeova, mo yu lavem hem. Nao bambae yu yu gat plante plante gudfala samting blong givim long ol pikinini blong yu.​—Luk 6:45.

12. ?Olsem wanem ol papa mama oli save folem eksampol blong Jisas taem oli mas putum trutok blong Baebol long hat blong pikinini blong olgeta?

¹² Ol papa mama we oli strong long saed blong spirit oli naf blong folem tok blong Dutronome 6:7 (NW), we i talem se oli mas ‘putum ol tok blong Jeova long hat’ blong ol pikinini blong olgeta evri taem we oli gat janis blong mekem olsem. ‘Putum long hat’ i minim se yumi tijim mo yumi makem klia wan poen taem yumi talem poen ya bakegen mo bakegen. Jeova i savegud we yumi ol man​—antap moa ol pikinini—​yumi nidim blong harem sem samting plante taem blong yumi  save lanem. Taswe Jisas i talem samting bakegen plante taem, taem hem i prij long ol man. Eksampol, taem hem i tijim ol disaepol blong hem se oli mas gat tingting daon, oli no mas flas, oli no mas traem winim narawan, hem i yusum plante defren fasin blong talem bakegen ol tijing ya long olgeta. Hem i yusum kwestin blong mekem oli tingting, hem i yusum pijatok, mo i soem long prapa eksampol blong hem. (Matiu 18:​1-4; 20:​25-27; Jon 13:​12-15) Be wan samting we i gud blong makem, se oltaem Jisas i gat longfala tingting. Long sem fasin, ol papa mama oli mas faenem rod blong tijim ol stamba trutok long ol pikinini blong olgeta, oli mas gat longfala tingting blong talem ol rul blong Jeova bakegen mo bakegen gogo pikinini i kasem gud ol rul ya mo i folem.

13, 14. ?Wetaem ol papa mama oli save putum trutok blong Baebol long hat blong ol pikinini blong olgeta? ?Mo oli save yusum wanem blong mekem olsem?

¹³ Taem famle i stadi Baebol tugeta, hemia wan nambawan janis blong tijim pikinini. Tru ya, taem famle i gat wan program blong stadi tugeta evri wik, mo taem stadi ya i givhan long famle, mo i wan hapi taem, stadi ya i wan long ol faswan samting we i save bildimap famle long saed blong spirit. Ol Kristin famle raon long wol oli stap harem gud tumas long ol stadi olsem. Oli yusum ol buk we ogenaesesen blong Jeova i wokem mo oli mekem stadi i laenap long nid blong wanwan pikinini blong olgeta. Buk ya Learn From the Great Teacher i wan nambawan blesing long plante famle, sem mak wetem buk ya Ol Kwestin We Ol Yangfala Oli Askem​—Ol Ansa We Oli Wok Gud. * Be yumi no mas ting se yumi mas tijim pikinini nomo long taem blong stadi.

¹⁴ Olsem Dutronome 6:7 i soem, i gat plante defdefren taem we yufala ol papa mama i save tokbaot ol samting long saed blong spirit wetem ol pikinini blong yufala. Taem yufala i stap wokbaot i go long narafala ples, taem yufala i stap mekem ol wok tugeta, no taem yufala i stap spel nomo, yufala i gat janis blong givim samting we pikinini blong yufala i nidim long saed blong spirit. Be hemia i no min se yufala i “tok” long pikinini blong yufala oltaem long saed blong ol trutok blong Baebol. Defren olgeta, traem mekem we ol storian long famle oli leftemap tingting mo oli save bildimap bilif blong wanwan memba. Eksampol, ol stori insaed long Wekap! oli tokbaot fulap defdefren samting. Ol stori ya oli save openem rod long yumi blong storebaot ol anamol we Jeova i wokem, sam naesfala ples long wol blong yumi, mo ol defdefren kaen kalja mo fasin blong laef blong ol man long nara kantri. Taem yumi storebaot ol samting ya we yumi ridim, yumi save pulum ol yangfala blong olgeta tu, blong oli wantem ridim ol buk blong slef we i stret mo waes.​—Matiu 24:​45-47, NW.

15. ?Olsem wanem ol papa mama oli save halpem ol pikinini blong olgeta blong oli intres long Kristin wok blong prij mo blong tingbaot wok ya olsem wan samting we i karem glad?

¹⁵ Taem yu storian gud wetem ol pikinini blong yu, yu save givhan long olgeta blong kasem wan narafala impoten samting we oli nidim long saed blong spirit. Ol pikinini blong yumi ol Kristin, oli mas lanem olsem wanem blong serem bilif blong olgeta wetem narafala. Taem yu stap storian wetem pikinini  blong yu long saed blong wan poen long Wajtaoa no Wekap! yu save tingbaot sam rod blong pulum tingting blong pikinini i go long wok blong prij. Maet yu askem long hem se: ‘?Hemia wan gudfala save long saed blong Jeova a? ?Yu ting se i gud sipos evri man oli save samting ya? ?Yu save talem wanem long man blong mekem se hem i save samting ya long saed blong Jeova?’ Ol storian olsem oli save halpem ol pikinini blong yu blong oli wantem tokbaot ol samting we oli lanem wetem ol narafala. Nao, taem oli folem yu long wok blong prij, oli save lukluk eksampol blong yu mo olsem wanem yu yu yusum ol save ya we yutufala i bin tokbaot, blong prij long narafala. Mo tu, oli save lanem se wok blong prij hem i wan hapi taem, wan gudfala wok we i mekem man i harem gud mo i glad.​—Ol Wok 20:35.

16. ?Ol pikinini oli save lanem wanem taem oli lesin long ol prea blong papa mama blong olgeta?

¹⁶ Papa mama i save givhan long ol pikinini blong olgeta long saed blong spirit taem oli prea wetem olgeta tu. Jisas i tijim ol disaepol blong hem blong oli prea, mo hem i prea wetem olgeta plante taem. (Luk 11:​1-13) !Oli lanem fulap samting taem oli lesin long ol prea blong stret Pikinini ya blong Jeova! Long sem fasin, ol pikinini blong yu oli save lanem fulap samting taem oli lesin long ol prea blong yu. Maet oli lanem se Jeova i wantem we yumi toktok enitaem nomo long hem, yumi talemaot eni samting we i stap long hat blong yumi no eni wari we yumi gat. Yes, ol prea blong yu oli save halpem ol pikinini blong yu blong lanem impoten trutok ya long saed blong spirit se: Olgeta tu oli save kam fren wetem Papa blong olgeta long heven.​—1 Pita 5:7.

Givim Samting We Oli Nidim Long Saed Blong Filing

17, 18. (a) ?Olsem wanem Baebol i soemaot se i impoten tumas blong soem lav long ol pikinini? (b) ?Olsem wanem ol papa oli mas folem fasin blong Jeova blong soem lav long ol pikinini blong olgeta?

¹⁷ Ol pikinini oli gat nid tu long filing blong olgeta. Baebol i talem long ol papa mama se i impoten tumas we oli givim samting ya long ol pikinini. Eksampol, Baebol i talem long ol yangfala woman se oli mas ‘lavem ol pikinini blong olgeta.’ Hemia haf blong stret tijing we ol yangfala woman oli mas kasem. (Taetas 2:4) Yes, i stret nomo blong soem lav long pikinini. Fasin ya i tijim pikinini, blong hem tu i save soem lav long narafala, mo samting ya i save mekem i gud long pikinini long ful laef blong hem. Man we i no soem lav long pikinini blong hem, hem i krangke. Fasin ya i spolem filing blong pikinini, mo i no laenap nating wetem fasin blong Jeova we hem i soem bigfala lav long yumi nating se yumi sin man.​—Ol Sam 103:​8-14.

¹⁸ Jeova i tekem faswan step blong soemaot lav long ol pikinini blong hem long wol ya. Fas Jon 4:19 i talem se “God i lavem yumi fastaem.” Yufala ol papa, yufala i mas folem fasin blong Jeova. I gud yufala i tekem faswan step blong wokem lav ya we i save joenem yu long pikinini blong yu. Baebol i talem se ol papa oli no mas mekem ol pikinini oli harem nogud, from we samting ya i save mekem “tingting blong olgeta i foldaon.” (Kolosi 3:21) Wan samting we i rili save mekem pikinini i harem nogud, hemia sipos hem i harem se papa no mama blong hem i no lavem hem no i no tinghae long hem. Ol papa we oli harem se i had blong soem filing blong olgeta, oli mas tingbaot eksampol blong Jeova. Nating se Jeova i stap long heven, hem i toktok i kamdaon long wol ya blong talem long Pikinini blong hem se hem i laekem hem mo i glad long hem. (Matiu 3:17; 17:5) !Ating ol tok ya oli rili leftemap tingting blong Jisas! Long sem fasin, sipos ol papa mama oli talem wetem fulhat blong olgeta se oli lavem pikinini blong olgeta mo oli glad long hem, samting ya i save givim paoa long pikinini mo mekem se hem i no fraet.

19. ?From wanem i impoten blong stretem pikinini? ?Olsem wanem ol Kristin papa mama oli traehad blong no bitim mak?

¹⁹ I tru se lav blong papa mama i no wan samting we tufala i talem long toktok nomo. Fastaem, tufala i soemaot lav blong tufala long ol aksin blong tufala. Taem papa mama i givim samting we pikinini i nidim  long saed blong bodi mo spirit, hemia wan rod we tufala i soem se tufala i lavem pikinini blong tufala, antap moa sipos tufala i mekem long fasin we i soem se lav nao i pusum tufala. Fasin stretem, hemia wan impoten fasin tu we i soem lav. Yes, Jeova ‘i save stretem olgeta ya we hem i lavem olgeta.’ (Hibrus 12:6) !Be sipos papa mama i no stretem pikinini blong tufala, hemia i soem se tufala i no laekem hem nating! (Ol Proveb 13:24) Jeova i neva bitim mak long fasin blong hem, hem i ‘stretem ol man, be i no save mekem i strong tumas long olgeta.’ (Jeremaea 46:28) I no isi long ol papa mama we oli sinman nomo, blong oli gat fasin olsem Jeova we i no bitim mak. Be yu save kasem bigfala blesing sipos yu traehad blong no bitim mak. Sipos papa mama i no slak blong stretem pikinini mo oli stretem hem long lav, pikinini i save gruap i kam wan hapi man we i karem frut long laef blong hem. (Ol Proveb 22:6) Ating evri Kristin papa mama oli wantem we pikinini blong olgeta i gat wan laef olsem.

20. ?Olsem wanem ol papa mama oli save halpem pikinini blong olgeta blong “jusumaot laef”?

²⁰ Ol papa mama, yufala i save kasem bigfala blesing sipos yufala i mekem impoten wok ya we Jeova i putum long han blong yufala​—hemia blong givim samting we pikinini blong yufala i nidim long saed blong bodi, spirit, mo filing. Yes, i no gat wan rod we i moagud blong givim janis long pikinini blong yufala blong “jusumaot laef” nao bambae hem i save “laef.” (Dutronome 30:19) Ol pikinini we oli jusum blong mekem wok blong Jeova, mo we oli stap wokbaot yet long rod we i go kasem laef taem oli kam bigman, oli mekem papa mama blong olgeta i glad bigwan. (Ol Sam 127:​3-5) !Glad ya bambae i stap gogo i no save finis! ?Be ol yangfala oli save presem Jeova olsem wanem naoia? Nekis haf bambae i tokbaot poen ya.

[Ol Futnot]

?Bambae Yu Yu Ansa Olsem Wanem?

?Papa mama i save mekem wanem blong givim samting we pikinini i nidim

• long saed blong bodi?

• long saed blong spirit?

• long saed blong filing?

[Kwestin]

[Tok blong pija long pej 18]

Plante pijin oli wokhad blong givim kakae long pikinini blong olgeta

[Tok blong pija long pej 20]

Papa mama i mas lukluk long tufala fastaem se tufala i strong long saed blong spirit

[Tok blong pija long pej 21]

I gat plante janis blong papa mama i tijim pikinini long saed blong God

[Tok blong pija long pej 22]

Taem papa mama i talem long pikinini se tufala i glad long hem, samting ya i save givim paoa long pikinini mo mekem se hem i no fraet