Presem Jeova Long Skul

RAON long wol, ol yangfala Witnes blong Jeova oli faenem rod blong presem Jeova long skul, tru long toktok mo fasin blong olgeta. Tingbaot sam stori we i soemaot strong tingting mo fasin no fraet blong ol yangfala ya.

Wan yangfala Witnes long Gris i mas raetem wan ripot long saed blong fasin ya we man i stap sakem doti long win we yumi pulum. Taem hem i stap lukaot sam save long saed ya insaed long Watch Tower Publications Index, hem i faenem wan haf long Wekap! magasin we i stret long ripot ya blong hem. Long en blong ripot blong hem, hem i talem se ol save we i stap long ripot blong hem i kamaot long Wekap! Tija blong hem i talem se hem i neva bin ridim wan ripot we oli raetem i gud olsemia, ripot ya hem i beswan. Smoltaem biaen, tija ya i yusum ol infomesen blong ripot ya long wan miting blong olgeta, mo gudfala frut i kamaot from. Yangfala Witnes gel ya i tekem desisen blong givim sam moa Wekap! long tija blong hem wetem hemia tu we i talem se: “Ol Tija​—?Bambae Yumi Mekem Wanem Sipos Oli No Stap?” I no longtaem biaen, tija ya i toktok long ol studen long klasrum mo hem i talem gudfala toktok long saed blong Wekap! ya, nao sam narafala studen tu oli askem sipos oli save gat ol wanwan kopi blong olgeta. Yangfala Witnes ya i karem sam moa Wekap! i go long skul blong ol studen oli save ridim sam narafala samting bakegen tu.

Long Benin, Afrika, wan yangfala Kristin gel i fesem wan traem we i defren olgeta. Folem kastom blong ples ya, plante papa mama blong ol studen long skul blong hem, oli joen tugeta blong pem sam tija blong oli tijim sam lesen we ol pikinini blong olgeta oli faenem i had long olgeta. Hemia i blong rerem ol pikinini ya from eksam. Be, ol tija ya oli jusum Sarede moning blong tijim ol studen ya. Yangfala Witnes ya i talem se: “Sarede moning hemia taem we ful kongregesen i go prij. Hemia wan taem long wik we i mekem mi mi hapi mo bambae mi mi no save letem wan narafala samting i tekem ples blong hapi taem ya.” Papa blong gel ya i wan Witnes mo hem wan nomo i lukaot long gel ya. Papa ya i agri long desisen blong gel blong hem mo hem i traem blong storian wetem wan grup blong ol papa mama mo tija blong oli jenisim program blong olgeta. Be, olgeta oli no wantem. Ale, yangfala gel ya i tekem desisen blong no tekem ol lesen ya olsem ol narafala studen long Sarede moning. Defren olgeta, hem i go prij wetem ol brata sista. Ol fren blong hem long skul oli jikim hem mo oli talem long hem blong hem i lego wok blong prij mo i lego Jeova tu. Ol fren blong hem oli sua fulwan se gel ya bambae i no winim eksam blong hem. Be afta we oli mekem eksam, grup blong ol studen ya we oli stap tekem lesen evri Sarede, oli lus long eksam blong olgeta be yangfala sista blong yumi i winim eksam blong hem. From samting ya ol pikinini oli no moa jikim hem. Ale, ol studen oli talem long yangfala sista ya se: “Yu mas gohed blong mekem wok blong God blong yu.”

Long Jek Ripablik, wan yangfala gel we i gat twelef yia blong hem i mas raetem wan stori blong talemaot tingting blong hem long saed blong wan buk we hem i ridim. Mama blong hem i talem long hem blong tokbaot buk ya Man We i Hae Moa Long Olgeta Man. Hem i statem stori blong hem wetem ol kwestin olsem: “?Wanem tingting blong yu? ?Hu ya man ya we i hae moa long olgeta man long wol?” Nao, hem i tokbaot Jisas, laef blong Jisas taem hem i stap long wol mo ol tijing blong hem. Afta hem i tokbaot japta ya we i talem se: “Wan Lesen Long Fasin Fogif.” Tija blong hem i talem long hem se: “!Hemia beswan stori we mi mi harem long yu!” mo tija ya i glad blong tekem buk ya Man We i Hae Moa Long Olgeta Man. Sam narafala studen tu oli wantem gat semfala buk ya. Long nekis dei, gel ya i glad tumas blong givimaot 18 buk bakegen long ol pikinini long klas blong hem.

Ol yangfala ya oli faenem bigfala glad taem oli presem Jeova long skul. I gud yumi evriwan yumi folem fasin blong olgeta yangfala ya we oli gat strong tingting mo fasin no fraet blong presem Jeova.