Wok—?Wan Blesing No Wan Panis?
Wok—?Wan Blesing No Wan Panis?
“I no gat samting we i gud moa bitim we [man] i . . . haremgud from ol hadwok blong hem.”—Prija 2:24, NW.
“TAED bitim mak long en blong dei.” Wan ripot we i jes kamaot, i soemaot se 1 man long evri 3 man we oli wok, oli taed olsem. Yumi no sapraes long samting ya, from ol man ya oli wok long medel blong ol narafala we oli wari tumas, oli spenem plante moa taem long wok, mo oli karem haf wok blong olgeta i go long haos—mo antap long ol samting ya, oli gat wan bos we i neva talem gudfala toktok blong soem tangkiu.
From we ol faktri tede oli yusum ol bigbigfala mesin blong wokem ol samting, ale ol man blong wok oli harem se oli nating nomo, mo se wok blong olgeta i no impoten. Plante taem ol wok olsem oli blokem ol man blong oli no yusum waes blong olgeta mo gudhan we oli gat blong wokem samting. From samting ya, ol man oli gat nogud tingting long saed blong wok. I isi nomo blong ol man oli no moa intres long wok blong olgeta. Maet oli no moa wantem traehad blong mekem nambawan wok. Ol samting ya oli save mekem ol man oli no moa laekem wok, maet i mekem we man i no moa wantem wok nating.
Jekem Gud Tingting Blong Yumi
I tru se, i no evriwan we oli save jenisim wok blong olgeta sipos oli no laekem. ?Be yu ting se yumi save jenisim tingting blong yumi? Sipos yu luk se sam samting oli mekem we yu tingting nogud long saed blong wok, skelem tingting blong God long saed ya mo ol rul blong hem. (Prija 5:18) Plante man oli faenemaot se taem oli tingbaot ol samting ya, oli glad mo oli haremgud long wok blong olgeta.
God i Bigfala Man Blong Wok. God i wan man blong wok. Maet yumi no tingbaot se hem i wan man olsem, be long faswan buk blong Baebol, God i soemaot se hem i wan man blong wok. Fastok blong buk blong Jenesis i talem se Jeova i wokem heven mo wol. (Jenesis 1:1) Tingbaot ol defdefren wok we God i mas mekem long taem ya—hem i wokem plan, i oganaesem wok, hem i enjinia, hem i gat gudhan blong flasem ol samting, i savegud ol stret samting blong yusum, i wokem ol niufala projek, i wokem ol kemikol, hem i speselis long saed blong laef blong ol man mo ol anamol, i mekem plante samting oli wok olsem we oli folem klok, mo i save evri lanwis. Hemia sam nomo long ol wok we hem i mekem.—Ol Proveb 8:12, 22-31.
?Wok we God i mekem, i gud no i nogud? Baebol i talem se wok we hem i mekem i “gud tumas,” i “gud we i gud tumas.” (Jenesis 1:4, 31) !Yes, ol samting we God i wokem oli “stap soemaot bigfala paoa blong [hem],” mo yumi tu yumi mas presem hem from!—Ol Sam 19:1; 148:1.
Be taem God i wokem skae mo wol wetem faswan man mo woman, wok blong hem i no finis long ples ya. Jisas Kraes, Pikinini blong Jeova, i talem se: “Oltaem Papa blong mi i stap wok.” (Jon 5:17) Yes, Jeova i gohed blong wok taem hem i givim ol samting we ol man mo ol anamol oli nidim, i lukaotgud long ol samting we hem i wokem blong oli gohed blong laef, mo i sevem ol man blong wosip long hem we oli stap tru long hem. (Nehemaea 9:6; Ol Sam 36:6; 145:15, 16) Hem i yusum ol man tu, blong oli ‘wok wetem hem.’—1 Korin 3:9.
Wok i save stap olsem wan blesing. Be Baebol i talem se wok i wan panis, ?no? Maet Jenesis 3:17-19 i givim tingting ya se God i putum baden ya blong wok long Adam mo Iv, blong panisim tufala from we tufala i no obei long hem. Taem God i tok blong givim panis long tufala, hem i talem long Adam se: “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon.” ?Olsem wanem? ?Tok ya i soemaot se wok i wan panis?
Nogat. Hemia i soemaot se, from Adam mo Iv tufala i no stap tru long God, bambae Paradaes blong Iden i no save kam bigwan moa long taem ya. God i mekem se graon ya i kam nogud. Nao sipos wan man i wantem kasem kakae, hem i mas hadwok mo swet from.—Rom 8:20, 21.
Baebol i no talemaot se wok i wan panis, be hem i soem se wok i wan blesing we yumi mas laekem. Olsem we yumi luk finis, God hem wan i wan man blong wok had. From we Jeova i wokem ol man blong oli tekem fasin blong hem, hem i mekem we olgeta oli naf blong lukaot long ol samting we hem i wokem long wol ya mo blong oli bos long olgeta. (Jenesis 1:26, 28; 2:15) God i givim wok ya bifo we hem i talemaot tok we i stap long Jenesis 3:19. Sipos wok i wan nogud samting no wan panis, bambae neva Jeova i leftemap tingting blong ol man blong oli wok. Noa mo famle blong hem oli mas mekem plante wok bifo long Bigfala Ren mo afta long hem. Long ol yia afta we Jisas i kam long wol ya, ol disaepol blong hem tu oli kasem advaes we i pusum olgeta blong wok.—1 Tesalonaeka 4:11.
Be tede, wok i save kam wan baden. Ol wari, denja, man i kam taed, i harem nogud, i wantem winim narafala, i giaman, mo i mekem i no stret long narafala, oli jes sam long ‘ol ropnil mo rabis gras’ we oli joen wetem wok. Be wok hem wan i no wan trabol. Long Prija 3:13, Baebol i talem se wok mo frut we i kamaot from, oli kam long God.—Lukluk bokis ya “Winim Wari Long Saed Blong Wok.”
Wok blong yu i save leftemap nem blong God. Oltaem long ples blong wok, ol man oli presem ol narafala taem oli mekem wok blong olgeta long fasin we i nambawan. Baebol i soemaot se impoten samting long saed blong wok, hemia se man i mas wok gud. God hem wan i wok long fasin we i nambawan. Hem i wokem yumi we yumi gat save mo gudhan blong wok, mo hem i wantem se yumi yusumgud ol samting ya. Olsem nao, long Isrel bifo, taem oli wokem Haos Tapolen blong Hae God, Jeova i givim save, waes, mo fasin blong kasem save, long ol man olsem Bejalehel mo Oholiab, blong oli wokem Eksodas 31:1-11) Hemia i soemaot se God i intres bigwan long wok blong olgeta, olsem wanem oli yusum gudhan blong olgeta blong wokem ol samting, plan we oli folem, mo plante narafala samting long saed blong wok blong olgeta.
sam spesel samting we i nidim gudhan blong mekem olgeta. (Hemia i save gat bigfala paoa long tingting we yumi gat long saed blong yumi wan, ol samting we yumi naf blong mekem, mo fasin blong yumi blong wok. Hemia i givhan long yumi blong yumi luk ol samting ya olsem ol presen we oli kam long God, we yumi no mas ting nating long olgeta. Taswe, ol Kristin oli kasem advaes ya se oli mas mekem wok blong olgeta olsem we God hem wan i jajem wok ya: “Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi, yufala i no stap wok blong ol man nomo.” (Kolosi 3:23) Ol man blong wok blong God oli kasem oda ya blong oli mekem gudfala wok, nao ol man we oli wok wetem olgeta, mo ol narafala man tu, bambae oli glad moa blong lesin long tok we ol Kristin oli talemaot.—Lukluk bokis ya “Folem Ol Rul Blong Baebol Long Ples Blong Wok.”
Taem yumi kasem save se wok blong yumi i save leftemap nem blong God, i gud blong yumi jekem yumi wan blong luk sipos yumi stap wok had, mo sipos yumi stap wok long fasin we i nambawan. ?God bambae i glad long wok blong yumi? ?Yumi glad fulwan long fasin blong yumi blong mekem ol defren wok we yumi mas mekem? Sipos no, yumi mas traehad blong kamgud moa.—Ol Proveb 10:4; 22:29.
Skelem wok wetem ol samting long saed blong spirit. Nating se i gud tumas blong wok had, be i gat wan narafala impoten samting we i save givhan long yumi blong kasem glad long wok mo long laef blong yumi. Hemia ol samting long saed blong spirit. King Solomon, we i bin wok had mo i haremgud long olgeta rij samting blong wol ya, i talem se: “Yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from.”—Prija 12:13.
I klia nomo se, long evri samting we yumi mekem, yumi mas tingbaot wanem we God i wantem. ?Wok we yumi mekem i laenap wetem samting we God i wantem, no maet yumi stap agensem hem? ?Yumi stap traehad blong mekem God i glad, no yumi jes traem blong mekem yumi nomo i haremgud? Sipos yumi no mekem samting we God i wantem, bambae yumi mas harem nogud from, bambae yumi harem se yumi stap yumi wan nomo, mo se laef blong yumi i no gat mining.
Jon 4:34; 5:36) Mo tu, tingbaot se God ya we i Bigfala Man blong Wok, i askem long yumi blong yumi “joen wetem [hem] blong mekem wok blong hem.”—1 Korin 3:9.
Steven Berglas i givim advaes ya se ol man we oli taed tumas from we oli wok had tumas, ‘oli mas joenem wan samting we oli laekem tumas i go long laef blong olgeta.’ I no gat wan samting we i moagud i bitim we, yumi mekem wok blong God ya we i wokem yumi, mo we yumi gat gud han mo yumi naf blong mekem ol wok we i givim glad long yumi. Taem God i glad long wok blong yumi, bambae yumi tu yumi glad. Long tingting blong Jisas, wok ya we Jeova i givim long hem, i mekem hem i kam strong, i mekem hem i glad, mo i givim paoa long hem olsem we wan kakae i save mekem long hem. (Taem yumi wosipim God mo yumi stap gruap long saed blong spirit, yumi stap mekem yumi rere blong kasem ol bigbigfala wok mo ol wok we i givim glad long yumi. Taem wan man i wok, plante taem i gat wari, raorao, mo hem i mas mekem plante samting. Taswe, strong bilif mo ol samting long saed blong spirit oli save givim paoa long yumi we yumi rili nidim taem yumi traehad blong kam wan gudfala man blong wok no wan gudfala bos. Mo tu, ol samting we oli kamaot long laef blong yumi long rabis wol ya, oli save mekem yumi luksave se yumi nidim blong mekem bilif blong yumi i kam strong moa.—1 Korin 16:13, 14.
Taem Wok Bambae i Kam Wan Blesing
Olgeta we oli stap wok strong long wok blong God, oli stap wet long taem ya we God bambae i mekem wol ya i kam wan Paradaes bakegen, nao ol man oli gat fulap gudfala wok blong mekem. Aesea, we i wan profet blong Jeova, i talemaot se laef ya bambae i olsem wanem, hem i se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. . . . Ol samting we olgeta oli hadwok long hem, bambae oli save harem gud long hem longtaem.”—Aesea 65:21-23.
!Long taem ya bambae wok i wan blesing! Sipos yu lanem wanem samting God i wantem yu blong mekem mo yu mekem laef blong yu i laenap wetem save ya, bambae yu yu save stap wetem olgeta ya we Jeova i blesem, nao oltaem bambae yu yu ‘stap glad long ol samting ya we yu stap hadwok long hem.’—Prija 3:13.
[Tok blong makem poen pija long pej 8]
God i Bigfala Man blong Wok: Jenesis 1:1, 4, 31; Jon 5:17
[Tok blong makem poen pija long pej 8]
Wok i save stap olsem wan blesing: Jenesis 1:28; 2:15; 1 Tesalonaeka 4:11
[Tok blong makem poen pija long pej 8]
Wok blong yu i save leftemap nem blong God: Eksodas 31:1-11; Kolosi 3:23
[Tok blong makem poen pija long pej 8]
Skelem wok wetem ol samting long saed blong spirit: Prija 12:13; 1 Korin 3:9
[Bokis/Foto blong pija long pej 6]
WINIM WARI LONG SAED LONG WOK
Ol dokta oli talem se wari we i kamaot from wok, i wan bigfala denja. Hem i save mekem soa i kamaot insaed long bel blong man, i mekem tingting i foldaon, mo i save pusum man tu blong i kilim hem wan i ded. Ol man Japan oli givim wan nem long wari ya—karoshi, we i minim se “ded from wok bitim mak.”
Plante defren samting we i joen wetem wok oli save mekem wari i kamaot. Wari i save kamaot taem ol aoa no ples blong wok oli jenis, taem i gat problem wetem bos, taem i gat jenis long wok no posisen, taem man i ritae, no oli sakemaot hem. Samfala oli traem blong jenisim wok no ples blong olgeta taem oli kasem ol wari olsem. Sam narafala oli traem blong blokem wari ya, be taem oli mekem olsem, kros i kamaot long sam narafala haf blong laef blong olgeta, plante taem insaed long famle. Samfala man oli kasem trabol long filing blong olgeta, tingting blong olgeta i foldaon olgeta, mo oli harem se oli no moa gat rod.
Ol Kristin oli gat plante samting we i save givhan long olgeta blong winim wari we i kamaot from wok. Baebol i givim plante rul we oli save givhan long yumi tru long ol trabol olsem, oli mekem tingting mo filing blong yumi i stap gud, mo yumi stanap strong long saed blong spirit. Olsem nao, Jisas i talem se: “I nogud yufala i stap tingting tumas from ol samting blong tumora. Ol bisnes blong tumora i blong tumora. Trabol blong wan dei, hem i naf finis blong dei ya.” Vas ya i pulum yumi blong tingbaot ol trabol blong tede nomo, i no hemia blong tumora. Long fasin ya, yumi no mekem se trabol ya i kam bigwan bitim mak, we wari blong yumi tu i kam moa bigwan.—Matiu 6:25-34.
I impoten we ol Kristin oli dipen long paoa blong God, be i no long prapa paoa blong olgeta. Sipos yumi harem se wari blong yumi i bigwan tumas we bambae yumi lusum hed from, God i save putum pis mo glad insaed long hat blong yumi, mo i save givim waes long yumi blong yumi winim eni trabol. Aposol Pol i raetem se: “Yufala i mas joen long Masta blong yumi, blong kasem paoa. Hem i gat olgeta paoa, mo yufala i mas kam strong long paoa blong hem.”—Efesas 6:10; Filipae 4:7.
Mo tu, trabol i save mekem se yumi wokem sam gudfala fasin. Yumi save lanem blong lukluk i go long Jeova, yumi lukaotem hem mo trastem hem. Trabol i save pusum yumi blong wokem ol gudfala Kristin fasin, mo mekem yumi naf blong stanap strong longtaem. Pol i tok strong long yumi i se: “Taem yumi kasem hadtaem, yumi save glad, from we yumi save we hadtaem i stap mekem yumi strong, nao yumi save mekem tingting blong yumi i longfala. Nao taem yumi mekem tingting blong yumi i longfala, God i save glad long yumi. Mo taem hem i glad long yumi, hemia i save mekem tingting blong yumi i stap moa long hem.”—Rom 5:3, 4.
Taswe, wari i save mekem yumi gru long saed blong spirit, i bitim we hem i mekem yumi harem nogud mo yumi sore.
[Bokis/Foto blong pija long pej 7]
FOLEM OL RUL BLONG BAEBOL LONG PLES BLONG WOK
Tingting mo fasin we Kristin i soemaot long ples blong wok, i save mekem se plante narafala man, mo olgeta we oli wok wetem hem tu, oli glad blong lesin long ol tok blong Baebol. Aposol Pol i raet i go long Taetas, mo hem i tok strong long ol man blong wok blong “oli obei long ol [bos] blong olgeta, mo blong oli mekem ol [bos] blong olgeta oli harem gud long evri samting. Bambae oli no tokbak long olgeta, mo oli no stil long olgeta. Oli mas soemaot oltaem we oli stap mekem i stret, mo we ol [bos] blong olgeta oli save trastem olgeta. Long fasin ya, long olgeta samting we oli mekem, bambae oli stap leftemap tok blong God ya we i sevem yumi, long fes blong ol man.”—Taetas 2:9, 10.
Olsem nao, tingbaot tok blong wan bisnes man we i raet i go long hedkwota blong ol Witnes blong Jeova, i se: “Mi raetem leta ya from we mi wantem se yufala i givim raet long mi blong askem ol Witnes blong Jeova blong oli kam wok blong mi. Mi wantem tekem olgeta oli wok blong mi from we mi save se oli no stil, oli no giaman, mo mi mi save trastem olgeta. Mo bambae oli no trikim mi. Mi mi trastem ol Witnes blong Jeova nomo. Plis yufala i halpem mi.”
Kyle i wan Kristin woman we i wok long ofis blong wan praevet skul. Wan woman we i wok wetem hem i no kasem save gud long wan bisnes, ale hem i tok swea long Kyle long fored blong sam studen. Kyle i tingbaot taem ya, mo i talem se: “Mi mi mas lukaotgud se mi no sakem doti long nem blong Jeova.” Blong faef dei Kyle i tingbaot olsem wanem hem i save mekem ol rul blong Baebol i wok. Hem i faenem wan long ol rul ya long Rom 12:18, we i talem se: “Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.” Ale Kyle i raet i go long woman ya we tufala i wok tugeta mo i talem sore from trabol ya we i mekem se tufala i no moa joengud. Kyle i askem long woman ya blong i wet afta long wok, nao tufala i save toktok mo stretem problem ya. Taem tufala i mekem samting ya, kros blong woman ya i godaon mo hem i luksave waes fasin blong Kyle blong stretem problem blong tufala. Hem i talem long Kyle se: “Hemia i mas wan fasin we jos blong yu i tijim yu long hem,” nao i holemtaet Kyle mo i talem gud naet long hem. ?Kyle i talem wanem long saed blong bisnes ya? Hem i talem se: “Sipos yumi folem ol rul blong Baebol, bambae yumi no save mekem samting we i rong.”
[Tok blong pija long pej 5]
Plante man blong wok oli harem se oli nating nomo mo se wok blong olgeta i no impoten
[Credit Line]
Japan Information Center, Consulate General of Japan in NY
[Foto Credit Line blong pija long pej 8]
Globe: NASA photo