Yufala Ol Yangfala—!Presem Jeova!
Yufala Ol Yangfala—!Presem Jeova!
‘Yufala ol samting we i stap long wol ya, yufala i mas presem Jeova, . . . yufala ol gel wetem ol boe tu, yufala i mas presem hem.’—OL SAM 148:7, 12.
1, 2. (a) ?Plante yangfala oli save se oli no gat raet long wanem? (b) ?From wanem ol yangfala oli no mas harem nogud long ol samting we papa mama blong olgeta i blokem olgeta blong mekem?
PLANTE taem, ol yangfala oli savegud wanem samting we oli no gat raet yet blong mekem. Plante long olgeta oli save talem stret long yu se taem oli gat yia olsem, ale bambae oli save krosem rod olgeta nomo, no oli save wekap let, no oli save draevem trak. Be samtaem ol yangfala oli save harem nogud from we oli ting se klosap evri samting we oli askem blong mekem, sem ansa nomo i kamaot se, “Yu wet se yu kam bigwan moa.”
2 Yu we yu yangfala, yu save se long lukluk blong papa mama blong yu, i waes blong blokem yu olsem from we samting ya i save protektem yu. Mo tu, yu yu save se Jeova i glad taem yu obei long papa mama blong yu. (Kolosi 3:20) ?Be, olsem wanem? ?Samtaem yu harem olsem se yu no fri blong mekem samting we yu wantem? ?I tru se, taem yu bigman nomo bambae yu save mekem olgeta impoten samting? Nogat. I gat wan wok we plante man i stap mekem tede we i impoten moa i winim olgeta narafala samting we yu yu wantem tumas blong mekem. ?Be yu we yu yangfala, yu gat raet blong joen long wok ya? !Yes yu gat raet, mo antap long hemia, Hae God hem wan i singaot yu blong yu joen long wok ya!
3. ?Jeova i singaot ol yangfala blong oli joen long wanem nambawan wok? ?Wanem ol kwestin we naoia bambae yumi tokbaot?
3 ?Wanem wok ya we yumi stap tokbaot? Ridim ol tok ya we oli kamaot long vas we stadi blong yumi i stanap long hem, hem i se: “Yufala ol samting we i stap long wol ya, yufala i mas presem [Jeova] . . . Yufala ol gel wetem ol boe, yufala ol ololfala wetem ol pikinini tu, yufala i mas presem hem.” (Ol Sam 148:7, 12) Hemia nao nambawan wok we yu gat janis blong mekem. !Yu save presem Jeova! ?Yu we yu yangfala, yu rili glad blong joen long wok ya? Plante yangfala oli glad tumas blong mekem olsem. I gud blong gat filing olsem olgeta ya. ?From wanem? Blong save from wanem, bambae yumi ansa long trifala kwestin ya. Faswan se, ?from wanem yu mas presem Jeova? Seken wan se, ?olsem wanem yu save presem hem long fasin we i stret? Mo namba tri se, ?wetaem i stret taem blong stat presem Jeova?
?From Wanem Yu Mas Presem Jeova?
4, 5. (a) ?Folem ol tok blong Sam namba 148, yumi gat janis blong “harem” wanem samting? (b) ?Olsem wanem ol samting we oli no save toktok no tingting oli save presem Jeova?
4 Wan nambawan risen from wanem yumi mas presem Jeova, hemia se hem i wokem olgeta samting. Sam namba 148 i halpem yumi blong putum tingting blong yumi long trutok ya. Tingbaot sipos yu stap lesin long wan bigfala grup blong man we oli stap singsing tugeta long wan naesfala singsing we ol tok blong hem oli gat paoa. ?Bambae yu harem olsem wanem? ?Taem yu harem se ol tok blong sing ya oli tru, mo oli talemaot samting we i impoten, i mekem yu yu glad, mo i leftemap tingting blong yu, bambae yu harem se yu tu yu wantem tumas blong singsing? Yes, ating plante long yumi bambae i harem olsem. Ale Sam namba 148 i soem se i gat wan grup blong singa olsem we yu yu save harem singsing blong olgeta. Singsing blong olgeta ya i moagud i bitim hemia we man i mekem. Sam ya i tokbaot wan bigfala grup blong ol singa we olgeta evriwan oli stap singsing tugeta blong presem Jeova. Be ating taem yu ridim Sam ya, bambae yu makem wan samting we i defren. ?Wanem samting ya?
5 Plante long ol singa ya we Sam 148 i tokbaot, oli no save toktok mo oli no save tingting tu. Tru ya, san, mun, ol sta, sno, win, ol bigbigfala hil wetem ol smosmol hil, olgeta nao we oli stap presem Jeova. ?Olsem wanem ol samting ya we oli no gat laef oli save presem God? (Vas 3, 8, 9) Oli presem God sem mak olsem we ol tri, ol fis long solwota, mo ol narafala anamol oli stap mekem. (Vas 7, 9, 10) ?Samtaem yu yu lukluk ol kala blong skae taem san i godaon? no ?Yu luk ful mun taem i stap mekem wokbaot blong hem long skae we i fulap long ol sta, olsem wan sip we i sel long solwota? ?Samtaem yu bin laf from we fasin blong sam anamol i fani taem oli pleplei? no ?Yu yu stap sapraes bigwan taem yu kamtru long ol ples we oli naes we oli naes, olsem taem yu stap antap long wan bigfala hil nao yu lukluk i kamdaon? Sipos yes, be hemia i olsem we yu bin “harem” singsing blong olgeta ya we oli stap presem Jeova. Evri samting we Jeova i wokem i mekem yumi tingbaot se hem nao God we i gat olgeta paoa mo we i wokem olgeta samting. I no gat narawan long heven no long wol we i gat paoa, waes, mo lav olsem hem.—Rom 1:20; Revelesen 4:11.
6, 7. (a) ?Sam namba 148 i tokbaot hu bakegen we i presem Jeova? (b) ?Wanem samting i save pusum yumi blong presem Jeova? Talem wan pijatok.
6 Sam namba 148 i talem tu se ol laef samting we oli save tingting, oli stap presem Jeova. Long vas 2, yumi ridim se ol “soldia” blong Jeova long heven, hemia ol enjel, oli stap presem God. Vas 11 i soem se God i wantem we ol man we oli gat paoa mo posisen, olsem ol king mo haeman, olgeta tu oli mas presem hem. ?Sipos ol strongfala enjel oli glad blong presem Jeova, yu ting se wan man long wol ya i gat raet blong ting se hem i impoten tumas, i no nid blong presem Jeova? !Nogat! Ale vas 12 mo 13 i singaot yufala nao ol yangfala, blong yufala i kam presem Jeova. ?Yu yu wantem mekem olsem?
7 Tingbaot pijatok ya. ?Sipos yu yu gat wan fren we hem i gat gudhan blong mekem samting—maet hem i gud long spot, no i save dro gud, no i save plei miusik—bambae yu tokbaot hem long famle blong yu mo long ol narafala fren blong yu? Ating yes. Ale long sem fasin, taem yu lanem se Jeova i mekem plante bigbigfala samting no wok, bambae yu harem tu se yu wantem tokbaot hem long narafala. Ol Sam 19:1, 2 (NTB) i talem se ol sta long skae oli stap “talemaot” ol gudfala wok we God i mekem. Taem yumi tingbaot ol nambawan samting we Jeova i mekem, yumi no save stap kwaet, yumi wantem tokbaot God ya blong yumi long narafala man.
8, 9. ?From wanem Jeova i wantem yumi blong presem hem?
8 Wan narafala nambawan risen blong presem Jeova, hemia se hem i wantem yumi blong mekem olsem. ?From wanem? ?Jeova i nidim we ol man oli presem hem blong leftemap tingting blong hem? Nogat. Yumi ol man, yes, yumi nidim wanwan taem we narafala i presem yumi from gudfala samting we yumi mekem. Be Jeova i hae moa i bitim yumi. (Aesea 55:8) Jeova i neva harem se hem i no naf no se ol wok blong hem i hafhaf. (Aesea 45:5) Nating se i olsem, hem i wantem we yumi presem hem, mo hem i glad taem yumi mekem olsem. ?From wanem? Tingbaot tufala risen ya. Faswan risen se, Jeova i save se yumi nidim blong presem hem. Hem i wokem yumi long wan fasin we yumi nidim ol samting long saed blong spirit, yumi nidim blong wosip. (Matiu 5:3) Jeova i glad taem yumi tingbaot nid ya long saed blong spirit, sem mak olsem we papa mama blong yu tu, tufala i glad taem tufala i luk we yu stap kakae ol kakae we i save mekem i gud long bodi blong yu.—Jon 4:34.
9 Namba tu samting, Jeova i save se ol narafala man oli mas harem ol tok blong yumi we i presem hem. Aposol Pol i raetem ol tok ya i go long yangfala Timoti i se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.” (1 Timoti 4:16) Yes, taem yu tijim ol man long saed blong Jeova God, mo yu presem hem, yu givhan long olgeta blong olgeta tu oli stat save Jeova. !Save olsem bambae i save halpem olgeta ya blong kasem laef blong olwe!—Jon 17:3.
10. ?From wanem yumi wantem presem God blong yumi?
10 Be i gat wan narafala risen yet, from wanem yumi presem Jeova. Tingbaot bakegen pijatok ya se sipos yu gat wan fren we hem i gat gudhan blong mekem samting. ?Olsem wanem sipos yu harem we ol narafala oli stap tokbaot hem, oli stap talem sam giaman stori we i spolem nem blong hem? Ating long taem olsem, bambae yu wantem moa blong talemaot sam gudgudfala tok blong presem fren ya. Jeova tu, ol man oli talem plante giaman toktok long saed blong hem. (Jon 8:44; Revelesen 12:9) Taswe, ol man we oli lavem Jeova oli wantem tumas blong talemaot trutok long saed blong hem, blong stretem ol rong toktok ya. ?Yu tu yu wantem soemaot lav mo tangkiu blong yu long Jeova? ?Yu yu wantem se hem no enemi blong hem Setan nao i rulum yu? Sipos yu wantem we Jeova i rulum yu mo yu wantem soemaot lav mo tangkiu long hem, ale i gud yu presem hem. Be nekis kwestin i stap nao se, ?Olsem wanem blong presem Jeova?
?Olsem Wanem Sam Yangfala Oli Presem Jeova?
11. ?Wanem eksampol long Baebol i soem se ol yangfala oli gat gudhan blong presem Jeova?
11 Baebol i soem se plante taem, ol yangfala oli gat gudhan blong presem Jeova. Tingbaot stori blong yangfala gel Isrel ya we ol man Siria oli tekem hem i go slef long ples blong olgeta. Yangfala ya i no fraet blong tokbaot Elisa we i profet blong Jeova, long misis blong hem. From toktok blong hem, wan merikel i kamaot mo merikel ya i givim gudfala witnes long plante man. (2 King 5:1-17) Jisas tu i no fraet blong tokbaot Jeova taem hem i pikinini. I gat plante samting i hapen long laef blong Jisas taem hem i yangfala. Be Jeova i jusum wan stori nomo blong raetem long Baebol. Hemia stori blong Jisas taem hem i gat 12 yia. Long taem ya hem i askem kwestin long ol tija blong Loa we oli stap long tempol long Jerusalem, mo i bin mekem olgeta ya oli sapraes bigwan blong luk we yangfala ya i gat save long saed blong Jeova.—Luk 2:46-49.
12, 13. (a) ?Jisas i mekem wanem long tempol smoltaem bifo we hem i ded, mo samting ya i mekem wanem long ol man long ples ya? (b) ?Jisas i harem olsem wanem taem ol yangfala boe oli presem hem?
12 Taem Jisas i kam bigman, hem i pulum ol pikinini tu blong oli presem Jeova. Sam dei nomo bifo we hem i ded, hem i stap smoltaem long tempol long Jerusalem. Baebol i talem se hem i mekem “ol gudgudfala wok” long ples ya. Hem i ronemaot ol man we oli stap mekem tabu haos ya blong God i ples blong haed blong ol man blong stil. Hem i hilim ol man we oli blaen mo we oli no save wokbaot gud. Olgeta man we oli stap long tempol ya, antap moa ol lida blong skul we oli luk samting ya, oli sud wantem presem Jeova mo Pikinini blong hem, we hem i Mesaea. Be sore tumas, plante man long taem ya oli no mekem olsem. Nating we oli save se God nomo i sanem Jisas i kam, oli fraet long ol lida blong skul. Be i gat wan smol grup we oli no fraet blong toktok. ?Yu save hu olgeta? Baebol i talem se: “Ol jif pris mo ol tija blong Loa oli luk ol gudgudfala wok ya we hem i mekem. Mo oli harem ol pikinini we oli stap singsingaot se, ‘Hosana long Laen ya blong King Deved.’ Nao olgeta oli kros tumas, oli talem long Jisas se, ‘!Ei! ?Yu harem tok ya we oli stap talem?’ ”—Matiu 21:15, 16; Jon 12:42.
13 Ol jif pris oli ting se bambae Jisas i satem maot blong ol boe ya we oli stap presem hem. ?Jisas i mekem olsem? !Nogat! Hem i ansa long ol pris ya se: “Yes, mi mi harem. ?Be ating yufala i no ridim wan tok long Baebol? Long ples ya wan man i presem God, i talem se, ‘Ol pikinini mo ol smosmol pikinini, be yu yu mekem we olgeta oli save presemgud yu.’ ” I klia se Jisas mo Papa blong hem, tufala i glad tumas long toktok we ol yangfala boe ya oli stap talem blong presem Jisas. Ol smol pikinini ya oli stap mekem samting we olgeta bigman oli sud mekem. Nating se oli yangfala yet, i klia long tingting blong olgeta se hemia nao samting we i stret blong mekem. Oli luk man ya Jisas we i mekem sam nambawan wok, oli harem we hem i no fraet nating blong toktok mo i gat strong bilif, mo oli luk tu we hem i soem bigfala lav long God mo ol man blong God. Hem i bin talem se hem nao Mesaea, no ‘Laen blong King Deved,’ mo hem i mekem olgeta samting we i stret blong Mesaea i mekem. From bilif we ol smol boe ya oli gat, oli mekem wan profet tok blong Baebol i kamtru.—Ol Sam 8:2.
14. ?Olsem wanem ol spesel presen we ol yangfala oli gat i save halpem olgeta blong presem God?
14 ?Yumi save lanem wanem from ol stori ya? Yumi lanem se ol yangfala oli save mekemgud wok ya blong presem Jeova. Plante taem, long tingting blong ol yangfala, trutok i klia mo i isi nomo, ale oli gat strong tingting mo oli wantem tumas blong talemaot bilif blong olgeta. Mo tu, oli gat spesel presen ya we Ol Proveb 20:29 i talem se: “Oltaem yumi glad blong luk ol yangfala, from we bodi blong olgeta i strong.” Yes, blesing blong yufala ol yangfala hemia paoa mo strong bodi. Hemia wan samting we i save halpem yu blong presem Jeova. ?Yu yu save yusum paoa blong yu blong mekem wanem?
?Yu Yu Save Presem Jeova Olsem Wanem?
15. ?Wanem i mas pusum yu blong presem Jeova long rod we i stret?
15 Hat nao i pusum yumi blong presem Jeova. Sipos yu presem Jeova nomo from we hemia samting we narafala i wantem yu blong mekem, hemia yu no rili stap presem Jeova ya. Tingbaot loa ya we i bigwan moa i bitim ol narafala loa: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) ?Yu yu stadi yu wan long Baebol? ?Stadi ya i halpem yu blong save Jeova olsem wan fren? Save we yu kasem taem yu stadi olsem, i mas mekem we yu harem se yu lavem Jeova. Ale, rod blong soemaot lav ya hemia taem yu presem Jeova. Sipos risen we i pusum yu blong presem Jeova i klia nomo long tingting blong yu mo i strong, yu yu rere nao blong presem Jeova wetem fulhat blong yu.
16, 17. ?Olsem wanem fasin blong yumi i save presem Jeova? Givim wan eksampol.
16 Be, bifo we yu tingbaot wanem we bambae yu talem blong presem Jeova, tingbaot fastaem se fasin blong yu i olsem wanem. Tingbaot yang gel ya blong Isrel long taem blong Elisa. ?Sipos fasin blong hem oltaem se hem i tok nogud, i no gat respek long ol bigman, mo i stap giaman, yu ting se masta mo misis blong hem blong Siria bambae tufala i save lesin taem hem i tokbaot profet blong Jeova long tufala? Ating no. Sem mak long yu. Sipos yu yu gat respek long ol man, yu tok tru, mo fasin blong yu i stret, bambae ol man oli rere moa blong lesin long tok blong yu. (Rom 2:21) Tingbaot stori ya.
17 Long Potugal, wan yang gel we i gat 11 yia blong hem i fesem traem long skul blong joen long sam lafet we i no laenap wetem wanem we hem i lanem long Baebol. Wetem respek, hem i talem long tija blong hem from wanem hem i no wantem joen long ol lafet ya. Tija blong hem i tok daonem hem. Taem i pas, mo tija i traem bakegen mo bakegen blong mekem hem i sem. Hem i jikim bilif blong gel ya. Be yang gel ya i gohed nomo blong soem respek long tija ya. Plante yia biaen, yang gel ya i kam wan fultaem paenia, i min se hem i prij fultaem. Taem hem i stap long wan bigfala asembli, hem i stap lukluk olgeta we oli tekem baptaes mo i luksave wan long olgeta. !Hemia tija ya blong hem bifo! Tija ya i glad tumas blong luk studen blong hem bakegen, i holem hem mo i krae. Tija ya i talem se hem i neva fogetem gudfala fasin blong studen ya. Wan Witnes i bin kam long haos blong hem, mo hem i tokbaot gudfala fasin blong studen ya. Ale, hem i stat stadi Baebol mo naoia hem i bilif long ol trutok blong Baebol. !Tru ya, fasin blong yu i wan samting we i save presem Jeova bigwan!
18. ?Yangfala i save mekem wanem sipos hem i harem se i had long hem blong tokbaot Baebol no Jeova long ol fren long skul?
18 ?Samtaem yu harem se i had long yu blong storebaot bilif blong yu long skul? Plante yangfala oli harem olsem. Be yu save mekem rod blong bambae ol narafala nao oli askem yu long saed blong bilif blong yu. Yu save karem sam buk we oli tokbaot Baebol i go wetem yu long skul mo yu save ridim olgeta long medel dei no long narafala taem blong spel, sipos i no gat rul long skul no loa long kantri we i agensem samting ya. Ale, taem yu mekem olsem, maet ol narafala studen bambae oli askem yu se yu stap ridim wanem. Sipos yu talem long olgeta, wanem gudfala samting we yu yu laekem long magasin no buk we yu stap ridim, maet bambae yu sek se yu mo studen we i askem kwestin long yu, yutufala i stat nao blong storebaot Baebol. Tingbaot se i gud blong askem kwestin long olgeta blong traem save bilif blong olgeta tu. Lesin wetem respek, mo serem wanem we yu yu lanem finis long saed blong Baebol. Ol stori long pej 29 oli soemaot se plante yangfala oli stap presem God long skul blong olgeta. Samting ya i mekem olgeta oli glad bigwan mo i halpem olgeta blong save Jeova.
19. ?Olsem wanem ol yangfala oli save kamgud moa long wok blong prij long ol haos wanwan?
19 Wok blong prij long ol haos wanwan i wan nambawan rod blong presem Jeova. Sipos yu no joen long wok ya yet, i gud yu traehad blong kasem mak ya. Sipos yu joen finis long wok ya, ating i gat sam narafala mak we yu save traem blong kasem. Maet yu save tingbaot sam defdefren samting blong tokbaot taem yu prij long ol haos wanwan, blong yu no tokbaot sem samting nomo oltaem. Askem papa mama no wan narafala insaed long kongregesen blong i halpem yu blong save ol rod blong kamgud moa. Traem lanem blong yusum gud Baebol, kamgud moa long fasin blong mekem visit, mo traem statem wan Baebol stadi. (1 Timoti 4:15) Moa we yu presem Jeova long ol defdefren rod ya, moa we bambae yu gat gudhan blong mekem olsem, ale moa we bambae yu glad tu long wok blong prij.
?Yu Yu Save Stat Wetaem Blong Presem Jeova?
20. ?From wanem ol yangfala oli no mas ting se oli yang tumas blong presem Jeova?
20 Laswan long ol trifala kwestin ya we yumi tokbaot long stadi ya, hem i moa isi blong ansarem. Ridim tok ya we Baebol i talem olsem ansa blong kwestin ya: “Naoia we yufala i yangfala yet, oltaem yufala i mas tingbaot [God].” (Prija 12:1) Yes, yu save stat naoia blong presem Jeova. Be maet yu talem se: “Mi mi yang tumas blong presem Jeova. Mi no gat plante save. Ating i moagud mi wet kasem taem we mi olfala moa.” Yu yu no faswan yangfala we i gat tingting olsem. Yangfala Jeremaea i talem sem samting ya long Jeova, i se: “Hae God. Yu yu Masta blong mi. Mi mi no save toktok, from we mi mi yangfala nomo.” Be Jeova i leftemap tingting blong hem se hem i no mas fraet. (Jeremaea 1:6, 7) Long sem fasin, yumi no mas fraet taem yumi presem Jeova. Olgeta samting we oli save kam agensem yumi, be Jeova i gat naf paoa blong stretem fulwan.—Ol Sam 118:6.
21, 22. ?From wanem ol yangfala we oli presem Jeova oli olsem wota blong naet? ?From wanem pijatok ya i leftemap tingting?
21 Taswe, mifala i talem stret long yufala ol yangfala se: !Yufala i no tektaem tumas, yufala i mas stat naoia blong presem Jeova! Naoia we yu yangfala yet, hemia beswan taem blong joen long wok ya we i moa impoten i bitim ol narafala wok long wol tede. Taem yu mekem wok ya, yu kam pat blong wan nambawan samting—yes, yu kam pat blong bigfala famle long heven mo wol we i stap presem Jeova. Jeova i glad tumas sipos yu tu yu wan memba blong famle ya. Ridim ol tok ya we man blong raetem Sam i talem long Jeova: “Long dei we bambae ol ami blong yu oli rere blong faet, bambae ol man blong yu oli kam joen, oli glad blong mekem wok. Taem i jes brok delaet, bambae yu yu gat kampani blong ol yangfala blong yu, oli kam long yu long fasin we i klingud, i tabu, we olgeta oli olsem ol drop blong wota blong naet.”—Ol Sam 110:3, NW.
22 Long eli moning, taem san i saen long ol drop blong wota blong naet we oli stap olbaot long ol lif, olgeta smosmol wota ya oli saenaot mo oli mekem ples i naes tumas. Oli klin, oli saen, mo oli plante tumas, yu no save kaontem olgeta. Hemia nao tingting we Jeova i gat long yufala ol yangfala we yufala i stap presem hem long ol las dei ya. I klia se taem yu jusum blong presem Jeova, yu mekem hat blong hem i glad. (Ol Proveb 27:11) !Taswe, i gud tumas sipos yufala ol yangfala, yufala i presem Jeova!
?Bambae Yu Yu Ansa Olsem Wanem?
• ?Wanem sam impoten risen we i pusum yumi blong presem Jeova?
• ?Wanem eksampol long Baebol i soemaot se ol yangfala oli save mekemgud wok ya blong presem Jeova?
• ?Olsem wanem ol yangfala oli save presem Jeova tede?
• ?Wetaem ol yangfala oli save stat blong presem Jeova, mo from wanem?
[Kwestin]
[Tok blong pija long pej 25]
Sipos fren blong yu i gat gudhan blong mekem samting, bambae yu wantem talemaot hem long ol narafala
[Tok blong pija long pej 27]
Maet sam studen long skul oli intres long bilif blong yu
[Tok blong pija long pej 28]
Sipos yu wantem kamgud moa long wok blong prij, askem wan Witnes we i olfala moa long yu blong i halpem yu