Laef Stori

Glad Blong Joen Long Wok Ya Blong Tijim Baebol

ANNA MATHEAKIS I TALEM STORI YA

Faea i stap bonem sip ya, we longfala blong hem i 171 mita. Sipos bigfala sip ya i draon, bambae solwota i kam beregraon blong mi tu. Mi fraet tumas taem mi stap traehad blong swim agensem ol bigfala wef blong kasem so. I gat wan rod nomo blong stap flot, hemia blong holemtaet laef jaket we wan narafala woman i werem. Mi prea long God blong hem i givim paoa long mi mo blong mi no fraet. Hemia nomo we mi mi naf blong mekem.

HEMIA long yia 1971, taem mi stap gobak long Itali, namba tri kantri we mi mi mekem wok blong misinari long hem. Taem sip ya i rek, mi mi lusum klosap evri samting blong mi. Be mi no lusum ol samting we oli moa impoten​—laef blong mi, gudfala famle blong ol Kristin brata we oli lavem mi, mo janis ya we mi mi gat blong mekem wok blong Jeova. Mi mi mekem wok ya long tri kantri finis, mo sip ya we i rek, i jes wan nomo long plante trabol we mi mi kasem long laef blong mi.

Mi mi bon long 1922. Famle blong mi i stap long taon blong Rām Allāh, samwe 16 kilomita long not blong Jerusalem. Papa mama blong mi, tufala tugeta oli blong aelan ya Krit, be papa blong mi i gruap long Nasaret. Mifala i faef pikinini, tri boe mo tu gel, mo mi mi lasbon. Famle blong mi i harem nogud bitim mak taem namba tu bigfala brata blong mi i ded. Hem i draon long Jodan Reva taem hem wetem ol narafala studen long klas blong hem, oli go swim long reva ya. Afta long trabol ya, mama blong mi i no moa wantem stap long Rām Allāh, ale taem mi mi gat tri yia, mifala i muv i go long Atens, Gris.

Trutok Blong Baebol i Kasem Mifala

Smoltaem afta we mifala i kasem Gris, fasbon brata blong mi, Nikos, we long taem ya hem i gat  22 yia, i stat blong storian wetem ol Baebol Studen, hemia nem blong ol Witnes blong Jeova fastaem. Ol save blong Baebol we Nikos i lanem, oli mekem hem i glad tumas mo oli pusum hem blong mekem Kristin wok ya blong prij. Papa blong mi i kros tumas from samting ya, ale hem i ronemaot Nikos long haos. Be taem papa blong mi i mekem trip i go long Palestaen, mama blong mi, sista blong mi, mo mi, mifala i folem Nikos i go long ol Kristin miting. Mi tingbaot yet, taem mama blong mi i tokbaot wetem glad ol samting we hem i harem long ol miting ya. Be, smoltaem afta, hem i kasem kansa mo i ded taem hem i kasem 42 yia blong hem. Long trabol taem ya, sista blong mi Ariadne, i lukaot long famle blong mifala wetem bigfala lav. Nating se hem i yangfala nomo, be blong plante yia, hem i stap olsem mama blong mi.

Taem papa blong mi i stap long Atens, hem i tekem mi mi go long Otodoks Jos, mo afta we hem i ded, mi mi gohed blong joen sam samtaem long jos ya. Be taem mi luk we ol man blong jos ya oli no mekem laef blong olgeta i laenap nating wetem samting we God i wantem, mi mi no moa go long jos ya.

Afta we papa blong mi i ded, mi mi kasem wan gudfala wok long ministri blong faenens. Be brata blong mi, hem i spenem laef blong hem long wok ya blong talemaot Kingdom, hem i mekem wok ya blong plante yia long Gris. Long 1934, hem i muv i go long Saepras. Long taem ya, i no gat wan Witnes blong Jeova yet long aelan ya, hem nao i mekem wok blong prij i gohed long ples ya. Afta we hem i mared, waef blong hem tu, Galatia, i mekem wok ya blong prij fultaem long plante yia. * Oltaem nomo Nikos i sanem ol buk mo magasin we oli tokbaot Baebol i kam long mifala, be mifala i lukluk olgeta sam samtaem nomo. Nikos i stap long Saepras gogo kasem ded blong hem.

Mi Tekem Trutok i Kam Long Laef Blong Mi

Long 1940, George Douras, wan Witnes long Atens we i gat strong tingting blong wok mo i wan fren blong Nikos, i kam luk mifala mo i invaetem mifala blong joen long smol grup we i mekem Baebol stadi long haos blong hem. Mifala i glad blong go. Smoltaem afta, mifala i stat blong toktok wetem ol narafala man long saed blong ol samting we mifala i lanem. Save we mifala i lanem long Baebol i lidim mi mo sista blong mi, blong mitufala i givim laef blong mitufala i go long Jeova. Ariadne i baptaes long 1942, mo mi, long 1943.

Taem Wol Wo Tu i finis, Nikos i singaot mitufala blong go long Saepras, ale long 1945 mitufala i go long Nicosia. Long Gris, wok blong prij i tabu, be long Saepras i no olsem. Mifala i prij long ol haos wanwan, mo long ol rod tu.

Tu yia biaen, Adriadne i mas gobak long Gris. Long ples ya, hem i mitim wan Kristin brata, ale hem i tekem desisen blong stap nomo long Atens mo biaen tufala i mared. I no longtaem afta, sista blong mi mo man blong hem, tufala i leftemap tingting blong mi blong mi kambak long Gris mo mi prij fultaem long Atens. Oltaem mi bin gat tingting ya blong mekem wok blong paenia, ale mi gobak long Atens, ples we i nidim plante moa man blong prij.

Plante Doa Oli Open Long Mi Blong Mekem Wok

Long Novemba 1, 1947, mi stat mekem wok blong paenia, we mi spenem 150 aoa evri manis long wok blong prij. Teritori blong kongregesen blong mifala i bigwan tumas, mo mi mas wokbaot plante. Nating se i olsem, be mi mi kasem plante blesing. Plante taem ol polis oli holemtaet ol Witnes we oli faenem long wok blong prij no long ol Kristin miting, taswe i no longtaem, oli holem mi tu.

 Oli jajem mi se mi stap fosem ol man blong jenisim skul blong olgeta, hemia i wan bigfala rong long taem ya. Oli givim panis long mi blong mi stap tu manis long kalabus blong Averof long Atens, wan kalabus blong ol woman. Wan narafala woman we i Witnes, i stap finis long ples ya, mo mitufala i haremgud blong givgivhan long mitufala, nating se mitufala i stap long prisen. Afta we mi finisim taem blong mi long prisen, mi glad blong gohed bakegen long wok blong paenia. Plante long olgeta we mi bin mekem Baebol stadi long olgeta, oli gohed yet blong mekem wok blong Jeova, mo hemia i givim bigfala glad long mi.

Long 1949, mi kasem wan leta blong singaotem mi blong joen long namba 16 klas blong Wajtaoa Baebol Skul blong Gilead long Yunaeted Stet. Skul ya i trenem olgeta we oli prij fultaem blong oli mekem wok blong misinari. Mi mo ol famle blong mi, mifala i glad tumas. Mi plan blong joen long bigfala asembli long Niu Yok long hot taem blong 1950, mo biaen bambae mi go long Gilead.

Afta we mi kasem Yunaeted Stet, mi gat janis blong wok olsem haosgel blong sam manis long hedkwota blong ol Witnes blong Jeova long Niu Yok. Ples ya i klin, i gud, mo bilif blong man i kam strong long ples ya, mo mi mi stap long medel blong ol brata sista we oli hapi. Bambae mi neva fogetem ol sikis manis we mi bin spenem long ples ya. Biaen, hem i taem blong joen long Gilead skul, mo ol faef manis ya we mifala i stadi dip mo kasem tijing, oli pas kwiktaem nomo. Mifala ol studen, mifala i kasem save se ol save blong Baebol oli sas tumas mo oli rili gud, mo hemia i mekem glad blong mifala i bigwan moa mo mifala i wantem tumas blong serem save ya blong trutok we i givim laef, wetem ol narafala man.

Faswan Ples We Mi Mekem Misinari Wok Long Hem

Long Gilead Skul, bifo we oli sanemaot mifala blong mekem misinari wok, oli letem se mifala nomo i jusum wan fren we bambae mifala i wok wetem. Ruth Hemmig (tede Bosshard), we i wan nambawan sista, i kam fren blong mi. !Mi mo Ruth, mitufala i glad bitim mak taem oli talem se bambae mitufala i go wok long Istanbul, Teki​—wan kantri we i joenem Esia wetem Yurop! Mitufala i save se gavman i no givim raet long ol Witnes blong prij long kantri ya, be mitufala i sua se Jeova bambae i givhan long mitufala.

Istanbul i wan taon we i naes, mo plante man blong ol defdefren kantri oli stap long hem. Long ples ya, mitufala i faenem fulap maket, plante gudfala stael blong kuk blong ol defdefren kantri, ol haos we ol man oli kipim ol samting blong bifo long hem, ol naesfala eria blong taon, mo naesfala wota fran. Samting we i moa impoten se, mitufala i faenem ol man we hat blong olgeta i stret nao oli wantem save long saed blong God. Smol grup blong ol Witnes we oli stap long Istanbul, oli ol man Amenia, Gris, mo ol Jiu. Be i gat plante man blong ol narafala kantri tu, mo i gud sipos mitufala i save lanem sam narafala lanwis, wetem lanwis Teki, blong mitufala i save storian wetem olgeta. Mitufala i glad tumas blong mitim ol man blong ol defren kantri we oli hanggri from trutok. Plante long olgeta ya oli gohed yet blong mekem wok blong Jeova.

Sore tumas, be oli no agri blong Ruth i kasem pepa blong hem bakegen blong stap moa long kantri ya, ale hem i mas aot. Hem i gohed yet long wok blong fultaem paenia long Swiselan. Plante yia i pas finis, be taem mi tingbaot gudfala fasin blong hem blong mekem man i haremgud mo leftemap tingting blong narafala, mi sore yet we hem i no moa stap wetem mi.

Mi Muv i Go Long Narasaed Blong Wol

Long 1963, oli no moa letem blong mi mi stap long Teki. I no isi blong mi lego ol Kristin fren we  mi bin luk olgeta oli gohed gud long saed blong spirit mo oli winim plante trabol. Ol famle blong mi oli wantem leftemap tingting blong mi, ale oli pem rod blong mi, blong mi go joen long wan asembli long Niu Yok. Mi no save yet nekis ples we bambae mi go mekem misinari wok long hem.

Afta long asembli, mi harem se bambae mi go wok long Lima, Peru. Mi mo wan yangfala sista we bambae i joen wetem mi blong prij, mitufala i aot long Niu Yok blong go long niufala ples ya we bambae mitufala i wok long hem. Mi lanem lanwis blong Spen, mo mi stap long misinari hom we i stap long branj ofis blong ol Witnes blong Jeova. I gud tumas blong prij long ples ya mo blong save ol brata sista.

Wan Narafala Ples Bakegen Mo Wan Narafala Lanwis

I no longtaem afta, ol famle blong mi long Gris oli stat blong kasem hadtaem from oli kam olfala mo helt blong olgeta i kam nogud. Oli neva askem long mi blong mi stopem wok blong fultaem paenia mo blong mi kambak blong givhan long olgeta. Nating se i olsem, mi mi tingting gud mo mi prea, nao mi kasem save se i moagud we mi stap klosap long famle blong mi. Ol brata we oli lukaot long branj ofis oli agri wetem tingting blong mi mo oli sanem mi mi go long Itali. Famle blong mi oli talem se bambae oli pem rod blong mi. Taem mi kasem Itali, mi luksave se ples ya i rili nidim plante moa man blong prij.

Mi mas lanem wan niufala lanwis bakegen​—hemia Ianwis blong Itali. Faswan taon we mi go long hem, hemia Foggia. Biaen, oli sanem mi mi go long Naples, we i gat bigfala nid. Teritori blong mi hemia Posilipo, wan haf blong Naples we i moa naes i bitim ol narafala ples. Teritori ya i bigwan, mo i gat wan pablisa nomo blong Kingdom. Mi mi glad tumas blong prij, mo Jeova i givhan long mi blong statem plante Baebol stadi. Samtaem biaen, i gat wan bigfala kongregesen long ples ya.

Long ol faswan man we mi mi stadi Baebol wetem olgeta, i gat wan mama wetem fo pikinini blong hem. Tede, sista ya wetem tu gel blong hem oli Witnes blong Jeova yet. Mo tu, mi mekem stadi blong wan man mo waef blong hem we tufala i gat wan smol gel. Ful famle ya oli gohed long trutok, mo oli baptaes long wota blong soemaot se oli givim laef blong olgeta i go long Jeova. Naoia gel ya i maredem wan Kristin brata, mo tufala tugeta oli mekem wok blong God wetem strong tingting. Taem mi stap mekem stadi blong wan bigfala famle, mi mi sapraes blong luk olsem wanem Tok blong God i gat paoa. Taem mifala i ridim sam vas we oli soemaot se God i no agri long man we i mekem wosip long aedol, mama long famle ya i no wet. !Stadi i no finis yet, be hem i girap i sakemaot evri aedol we oli stap long haos blong hem!

Denja Long Solwota

Taem mi aot long Itali blong go long Gris, oltaem mi ron long sip. Plante taem hem i wan naesfala trip. Be long hot taem blong 1971, hem i defren. Mi stap kambak long Itali long sip ya Heleanna. Long eli moning long Ogis 28, faea i stat long kijin blong sip. Faea ya i go olbaot mo ol pasenja oli fraet tumas. Ol woman oli hafded, ol pikinini oli krakrae, mo ol man oli komplen mo oli tok strong long ol boskru blong sip. Ol man oli ron i go long ol laef bot we oli stap long tufala saed blong sip. Be i no gat naf laef jaket, mo mesin we i stap leftemap laef bot mo putum i godaon long solwota i no wokgud. Mi mi no gat wan laef jaket, be faea ya i stap kam bigwan moa, taswe i gat wan samting nomo we mi save mekem, hemia blong jiam i go long solwota.

Afta we mi jiam i go long solwota, mi luk wan woman we i werem wan laef jaket, i stap flot klosap long mi. I luk olsem se hem i no save swim, ale mi holem han blong hem mo pulum hem i go longwe long sip ya we i stap draon. Solwota i stat blong kam raf, mo mi mi taed we mi taed from we mi traehad wetem olgeta paoa blong mi blong stap flot. I luk olsem se mi mi no save laef, be mi gohed blong askem Jeova blong givim paoa long mi, mo hemia i mekem mi mi kam strong. Samting ya i mekem mi mi tingbaot aposol Pol taem sip blong hem i rek.​—Ol Wok japta 27.

Mi hang long woman ya, mo blong fo aoa mi traehad blong winim ol wef. Taem mi gat smol paoa mi swim mo mi singaot Jeova blong i givhan long mi. Long en blong hem, mi luk wan smol bot i kam. Oli kam sevem mi, be woman ya i ded finis. Taem mifala i kasem taon blong Bari long Itali, oli karem mi mi go long hospital, mo oli givim meresin long mi. Mi slip sam dei long hospital. Plante Witnes oli kam luk mi, mo long kaen fasin, oli givim evri samting we mi nidim. Kristin lav we oli soemaot i mekem ol narafala long hospital oli sapraes bigwan. *

 Afta we mi kamgud bakegen, oli sanem mi mi go long Rom. Oli askem long mi blong mi prij long medel blong taon, long ples we i gat ol stoa mo ol ofis. Wetem help blong Jeova, mi wok faef yia long ples ya. Blong 20 yia evriwan, mi mi prij long Itali, mo mi laekem tumas ol man Itali.

Gobak Long Ples We Mi Mi Stat Long Hem

Biaen, helt blong Adriadne mo hasban blong hem i kam moa nogud. Mi kasem save se sipos mi stap klosap long tufala, bambae mi naf blong pembak smol ol samting we tufala i bin mekem long mi wetem lav. Mi talem tru se mi harem nogud tumas blong lego Itali. Nating se i olsem, long hot taem blong 1985, ol elda oli agri se bambae mi mas go paenia long Atens, faswan ples we mi bin statem fultaem paenia long hem long 1947.

Mi prij long teritori blong kongregesen we mi stap long hem, mo mi askem long ol brata long branj ofis sipos mi save prij tu long ples we i gat ol stoa mo ol ofis long hem, long medel blong taon. Wan narafala paenia sista i joen wetem mi ale mitufala i prij long ples ya blong tri yia. Mitufala i prij long plante man we mifala i no save faenem olgeta long haos blong olgeta.

Moa taem i pas, moa mi wantem mekem wok. Be naoia paoa blong mi i stap godaon. Tawian blong mi i ded finis. Ariadne, we i bin stap olsem wan mama blong mi, i no moa save lukluk. Long saed blong mi, mi gat gudfala helt long ol yia we mi mekem wok blong fultaem paenia. Be i no longtaem i pas, mi bin foldaon long ol step we oli hae, mo mi brekem raet han blong mi. Biaen, mi foldaon bakegen mo bun blong as blong mi i brok. Oli mas katem mi long hospital mo mi stap longtaem long bed we mi no save wokbaot. Naoia, mi no moa save wokbaot gud. Mi yusum wan wokingstik mo mi go aot nomo taem i gat wan narafala i stap wetem mi. Nating se i olsem, mi traem bes blong mi yet mo mi hop se helt blong mi bambae i kam moagud. Olsem long ol yia we oli pas, bigfala glad blong mi, hemia wok blong tijim ol narafala long Baebol, nating sipos mi save mekem smol nomo long wok ya.

Taem mi tingbaot ol hapi yia we mi spenem long wok blong paenia, hat blong mi i fulapgud long tangkiu we mi gat long Jeova. Oltaem hem wetem ogenaesesen blong hem long wol ya, oli givim ol gudfala advaes we i givhan gud. Hemia i givhan long mi blong yusum save blong mi fulwan, long olgeta yia we mi mekem wok blong hem. Samting we mi wantem tumas long hat blong mi, hemia se Jeova i givim paoa long mi blong mi gohed blong mekem wok blong hem. Mi mi glad tumas we mi save wok smol yet long wok ya we Jeova i lidim, blong tijim ol narafala long Baebol.​—Malakae 3:10.

[Ol Futnot]

[Tok blong pija long pej 9]

Mi wetem sista blong mi, Ariadne, mo man blong hem, Michalis, taem mi stap rere blong go long Gilead

[Tok blong pija long pej 10]

Oli sanem mi mo Ruth Hemmig i go long Istanbul, Teki

[Tok blong pija long pej 11]

Long Itali, jes afta long yia 1970

[Tok blong pija long pej 12]

Tede, mi wetem sista blong mi, Ariadne