Lukaot Pis Long Tingting

ALBERT i gat wan gudfala mared, hem i gat tu naesfala pikinini. Be hem i harem olsem se i gat wan samting we i mestem long laef blong hem. Wan taem, taem hem i stap traehad blong faenem wok, hem i joen long politik mo i folem tingting blong sosialis gavman. Hem i kam wan strong memba blong Komunis pati tu long ples blong hem.

Be biaen, hem i no moa trastem Komunis pati. Hem i lego politik fulwan mo i lukluk moa long famle blong hem. Mak blong hem hemia blong meksua se famle blong hem i hapi. Nating se i olsem, Albert i harem yet se i gat wan samting we i mestem long laef blong hem. Yes hem i no gat pis long tingting blong hem.

I gat fulap man olsem Albert we oli harem se i gat wan samting we i mestem long laef blong olgeta. Milian man oli bin traem plante save, ol waes blong man, mo ol skul, blong faenem wan mining long laef blong olgeta. Long ol kantri we oli rij, wan grup blong ol yangfala i stat girap long ol yia 1960, we oli kolem olgeta ol hipi. Olgeta ya oli rebel agensem fasin blong laef blong ol man long taem ya. Ol yangfala ya oli yusum ol drag mo waes blong ol tija blong olgeta we oli kolem ol guru mo hae pris, blong traem faenem trufala glad mo wan mining long laef blong olgeta. Be, ol yangfala ya oli no faenem trufala glad long laef blong olgeta. Defren olgeta, oli yusum ol strong drag, oli gat fasin ya blong slip olbaot mo oli mekem se tingting blong ol man i konfius moa long saed blong wanem fasin we i stret.

Blong plante handred yia, ol man oli ting se oli save glad sipos oli gat plante mane, paoa mo edukesen. Be nogat, ol samting ya oli lidim man blong harem nogud nomo. Jisas i talem se: “Maet man i gat plante samting blong hem, be stamba blong prapa laef blong man i no stap long ol samting ya.” (Luk 12:15) Yes, fasin ya blong ronem mane i no save mekem man i glad. Baebol i talem se: “Ol man  ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta. Fasin blong laekem mane tumas, hem i stamba blong olgeta fasin nogud. Mo i gat sam man we oli strong blong folem fasin ya, nao . . . oli stap mekem ol samting we olgeta tu oli stap harem nogud tumas from.”​—1 Timoti 6:​9, 10.

?Taswe, olsem wanem wan man i save faenem pis long tingting mo mining long laef blong hem? Plante man oli ting se i no gat rod blong givhan long yumi blong faenem tufala samting ya. Be yumi glad se tingting ya i no tru. Long ol haf we i kam biaen, bambae yumi luk se blong kasem tufala samting ya, fastaem man i mas tingbaot wan narafala impoten samting we yumi ol man i nidim.

[Tok blong pija long pej 3]

?Yu ting se sipos yu ronem mane, paoa mo edukesen, ol samting ya nao bambae oli halpem yu blong faenem pis long tingting?