“Olgeta We Oli Luksave Se Oli Nidim Ol Samting Long Saed Blong Spirit, Oli Save Glad”

TAEM ol pijin oli wekap long moning, plante taem oli singsing blong smoltaem mo biaen oli flae i go blong lukaot kakae blong olgeta. Long aftenun, oli kambak long ples we oli stap slip long hem, oli singsing bakegen mo biaen oli slip. Long sam defren taem blong yia, ol pijin oli putum eg mo biaen oli lukaot long ol pikinini blong olgeta. Ol narafala anamol oli mekem sam samting we i klosap sem mak long ol pijin ya. Olgeta evriwan oli no wari long saed blong fiuja blong olgeta.

Yumi ol man yumi defren long ol anamol. I tru se yumi kakae, yumi slip mo yumi gat ol pikinini, be plante long yumi, yumi wantem moa samting bakegen. Yumi wantem blong save from wanem yumi laef i stap long wol ya. Yumi lukaot mining blong laef blong yumi. Mo tu, yumi laekem blong gat wan hop long fiuja. Ol dip filing ya oli soemaot wan samting we olgeta man evriwan oli nidim​—hemia ol samting long saed blong spirit.

God i Wokem Yumi i Olsem Pija Blong Hem

Baebol i eksplenem from wanem ol man oli gat fasin ya blong wantem ol samting long saed blong spirit i se: “God i stat wokem man, i olsem pija blong hem. Hem i wokem hem i olsem pija blong God. Hem i wokem tufala, man mo woman.” (Jenesis 1:​27, NW ) God i wokem yumi ‘olsem pija blong hem.’ Samting ya i minim se nating se yumi no stret gud olgeta from we yumi sinman be yumi naf blong soemaot sam fasin blong God. I olsem wan glas we i no klia gud be yumi stil save luk fes blong yumi long hem. (Rom 5:12) Eksampol, yumi save wokem sam niufala samting. Yumi gat waes tu, yumi harem save samting we i stret long samting we i no stret, yumi naf blong soem lav long ol narafala. Yumi save tingbaot ol samting blong bifo mo yumi save mekem plan long saed blong fiuja blong yumi.​—Ol Proveb 4:7; Prija 3:​1, 11; Maeka 6:8; Jon 13:34; 1 Jon 4:8.

Yumi naf blong tingbaot ol samting long saed blong spirit from we yumi bon wetem tingting ya we yumi wantem mekem wosip long God. Yumi no save faenem trufala glad we i stap longtaem sipos yumi no luksave se yumi nidim blong frengud wetem God blong yumi. Jisas i talem se: “Olgeta we oli luksave se  oli nidim ol samting long saed blong spirit, oli save glad.” (Matiu 5:​3, NW ) Be yumi mas lukaotgud se ol samting long saed blong spirit we yumi stap haremgud long hem, oli stanap long ol trutok​—hemia ol trutok long saed blong God, ol rul blong hem mo stamba tingting we hem i gat long saed blong ol man. ?Weples yumi save faenem ol trutok ya? Yumi faenem ol trutok ya long Baebol.

“Tok Blong Yu, Hemia Trutok Ya”

Aposol Pol i raetem se: “Olgeta tok blong Baebol oli kamaot long God fastaem. . . . Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin.” (2 Timoti 3:16) Ol tok ya blong Pol oli laenap wetem ol tok we Jisas i talem long prea blong hem se: “Tok blong yu, hemia trutok ya.” Tede yumi save se Tok ya hemia Tabu Baebol. Yumi waes taem yumi jekem long Baebol sipos ol bilif mo ol fasin blong yumi oli laenap wetem ol rul blong Baebol no nogat.​—Jon 17:​17, NTB.

Taem yumi skelem ol bilif blong yumi wetem Tok blong God, yumi stap folem fasin blong ol man Berea bifo we oli meksua se ol tijing blong Pol oli laenap wetem ol tok blong Baebol. Luk i no tok daonem ol man Berea be hem i leftemap olgeta from fasin blong olgeta. Luk i raetem se oli “wantem tumas blong harem tok blong tufala, mo evri dei, oli stap ridimgud ol tok blong Baebol, blong faenemaot se ol tok blong tufala i tru no i no tru.” (Ol Wok 17:11) Tede i gat plante defdefren kaen tijing blong jos mo fasin blong laef blong ol man we oli no laenap. Taswe i impoten we yumi folem eksampol blong ol man Berea ya.

Wan narafala rod blong luksave wan samting se hem i trutok hemia blong lukluk olsem wanem samting ya i gat paoa long laef blong ol man. (Matiu 7:17) Eksampol, taem wan man i laef folem ol trutok blong Baebol, samting ya bambae i mekem se hem i kam wan gudfala hasban, wan gudfala papa, wan gudfala waef, no wan gudfala mama, mo from samting ya, famle blong hem i hapi mo i glad bigwan. Jisas i talem se: “Man we i harem tok blong God mo i obei long hem, hem i save harem gud moa.”​—Luk 11:28.

Ol tok blong Jisas oli mekem yumi tingbaot ol tok blong Papa blong hem long heven we i talem long ol man Isrel bifo se: “Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.” (Aesea 48:​17, 18) !I sua se naesfala tok ya we Jeova i talem i rili tajem hat blong olgeta we oli laekem gud fasin mo stret fasin!

Samfala Oli Lukaot Man We i Save Talem Ol ‘Tok We Oli Wantem Harem’

God i talem ol gudfala tok ya we yumi ridim long Aesea long ol man Isrel from we ol giaman tijing blong skul long taem ya oli bin lidim olgeta oli go krangke. (Ol Sam 106:​35-40) Yumi tu yumi mas lukaotgud long ol giaman tijing. Pol i tokbaot ol man we oli talem se oli Kristin, i se: “I gat taem i stap kam, we ol man bambae oli no moa wantem harem ol trutok. Bambae oli save mekemhed, blong go lukaot plante narafala tija olbaot, we oli save talem wanem tok we olgeta oli wantem harem. Bambae oli no save lesin long ol trutok.”​—2 Timoti 4:​3, 4.

Plante lida blong skul oli talem ol tok ya nomo we ol man oli wantem harem, taem oli agri long ol rabis fasin we ol man oli laekem, olsem seks bifo long mared, man i slip wetem man, mo fasin blong drong. Baebol i talem klia se ol man we oli agri long ol fasin ya mo oli stap mekem ol fasin ya “bambae oli no save go insaed long niufala wol ya we God i king long hem.”​—1 Korin 6:​9, 10; Rom 1:​24-32.

Blong talem stret, i nidim strong tingting blong folem ol rul blong Baebol speseli taem ol man  oli jikim yumi. Be nating se i olsem, yumi naf blong folem ol rul ya. Long ogenaesesen blong ol Witnes blong Jeova i gat plante man we bifo oli stap tekem drag, oli stap drong, oli stap slip olbaot, oli ol rabis man blong faet, oli man blong stil mo oli man blong giaman. Be, oli fulumap hat blong olgeta wetem ol save long Tok blong God mo tabu spirit i halpem olgeta tu blong oli mekem sam jenis long laef blong olgeta blong oli save ‘mekem laef blong olgeta i kam stret gud olsem we Masta blong yumi i wantem.’ (Kolosi 1:​9, 10; 1 Korin 6:11) From we oli wantem blong gat pis wetem God, ale, oli gat pis long tingting tu mo oli gat wan gudfala hop blong fiuja.

Hop Blong Kingdom

Hop ya we Baebol i givim se ol man we oli obei long God bambae oli save laef blong olwe long pis, bambae i kamaot tru long Kingdom blong God. Long prea we Jisas i tijim long ol man blong hem, Jisas i talem se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Tru ya, Kingdom blong God nomo i save mekem se ol samting we God i wantem oli kamaot long wol. ?From wanem? From we Kingdom ya we i stap long heven​—wan gavman we i stap long han blong Jisas Kraes—​hemia nao samting we God bambae i yusum blong soemaot we Hem i gat raet blong rul antap long wol.​—Ol Sam 2:​7-12; Daniel 7:​13-14.

Jisas Kraes we i King blong Kingdom ya long heven, bambae i mekem se olgeta man we oli obei long Jeova, oli fri long evri samting we i mekem olgeta oli slef, olsem sik mo ded mo sin we i stap holemtaet olgeta. Revelesen 21:​3, 4 i talem se: “!Yu luk! Naoia God i mekem ples blong hem wetem ol man . . . Hem [Jeova God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”

Ful wol bambae i gat pis blong olwe. ?From wanem yumi save sua long samting ya? Wan risen i stap long Aesea 11:​9, we i talem se: “Long Saeon ya, tabu hil blong Hae God, bambae i no moa gat man [aninit long Kingdom ya] we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.” Yes, olgeta man long wol bambae oli kasem stret save blong God mo bambae oli obei long Hem. ?Yu yu glad blong laef long taem ya we pis nomo i stap? Sipos yes, naoia hem i taem blong yu stat kasem ‘save ya blong Jeova’ we i nambawan tumas.

 ?Bambae Yu Yu Lesin Long Mesej Ya Blong Kingdom?

God bambae i yusum Kingdom ya blong finisim olgeta wok blong Setan mo bambae i tijim ol man long ol stret rod blong Hem. Taswe, yumi no sapraes se long ol tijing blong Jisas, oltaem hem i tokbaot Kingdom ya. Jisas i talem se: “Mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:43) Jisas i givim oda long ol disaepol blong hem blong oli talemaot semfala mesej ya long ol narafala man. (Matiu 28:​19, 20) Hem i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:​14, NW ) En ya i kam klosap finis. Taswe, i impoten tumas we ol man we hat blong olgeta i stret oli lesin long gud nius ya we i save sevem laef blong olgeta.

Albert we yumi tokbaot long faswan haf blong magasin ya, i harem mesej blong Kingdom taem waef mo boe blong hem, tufala i stat blong stadi Baebol wetem ol Witnes blong Jeova. Fastaem Albert i wari long saed ya. Ale hem i askem wan pasta long ples we oli stap long hem blong i kam visitim waef mo boe blong hem blong soemaot klia ol giaman tijing blong ol Witnes. Be pasta ya i no wantem joen long bisnes ya. Ale, Albert i tekem desisen blong traem lesin nomo long wanem we waef mo boe blong hem, tufala i stap tokbaot long stadi blong olgeta. Hem i mekem olsem blong traem faenem eni rong tijing we ol Witnes oli stap talem. Ale taem oli stap stadi, Albert i stap lesin long olgeta. Be long nekis taem we oli stadi bakegen, Albert i joen long stadi nao from we hem i wantem blong lanem moa. Hem i eksplenem biaen, from wanem fasin blong hem i jenis i se: “Hemia nao samting we mi bin wantem tumas blong faenem.”

Yes, naoia Albert i haremgud from we hem i kasem samting we hem i nidim long saed blong spirit, mo hem i no sore from desisen ya we hem i bin tekem. Ol trutok blong Baebol i givim samting we hem i stap lukaotem long ful laef blong hem​—hemia rod blong stretem ol nogud fasin mo trabol we i stap spolem ol man mo i givim wan hop blong ol man long fiuja. Ol trutok blong Baebol oli mekem se hem i gat pis long tingting blong hem. ?Yu yu kasem ol samting we yu nidim long saed blong spirit? I gud yu tekem smoltaem blong ridim ol kwestin long bokis we i stap long pej 6. Ol Witnes blong Jeova oli glad blong givhan long yu blong kasem moa save.

[Bokis/Foto blong pija long pej 6]

?YU YU STAP KASEM OL SAMTING WE YU NIDIM LONG SAED BLONG SPIRIT?

?Yu yu haremgud long ol kakae long saed blong spirit we yu stap kasem? Ale, ridim ol kwestin we oli kam biaen mo traem luk sipos yu save ansa long olgeta.

□ ?God hem i hu, mo wanem nem blong hem?

□ ?Hu ya Jisas Kraes? ?From wanem Jisas i mas ded? ?Olsem wanem ded blong hem i save givhan long yu?

□ ?Devel Setan i rili stap? ?Sipos yes, hem i kam long weples?

□ ?Wanem i hapen long yumi taem yumi ded?

□ ?Wanem stamba tingting blong God long saed blong wol ya mo ol man?

□ ?Wanem ya Kingdom blong God?

□ ?Wanem ol rul we God i givim long saed blong stret fasin?

□ ?Insaed long famle, wanem ol wok we God i givim long wan hasban mo wan waef? ?Wanem sam rul blong Baebol we i mekem famle i hapi?

Sipos yu no sua long ol ansa we yu givim long ol kwestin ya, yu save askem wan kopi blong smol buk ya ?Wanem Samting God i Wantem Yumi Blong Mekem? Ol Witnes blong Jeova oli wokem smol buk ya long klosap 300 lanwis. Insaed long buk ya i gat 16 stadi we oli tokbaot ol stamba tijing blong Baebol mo oli givim wan ansa we i kamaot long Baebol long olgeta kwestin we i stap antap.

[Tok blong pija long pej 4]

Yumi man yumi no sem mak long ol anamol. Yumi nidim samting long saed blong spirit

[Tok blong pija long pej 5]

“Oli . . . go lukaot plante narafala tija olbaot, we oli save talem wanem tok we olgeta oli wantem harem.”​—2 Timoty 4:3.

[Tok blong pija long pej 7]

Tru long Kingdom blong Mesaea nomo bambae God i putum pis blong olwe long wol ya