Oli Rere Blong Mekem Moa Wok

“OL MAN blong yu bambae oli glad blong kam joen long yu.” (Ol Sam 110:3) Ol tok ya oli stret long ol 46 studen blong klas namba 118 blong Wajtaoa Baebol Skul blong Gilead. Skul ya i trenem ol man mo woman long wok blong misinari nao oli save givim help long saed blong spirit long ol man long narafala kantri. ?Wanem i mekem se ol studen ya oli naf blong kam long skul ya? Mike mo Stacie, we tufala i memba blong klas ya namba 118, tufala i talem se: “Mitufala i mekem disisen blong gat wan laef we i no fasfas wetem plante tumas samting. Ale, fasin blong laef olsemia i halpem mitufala blong no letem ol samting blong wol i pulum tingting blong mitufala, mo putum wok blong God fasples. Fastaem mitufala i win gud long bisnes blong mitufala, be mitufala i gat strong tingting se mitufala i no mas letem samting ya i pulum mitufala i gowe long mak we mitufala i putum blong mekem wok blong God.” Ol narafala studen blong klas ya oli mekem olsem Mike mo Stacie. Oli rerem laef blong olgeta blong oli save mekem moa wok, mo naoia olgeta studen ya oli mekem wok blong talemaot Kingdom long fo bigfala kantri.

Long Sarede, Maj namba 12, 2005, i gat 6,843 man oli glad blong joen mo lesin long miting blong givimaot setifiket i go long ol studen ya. Jeaman blong miting ya hemia Theodore Jaracz, we hem i memba blong Hed Kampani blong ol Witnes blong Jeova. Jeaman i talem welkam long olgeta man ya we oli stap, we oli kamaot long 28 defren kantri, nao hem i tokbaot olsem wanem tijing long saed blong Baebol i wan samting we i sas tumas. Jeaman i talem ol tok ya blong wan bigfala tija blong Amerika, nem blong hem William Lyon, we hem i bin talem se: “Olgeta man we oli save gud Baebol, yumi save talem se oli skul gud.” I impoten we man i go long skul blong lanem blong rid mo raet. Be edukesen long saed blong Baebol i impoten moa. Edukesen long saed blong Baebol i save halpem ol man blong save God, nao save ya bambae i givim laef we i no save finis. (Jon 17:3) Brata Jaracz i talem long ol studen blong klas ya se oli mekem wan gudfala samting taem oli rere blong joen moa long wok ya blong tijim Baebol we i stap gohed raon long wol long bitim 98,000 kongregesen blong ol Witnes blong Jeova.

Sam Tok Blong Leftemap Tingting

Afta long jeaman, William Samuelson i givim tok ya “?Olsem Wanem Yu Yu Save Stap Olsem Wan Oliftri We i Gru Gud Long Haos Blong God?” Tok ya i stanap long Ol Sam 52:8. Hem i talem se Baebol i tokbaot oliftri olsem pija blong samting we i karem frut, samting we i naes, no samting we man i save tinghae long hem. (Jeremaea 11:16) Ale brata Samuelson i talem long ol studen se oli olsem ol oliftri i se: “Taem yu holemstrong long wok blong yu blong talemaot Kingdom long kantri ya we oli sanem yu blong wok olsem misinari, bambae yu naes tumas long ae blong Jeova mo bambae hem i tinghae long  yu.” Wan oliftri i gat plante longlongfala rus we oli godaon dip long graon. Samting ya i halpem hem blong i kasem wota oltaem nating se ples i drae. Long sem fasin, ol studen blong klas ya oli mas tingbaot se oli mas tekem kakae long saed blong spirit oltaem sipos oli wantem stanap strong taem man i no wantem lesin long gud nius, taem man i agensem olgeta, mo taem oli fesem ol defdefren traem long misinari wok blong olgeta.​—Matiu 13:21; Kolosi 2:​6, 7.

John E. Barr, wan long ol trifala memba blong Hed Kampani we oli joen long program ya, i givim tok ya, “Yufala i Olsem Sol Long Ol Man Long Wol.” (Matiu 5:13) Hem i talem se sol i save holem kakae i stap gud, i no sting, mo hem i se wok we ol misinari oli mekem blong talemaot Kingdom blong God i olsem sol. Wok ya i save sevem laef blong ol man we oli lesin, mo i save blokem olgeta long ol nogud fasin mo ol giaman tijing. Ale Brata Barr i toktok long ol studen ya olsem wan papa we i toktok long ol pikinini blong hem. Hem i leftemap tingting blong olgeta blong oli traem “gat pis oltaem” wetem ol narafala. (Mak 9:50) Hem i givim advaes ya se: “Wokem ol frut blong tabu spirit, mo meksua se yu kaengud mo yu tingbaot narafala long ol fasin mo toktok blong yu.”

Nekis tok hemia “Yu No Mas Jamaot Long Bot Taem Yu Stap Long Dipsi.” Wallace Liverance, we i wan tija blong Gilead skul, i mekem tok ya. Wan sip i no save rongud sipos hem i stap long sanbij. Hem i save rongud taem hem i stap long dipsi. Long sem fasin, taem yumi kasem save long ol “tingting blong God we man i no save faenemaot”​—hemia ol trutok long saed blong stamba tingting blong God mo olsem wanem bambae hem i mekem stamba tingting ya i kamtru—​samting ya i save halpem yumi blong gru long saed blong spirit. (1 Korin 2:10) Yumi no save gru long saed blong spirit sipos yumi stap nomo long wota we i no dip long saed blong spirit, hemia i minim ‘stamba blong ol tok ya we yumi lanem fastaem.’ Fasin ya i save mekem we ‘bilif blong yumi i foldaon’, olsem we sip i rek. (Hibrus 5:​12, 13; 1 Timoti 1:19) Brata Liverance i finisim tok blong hem taem hem i talem se: “Yufala i mas letem ‘waes blong God, mo save blong hem we i bigfala tumas i bitim mak’ i givhan long yufala blong yufala i stap strong long misinari wok blong yufala.”​—Rom 11:33.

Mark Noumair, we hem tu i tija long Gilead skul, i givim tok ya “?Bambae Yu Folem Eksampol Blong Olgeta We Oli Go Fastaem Long Yu?” Wajtaoa Baebol Skul blong Gilead i gohed 60 yia finis mo ‘bigfala witnes’ we ol studen oli givim, i soemaot se skul ya i tijimgud olgeta blong oli mekem nambawan wok. (Jenesis 31:48) Ol sas samting ya we skul i karem, hem i pasem i go long ol studen ya bakegen we oli blong klas namba 118. Brata Noumair i leftemap tingting blong ol studen blong oli folem fasin blong ol man Tekoa long taem blong Nehemaea bifo. Oli mas gat tingting daon blong wokgud wetem kongregesen blong olgeta mo ol narafala misinari we oli wok wetem olgeta. Advaes i go long ol studen ya se oli mas lukaot blong no kam praod olsem ol “lida” ya long taem blong Nehemaea, be oli mas rere blong wok long kwaet fasin mo no pulum ae blong ol narafala i kam long ol samting we oli mekem.​—Nehemaea 3:5.

Ol Ekspiriens Mo Stori We Oli Tijim Yumi

Nekis tok long miting ya hem i karem taetel ya se “Tok Blong God i Stap Goaot Moa Long Ol Man.” (Ol Wok 6:7) Wan narafala tija blong Gilead skul, Lawrence Bowen, i askem sam long ol studen ya blong mekem pleplei blong soemaot wanem gudfala samting we i hapen long olgeta long wok blong prij long taem ya we oli stap folem kos long Gilead skul. Ol ekspiriens blong olgeta i soemaot se ol studen ya oli talemaot Tok blong God wetem strong tingting, mo Jeova i blesem ol traehad blong olgeta.

Richard Ashe i askem kwestin long samfala we oli wok long haos Betel, we oli bin wok klosap wetem ol studen blong skul ya. Toktok blong olgeta ya i soemaot olsem wanem wok long haos Betel i givhan bigwan long ol studen blong Gilead blong oli save mekemgud kos blong olgeta. Biaen long hemia, Geoffrey Jackson i toktok wetem samfala we oli bin skul long Gilead bifo. Oli tokbaot ol gudgudfala janis we ol misinari oli gat blong presem mo ona long Jeova. Wan long olgeta i talem se: “Taem yu yu misinari, ol narafala oli lukluk evri samting we yu mekem. Oli lesin long yu, oli wajem yu, mo oli no fogetem ol samting ya.” Taswe, advaes i go long ol studen ya se i gud oli tingbaot oltaem blong soem gudfala eksampol long narafala. Ating advaes ya bambae i givhan bigwan long olgeta ya long taem we i kam.

Stephen Lett, wan memba blong Hed Kampani, i givim laswan tok we taetel blong hem “Go Fored Olsem Ol Man Blong Karem ‘Wota Blong Laef.’ ” (Jon 7:38) Hem i tokbaot se long faef manis we i  pas, ol studen ya oli dring plante long ol dip trutok blong Baebol. ?Be ol niu misinari ya bambae oli mekem wanem wetem olgeta save we oli kasem? Brata Lett i talem se i gud sipos ol studen ya oli serem ol wota ya blong trutok wetem ol narafala, nao ‘springwota i save ron oltaem insaed long [ol man ya], blong givim laef ya we i no save finis’ long olgeta. (Jon 4:14) Nao hem i gohed i se: “Neva fogetem blong givim ona oltaem i go long Jeova we hem i stamba blong wota ya blong laef. Yu mas gat longfala tingting taem yu tijim olgeta we oli kamaot long draeples ya Bigfala Babilon.” (Jeremaea 2:13) Brata Lett i finisim tok blong hem taem hem i talem se i gud ol studen ya oli glad blong folem fasin blong tabu spirit mo woman blong Smol Sipsip ya we tufala i stap singaot se: “Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.”​—Revelesen 22:17.

Blong finisim miting ya, Brata Jaracz i talemaot halo we i kam long ol brata sista blong plante kantri. Mo wan studen blong klas ya i ridimaot wan leta blong talem tangkiu blong evriwan from skul ya.

?Yu yu save rerem laef blong yu blong go wok long ples we i gat nid? Sipos yes, ale traehad blong kasem sam mak long saed blong spirit, olsem we ol studen ya oli bin mekem. Yu save kasem glad mo harem gud tumas long tingting blong yu, taem yu givim yu wan blong mekem wok blong God wetem gladhat blong yu​—maet blong mekem misinari wok long narafala kantri no long wok blong prij long ples blong yu nomo.

[Bokis blong pija long pej 13]

KAONTEM KLAS YA

Oli kamaot long hamas kantri: 8

Oli go wok long hamas kantri: 19

Hamas studen: 46

Oli gat hamas yia: 33.0

Hamas yia long trutok: 16.5

Hamas yia finis oli prij fultaem: 12.9

[Tok blong pija long pej 15]

Klas Namba 118 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D; Mayer, J.; Rainey, S.; Zilavetz, S.; Jones, R.; Lareau, J.