Wan Kwestin

Dutronome 14:21 i talem se: “I tabu blong yufala i kakae anamol we i ded hem wan.” ?Olsem wanem? ?Ol tok ya oli agensem Levitikas 11:​40, we i talem se: “Sipos wan man i kakae mit blong wan anamol olsem [anamol we i ded hem wan], bambae hem i mas wasem ol klos blong hem, mo hem bambae i stap doti long fes blong mi go kasem long sapa”?

Tufala vas ya i laenap gud tugeta. Vas blong Dutronome i talem bakegen nomo tok we God i talem se i tabu blong kakae anamol we i ded, maet hemia anamol we wael anamol i kilim i ded. (Eksodas 22:31; Levitikas 22:8) Mo vas blong Levitikas i eksplenem wanem we wan man Isrel i mas mekem sipos hem i brekem loa ya, maet from we hem i no save se anamol ya i olsem.

Yes, nating se loa i putum tabu long wan samting, be i no oltaem we man i folem loa ya. Eksampol, i gat loa agens long fasin blong stil, kilim man i ded, fasin blong giaman, mo ol narafala samting bakegen. Be long semtaem, i gat panis i stap blong ol man taem oli brekem ol loa ya we God i putum finis. Taem man i kasem panis, samting ya i blong meksua se ol man oli mas folem loa ya mo i soem tu se ol loa ya oli impoten tumas.

Wan man we i agens long loa ya blong no kakae anamol we i ded hem wan, bambae hem i doti long fes blong Jeova mo bambae hem i mas folem rod ya blong wasem ol klos blong hem. Sipos hem i no wasem ol klos blong hem, bambae hem i “mas kasem panis from.”​—Levitikas 17:​15, 16