‘Wokbaot Blong Talemaot Gud Nius’

“I gud tumas blong luk man blong karem tok, we i wokbaot, i kamkros long ol bigbigfala hil, blong kam talemaot gud nius.”​—AESEA 52:7.

1, 2. (a) ?Wanem ol rabis samting we oli stap hapen evri dei? (b) ?Wanem filing blong plante man we oli stap harem badnius oltaem?

 TEDE, long olgeta ples blong wol, ol man oli stap harem badnius oltaem. Long radio, oli harem ol ripot we i mekem olgeta oli fraet long saed blong ol sik we oli givim ded. Long televisin, oli lukluk pija blong ol pikinini we oli bun nomo, oli stap krakrae from hanggri. Long niuspepa, oli ridim stori blong ol bom we oli bosta long ol bigfala stori haos, oli kilim fulap gudfala man i ded wantaem.

² Yes, ol rabis samting olsem oli stap hapen evri dei. Wol ya i stap jenis, i stap kam moa nogud oltaem. (1 Korin 7:31) Wan niuspepa long Wes Yurop i talem se samtaem i luk olsem se ful wol “i rere blong bosta.” !Yumi luksave from wanem plante moa man oli stap harem nogud tede! Long Yunaeted Stet, oli askem kwestin long ol man long saed blong nius long televisin. Ansa blong wan man i soemaot filing blong plante milian narafala man tu. Hem i se: ‘Taem mi lukluk nius, tingting blong mi i foldaon olgeta. Evri nius i badnius. I spolem filing blong mi bitim mak.’

Nius We Evri Man i Nidim

3. (a) ?Wanem gud nius we Baebol i talemaot? (b) ?From wanem yu yu tinghae long gud nius blong Kingdom?

³ ?Olsem wanem? ?Yumi save faenem nius we i gud long wol ya we i fulap long trabol? !Yes! Yumi haremgud blong save se Baebol i stap talemaot gud nius. Nius ya, hemia se Kingdom blong God bambae i finisim sik, hanggri, fasin stil, fasin blong kilim man, wo, mo olgeta samting we oli mekem laef blong ol man i strong tumas. (Ol Sam 46:9; 72:12) ?Yu ting se hemia nius we evri man i nidim? !Ol Witnes blong Jeova oli ting se yes! From samting ya, ol Witnes oli wok had blong talemaot gud nius blong Kingdom blong God long ol man blong olgeta kantri, mo ol man oli save ol Witnes from wok ya.​—Matiu 24:14.

4. ?Long stadi ya mo long nekis stadi, bambae yumi tokbaot wanem samting long saed blong wok blong prij?

⁴ Be long sam ples, plante man oli no wantem lesin long gud nius ya. ?Yumi save mekem wanem blong haremgud oltaem blong talemaot gud nius? ?Olsem wanem yumi save yusumgud taem we yumi spenem long wok blong prij? (Luk 8:15) Sipos yumi tingting long tri impoten samting long saed blong wok blong prij, hemia bambae i givhan long yumi. Bambae yumi tokbaot (1) tingting we i pusum yumi, no from wanem yumi prij; (2) tok we yumi talemaot, no wanem we yumi tokbaot; mo (3) ol fasin blong prij, no olsem wanem yumi prij. Yumi mas meksua se oltaem tingting we i pusum yumi i stret, tok we yumi talemaot i klia, mo ol fasin we yumi yusum oli wokgud. Olsem nao, bambae yumi givim janis long olkaen man blong oli harem gud nius ya we i beswan, hemia gud nius blong Kingdom blong God. *

?From Wanem Yumi Talemaot Gud Nius?

5. (a) ?Wanem faswan samting we i pusum yumi blong prij? (b) ?Taem yumi obei long oda blong Baebol blong prij, olsem wanem yumi stap soemaot lav long God?

⁵ Faswan samting we bambae yumi tokbaot, hemia tingting we i pusum yumi blong prij. ?From  wanem yumi talemaot gud nius? Fasin we i pusum yumi blong mekem wok ya i sem mak long fasin we i pusum Jisas. Hem i se: “Mi lavem Papa blong mi.” (Jon 14:31; Ol Sam 40:8) Faswan samting we i mas pusum yumi blong mekem wok ya, hemia lav we yumi gat long God. (Matiu 22:​37, 38) Baebol i joenem lav we yumi gat long God wetem wok blong prij, i se: “Sipos yumi lavem God, hemia i min se yumi stap folem ol tok blong hem.” (1 Jon 5:3; Jon 14:21) ?Olsem wanem? ?Ol tok blong God i minim oda ya tu blong ‘go pulum ol man oli kam man blong Jisas’? (Matiu 28:19) Yes. Nating se Jisas i givim oda ya, be ol tok ya i rili kamaot long Jeova. ?From wanem yumi talem olsem? Jisas i eksplenem se: “Yufala i save we mi mi no mekem wan samting nating mi wan. Mi mi stap talemaot ol samting ya nomo we Papa blong mi i tijim mi finis long hem.” (Jon 8:28; Matiu 17:5) Taswe, taem yumi obei long oda ya blong prij, yumi stap soem long Jeova se yumi lavem hem.

6. ?Olsem wanem lav we yumi gat long God i pusum yumi blong prij?

⁶ Mo tu, lav long Jeova i pusum yumi blong prij, from we yumi wantem soemaot se ol tok we Setan i talem agensem Jeova i giaman nomo. (2 Korin 4:4) Setan i talem se God i stap rulum man long fasin we i no stret. (Jenesis 3:​1-5) Yumi ol Witnes blong Jeova, yumi wantem tumas blong joen long wok ya we i soemaot se ol giaman tok ya blong Setan i blong spolem nem blong Jeova nomo. Yumi wantem mekem nem blong God i tabu mo i klin long tingting blong olgeta man. (Aesea 43:​10-12) Antap long hemia, yumi prij from we yumi kasem save finis long ol fasin mo wok blong Jeova. Yumi frengud wetem God blong yumi, mo yumi wantem tumas blong tokbaot hem long ol narafala. Yes, ol gudgudfala samting we Jeova i mekem mo ol stret fasin blong hem oli givim bigfala glad long yumi, taswe yumi no save stop blong tokbaot hem. (Ol Sam 145:​7-12) Yumi wantem presem hem mo talemaot “ol gudgudfala wok” blong hem long ol man we oli glad blong lesin.​—1 Pita 2:9; Aesea 43:21.

7. ?Antap long lav we yumi gat long God, wanem narafala impoten samting i pusum yumi blong prij?

⁷ Wan narafala impoten risen from wanem yumi gohed blong prij, hemia: Yumi rili wantem givim hop long ol man we oli harem nogud tumas long ol badnius we oli stap kasem oltaem, mo givim hop long ol man we oli stap safa. Long saed ya, yumi traehad blong mekem olsem Jisas. I gud yu openem Baebol blong yu long Mak japta 6 mo yu ridim.

8. ?Stori long Mak japta 6 i soemaot wanem long saed blong filing we Jisas i gat long ol man?

⁸ Ol aposol oli wokbaot olbaot blong prij long ol man. Nao oli kambak long Jisas, oli talem long hem ol samting we oli mekem mo we oli tijim ol man long hem. Jisas i luk we ol aposol ya oli taed, ale hem i talem long olgeta blong oli kam, bambae hem i tekem olgeta oli go long wan ples we oli save “spel smol.” Oli klaem long wan bot, oli pul i go long wan ples we i no gat man long hem. Be fulap man oli folem olgeta, oli ron i go folem sanbij, mo i no longtaem ol man ya oli kamtru long ples we Jisas mo ol aposol oli stap long hem. ?Jisas i mekem wanem? Baebol i talem se: “Hem i luk we plante man oli stap, nao hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i stat tijim olgeta long plante samting.” (Mak 6:​31-34) Jisas i sore tumas long ol man ya, mo samting ya i pusum hem blong talemaot gud nius long olgeta nating se hem i taed. I klia se Jisas i haremsave filing blong ol man ya. Hem i sore long olgeta.

9. ?Mak japta 6 i tijim yumi long wanem samting long saed blong tingting we i mas pusum yumi blong prij?

 ⁹ ?Stori ya i tijim yumi long wanem samting? Yumi ol Kristin, yumi harem se yumi mas talemaot gud nius mo pulum ol man oli kam disaepol blong Kraes. Yumi luksave se hemia wok blong yumi, from we God i wantem “sevem olgeta man.” (1 Timoti 2:4) Be yumi no prij nomo from we yumi harem se hemia wan wok we yumi mas mekem, nogat. Yumi prij tu from we yumi sore long ol man. Sipos yumi gat fasin olsem Jisas we i haremsave filing blong ol man, hat blong yumi bambae i pulum yumi blong mekem bes blong yumi blong talemaot gud nius long olgeta. (Matiu 22:39) Sipos gudfala fasin ya i pusum yumi blong prij, bambae yumi gohed blong prij we yumi no save stop.

Tok We Yumi Talemaot​—Gud Nius Blong Kingdom Blong God

10, 11. (a) ?Aesea i talem wanem long saed blong tok we yumi talemaot? (b) ?Olsem wanem Jisas i karem “gud nius” blong samting we i moagud, mo olsem wanem ol man blong God tede oli folem eksampol ya blong Jisas?

¹⁰ ?Olsem wanem long seken samting long saed blong wok blong prij​—hemia tok we yumi talemaot? ?Wanem tok ya we yumi talemaot? Aesea i talem wan nambawan profet tok long saed blong samting we yumi talemaot, i se: “I gud tumas blong luk man blong karem tok, we i wokbaot, i kamkros long ol bigbigfala hil, blong kam talemaot gud nius, we i nius blong pis. !Samting ya i gud tumas blong luk! Bambae man olsem i kam long Saeon, i talemaot long yumi se, ‘!God blong yufala i King! !Hem i stap sevem yufala!’ ”​—Aesea 52:7.

¹¹ “God blong yufala i King,” hemia impoten haf blong vas ya. Tok ya i mekem yumi tingbaot tok we yumi talemaot, gud nius blong Kingdom blong God. (Mak 13:10) Makem tu, olsem wanem Aesea i soem se tok we yumi talemaot i gud tumas. Hem i yusum ol tok olsem “sevem yufala,” “gud nius,” “pis,” mo “i gud tumas.” Long faswan handred yia K.T., * plante handred yia afta long taem blong Aesea, Jisas Kraes i mekem profet tok ya i kamtru long nambawan fasin. Hem i mekem olsem, taem hem i wok strong blong talemaot gud nius ya long saed blong Kingdom blong God we bambae i stanap. Long rod ya, hem i givim gudfala eksampol long ol man blong hem. (Luk 4:43) Long taem blong yumi, antap moa afta 1919, ol Witnes blong Jeova oli folem eksampol ya blong Jisas. Oli wok strong blong talemaot gud nius blong Kingdom blong God we i stanap finis, mo oli talemaot ol blesing we bambae Kingdom ya i karem i kam long ol man.

12. ?Gud nius blong Kingdom i mekem wanem long ol man we oli harem?

¹² ?Gud nius ya blong Kingdom i mekem wanem long ol man we oli harem? Olsem long taem blong Jisas, tede tu gud nius ya i givim hop long ol man mo i mekem olgeta oli haremgud. (Rom 12:12; 15:4) Gud nius ya i givim hop long olgeta we hat blong olgeta i stret, from we i mekem bilif blong olgeta i strong se laef bambae i kam moagud long fiuja. (Matiu 6:​9, 10; 2 Pita 3:13) Hop ya i  givhan bigwan long ol man we oli wantem mekem God i glad, blong oli holem wan gudfala tingting long saed blong laef. Man blong raetem Ol Sam i talem se oli ‘no save fraet se badnius bambae i kasem olgeta.’​—Ol Sam 112:​1, 7.

Tok We i “Fasem Soa Blong Ol Man We Oli Sore Tumas”

13. ?Profet Aesea i talemaot wanem blesing we i save kam naoia long olgeta we oli lesin long gud nius?

¹³ Antap long hemia, gud nius ya we yumi talemaot i givhan mo i karem blesing naoia long ol man we oli harem. ?Hem i mekem samting ya olsem wanem? Profet Aesea i tokbaot sam long ol blesing ya, i se: “Spirit blong Hae Masta Jeova i stap long mi, from we Jeova i makemaot mi finis blong go talemaot gud nius long ol kwaet man. Hem i sanem mi mi go blong fasem soa blong ol man we oli sore tumas long hat blong olgeta, mo blong talemaot fasin fri long ol man we oli kam slef finis, mo blong talemaot long ol man long kalabus we ae blong olgeta i save opengud. Jeova i sanem mi blong talemaot yia we hem i makem blong soemaot gladhat blong hem long ol man, mo dei we God ya blong yumi i makem blong givimbak long ol man nogud. Hem i sanem mi blong leftemap tingting blong olgeta we oli stap krae.”​—Aesea 61:​1, 2, NW; Luk 4:​16-21.

14. (a) ?Tok ya “fasem soa blong ol man we oli sore tumas” i soemaot wanem long saed blong gud nius blong Kingdom? (b) ?Olsem wanem yumi soemaot semfala kea we Jeova i soemaot long ol man we oli sore tumas?

¹⁴ Profet tok ya i talem se taem Jisas i talemaot gud nius, bambae hem i “fasem soa blong ol man we oli sore tumas.” !Hemia wan gudfala pijatok ya! Wan diksonari long saed blong Baebol, i talem se olfala tok we yumi tanem i kam “fasem,” “plante taem ol man Hibru oli yusum blong talem se oli ‘fasem’ wan bandej, i min se oli putum meresin long wan man we i karekil blong mekem soa blong hem i kamgud.” Maet wan gudfala nes i fasem wan kil wetem bandej no kaliko, blong sapotem haf ya blong bodi blong man we i karekil. Long sem fasin, ol gudfala pablisa we oli talemaot Kingdom, oli givhan long ol man we oli lesin blong oli haremgud bakegen. Oli mekem olgeta we oli stap safa oli kam strong moa. Taem oli givhan long ol man we oli nidim help, oli soemaot semfala kea we Jeova i soemaot. (Esikel 34:​15, 16) Man blong raetem Ol Sam i tokbaot God se: “Hem i stap mekem olgeta we oli harem nogud, oli harem gud bakegen, mo i stap fasem ol soa blong olgeta.”​—Ol Sam 147:3.

?Olsem Wanem Gud Nius Blong Kingdom i Givhan Long Man?

15, 16. Storian long saed blong samfala we gud nius blong Kingdom i givim paoa mo hop long olgeta.

¹⁵ Samting we i hapen long laef blong plante man, i soemaot olsem wanem gud nius blong Kingdom i rili givhan long ol man we oli sore tumas, mo i mekem olgeta oli strong bakegen. Tingbaot Oreanna, wan olfala woman long Saot Amerika. Hem i harem nogud tumas, i wantem ded nomo. Nao wan Witnes blong Jeova i kam luk Oreanna, mo i kambak evri taem blong ridim Baebol long hem wetem Buk Blong Ol Baebol Stori. * Fastaem we woman ya i lesin long ol stori ya, hem i stap slip nomo long bed, i satem ae blong hem, mo i pulum win strong olsem we i les blong lesin, from we tingting blong hem i foldaon tumas. Be sloslo, hem i girap, mo i sidaon long bed blong hem taem Witnes ya i ridim ol stori long hem. Smoltaem i pas, nao hem i go sidaon long jea long narafala rum, i wet long tija blong hem. Biaen, woman ya i stat kam long ol Kristin miting long Haos Kingdom. Tijing we hem i kasem long ol miting ya i leftemap tingting blong hem bigwan. Nao hem i stat givimaot ol buk we oli tokbaot Baebol, long ol man we oli pas fored long haos blong hem. Taem Oreanna i gat 93 yia blong hem, hem i tekem baptaes blong kam wan Witnes blong Jeova. Gud nius blong Kingdom i jenisim tingting blong hem, hem i no moa wantem ded be hem i wantem stap laef.​—Ol Proveb 15:30; 16:24.

¹⁶ Gud nius blong Kingdom i givhan tu long olgeta we oli kasem wan strong sik, mo oli save se i no longtaem bambae oli ded. Tingbaot Maria long Wes Yurop. Hem i kasem wan bigfala sik we i no gat meresin blong hem, nao tingting blong hem i foldaon. Taem ol Witnes blong Jeova oli kam luk hem, hem i harem nogud tumas. Be taem hem i kasem save long stamba plan we God i gat, hem i haremgud mo i luksave se laef blong hem i  gud yet. Ale hem i tekem baptaes mo i prij oltaem. Long tu laswan yia blong laef blong hem, ol narafala oli luksave klia se hem i gat hop mo glad. Taem Maria i ded, tingting blong hem i strong se bambae hem i laef bakegen long fiuja.​—Rom 8:38, 39.

17. (a) ?Olsem wanem gud nius blong Kingdom i stap jenisim tingting mo laef blong olgeta we oli harem? (b) Talem wan samting we i bin hapen long laef blong yu we i soem se Jeova i stap “leftemap olgeta we oli foldaon”.

¹⁷ Ol stori olsem oli pruvum se gud nius blong Kingdom i save jenisim tingting mo laef blong ol man we oli wantem tumas blong save trutok blong Baebol. Olgeta we oli krae from wan famle no fren we i ded, oli kasem niufala paoa taem oli lanem se olgeta we oli ded oli gat hop ya blong laef bakegen. (1 Tesalonaeka 4:13) Ol man we oli pua tumas mo oli hadwok evri dei blong faenem naf kakae nomo blong famle blong olgeta, tingting blong olgeta i kam strong mo oli tinghae long olgeta wan bakegen, taem oli kasem save se Jeova i no save lego olgeta sipos oli stap tru long hem. (Ol Sam 37:28) Ol man we tingting blong olgeta i foldaon, sloslo, wetem help blong Jeova, oli save kasem paoa bakegen. Sam long olgeta oli save winim fulwan, sik ya we i mekem tingting blong olgeta i foldaon. (Ol Sam 40:​1, 2) Yes, naoia nomo Jeova i stap yusum Tok blong hem we i gat paoa, blong “leftemap olgeta we oli foldaon.” (Ol Sam 145:14) !Tru ya, long ples we yumi prij long hem mo long Kristin kongregesen, yumi luk olsem wanem gud nius blong Kingdom i mekem plante man we oli sore tumas oli haremgud! !Samting ya i mas mekem yumi luksave bakegen mo bakegen se yumi stap talemaot beswan nius we man i save harem!​—Ol Sam 51:17.

‘Stap Prea Long God’ From Olgeta

18. ?Wanem filing blong Pol taem ol man Jiu oli no wantem lesin long gud nius, mo from wanem hem i harem olsem?

¹⁸ Nating se yumi stap talemaot beswan nius, plante man oli no wantem harem. ?Samting ya i save mekem wanem long yumi? Maet i mekem se yumi gat sem filing olsem aposol Pol. Hem i prij plante taem long ol man Jiu, be bighaf blong olgeta oli no wantem harem tok ya we i save sevem olgeta. Taem oli no wantem lesin, Pol i harem nogud tumas. Hem i talem se: “Tingting blong mi i hevi tumas, mo oltaem mi stap harem nogud tumas.” (Rom 9:2) Pol i sore long ol man Jiu we hem i prij long olgeta. Taem oli no wantem lesin, hem i harem nogud.

19. (a) ?From wanem i no rong we yumi harem nogud taem samfala oli no wantem lesin long gud nius? (b) ?Wanem i givhan long Pol blong i no kam slak long wok blong prij?

¹⁹ Yumi tu, yumi sore long ol man we yumi talemaot gud nius long olgeta. Taswe, yumi save harem nogud taem oli no wantem lesin long gud nius ya blong Kingdom. I no rong we yumi harem nogud olsem. Samting ya i soemaot se yumi rili kea long ol man ya we yumi prij long olgeta mo yumi wantem halpem olgeta long saed blong spirit. Be i gud yumi tingbaot fasin blong aposol Pol bakegen. ?Wanem i givhan long hem blong no  kam slak long wok blong prij? Nating se plante man Jiu oli no wantem lesin long gud nius mo Pol i harem nogud from, be hem i no letem tingting blong hem i kam nogud long saed blong olgeta, hem i no gat tingting ya se neva bambae oli save jenis. Hem i holem strong tingting se sam long olgeta bambae oli bilif long Kraes. Pol i talemaot tingting ya blong hem long saed blong sam man Jiu, i se: “Long tingting blong mi, mi mi wantem tumas we bambae God i sevem ol laen blong Isrel. Oltaem, mi stap prea long hem from samting ya.”​—Rom 10:1.

20, 21. (a) ?Olsem wanem yumi save folem eksampol blong Pol long wok blong prij? (b) ?Long nekis stadi, bambae yumi tokbaot wanem?

²⁰ Makem tufala samting we Pol i talem. Hem i wantem tumas we God i sevem ol man, mo hem i prea long God from samting ya. Tede, yumi mas folem eksampol ya blong Pol. Yumi mas holemtaet tingting ya we yumi wantem tumas blong faenem ol man we oli glad blong lesin long gud nius. Mo yumi mas gohed blong prea long Jeova oltaem blong hem i givhan long yumi blong faenem olgeta, mo blong yumi save halpem olgeta blong folem rod we i save lidim olgeta blong kasem laef.​—Ol Proveb 11:30; Esikel 33:11; Jon 6:44.

²¹ Be, blong mekem se gud nius blong Kingdom i kasem tingting blong ol man, yumi no tingbaot nomo from wanem yumi prij mo wanem tok we yumi talemaot. Yumi mas lukaotgud tu, olsem wanem yumi prij. Bambae yumi tokbaot samting ya long nekis stadi.

[Ol Futnot]

?Yu Yu Lanem Wanem?

• ?From wanem yumi prij?

• ?Wanem bigfala samting we yumi stap talemaot?

• ?Ol man we oli lesin, oli kasem wanem blesing?

• ?Wanem bambae i givhan long yumi blong no kam slak long wok blong prij?

[Kwestin]

[Tok blong pija long pej 18]

Gud nius blong Kingdom i save givim paoa long olgeta we oli sore tumas

[Tok blong pija long pej 20]

Prea i save givhan long yumi blong gohed nomo long wok blong prij