“Gohed Blong Pruvum Se Yufala i Wanem Kaen Man”

“Yufala i mas gohed blong jekemap sipos yufala i holem yet fasin blong bilif no nogat, yufala i mas gohed blong pruvum se yufala i wanem kaen man.”​—2 KORIN 13:​5, NW.

1, 2. (a) ?Taem yumi no sua long ol bilif blong yumi, samting ya i save mekem wanem long yumi? (b) ?Wanem i hapen long ol Kristin long Korin bifo, we i mekem se maet samfala oli no moa sua long rod we oli mas folem?

 TINGBAOT se yu stap wokbaot long wan rod nao yu kamtru long wan ples we rod i seraot, wan i go long lef saed, wan i go long raet saed. Yu no moa sua se weswan rod nao blong tekem. Ale yu askem sam man we oli kam long rod ya blong oli givhan long yu. Be toktok blong ol man ya i no laenap, samting we wan i talem i defren long wanem we narafala i talem. Tingting blong yu i fasfas olgeta, nao yu no moa save gohed long wokbaot blong yu. Tru ya, sem samting i save kamaot taem tingting blong yumi i hafhaf long saed blong ol bilif blong yumi. Taem yumi no sua long bilif blong yumi, yumi no naf tu blong tekem desisen, ale samting ya i save mekem we yumi no moa sua se wanem rod i stret blong tekem.

² Long faswan handred yia, wan samting olsem i bin kamaot long sam memba blong Kristin kongregesen blong Korin, long Gris. Sam man we oli kolem olgeta ol ‘nambawan aposol’ oli stap tok agensem ol wok blong aposol Pol. Oli stap talem se: “Ol tok blong Pol long ol leta ya blong hem oli strong tumas, mo oli hevi tumas. Be taem hem i stanap long fes blong yumi, hem i no wan strong man, mo ol tok blong hem i nating nomo.” (2 Korin 10:​7-12; 11:​5, 6) Ating toktok blong olgeta ya i mekem se sam memba long Kristin kongregesen oli no moa sua long rod we oli mas folem.

3, 4. ?From wanem advaes we Pol i givim long ol Kristin long Korin i gud tu long yumi?

³ Pol i kamtru long Korin long yia 50 K.T., mo hem i stanemap wan kongregesen long ples ya. Hem i stap long Korin blong “wan yia haf, i stap tijim ol man long tok blong God.” Yes, ‘plante man Korin oli harem tok blong Pol, nao oli bilif long Jisas, mo oli baptaes.’ (Ol Wok 18:​5-11) Pol i rili intres long ol Kristin brata blong hem long Korin. Hem i wantem se oli stap gohed gud long saed blong spirit. Mo tu, ol Kristin ya nomo oli bin raet long Pol blong askem advaes long sam samting. (1 Korin 7:1) Ale Pol i givim sam nambawan advaes long olgeta.

⁴ Pol i raetem se: “Yufala i mas gohed blong jekemap sipos yufala i holem yet fasin blong bilif no nogat, yufala i mas gohed blong pruvum se yufala i wanem kaen man.” (2 Korin 13:​5, NW ) Sipos ol brata ya blong Korin oli bin folem advaes ya, bambae oli no save gat tingting we i hafhaf long saed blong rod we oli mas folem. Advaes ya i save givhan bigwan long yumi tede tu. ?Ale, be, olsem wanem blong folem advaes ya blong Pol? ?Olsem wanem yumi save jekemap sipos yumi holem fasin blong bilif? ?Mo yumi mekem olsem wanem blong pruvum se yumi wanem kaen man?

“Gohed Blong Jekemap Sipos Yufala i Holem Yet Fasin Blong Bilif”

5, 6. ?Wanem tul we yumi gat blong jekem sipos yumi stap holem bilif no nogat? ?Mo from wanem tul ya i nambawan?

⁵ Long wan jekap i mas gat wan samting no wan man i stap, we hem nao bambae oli jekemap. Mo i mas gat wan tul we bambae i givhan blong mekem jekap ya. Folem tok blong Pol, samting ya we yumi mas jekemap, i no bilif blong yumi, be hem i yumi wan. Ale blong jekemap yumi wan, yumi gat wan tul i stap we hem i stretgud olgeta. Deved i raetem long wan Sam blong hem se: “Loa blong Hae God i stret gud, mo i stap givim niufala paoa long yumi. Ol tok we Hae God i putum, yumi save bilif long hem, mo i stap givim waes long olgeta we oli no waes. Ol loa we hem i stap tijim yumi long hem oli stret, mo olgeta we oli stap obei long ol loa ya, oli stap harem gud. Ol tok we hem i putum oli stret  gud, mo oli stap givim save long yumi.” (Ol Sam 19:​7, 8) Baebol i holem ol loa blong Jeova we oli stret gud olgeta, mo ol advaes blong hem, ol tok we yumi save trastem mo oli tabu. Yes, Baebol hem i nambawan tul ya we yumi save yusum blong jekemap yumi wan.

⁶ Aposol Pol i tokbaot tabu Tok ya blong God i se: “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” (Hibrus 4:12) Yes, tok blong God i save jekemap yumi, i save soemaot wanem samting we i rili stap long hat blong yumi. ?Olsem wanem yumi save yusum tok ya we i sap olsem naef blong faet mo we i gat paoa? Man blong raetem Sam i talem klia, olsem wanem yumi save yusum tok blong God blong jekemap hat blong yumi. Hem i singsing olsem se: “Ol man [we oli haremgud], oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet.” (Ol Sam 1:​1, 2) “Loa blong Hae God” Jeova i stap long Tok blong hem, Baebol. Yumi mas glad blong ridim tok blong Jeova. Yes, yumi mas tekem taem blong ridim buk ya mo blong tingting dip long hem. Taem yumi mekem olsem, yumi mas letem ol tok blong hem oli jekemap hat blong yumi.

7. ?Wanem nambawan rod blong jekem sipos yumi holem bilif?

⁷ Taswe, nambawan rod blong jekemap sipos yumi stap holem bilif yet, hemia blong ridim mo tingting dip long Tok blong God, mo jekem sipos ol fasin blong yumi oli laenap wetem wanem we yumi stap lanem. Yumi mas glad from we yumi gat plante samting blong halpem yumi blong kasem save long Tok blong God.

8. ?Olsem wanem ol buk blong ‘slef we i stret mo waes’ oli save halpem yumi blong jekemap sipos yumi holem bilif no nogat?

⁸ Jeova i givim tijing mo advaes long yumi long ol buk blong ‘slef we i stret mo waes’ we oli stanap long Baebol. (Matiu 24:​45, NW ) Tingbaot bokis ya “Tingting Dip Long Ol Kwestin Ya,” we i stap long en blong olgeta japta blong buk ya Draw Close to Jehovah. * !Ol kwestin olsem oli givhan bigwan long yumi blong yumi tingting dip mo jekemap yumi wan! Ol defdefren stori we oli stap long ol Wajtaoa mo Wekap!, olgeta tu oli halpem yumi blong jekemap sipos yumi stap holem bilif no nogat. Wan Kristin woman i tokbaot ol haf blong Wajtaoa we oli eksplenem wanwan vas long buk blong Ol Proveb, i se: “Ol haf ya [blong Wajtaoa] oli givim gudfala advaes we mi mi save yusum long laef blong mi. Oli halpem mi blong jekem sipos ol toktok, fasin, mo tingting blong mi oli rili laenap wetem ol rul blong Jeova.”

9, 10. ?Jeova i givim wanem blong halpem yumi blong jekem sipos yumi stap holem bilif no nogat?

⁹ Yumi kasem plante advaes mo tok blong leftemap tingting, long ol miting blong kongregesen mo long ol asembli. Hemia sam long ol rod we God i yusum blong halpem olgeta ya we profet Aesea i bin tokbaot olgeta se: “I gat taem i stap kam, we hil ya we haos blong mi i stap long hem, bambae i kam hae moa, i winim ol narafala hil. Mo ol man blong ol narafala kantri bambae oli save wokbaot blong kam long hem. Olgeta ya bambae oli kam, oli talem se, ‘... Yufala i kam. Yumi go antap long hil ya blong [Jeova]. . . . Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.’ ” (Aesea 2:​2, 3) Hemia wan bigfala blesing ya blong kasem tijing olsem wanem blong folem rod blong Jeova.

¹⁰ Wan samting we yumi no mas mestem tu, hemia advaes we i kam long olgeta we oli bigman long saed blong spirit, olsem ol Kristin elda. Baebol i tokbaot olgeta i se: “Sipos wan long yufala i foldaon, yufala we Spirit blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin. Mo yufala tu i mas lukaot gud long yufala, blong sam samting bambae i no kam traem yufala.” (Galesia 6:1) !Yumi mas tangkiu bigwan long Jeova we i putum rod ya i stap blong stretem yumi long saed blong spirit!

11. ?Blong jekemap se yumi stap holem bilif no nogat, yumi nidim blong mekem wanem?

¹¹ Ol buk blong yumi, ol Kristin miting, ol elda​—hemia nao ol nambawan presen we Jeova i givim. Be blong jekemap sipos yumi gat bilif no nogat,  yumi mas skelem ol tingting mo fasin blong yumi wan wetem save we yumi kasem. Taswe, taem yumi ridim ol buk blong yumi no taem yumi harem wan advaes we i kamaot long Baebol, i gud yumi tingbaot se: ‘?Ol tok ya oli stret long fasin blong mi? ?Mi mi stap mekem samting ya? ?Mi mi stap folemgud olgeta Kristin tijing we mi kasem?’ Gudfala tingting we yumi gat long ol save ya we yumi kasem tru long ol buk, ol elda, mo ol miting, bambae i givhan long yumi blong gru long saed blong spirit. Baebol i talem se: “Man we Tabu Spirit ya i no stap long hem, hem i no save kasem ol paoa ya we Tabu Spirit i stap givim. Hem i no gat rod blong save ol samting ya, i stap luk olgeta olsem we oli krangke samting nomo.” Be, “man we Spirit blong God i stap long hem, hem i save lukluk olgeta samting, blong makem wanem i gud, wanem i nogud.” (1 Korin 2:​14, 15) Taswe, i gud yumi traehad blong gat stret tingting long saed blong ol tok no advaes we oli kamaot long ol buk blong yumi, ol magasin, mo taem yumi harem ol tok long ol miting no ol advaes blong ol elda. I gud yumi tingbaot ol samting ya wetem tingting blong man we tabu spirit i stap long hem.

“Gohed Blong Pruvum Se Yufala i Wanem Kaen Man”

12. ?Taem yumi pruvum se yumi wanem kaen man, yumi mekem wanem?

¹² Blong pruvum se yumi wanem kaen man, yumi mas askem kwestin long saed blong yumi wan. Yes, i tru, yumi stap long trutok. ?Be laef blong yumi i laenap wetem trutok ya gogo kasem wanem mak? Yumi pruvum se yumi wanem kaen man taem yumi soemaot se yumi bigman long tingting, mo yumi tinghae long ol kakae long saed blong spirit we yumi kasem.

13. ?Folem tok blong Hibrus 5:​14, wanem i soemaot se yumi bigman finis long ol Kristin fasin?

¹³ ?Wanem samting we yumi save jekem long yumi wan we i soemaot se yumi bigman long ol Kristin fasin? Aposol Pol i raetem se: “Strong kakae i blong olgeta we oli kam bigman finis, we oli stap traehad longtaem finis, nao oli naf blong jusumaot wanem fasin i gud mo wanem fasin i nogud.” (Hibrus 5:14) Yumi soemaot klia se yumi bigman taem yumi trenem tingting blong yumi gogo yumi kam naf blong jusumaot samting we i gud mo samting we i nogud. Yumi trenem tingting blong yumi taem yumi yusum tingting ya oltaem blong jusumaot wanem rul blong Baebol i stret blong folem, olsem wan man blong resis we i trenem ol masel long bodi blong hem bifo we hem i save win long resis.

14, 15. ?From wanem yumi mas traehad blong stadi long ol dip trutok blong Baebol?

¹⁴ Be bifo we yumi save trenem tingting blong yumi blong luksave samting we i gud mo samting we i nogud, yumi mas fulumap tingting blong yumi wetem save. Blong mekem olsem, i impoten tumas blong stadi yumi wan. Taem yumi stadi oltaem, antap moa taem yumi stadi long ol dip save long Tok blong God, save blong yumi i gru. Long ol yia we oli pas i gat plante dip save we oli kamaot long ol Wajtaoa. ?Yu yu mekem wanem taem ol Wajtaoa ya oli tokbaot sam trutok we oli dip? ?Yu yu no wantem ridim ol Wajtaoa ya from we “sam tok blong hem i strong blong save”? (2 Pita 3:16) I moagud yumi traem bes blong yumi blong kasem ol dip save ya.​—Efesas 3:18.

¹⁵ ?Be olsem wanem sipos i hadwok long yu blong stadi? Ale i impoten tumas we yu traem wokem fasin ya we yu laekem blong stadi. * (1 Pita 2:2) Blong kam bigman long saed blong spirit yumi mas lanem olsem wanem blong tekem ol strong  kakae, hemia ol dip trutok blong Baebol. Sipos yumi no mekem olsem, tingting blong yumi bambae i sot long save nao bambae yumi naf blong skelem smol samting nomo. Be afta we man i kasem save we i mekem se hem i naf blong jusumaot samting we i gud long samting we i nogud, hem i nidim nara samting moa blong soem se hem i bigman. Long laef blong yumi evri dei, yumi wanwan i mas mekem ol save ya we yumi kasem taem yumi stadi Baebol, i wok long laef blong yumi.

16, 17. ?Wanem advaes we disaepol Jemes i givim long saed blong man we i “mekem ol samting we tok ya i talem”?

¹⁶ Wan narafala samting we i pruvum se yumi wanem kaen man, hemia fasin we yumi mekem blong soem se yumi tinghae long trutok​—i minim ol wok we bilif i pulum yumi blong mekem. Disaepol Jemes i yusum wan pijatok we i gat bigfala paoa long yumi. Hem i talem pijatok ya blong tokbaot olsem wanem yumi mas jekemap yumi wan, i se: “I nogud yufala i stap giaman nomo long yufala, we yufala i stap lesin long tok ya blong God, be yufala i no mekem. Yufala i mas mekem ol samting we tok ya i talem. Man we i stap lesin long tok ya be i no stap mekem ol samting we tok ya i talem, hem i olsem man we i stap lukluk fes blong hem long glas. Hem i save luklukgud fes blong hem, be taem hem i gowe, wantaem nomo hem i no moa save tingbaot we fes blong hem i olsem wanem. Be loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem.”​—Jemes 1:​22-25.

¹⁷ Long tok ya i olsem we Jemes i stap talem se: ‘Lukluk yu wan long glas ya we hem i Baebol, mo jekemap yu wan. Mekem samting ya oltaem. Taem yu ridim wan haf blong Baebol, skelem prapa fasin blong yu wetem samting ya we yu ridim. Ale, yu no mas hareap blong fogetem samting we yu jes luk. Yu mas jenisim wanem fasin we i nidim blong jenisim.’ Samtaem bambae i no isi blong folem advaes ya.

18. ?From wanem i no isi blong folem advaes blong Jemes?

¹⁸ Tingbaot wok ya we yumi mas mekem, hemia blong talemaot Kingdom. Pol i raetem se: “Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.” (Rom 10:10) Blong mekem wok ya blong talemaot tok ya we i save sevem yumi, yumi mas mekem plante jenis long laef blong yumi. Bighaf blong yumi i no gat fasin ya we yumi save go long enikaen man blong toktok wetem olgeta. Taswe blong mekem wok ya oltaem mo blong putum wok ya i stap long fasples long laef blong yumi, ating yumi mas mekem plante moa jenis yet, mo yumi mas lego sam samting tu we yumi nomo i wantem. (Matiu 6:33) Be taem yumi kam man we i stap mekem wok ya we God i givim long yumi, ale yumi glad from we yumi save se samting ya i leftemap Jeova. ?Olsem wanem? ?Yu yu strong long wok ya blong talemaot Kingdom?

19. ?Wanem ol wok we yumi mas mekem from bilif?

¹⁹ ?Ol wok we yumi mekem folem bilif blong yumi oli mas bigwan olsem wanem? Pol i talem se: “Yufala i mas holem ol fasin ya we mi mi soemaot long yufala long ol tok mo ol wok blong mi, mo we mi tijim yufala long hem, nao yufala i lanem olgeta finis. Nao God ya we i stamba blong pis, hem bambae i stap kampani wetem yufala.” (Filipae 4:9) Yumi pruvum se yumi wanem kaen man taem  yumi mekem olgeta samting we yumi lanem, we yumi agri long hem, we yumi harem mo we yumi luk, i wok long laef blong yumi. Hemia olgeta samting we oli joen wetem desisen we yumi tekem blong givim laef i go long God mo mekem wok olsem wan Kristin disaepol. Tru long profet Aesea, Jeova i talem long yumi se: “Hemia rod. Yufala i folem.”​—Aesea 30:21.

20. ?Wanem kaen man mo woman we oli givhan bigwan long ol kongregesen?

²⁰ Ol man mo woman we oli stadi gud long Tok blong God, mo we oli strong blong talemaot gud nius, mo oli no slak blong holem ol stret rul blong God, mo oli sapotem Kingdom fulwan, oli wan bigfala blesing long kongregesen. Taem i gat ol man mo woman olsem insaed long kongregesen, oli mekem kongregesen i strong long saed blong spirit. Yes, oli givhan bigwan from we i gat plante plante man we oli niu long trutok mo we oli nidim help yet. Taem yumi wanwan i folem advaes blong Pol se yumi mas ‘gohed blong jekemap sipos yumi holem fasin blong bilif, mo yumi mas gohed blong pruvum se yumi wanem kaen man,’ ale fasin blong yumi tu, i save givhan bigwan long ol narafala.

Haremgud Blong Mekem Ol Samting We God i Wantem

21, 22. ?Olsem wanem yumi save wantem mekem ol samting we God i talem?

²¹ King Deved blong Isrel bifo, i singsing se: “God blong mi. Mi ya, mi kam. Ol tok blong yu blong tijim mi oli stap long buk blong Loa blong yu. Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” (Ol Sam 40:8) Deved i glad tumas blong mekem ol samting we God i wantem. ?From wanem? From we Deved i holem ol loa blong Jeova long tingting mo hat blong hem. Tingting blong Deved i no hafhaf se bambae hem i wokbaot folem wanem rod. Nogat.

²² Taem loa blong God i stap long tingting no hat blong yumi, yumi no gat tingting we i hafhaf, yumi savegud weswan rod i beswan rod blong folem. Yumi wantem tumas blong mekem ol samting we God i talem. Taswe i impoten tumas we yumi evriwan i “traehad” bigwan blong mekem wok blong Jeova wetem fulhat blong yumi.​—Luk 13:24.

[Ol Futnot]

?Yu Yu Tingbaot?

• ?Olsem wanem yumi save jekem sipos yumi stap holem bilif no nogat?

• ?Blong pruvum se yumi wanem kaen man, yumi mas mekem wanem?

• ?Wanem i pruvum se yumi bigman long ol Kristin fasin?

• ?Olsem wanem ol wok we yumi mekem folem bilif blong yumi oli soemaot se yumi wanem kaen man?

[Kwestin]

[Tok blong pija long pej 23]

?Yu yu save olsem wanem blong jekem sipos yu stap holem bilif no nogat?

[Tok blong pija long pej 24]

Yumi pruvum se yumi bigman long ol Kristin fasin taem yumi naf blong yusum save blong yumi blong jusumaot stret rod

[Tok blong pija long pej 25]

Yumi soemaot se yumi wanem kaen man taem yumi ‘lesin long tok blong God mo yumi mekem ol samting we tok ya i talem’