‘Jeova i Stap Givhan Long Mi’

Mi Mi Glad Blong Mekem Wok Blong Jeova Nating Se Mi No Mared

“WAN Kristin woman long Spen i talem se: “Plante long yumi, yumi hapi tumas nating se yumi no mared.” ?From wanem hem i talem se hem i hapi? Hem i gohed i se: “Yumi glad from we yumi no gat plante wari olsem olgeta we oli mared, ale from samting ya yumi save mekem moa long wok blong Jeova.”

Filing ya i laenap gud wetem wanem we Tok blong God i talem long saed blong olgeta we oli no mared. Taem aposol Pol i tokbaot ol samting we oli joen wetem mared laef, hem i talemaot tingting we God i givim long hem, i se: “Long olgeta we oli no mared yet, mo long ol wido, mi mi talem se i gud yufala i stap olsem mi nomo.” Pol i no mared. ?Be from wanem Pol i givim advaes ya? Hem i talem se man we i mared, tingting blong hem i seraot long tu rod, be man no woman we i no mared “hem i stap tingbaot moa long ol wok blong Masta blong yumi.” (1 Korin 7:​8, 32-34) Wok blong Jeova nao i stamba samting we i givim glad long olgeta we oli no mared.

Livim Mared From Wan Impoten Risen

Maet ol tok ya blong Pol oli mekem man i konfius lelebet sipos hem i stap long wan kantri we ol man blong hem oli ting se i impoten blong mared mo blong gat pikinini. Be, Jisas Kraes we hem i no mared mo i hapi, i talem wan impoten risen blong no mared. Hem i talem se: “Sam man oli no save mared from we oli livim mared blong mekem ol wok blong God, we hem i King blong olgeta. Be man we i save holem tok ya, hem i mas holem.”​—Matiu 19:12.

Folem ol tok ya, plante oli faenem se taem oli livim mared, samting ya i givhan long olgeta blong mekem wok blong God, we i no gat ol wari blong mared laef i pulum tingting blong olgeta. (1 Korin 7:35) Plante taosen Kristin we oli no mared, oli wosipim Jeova we oli hapi nomo. Mo oli faenem glad taem oli mekem wok blong givhan long ol narafala. *

Plante Kristin we oli no mared, oli luksave se oli save hapi sem mak long olgeta we oli mared. Oli luksave tu se olgeta we oli mared oli save harem nogud sem mak long olgeta we oli no mared. Tugeta grup ya, oli hapi mo samtaem oli no hapi. Be, Baebol i talemaot klia se olgeta we oli mared bambae oli gat “trabol long laef blong olgeta.”​—1 Korin 7:28.

Livim Mared From Wan Trabol Long Laef

Plante oli no mared, i no from we olgeta nomo oli jusum, be from ol trabol long laef. Maet oli wantem wan fren, wan man we i soem lav mo filing long olgeta, olsem insaed long plan blong mared. Be samfala oli no mared from we oli no gat vatu, no from sam nara samting we i blokem olgeta blong mared. Sam Kristin​—plante long olgeta oli ol sista we oli bigman long saed blong spirit​—oli no mared from we oli wantem obei long advaes ya blong Baebol, hemia blong mared long wan “man blong Masta” nomo. (1 Korin 7:39) Olgeta ya oli lukaot wan blong mared wetem, long medel blong olgeta we oli givim laef blong olgeta i go long Jeova mo tekem baptaes finis.

 Samtaem, olgeta ya we oli no mared oli harem nogud blong stap olgeta wan. Wan Kristin woman i bin talemaot se hem i harem olsemia. Hem i se: “Mifala we i no mared, mifala i save ol loa blong Jeova mo mifala i no wantem mekem Jeova i harem nogud long eni rod. Mifala tu i wantem gat ol man blong mifala, be nomata hamas man blong wol ya oli wantem se mifala i mared long olgeta, mifala i stanap strong. Mifala i no wantem blong kampani nating wetem ol man mo woman we oli no gat sem bilif olsem mifala.” I gud tumas we ol Kristin ya oli mekem ol advaes blong Baebol i wok long laef blong olgeta, mo oli holem strong long ol rul blong Baebol. Long rod ya, oli mekem Jeova i glad, nating se oli harem nogud long filing blong olgeta.

Jeova i Halpem Bigwan Olgeta We Oli No Mared

Jeova i stap tru long olgeta we oli stap tru long hem taem olgeta ya oli no mared long ol man no woman we oli no wosipim Hem. Jeova i bin halpem King Deved, taswe Deved i save talem se: “![Jeova]! Olgeta we oli stap tru long yu, oltaem, yu yu stap tru long olgeta.” (Ol Sam 18:​25, NW ) Mo God i mekem promes ya long olgeta we oli obei long hem, se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Yumi save mekem olsem Jeova taem yumi givim ol gudgudfala advaes long olgeta Kristin ya we oli no mared, mo we oli folem strong ol Tok blong God. Yumi save prea tu long Jeova blong i givim paoa long olgeta blong oli save winim ol traem.​—Jajes 11:​30-40.

Plante Kristin we oli no mared oli faenem se sipos oli spenem plante taem long wok ya blong tijim ol man long Baebol, samting ya i mekem se oli haremgud long laef. Tingbaot Patricia, wan woman we i gat 35 yia be i no mared. Hem i wan paenia, i min se hem i prij fultaem. Patricia i talem se: “From we mi mi no mared, mi kasem plante traem. Be mi gat janis blong mekem wok blong fultaem paenia. Long taem ya we mi no mared, i isi nomo blong mi jenisim program blong mi, mekem se mi gat moa taem blong stadi. Mi lanem tu blong trastem moa Jeova, speseli taem mi kasem ol traem.”

Ol tingting ya oli kamaot from we hem i bilif strong long nambawan promes ya blong Baebol se: “Yu mas givim laef blong yu long Hae God, yu mas trastem hem, nao bambae hem i halpem yu.” (Ol Sam 37:5) Yes, nating we ol trufala man blong Jeova oli mared no oli no mared, oli save haremgud mo kasem paoa from ol tok ya blong Baebol se: ‘Jeova i stap givhan long mi.’​—Ol Sam 121:2.

[Futnot]

[Tok blong makem poen pija long pej 9]

“Man we i no mared i tingbaot ol samting blong Masta blong yumi, olsem wanem blong mekem Masta blong yumi i glad long hem.”​—1 KORIN 7:​32, NW

[Bokis blong pija long pej 8]

KASEM BLESING TAEM YU NO MARED

Jisas we i neva mared, i talem se: “Kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.”​—Jon 4:34.

Ol fo gel blong Filip we oli no mared, oli bisi oltaem blong “talemaot tok we God i givim long olgeta.”​—Ol Wok 21:8, 9.

Ol Kristin sista we oli no mared mo we oli stap talemaot Kingdom, oli haf blong ‘wan bigfala ami blong ol woman we oli stap talemaot gud nius.’​—Ol Sam 68:​11, NW.