Laef Stori

Jeova i Givim Bigfala Pei Long Olgeta We Oli Folem Rod Blong Hem

ROMUALD STAWKI I TALEM STORI YA

Taem Wol Wo Tu i stat long Septemba 1939, bigfala faet i kamaot long not blong Polan. Mi mi gat naen yia nomo mo mi intres blong go klosap long ples we faet i stap gohed long hem. Wanem we mi luk i mekem mi mi fraet​—ol dedman oli stap olbaot long graon, mo i gat fulap smok olbaot. Long taem ya mi stap tingbaot olsem wanem bambae mi gohom we mi sef, be i gat sam kwestin tu we i kam long tingting blong mi se: “?From wanem God i letem ol nogud samting oli hapen? ?Hem i saed wetem hu long faet ya?”

KLOSAP long en blong wo, oli fosem ol yangfala blong go wok blong gavman blong Jemani. Sipos yangfala i no wantem, oli hangem nek blong hem long wan tri no long wan brij wetem wan saen long jes blong hem we i se, “man we i agensem gavman.” Taon ya blong mifala, Gdynia, i stap long medel blong ol ami blong Jemani mo ol ami blong Soviet we tufala i stap faet. Taem mifala i go aot long taon blong go karem wota, mifala i pas long medel blong ol bolet mo bom we i stap flae antap long hed blong mifala, long taem ya nao we smol brata blong mi Henryk i kasem kil mo i ded. From ol nogud samting we i hapen, mama blong mi i karem mifala ol fo pikinini i go long wan rum aninit long graon. Long ples ya brata blong mi Eugeniusz we i gat tu yia i ded from sik ya diphtheria [hemia wan kaen strong fiva].

Mi mi askem long mi wan bakegen se: “?Wehem God? ?From wanem hem i letem man i safa?” Nating we mi mi wan strong man blong Katolik Jos mo mi stap go long jos oltaem, be mi no kasem ansa blong ol kwestin ya.

Mi Glad Blong Kasem Trutok Blong Baebol

Mi kasem ansa blong ol kwestin blong mi long wan ples we mi no tingbaot. Wo i finis long 1945,  mo long stat blong 1947 wan Witnes blong Jeova i kam long haos blong mifala long Gdynia. Mama blong mi i toktok wetem Witnes ya, mo mi harem sam long ol samting we hem i stap tokbaot. Ol samting we Witnes ya i talem i stret, mekem se mifala i glad blong go long wan miting blong olgeta. Wan manis biaen, nating we mi no kasem plante save yet long Baebol, mi folem sam Witnes we oli go prij long ol man, long saed blong wan fiuja we i moa gud we bambae i no gat wo mo fasin safa. Mi mi glad long samting ya.

Long Septemba 1947, mi tekem baptaes long wan seket asembli long Sopot. Long nekis yia blong hem, long manis Mei, mi statem wok blong fultaem paenia, mi spenem moa taem blong tokbaot Baebol long ol man. Ol lida blong skul oli agensem wok blong mifala mo oli fosem ol man blong mekem i nogud long mifala. Wantaem, wan grup blong ol man we oli kros tumas, oli stonem mifala, mo oli kilim nogud mifala. Wan narafala taem, ol lida blong skul mo ol sista blong Katolik Jos oli talem long wan grup blong ol man blong oli agensem mifala. Mifala i mas go haed long polis stesen, be ol man ya oli stanap raon long bilding ya mo oli talem se bambae oli kilim mifala. Biaen, plante moa polis oli kam, nao mifala i save gohom sef.

Long taem ya, i no gat kongregesen long eria we mifala i stap prij long hem. Sam samtaem mifala i mas slip afsaed nomo long bus. Mifala i glad we mifala i naf blong prij, nating se i gat sam trabol. Tede, i gat ol kongregesen long ples ya mo oli holemstrong long trutok.

Wok Long Betel Mo Oli Arestem Mi

Long 1949, mi go wok long Haos Betel long Łódź. !Mi mi glad blong wok long ples ya! Be sore tumas, mi mi stap smoltaem nomo long Betel. Long Jun 1950, wan manis bifo we gavman i putum tabu long wok blong mifala, oli arestem mi wetem sam brata long Betel. Oli tekem mi mi go long kalabus mo oli askem plante kwestin long mi mo givim kil long mi.

From we papa blong mi i wok long wan sip we i stap go long New York oltaem, sam polis we oli askem kwestin long mi oli fosem mi blong talem se papa blong mi i stap mekem wok blong spae blong ol man Amerika. Mi mas stanap strong taem oli askem ol kwestin ya long mi. Mo tu, i gat fo polis man we oli traem fosem mi blong sapotem ol giaman stori we oli talem long saed blong Brata Wilhelm Scheider, we i stap lukaot long wok blong prij long Polan long taem ya. Oli kilkilim aninit blong leg blong mi wetem ol bigfala wud. Taem mi stap ledaon long floa mo blad i stap ronaot long leg blong mi, mi harem se mi no moa naf blong holem soa ya, nao mi krae mo mi singaot se, “!Jeova, halpem mi!” Ol polisman ya oli sek, nao oli stop blong kilim mi. Afta sam minit i pas, fofala polisman ya oli slip. Mi haremgud mo mi kasem smol paoa bakegen. Mi save se Jeova i save givhan long ol man blong hem taem oli singaot hem blong i halpem olgeta. Samting ya i mekem bilif blong mi i strong mo i tijim mi blong trastem God fulwan.

Long ripot we oli raetem long saed blong taem ya we oli bin kwestinim mi, oli talem sam giaman toktok, we oli se, mi nao mi bin talem. Taem mi wantem toktok agensem samting we oli raetem long ripot ya, wan ofisa i talem long mi se, “!Bambae yu yu toktok long kot nomo!” Wan man we i stap long kalabus wetem mi i kaengud long mi, i talem long mi se mi no mas wari, from we loea blong ami i mas lukluk ripot ya laswan, mo samting ya bambae i givim janis long mi blong talemaot se ol tok long ripot ya oli giaman. Mo hemia nao wanem we i hapen.

Wok Blong Seket Elda Mo Kalabus Bakegen

Mi mi gofri long Jenuware 1951. Wan manis biaen, mi mekem wok olsem elda blong visitim ol  kongregesen. Nating we oli putum tabu long wok blong prij, mi wok wetem ol brata blong givhan long ol kongregesen, mo halpem ol narafala Witnes we oli stap wanwan olbaot from we ol polis oli stap spae long wok olgeta. Mifala i leftemap tingting blong olgeta blong gohed long wok blong prij. Long ol yia biaen, ol brata ya oli no fraet blong sapotem ol elda we oli goraon long ol kongregesen mo long fasin haed oli gohed long wok blong prentem mo givimaot ol buk we oli tokbaot Baebol.

Wan dei long Eprel 1951, afta long wan Kristin miting, ol polis ofisa we oli bin wajemgud mi, oli arestem mi long rod. From we mi no wantem ansa long sam kwestin we oli askem, oli putum mi long kalabus ya Bydgoszcz mo long semfala naet oli askem moa kwestin long mi. Oli givim oda long mi blong stanap fesem stonwol blong sikis dei mo sikis naet. Oli no givim kakae no dring long mi, mi stap smelem nomo smok blong sigaret blong ol polis ofisa. Oli kilim mi mo oli bonem mi long ol sigaret blong olgeta. Taem mi mi hafded, oli sakem wota long mi mo askem kwestin long mi bakegen. Mi askem strong long Jeova blong i givim paoa long mi, mo hem i givhan long mi.

Taem mi stap long kalabus ya Bydgoszcz, i gat sam gudfala samting i kamaot. Mi gat janis blong talemaot trutok blong Baebol long ol man we ol narafala Witnes oli no save prij long olgeta. Yes, i gat plante janis blong givim witnes. Ol prisena oli glad blong lesin mo oli laekem gud nius, from we laef we oli gat long kalabus i mekem olgeta oli harem nogud mo oli no gat hop nating.

Tu Impoten Jenis

Smoltaem afta we mi gofri long 1952, mi mitim Nela, wan sista we i wok strong blong talemaot gud nius. Nela i bin mekem wok blong paenia long saot blong Polan. Biaen, hem i wok long wan ples we i haed blong prentem ol buk blong Baebol, mifala i kolem ol ples ya, “ples blong mekem bred.” Wok ya i no isi from we man i mas gat klia tingting oltaem blong luksave sipos i gat denja mo i mas rere blong lego samting we hem nomo i wantem. Mitufala i mared long 1954, mo mitufala i gohed nomo blong mekem wok blong Jeova fultaem kasem taem we gel blong mitufala, Lidia, i bon. Biaen mitufala i tingting se, blong mi mi naf blong gohed blong mekem wok ya blong visitim ol kongregesen, Nela bambae i stop long wok blong paenia, nao bambae hem i save stap long haos blong lukaot long gel blong mitufala.

Long semfala yia, mitufala i mas mekem wan narafala impoten desisen bakegen. Sosaeti i askem mi blong wok olsem wan distrik elda long samting olsem 30 pesen long kantri blong Polan. Mitufala i prea long Jeova long saed ya. Mi save se i impoten blong leftemap tingting blong ol brata we oli mas traehad from we gavman i putum tabu long wok blong mifala. Long taem ya i gat plante brata we polis i holem olgeta, mekem se i gat nid i stap blong leftemap tingting blong olgeta long saed blong spirit. Nela i sapotem mi, nao mi agri blong mekem wok ya. Blong 38 yia Jeova i halpem mi blong mekem wok ya.

Lukaot Long Ol “Ples Blong Mekem Bred”

Long taem ya, distrik elda i gat wok blong lukaot long ol “ples blong mekem bred” we oli stap long ol ples we i haed. Ol polis oli wajemgud mifala oltaem blong faenem mo stopem wok blong prentem ol buk. Sam samtaem oli faenem ol ples we mifala i stap yusum blong prentem buk, be mifala i neva sot long kakae long saed blong spirit. Hemia i wan klia pruf se Jeova i stap lukaotgud long mifala.

 Man we i naf blong mekem bigfala wok ya blong prentem ol buk, hem i mas gat fasin ya blong stap tru, tingting blong hem i mas kliagud blong luksave denja, hem i mas rere blong lego samting we hem nomo i wantem, mo gat fasin obei. Ol man we oli wok long ol “ples blong mekem bred” oli mas gat ol fasin ya, mekem se wok i save gohed long ol ples ya we oli haed. I hadwok blong faenem wan stret ples we i haed blong mekem wok ya. I gat sam ples we i luk olsem se i gud, be ol brata we oli wok long ol ples ya oli no waes tumas. Be long sam narafala ples, i gat ol brata we oli waes, be ples i no stret blong mekem wok ya. Ol brata oli glad mo oli rere oltaem blong mekem wok. Mi tinghae long ol brata mo sista ya we mi gat janis blong wok wetem olgeta.

Blokem Ol Enemi Blong Gud Nius

Long ol hadtaem ya, oli talem giaman tok se mifala i brekem loa mo agensem gavman, mo from samting ya mifala i mas pas long kot. Hemia i wan problem from we mifala i no gat loea we i save tok long saed blong mifala. Sam loea oli sore long mifala, be plante oli fraet long ol haeman blong gavman. Be Jeova i savegud wanem we mifala i nidim, mo long stret taem blong hem, hem i lidim evri samting.

Alojzy Prostak i wan elda long Kraków, we i stap visitim ol kongregesen. Ol polis oli bin arestem hem mo oli spolemgud hem long taem we oli stap askem kwestin long hem, mekem se hem i mas go long hospital blong kalabus. Hem i stanap strong, nating se oli spolem tingting mo bodi blong hem. From samting ya, ol narafala prisena we oli stap long hospital oli gat respek long hem mo oli tinghae long hem. Wan long olgeta ya, i wan loea we nem blong hem Witold Lis-Olszewski. Hem i sapraes long fasin blong Brata Prostak we hem i no fraet nating. Hem i toktok long brata ya plante taem mo i promes se, “Taem mi gofri mo mi mekem wok blong mi bakegen, bambae mi glad blong toktok long saed blong ol Witnes blong Jeova long kot.” Hem i mekem wanem we hem i talem.

Masta Olszewski i gat wan tim blong ol loea blong hem wan. Help we oli givim long mifala i nambawan. Long taem we fasin agens i bigwan moa, ol loea ya oli toktok long saed blong ol brata klosap 30 taem evri manis taem gavman i putum ol brata long kot​—!hemia wan kot kes evri dei! From we Masta Olszewski i mas kasem save long saed blong ol bisnes ya, oli makem mi nao blong storian wetem hem oltaem. Mitufala i wok tugeta blong seven yia, long ol yia 1960 mo 1970.

Long taem ya, mi lanem fulap samting long saed blong loa. Oltaem mi stap long kot blong harem ol toktok blong ol loea​—ol gudfala toktok mo sam tok we i nogud​—mo olsem wanem oli jajem wan man mo ol toktok blong ol brata we oli pas long kot. Ol samting ya i givhan long mi blong halpem ol brata, speseli ol brata we oli mas givim witnes long kot, blong oli save wanem blong talem mo wetaem i moagud oli no toktok long kot.

Oltaem, Masta Olszewski i stap long haos blong ol Witnes blong Jeova bifo we oli lukluk long wan bisnes long kot. Hemia i no from we hem i no naf blong stap long wan hotel, nogat. Be olsem hem i bin talem finis se, “Bifo we mi go long kot, mi mas gat tingting we yufala i gat.” Fulap long ol kot kes we mifala i bin winim, hemia from help blong Masta Olszewski. Hem i sapotem mi plante taem, mo hem i neva wantem we mi mi givim mane long hem. Wan taem, hem i no wantem blong kasem mane, taem hem i jajem 30 kot kes blong mifala. ?From wanem? Hem i se: “Mi wantem blong givhan long wok blong yufala, nating se help we mi givim i smol nomo.” Mo mane we mifala i mas givim long hem from ol 30 kes ya i bigwan tumas. Ol haeman long gavman oli stap wajem ol wok ya we Masta Olszewski mo tim blong hem oli mekem, be samting ya i no blokem hem blong givhan long mifala.

I no isi blong eksplenem fulwan olsem wanem ol brata oli bin givim gudfala witnes long kot. Plante long olgeta oli kam long kot haos blong luk mo leftemap tingting blong ol brata we oli pas long kot. Long ol taem we i gat plante kot kes, mi mi kaontem se i gat bitim 30,000 brata mo sista long wan yia we oli kam long kot haos. !Hemia i wan bigfala hip blong ol Witnes ya!

Wan Niufala Wok

Long 1989, gavman i karemaot tabu long wok blong mifala. Tri yia biaen, oli wokem wan niufala branj ofis mo oli openem long semfala yia. Oli askem mi blong wok long Hospital Infomesen Sevis, mo mi glad blong mekem wok ya. Mi wetem tu narafala brata, mitrifala i givhan long ol brata we  oli no wantem we dokta i givim blad long olgeta. Mifala i givhan long olgeta blong stanap strong long bilif mo save blong olgeta long Baebol.​—Ol Wok 15:29.

Mi mo waef blong mi i glad long janis ya we mitufala i gat blong mekem wok blong Jeova. Nela i givhan long mi mo i leftemap tingting blong mi oltaem. Mi mi tangkiu tumas long Nela from we taem mi mi bisi long ol tiokratik wok no taem we mi mi stap long kalabus, hem i neva komplen se from wanem mi no stap wetem hem long haos. Long ol hadtaem, hem i no letem tingting blong hem i foldaon, be hem nao i leftemap tingting blong ol narafala.

Eksampol, long 1974 oli holem mi wetem sam narafala elda we oli stap visitim ol kongregesen. Sam brata we oli save wanem i hapen, oli wantem talemaot samting ya long waef blong mi long kaen fasin. Taem oli luk hem, oli askem se, “?Sista Nela yu yu rere blong harem wan bad nius?” Fastaem hem i fraet, i no talem wan samting nating, from we hem i ting se mi mi ded finis. Taem hem i harem se mi stap long kalabus, hem i talem se: “!Hem i laef i stap! Hemia i no faswan taem we hem i go long kalabus.” Biaen ol brata oli talem long mi se, oli sapraes long gudfala tingting we Nela i gat.

Nating we mifala i bin pastru long sam traem we oli strong tumas, oltaem Jeova i givim blesing long mifala from we mifala i folem rod blong hem. Mitufala i glad from gel blong mitufala Lidia mo man blong hem Alfred DeRusha i soem gudfala Kristin fasin. Tufala i tijimgud ol boe blong tufala, Christopher mo Jonathan, blong kam ol man blong God, mo samting ya i mekem mitufala i haremgud. Brata blong mi Ryszard, mo sista blong mi Urszula, tufala tu i holemstrong long ol Kristin fasin blong plante yia finis.

Jeova i neva lego mifala, mo mifala i wantem gohed blong mekem wok blong hem wetem fulhat blong mifala. Ol tok blong Ol Sam 37:34 i kamtru long mitufala we i se: “Yu mas putum tingting blong yu i stap strong long Hae God, mo yu mas obei long ol tok blong hem [“folem rod blong hem oltaem,” NW ], nao bambae hem i ona long yu, i givim graon ya long yu.” Mifala i stap wet long taem ya wetem fulhat blong mifala.

[Tok blong pija long pej 17]

Long Asembli long 1964, long yad blong wan brata long Kraków

[Tok blong pija long pej 18]

Long 1968, wetem waef blong mi Nela, mo gel blong mitufala, Lidia

[Tok blong pija long pej 20]

Mi wetem wan yangfala boe we i Witnes bifo we dokta i katem hat blong hem, we hem i no yusum blad

[Tok blong pija long pej 20]

Mi wetem Dokta Wites wan jif dokta blong ol pikinini we i save katem hat be i no yusum blad, long Katowice Hospital

[Tok blong pija long pej 20]

Wetem Nela long 2002