?Ol Filing Blong Yu Oli Stap Givim Hadtaem Long Yu?

LENA i wan woman we i ting se hem i nogud. Hem i gat ol filing olsem, stat taem hem i yang i kam kasem naoia. Hem i talem olsem: “Taem mi mi pikinini, wan man i bin stap spolem mi long saed blong seks. Hem i mekem olsem blong plante yia. Samting ya i spolem we i spolemgud ol filing blong mi. Mi stap tingting oltaem se mi mi rabis. Mi harem olsem se mi laef blong nating nomo.” Wan narafala woman we nem blong hem Simone, i tingtingbak long taem we hem i yangfala mo i talem se: “Long hat blong mi, mi harem olsem se mi no moa gat filing mo mi rili ting se mi rabis nomo.” Tru, i luk olsem se plante man tede oli no glad nating, hemia from we oli gat olkaen filing olsem we tufala woman ya i tokbaot. Long wan kantri, oli putum wan telefon namba i stap blong ol yangfala oli save ring i go long namba ya blong kasem advaes. Ol man we oli wok long telefon kampani ya oli talem se klosap stret haf blong olgeta yangfala we oli ring i go long olgeta oli stap talem se, “oltaem nomo oli stap harem long filing blong olgeta se oli nogud.”

Sam dokta oli talem se wan man i gat olkaen filing ya from we ol narafala man nao oli daonem hem. Man i stat tingting se hem i nogud taem ol  narafala man oli tok nogud long hem oltaem, oli jikim hem bitim mak, no oli yusum hem long wei we i nogud. Nomata weswan long ol samting ya i kasem wan man, be risal blong hem se man ya i no moa wan strong man long filing blong hem. Wan stadi we ol dokta oli bin mekem i no longtaem, i soemaot klia se man we i ting nogud long saed blong hem wan, hem i no trastem hem wan mo ol narafala tu, ale, from samting ya i had long hem blong gat ol fren. Ripot we oli raetem long saed blong stadi ya i talem se, “ol man ya oli fraet se narafala bambae i no laekem olgeta, be olgeta nomo oli stap ‘wokem’ rod blong ol fren oli no moa laekem olgeta.”

Man we i gat olkaen filing olsemia, hem i trabol tumas long prapa tingting blong hem nomo. Olsem Baebol i talem, hem i stap “tingting tumas.” (Ol Sam 94:19) Sipos man ya i mekem wan samting we i gud, be hem i tingting yet se samting ya i no gud inaf. Taem wan samting i gorong, wantaem nomo, hem i talem se hemia fol blong hem. Maet narafala i talem gudfala toktok long hem from gudfala wok we hem i mekem, be hem i filim se wanem we hem i mekem i giaman nomo, mo hem i fraet se wan dei narafala ya we i talem gudfala toktok ya long hem, bambae i gat nogud tingting yet long hem. Man ya i ting se hem i no gud inaf blong kasem ol samting long laef we oli save givim glad long hem. Ale, from samting ya, hem i stap mekem sam fasin we i spolem hem wan bakegen, mo hem i faenem i had blong stopem samting ya. Lena, we yumi tokbaot fastaem, i no moa stap kakae gud from we hem i ting nating nomo long hem wan. Hem i talem se, “Mi harem se mi no naf blong jenisim wan samting long laef blong mi.”

?Ol man ya we oli stap trabol from we oli stap “tingting tumas” se oli nogud, bambae oli harem olsemia long ful laef blong olgeta? ?I gat rod blong winim ol nogud filing ya? Baebol i givim sam gudfala rul mo advaes we oli bin halpem plante man finis, blong oli winim faet agensem ol nogud filing olsem. ?Wanem ol rul ya? ?Mo olsem wanem ol rul ya oli bin halpem sam man blong oli glad long laef? Nekis haf bambae i tokbaot samting ya.