Wan Kwestin

?Tok ya long Sefanaea 2:3 se “maet,” i minim se ol man blong God oli no sua se bambae oli kasem laef olwe no nogat?

Vas ya i rid olsem: “Yufala long ples ya, we tingting blong yufala i stap daon, mo oltaem yufala i stap obei long ol tok blong Hae God, i gud yufala i stap prea long hem. Yufala i mas mekem ol samting we i stret, mo yufala i mas mekem tingting blong yufala i stap daon long fes blong hem. Sipos yufala i mekem olsem, taem dei blong kros blong hem i kamtru, maet hem i no save givim panis long yufala.” ?From wanem vas ya i talem se “maet”?

Blong kasem save wanem we bambae Jeova i mekem long ol man blong hem long Amagedon, i gud blong tingbaot wanem we Baebol i tijim long saed blong olgeta we oli ded bifo long taem blong jajmen mo wanem we God bambae i mekem long olgeta ya. Samfala bambae oli laef bakegen olsem ol spirit man long heven we oli no moa save ded samtaem. Sam narafala bambae oli laef bakegen blong laef olwe long Paradaes long wol. (Jon 5:​28, 29; 1 Korin 15:​53, 54) Sipos Jeova i save rimemba mo givim pei long ol man blong hem we oli stap tru long hem mo we oli ded bifo Amagedon, i sua se bambae hem i mekem i sem mak long ol man blong hem we oli laef long dei blong kros blong hem.

Ol tok blong aposol Pita i rili leftemap tingting blong yumi. Hem i talem se: “[God] i sevem Noa we i wan prija we i stap talemaot stret fasin, wetem seven narafala man tu, be i letem wota i kam bigwan, i draonem ol narafala man ya we oli no obei long hem. God i jajem tufala taon ya Sodom mo Gomora, nao i bonem tufala long faea, tufala i kam olsem asis nomo . . . Be hem i sevem Lot . . . Hae God i save sevem ol man we oli bilif long hem, i save tekemaot olgeta long ol samting we i stap traem olgeta. Be ol man we oli no stret, hem i save holem olgeta oli stap long kalabus, gogo bambae bigfala Dei ya blong jajem man i kamtru.” (2 Pita 2:​5-9) Bifo, Jeova i spolem ol rabis man mo i sevem Noa mo Lot we oli holemstrong long hem. Long sem fasin, Jeova bambae i sevem ol man blong hem tu we oli stap tru long hem taem hem i spolem ol rabis man long Amagedon. “Wan bigfala hip” blong ol stret man bambae oli laef i stap.​—Revelesen 7:​9, 14.

Taswe taem Sefanaea 2:3 i yusum tok ya “maet,” i no blong soemaot se God i no naf blong sevem ol man blong hem, nogat. Be, sipos wan man i mekem ol samting we i stret mo i mekem tingting blong hem i stap daon, maet Jeova bambae i sevem hem long dei blong kros blong Hem. Fasin sef i dipen long fasin blong wanwan man blong gohed blong mekem ol samting we i stret mo mekem tingting blong hem i stap daon.​—Sefanaea 2:3.

[Tok blong pija long pej 31]

“[Jeova] i save tekemaot ol man blong hem long ol samting we i stap traem olgeta”