Loa Blong Lav i Stap Long Hat Blong Yumi
Loa Blong Lav i Stap Long Hat Blong Yumi
“Mi bambae mi putum loa blong mi long tingting blong yufala, mo bambae mi raetemdaon long hat blong yufala.”—JEREMAEA 31:33.
1, 2. (a) ?Bambae yumi tokbaot wanem naoia? (b) ?Olsem wanem Jeova i soemaot hem wan long hil ya Sinae?
LONG tufala stadi we yumi mekem finis, yumi lanem se, taem Moses i kamdaon long hil ya Sinae, i gat laet i saenaot long fes blong hem we i soemaot paoa blong Jeova. Mo tu, yumi bin tokbaot kaliko ya we Moses i putum blong kavremap fes blong hem. Naoia, bambae yumi tokbaot olsem wanem ol samting ya we yumi bin stadi long hem finis, i laenap wetem ol Kristin tede.
2 Taem Moses i stap antap long bigfala hil ya, Jeova i toktok long hem. Ol man Isrel we oli hivap daon long bigfala hil ya Sinae, oli luk sam bigbigfala saen we oli soemaot paoa blong God. “Oli luk bigfala laetning i laet, mo tanda i faerap, mo bigfala klaod i kam kavremap hil ya, mo oli harem bigfala noes blong pupu tu. Mo olgeta man we i stap long ples ya oli fraet we oli stap seksek from. . . . Nao Hae God i kamdaon we bigfala faea i stap laet raonabaot long hem, nao i kam stap antap long hil ya, mo bigfala smok i kavremap hil ya. Smok ya i stap go antap olsem smok blong wan faea we i bigwan olgeta, mo bigfala hil ya i stap seksek tumas.”—Eksodas 19:16-18.
3. ?Jeova i yusum wanem rod blong givim ol Tenkomanmen long Isrel, mo ol man Isrel oli kasem save wanem?
3 Jeova i yusum wan enjel blong toktok long ol man Isrel, i givim wanem we biaen oli kolem ol Tenkomanmen. (Eksodas 20:1-17) Taswe olgeta ya oli sua fulwan se ol loa ya oli kamaot stret long God ya we i gat Olgeta Paoa. Jeova i raetem ol Tenkomanmen ya long tu flat ston—tufala flat ston ya nao we Moses i smasem tufala long graon, taem hem i luk we ol man Isrel oli stap wosipim wan smol buluk we oli wokem long gol. Ale, Jeova i raetem bakegen ol Tenkomanmen ya long ston. Mo taem Moses i kamdaon wetem tufala niufala flat ston ya, laet i saenaot long fes blong hem. Long taem ya, olgeta man Isrel oli mas kasem save se ol loa ya oli impoten we oli impoten tumas.—Eksodas 32:15-19; 34:1, 4, 29, 30.
4. ?From wanem ol Tenkomanmen oli impoten tumas?
4 Tufala flat ston ya we i gat ol Tenkomanmen long tufala, oli putum insaed long bokis blong kontrak. Ale, bokis ya oli putum fastaem long rum ya we i tabu we i tabu tumas insaed long haos tapolen, mo biaen, long haos tempol. Ol loa we oli stap long tufala ston ya oli olsem ol stamba trutok we kontrak blong Loa blong Moses i stanap long hem, mo oli olsem fandesen blong rul blong God antap long neson blong Isrel. Oli olsem pruf se Jeova i gat ol man blong hem we hem i jusum.
5. ?Olsem wanem ol loa we God i givim long Isrel oli soemaot lav blong hem?
5 Ol loa ya oli soemaot plante samting long saed blong Jeova, antap moa, oli soemaot lav we hem i gat long ol man blong hem. !Ol loa ya oli mekem i gud tumas long olgeta we oli obei long olgeta! Wan man blong hae save i talem se: ‘Long olgeta loa we ol man oli stanemap bifo kasem tede, i no gat wan we i naf blong kasem no bitim level blong ol tenkomanmen ya blong God.’ Jeova i tokbaot fulwan Loa ya we hem i givim long Moses, i se: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol. Nating we olgeta man long wol ya oli blong mi, be yufala bambae i tabu, yufala i man blong mi nomo, mo bambae yufala i pris blong mi, yufala i stap mekem wok blong mi.”—Eksodas 19:5, 6.
Wan Loa We God i Raetem Long Hat Blong Olgeta
6. ?Wanem loa we i sas moa i bitim ol loa ya we oli raetem long ston?
6 Tru ya, ol loa ya we God i givim oli sas tumas. ?Be yu yu save se ol tabu Kristin oli holem wan samting we i sas moa i bitim ol loa ya we i stap long ston? Jeova i tokbaot wan niufala kontrak we bambae hem i mekem, we hem i defren long kontrak blong Loa we hem i mekem wetem ol man Isrel. “Bambae mi putum loa blong mi long tingting blong yufala, mo bambae mi raetemdaon long hat blong yufala.” (Jeremaea 31:31-34) Jisas, we hem i tekem niufala kontrak i kamtru long ol man blong hem, i no raetem wan lis blong ol loa we hem i givim long olgeta. Be, long ol toktok mo fasin blong hem, hem i putum ol loa blong Jeova i go long tingting mo hat blong ol disaepol blong hem.
7. ?“Loa blong Kraes” hem i blong hu, mo biaen hu bakegen i folem loa ya?
7 Loa ya hemia “loa blong Kraes.” Hem i no givim loa ya long prapa man Isrel, we oli laen blong Jekob, be hem i givim long wan neson long saed blong spirit, hemia “Isrel blong God.” (Galesia 6:2, 16, NW; Rom 2:28, 29) Isrel ya blong God, hemia ol Kristin we tabu spirit i makemaot olgeta. Biaen, i gat wan “bigfala kampani” blong man we oli kamaot long evri kantri mo we olgeta tu oli wantem wosipim Jeova. Olgeta ya oli joen wetem Isrel ya blong God. (Revelesen 7:9, 10, NW; Sekaraea 8:23) Tufala grup ya tugeta, oli olsem “wan kampani nomo” aninit long “wan man nomo blong lukaot long olgeta.” Oli agri blong folem “loa blong Kraes,” mo oli letem loa ya i lidim olgeta long evri samting we oli mekem.—Jon 10:16.
8. ?Wanem i defren long Loa blong Moses mo loa blong Kraes?
8 Ol man Isrel oli stap finis aninit long Loa blong Moses taem oli bon, be long saed blong ol Kristin i defren. Ol Kristin oli stap aninit long loa blong Kraes from we olgeta nomo oli jusum, i nating se oli blong wanem kala no oli bon wea. Olgeta ya oli lanem se hu ya Jeova mo wanem ol fasin blong hem mo oli wantem tumas blong mekem wok blong hem. God i putum loa blong hem “long tingting” blong ol tabu Kristin ya, yes hem i ‘raetemdaon loa ya long hat’ blong olgeta. Taswe, ol Kristin ya oli obeigud long God, i no from we oli fraet se God bambae i panisim olgeta, mo i no from we hemia wan wok nomo we oli mas mekem. Nogat. Fasin obei ya we oli gat long God i kamaot from wan samting we i moa impoten mo i gat bigfala paoa long laef blong olgeta. Ol narafala sipsip ya tu oli gat fasin obei olsem, from we God i raetem loa blong hem long hat blong olgeta.
Ol Loa We i Stanap Long Lav
9. ?Olsem wanem Jisas i soemaot se lav hem i stamba blong ol loa blong Jeova?
9 Fasin we i stamba blong olgeta loa mo rul blong Jeova, hemia lav. Longtaem finis, lav nao hem i wan impoten haf blong trufala wosip, mo bambae i stap olsem gogo i no save finis. Taem wan man i askem long Jisas se wanem loa nao we i hae moa, Jisas i ansa long hem se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” Mo seken wan se, “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” Nao biaen hem i se: “Tufala loa ya i stamba blong Loa we God i givim long Moses, wetem ol tok blong ol profet tu.” (Matiu 22:35-40) Olsem nao, Jisas i soemaot se Loa wetem ol Tenkomanmen, mo fulwan Hibru haf blong Baebol tu, oli stanap long lav.
10. ?Olsem wanem yumi save se loa blong Kraes i stanap long lav?
10 ?Olsem wanem long loa ya we God i raetem long hat blong ol Kristin? ?Hemia tu i stanap long fasin blong lavem God mo ol man we oli stap raonabaot long yumi? !Yes! Man we i folem loa blong Kraes, hem i mas lavem God wetem fulhat blong hem mo hem i mas folem wan niufala loa tu. Olgeta Kristin oli mas lavlavem olgeta long fasin we oli rere blong lego laef blong olgeta from narawan. Oli mas gat lav olsem lav ya we Jisas i gat, we i pusum hem blong lego prapa laef blong hem from ol fren blong hem. Jisas i tijim ol disaepol blong hem blong lavem God mo blong lavlavem olgeta, olsem we hem i lavem olgeta. Nambawan lav ya we oli gat bitwin olgeta, hem i bigfala mak ya nao we i mekem ol man oli luksave hu ya ol trufala Kristin. (Jon 13:34, 35; 15:12, 13) Jisas i tijim olgeta tu se oli mas lavem ol enemi blong olgeta.—Matiu 5:44.
11. ?Olsem wanem Jisas i soemaot lav long God mo long ol man?
11 Jisas i soem beswan eksampol long saed blong lav. Hem i wan strongfala spirit man long heven, be hem i glad nomo blong kamdaon long wol ya blong mekem wok we Papa blong hem i wantem. Hem i givim laef blong hem blong bambae ol man oli save kasem laef blong olwe, mo antap long samting ya, hem i soem long ol man, wanem ol fasin we oli mas mekem long laef blong olgeta. Hem i gat tingting daon, hem i kaengud, mo i tingbaot ol narafala, i halpem olgeta we tingting blong olgeta i hevi mo oli harem nogud. Mo tu, hem i talemaot “ol tok blong laef ya we i no save finis,” mo hem i neva taed blong halpem ol narafala blong save Jeova.—Jon 6:68.
12. ?From wanem yumi save talem se fasin blong lavem God i joengud wetem fasin blong lavem ol man raonabaot long yumi?
12 Tru ya, fasin blong lavem God i joengud wetem fasin blong lavem ol man raonabaot long yumi. Aposol Jon i talem se: “Fasin ya blong lavem man, hem i kamaot long God. . . . Man we i stap talem se hem i lavem God, be i no laekem nating Kristin brata no sista blong hem, i stap agens long hem, hem i man blong giaman. ?Be sipos hem i no save lavem brata no sista blong hem we hem i stap luk oltaem, olsem wanem bambae hem i save lavem God we hem i no luk samtaem?” (1 Jon 4:7, 20) Jeova i stamba blong lav, mo hem wan i olsem stret pija blong lav ya. Evri samting we Jeova i mekem i kamaot from lav. Yumi naf blong soem lav from we hem i wokem yumi we yumi naf blong tekem fasin blong hem. (Jenesis 1:27) Taem yumi soem lav long ol man raonabaot long yumi, yumi soemaot tu se yumi lavem God.
Man We i Gat Lav Hem i Obei
13. ?Blong lavem God, fastaem yumi mas mekem wanem?
13 ?Weswe yumi save lavem God sipos yumi no save luk hem? Faswan impoten step we yumi mas tekem, hemia blong save Jeova. Yumi no save lavem mo trastem wan man we hem i strenja nomo long yumi. Taswe, Tok blong God i pulum yumi blong ridim Baebol, prea, mo joen wetem ol man we oli save mo lavem Jeova finis. Long rod ya, yumi tu yumi save kasem save long saed blong God. (Ol Sam 1:1, 2; Filipae 4:6; Hibrus 10:25) Fofala Gospel oli save givhan bigwan long saed ya, from we oli tokbaot laef mo wok blong Jisas Kraes we i soemaotgud ol fasin blong Jeova. Moa we yumi save God mo yumi gat tangkiu from lav we hem i soem long yumi, moa we bambae yumi wantem obei long hem mo folem ol fasin blong hem. Yes, sipos yumi lavem God bambae yumi obei long hem.
14. ?From wanem yumi save talem se ol loa blong God oli no wan baden?
14 Taem yumi lavem wan man, yumi save wanem we hem i laekem mo wanem we hem i no laekem, mo yumi mekem ol fasin blong yumi i laenap wetem ol samting ya. Yumi no wantem mekem hemia we yumi lavem, i harem nogud. Aposol Jon i raetem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Yes, ol tok, no ol loa, blong God oli no wan baden long yumi, mo oli no plante tu. Lav i lidim yumi. Yumi no nidim blong lanem baehat wan longfala lis blong ol rul blong lidim evri aksen blong yumi. Lav we yumi gat long God, hemia nao i lidim yumi long evri samting we yumi mekem. Sipos yumi lavem God, yumi glad blong mekem ol samting we hem i wantem yumi blong mekem. Ale yumi mekem se God i glad long yumi, mo yumi mekem i gud long yumi wan bakegen, from we oltaem Jeova i lidim yumi long rod we i mekem i gud long yumi.—Aesea 48:17.
15. ?Wanem i save pusum yumi blong wantem folem fasin blong Jeova? Eksplenem.
15 Taem yumi lavem God, yumi traem folem ol fasin blong hem. Taem yumi lavem narafala, yumi laekem ol fasin blong hem mo yumi traem mekem olsem hem. Tingbaot fasin fren we i stap bitwin Jeova mo Jisas. Ating tufala i stap tugeta long heven blong plante milian yia. Lav we tufala i gat long tufala i strong mo i klingud. Ol fasin blong Jisas oli sem mak nomo long Papa blong hem, taswe hem i save talem long ol disaepol blong hem se: “Man we i luk mi, hem i luk Papa blong mi.” (Jon 14:9) Moa we yumi save Jeova mo Pikinini blong hem mo yumi gat tangkiu long hem, moa we bambae yumi wantem tumas blong folem fasin blong tufala. Tabu spirit mo lav we yumi gat long Jeova, i save halpem yumi blong ‘sakemaot olfala laef ya, wetem ol fasin blong hem, mo putum niufala laef ya, olsem prapa klos blong yumi.’—Kolosi 3:9, 10; Galesia 5:22, 23.
Wok We i Joen Wetem Lav
16. ?Olsem wanem wok we yumi mekem blong prij mo tijim man i soem se yumi lavem God mo ol man raonabaot long yumi?
16 Yumi ol Kristin, yumi letem lav we yumi gat long God mo ol man raonabaot long yumi i pusum yumi blong joen long wok blong talemaot Kingdom mo pulum man i kam disaepol. Long rod ya, yumi mekem Jeova God i glad. Yes, “hem i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:3, 4) Yumi save glad bigwan blong halpem ol narafala, blong olgeta tu oli save gat loa blong Kraes i stap long hat blong olgeta. Mo yumi glad blong luk olsem wanem fasin blong olgeta i jenis blong soemaot moa ol gudfala fasin blong Jeova. (2 Korin 3:18) Tru ya, beswan presen we yumi save givim long narafala, hemia save long saed blong God. Ol man we oli glad blong kam fren blong Jeova, bambae oli save stap fren blong Hem olwe, gogo i no save finis.
17. ?From wanem i waes moa blong lavem God mo ol man raonabaot long yumi i bitim we yumi lavem ol sas samting?
17 Long wol ya we yumi laef long hem, ol man oli tinghae tumas, mo oli lavem tu, ol sas samting. Be ol samting ya oli no save stap longtaem. Man i save stilim olgeta, no oli save kam nogud. (Matiu 6:19) Baebol i givim woning long yumi se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:16, 17) Yes, Jeova bambae i stap olwe, mo olgeta ya tu we oli lavem hem mo we oli mekem wok blong hem, bambae oli stap olwe. Taswe, i moagud blong lavem God mo ol man raonabaot long yumi, i bitim we yumi ronem ol samting blong wol ya we oli no save stap longtaem.
18. ?Olsem wanem wan misinari sista i soemaot lav ya we i pusum hem blong no tingbaot hem wan nomo?
18 Ol man we oli traehad blong wokem fasin lav, oli presem Jeova. Tingbaot wan misinari sista long Senegal, nem blong hem Sonia. Hem i stap stadi Baebol wetem wan woman we nem blong hem Heidi. Heidi i kasem AIDS from man blong hem we i no bilif long Jeova. Afta we hasban blong hem i ded, Heidi i baptaes, be smoltaem biaen hem i stat siksik plante mo i mas go slip long hospital from AIDS. Sonia i talem se: “Ol man we oli wok long hospital oli no plante be oli gat plante wok. Ale mifala i mekem wan program blong bambae samfala long kongregesen oli save kam lukaot [Heidi] long hospital. Long namba tu naet we hem i slip long hospital, mi mi go stap wetem hem. Mi slip long wan mat klosap long bed blong hem mo mi lukaot long hem gogo kasem we hem i ded. Dokta we i lukaot long hem i talem se: ‘Samting we i mekem i had long mifala, hemia se taem ol stret famle blong wan sikman oli save se sikman ya i gat AIDS, oli lego hem i stap long hospital long han blong mifala mo oli no moa wantem save long hem. Be yu yu no famle blong woman ya, yu yu no wan manples tu, mo kala blong yu tu i defren long hem. ?From wanem yu yu rere blong lukaot long hem we maet yu save kasem sik blong hem tu?’ Mi talem long hem se long lukluk blong mi, Heidi i olsem stret sista blong mi, i olsem we mitufala i gat wan mama mo wan papa nomo. Ale mi talem long hem se fasin fren we mi gat wetem Heidi we i niufala sista blong mi, i mekem se mi glad we mi glad tumas blong lukaot long hem.” Sonia i no kasem sik from ol traehad we hem i mekem blong lukaot long Heidi wetem fasin lav.
19. ?From we God i raetem loa blong hem long hat blong yumi, yumi mas tekem janis blong mekem wanem?
19 I gat plante stori blong ol man blong Jeova we oli gat lav ya we i pusum olgeta blong no tingbaot olgeta nomo. Tede, yumi no luksave ol man blong God from we oli stap folem wan lis blong ol loa. Defren olgeta, yumi luk we tok blong Hibrus 8:10 i stap kamtru long olgeta we i se: “Long taem ya we i stap kam, niufala promes ya we bambae mi mekem wetem yufala i olsem. Mi bambae mi putum ol loa blong mi insaed long tingting blong yufala, mo bambae mi raetemdaon long hat blong yufala. Mo mi bambae mi God blong yufala, mo yufala bambae i man blong mi.” I gud yumi tinghae long loa ya blong lav we Jeova i raetem long hat blong yumi, mo yumi tekem evri janis we yumi kasem blong soemaot lav ya.
20. ?From wanem loa blong Kraes i wan presen we i sas?
20 !Yumi glad tumas blong mekem wok blong God wetem wan bigfala kampani blong ol brata we oli gat lav ya! Ol man we God i raetem loa blong Kraes long hat blong olgeta, oli harem gud tumas from sas samting ya we oli holem, long wol ya we i no gat lav. Oli harem gud from we Jeova i lavem olgeta, mo tu, oli harem gud from lav ya we i joenem olgeta olsem wan brata nomo. “!Olgeta! I gud tumas taem ol man blong God oli stap wanples, we oli gat wan tingting nomo. Fasin ya i gud tumas.” Nating se ol Witnes blong Jeova oli stap long ol defdefren kantri, oli toktok long ol defdefren lanwis, mo oli gruap long ol defdefren kalja, oli joengud long wan skul nomo we i no gat narawan olsem. From we oli joengud olsem, Jeova i glad long olgeta. Man blong raetem Sam i raetem se: “Hae God i promes finis blong givim wan gudfala samting blong hem long ol man blong hem [we oli joengud long lav], we hemia laef ya we i no save finis.”—Ol Sam 133:1-3.
?Yu Yu Save Ansa?
• ?Ol Tenkomanmen oli impoten olsem wanem?
• ?Wanem loa ya we God i raetem long hat blong yumi?
• ?Wanem wok we lav i mekem insaed long “loa blong Kraes”?
• ?Long wanem rod yumi soemaot lav long God mo long ol man raonabaot long yumi?
[Kwestin]
[Tok blong pija long pej 25]
Ol man Isrel oli gat loa we oli raetem long ston
[Tok blong pija long pej 26]
Ol Kristin oli gat loa blong God long hat blong olgeta
[Tok blong pija long pej 28]
Sonia wetem wan gel Senegal long wan distrik asembli long 2004