Ol Kristin Oli Soemaot Paoa Blong Jeova Olsem Bigfala Laet

“Yufala i save harem gud, from we yufala i save luk ol samting ya, mo yufala i save harem ol tok ya.”​—MATIU 13:16.

1. ?Wanem kwestin we yumi tingbaot long saed blong fasin we ol man Isrel oli mekem long Moses long bigfala hil ya Sinae?

 OL MAN Isrel we oli hivap wanples fored long bigfala hil ya Sinae oli luk mo oli harem plante samting we i mas pulum olgeta i kam klosap moa long Jeova. Tru ya, Jeova i bin mekem ol bigbigfala merikel blong karemaot olgeta long Ijip. Hem i lukluk long ol nid blong olgeta, i givim kakae mo wota long olgeta taem oli stap long draeples. Mo biaen, hem i givhan long olgeta blong winim ami blong ol man Amalek. (Eksodas 14:​26-31; 16:​2–17:13) Taem oli putum kamp blong olgeta long draeples fored long bigfala hil ya Sinae, oli fraet tumas long ol tanda mo laetning nao oli stat seksek. Biaen, oli luk we Moses i kamdaon long hil ya Sinae, mo fes blong hem i saen from we hem i bin luk paoa blong Jeova. Be samting ya i no pulum olgeta blong ona mo blong tinghae long Jeova from bigfala paoa blong hem. Defren olgeta, oli ronwe, “oli fraet blong kam klosap long [Moses].” (Eksodas 19:​10-19; 34:30) ?From wanem oli fraet blong luk bigfala paoa blong Jeova, we hem i bin mekem plante samting blong olgeta?

2. ?Wanem samting nao we maet i mekem se ol man Isrel oli fraet taem oli luk bigfala laet we i saenaot long fes blong Moses we i soemaot paoa blong God?

² Ating samting we i hapen jes bifo long taem ya i mekem se ol man Isrel oli fraet. Olgeta ya oli bin mekem stronghed, oli no wantem obei long Jeova mo oli wokem pija blong wan bul long gol, ale Jeova i panisim olgeta. (Eksodas 32:​4, 35) ?Olsem wanem? ?Olgeta ya oli lanem lesen mo oli gat tangkiu  from we Jeova i panisim olgeta? I luk olsem se bighaf blong olgeta oli no lanem lesen. Jes bifo we Moses i ded, hem i tingtingbak long taem ya we ol man Isrel oli wokem bul ya long gol mo long sam narafala taem we oli no obei. Nao hem i talem long ol man Isrel se: ‘Yufala i girap, yufala i agensem hem. Yufala i no trastem hem, mo yufala i no obei long ol tok blong hem tu. I stat bifo finis, taem we mi mi jes savegud yufala fastaem, i kam kasem naoia, be oltaem yufala i stap faet agens long Jeova.’​—Dutronome 9:​15-24.

3. ?Moses i mekem wanem from we fes blong hem i saenaot olsem laet?

³ Tingbaot wanem we Moses i mekem taem hem i luk we ol man Isrel oli fraet long hem. Stori long Baebol i talem se: “Taem [Moses] i talemaot ol loa ya long olgeta finis, hem i blokem fes blong hem long wan kaliko. Nao oltaem, taem Moses i stap go insaed long Haos Tapolen blong Hae God blong toktok wetem hem, hem i stap tekemaot kaliko ya. Mo taem hem i kamaot bakegen blong talemaot ol samting we Hae God i talem long hem blong ol man oli harem, be oltaem, ol man oli stap luk we fes blong hem i saen. Nao biaen, hem i stap blokem fes blong hem bakegen, gogo kasem we i go toktok wetem Hae God bakegen.” (Eksodas 34:​33-35) ?From wanem Moses i kavremap fes blong hem? ?Samting ya i tijim yumi long wanem samting? Ansa long ol kwestin ya i save halpem yumi blong skelem se fasin blong yumi blong fren wetem Jeova i olsem wanem.

Oli Gat Janis Be Oli Mestem

4. ?Aposol Pol i talem se kaliko ya we Moses i kavremap fes blong hem wetem, i minim wanem?

⁴ Aposol Pol i eksplenem se fasin ya we Moses i kavremap fes blong hem long wan kaliko, i wan pija blong wanem we i hapen long tingting mo hat blong ol man Isrel. Pol i raetem se: “Ol laen blong Isrel oli no save lukluk i go long fes blong hem from laet ya. . . . I tru, tingting blong ol laen blong Isrel ya bifo i fas.” (2 Korin 3:​7, 14) !Sore tumas! Ol man Isrel oli wan neson we Jeova i jusum, mo hem i wantem we oli kam fren blong hem. (Eksodas 19:​4-6) Be olgeta ya oli no wantem luk laet ya we i olsem pija blong bigfala paoa blong God. Oli no putum tingting mo hat blong olgeta long Jeova, oli no gat lav mo oli no fasgud long Hem, i olsem se oli tanraon oli gowe long hem.

5, 6. (a) ?Wanem samting i sem mak long ol man Isrel long taem blong Moses mo ol man long faswan handred yia? (b) ?Olsem wanem olgeta we oli lesin long Jisas oli defren long olgeta we oli no lesin?

⁵ Long faswan handred yia K.T., i gat wan samting we i klosap sem mak. Taem Pol i kam wan Kristin, kontrak blong Loa i finis mo niufala kontrak i stanap we Jisas Kraes, Bigfala Moses, i tekem i kamtru. Long ol tok mo long ol wok we Jisas i mekem, hem i soemaot gud paoa blong Jeova. Pol i tokbaot Jisas we i laef bakegen i se: “Pikinini ya blong hem i olsem laet ya we i saenaot i kam long yumi. Hem i stret pija blong God, we i stap soemaot prapa fasin blong hem.” (Hibrus 1:3) !Ol man Jiu oli gat wan nambawan janis! !Oli save lesin long ol tok blong laef we i no save finis, stret long maot blong Pikinini blong God! Sore tumas, be plante long olgeta we Jisas i prij long olgeta, oli no wantem lesin. Jisas i tokbaot olgeta taem hem i talemaot profet tok ya we i stap long buk blong Aesea se: “Tingting blong olgeta i kam strong finis. Oli blokem sora blong olgeta, mo oli satem ae blong olgeta. Sipos oli no mekem olsem, maet oli save luk long ae blong olgeta, no oli save harem long sora blong olgeta, no oli save kasem long tingting blong olgeta. Nao bambae oli save tanem tingting blong olgeta blong bilif long mi, nao mi bambae mi mekem olgeta oli gud bakegen.”​—Matiu 13:15; Aesea 6:​9, 10.

⁶ Be ol disaepol blong Jisas oli defren olgeta long bighaf blong ol man Jiu ya. Jisas i tokbaot ol disaepol ya blong hem i se: “Yufala ya, yufala i save harem gud, from we yufala i save luk ol samting ya, mo yufala i save harem ol tok ya.” (Matiu 13:16) Ol trufala Kristin oli wantem tumas blong save Jeova mo mekem wok blong Hem. Oli wantem tumas blong mekem wok blong hem, olsem we hem i soemaot long Baebol. From samting ya, ol tabu Kristin oli soemaot bigfala paoa blong Jeova tru long wok we oli mekem insaed long niufala kontrak ya, mo ol narafala sipsip tu oli mekem sem mak.​—2 Korin 3:​6, 18.

?From Wanem Gud Nius i Haed?

7. ?From wanem yumi no sapraes we plante man oli sakemaot gud nius?

⁷ Olsem yumi luk finis, bighaf blong ol man Isrel long taem blong Jisas mo long taem blong Moses, oli sakemaot nambawan janis we i stap fored  long olgeta. Hemia i sem mak bakegen tede. Bighaf blong ol man oli sakemaot gud nius ya we yumi stap talemaot. Yumi no sapraes long samting ya. Pol i raetem se: “Nao maet gud nius ya we mifala i stap talemaot, i olsem samting we i haed, be i stap haed long olgeta ya nomo we oli stap lus. Oli no save bilif, from we Setan we i rabis god blong wol ya hem i satem tingting blong olgeta finis, nao oli stap long tudak.” (2 Korin 4:​3, 4) I tru se Setan i stap traehad blong haedem gud nius ya, be plante man oli stap blokem prapa fes blong olgeta nomo from we oli no wantem luksave gud nius ya.

8. ?Olsem wanem man we i no gat save hem i blaen, mo olsem wanem yumi save lukaotgud long yumi wan blong yumi no kam blaen olsem olgeta?

⁸ From we ol man oli no gat save long gud nius ya, i olsem se oli blaen. Baebol i tokbaot ol man blong wol ya se ‘tingting blong olgeta i stap long tudak nomo, oli stap longwe tumas long laef ya we God i stap givim, nao oli no gat save.’ (Efesas 4:18) Bifo we Pol i kam wan Kristin, hem i wan man we i gat gud save long saed blong Loa. Be hem i no gat save long gud nius ya ale hem i olsem wan blaen man, hem i gohed blong kilim ol man blong God. (1 Korin 15:9) Nao Jeova i soemaot trutok long hem. Pol i talem olsem: “God i gat sore long mi, from we Jisas Kraes i wantem yusum laef blong mi, blong soemaot fasin blong hem long olgeta man we bambae oli save bilif long hem blong kasem laef ya we i no save finis. Hem i wantem soemaot we oltaem tingting blong hem i longfala, we i no gat en blong hem.” (1 Timoti 1:16) Plante man oli olsem Pol, fastaem oli agensem trutok blong God, be naoia oli stap mekem wok blong Hem. Hemia wan gudfala risen blong gohed blong prij, long ol man ya tu we oli agensem yumi. Mo tu, taem yumi stadi oltaem long Tok blong God mo yumi traem kasem save blong hem, samting ya i mekem se tingting blong yumi i no stap long tudak, olsem ol man ya we oli no gat save nao oli stap mekem ol samting we Jeova i no glad long hem.

9, 10. (a) ?Olsem wanem ol man Jiu long faswan handred yia oli soem se oli no wantem man i tijim olgeta mo oli no rere blong jenisim tingting blong olgeta? (b) ?Samting ya i sem mak long Krisendom tede? Eksplenem.

⁹ Sam man oli blaen long saed blong spirit from we oli no wantem man i tijim olgeta mo oli no rere tu blong jenisim tingting blong olgeta. Plante man Jiu oli sakemaot Jisas mo ol tijing blong hem, from we oli wantem holemtaet Loa blong Moses nomo. Be i gat sam long olgeta ya we oli mekem i defren. Baebol i soem se afta we Jisas i laef bakegen long ded, ‘plante pris tu oli bilif long hem.’ (Ol Wok 6:7) Nating se i olsem, Pol i tokbaot bighaf blong ol man Jiu i se: “Kam kasem tede, be oltaem, taem olgeta oli ridim Loa blong Moses, samting ya i stap blokem tingting blong olgeta, olsem kaliko ya we i blokem fes blong Moses bifo.” (2 Korin 3:15) I sua se Pol i save tok ya we Jisas i bin talem bifo, taem hem i toktok long ol lida blong skul blong ol man Jiu i se: “Yufala i stap luklukgud long ol tok blong Baebol, mo yufala i bilif se long ol tok blong hem, yufala i gat laef we i no save finis. !Be yufala i luk! Ol tok blong Baebol ya oli stap tokbaot mi.” (Jon 5:39) Ol lida ya oli stap ridim gud ol hanraet blong Baebol. From samting ya oli sud luksave se Jisas nao hem i Mesaea ya. Be, ol man Jiu oli gat prapa tingting blong olgeta mo oli no wantem jenisim tingting ya, nating se Pikinini  blong God i wokem plante merikel, be ol merikel ya tu oli no save pulum olgeta.

¹⁰ Tede, plante man long Krisendom * oli gat sem fasin ya. Oli mekem olsem ol man Jiu blong faswan handred yia we oli “strong blong ona gud long God, be wok blong olgeta i no stanap long trufala save.” (Rom 10:​2, Good News Bible) Sam man oli stadi long Baebol, be oli no wantem bilif long ol tok blong hem. Oli no wantem agri se Jeova i stap yusum slef we i stret mo waes, hemia ol Kristin we tabu spirit i makemaot olgeta, blong tijim ol man blong hem. (Matiu 24:​45, NW ) Be yumi ya, yumi kasem save se Jeova i stap tijim ol man blong hem, mo se trutok blong God i wan samting we i stap klia moa oltaem. (Ol Proveb 4:18) Taem yumi letem Jeova i tijim yumi, yumi gat blesing ya se yumi save ol stamba tingting blong hem.

11. ?Olsem wanem fasin ya we man i satem ae long samting we hem i no wantem bilif long hem, i haedem trutok?

¹¹ Sam narafala man oli blaen from we olgeta nomo oli satem ae long samting we oli no wantem bilif long hem. Baebol i talem se sam man bambae oli jikim ol man blong God wetem nius we oli stap talemaot se Jisas i king finis. Aposol Pita i raetem se: “Olgeta oli stap tok olsem be oli satem ae blong olgeta long wan samting,” hemia se God i bin mekem bigfala wota i ron blong kilim ol rabis man long taem blong Noa. (2 Pita 3:​3-6, NTB) Long sem fasin, plante man we oli talem se oli Kristin oli agri se Jeova i gat fasin sore, kaen fasin, mo fasin fogif. Nating se i olsem, oli satem ae long trutok ya se, hem i save givim panis tu. (Eksodas 34:​6, 7) Ol trufala Kristin oli traehad blong kasem save wanem we Baebol i rili tijim.

12. ?Olsem wanem ol man oli letem kastom i blaenem ae blong olgeta?

¹² Plante man we oli stap go long jos oli blaen from we oli fas tumas long ol kastom mo tingting blong man. Jisas i tok long ol lida blong skul long taem blong hem, i se: “Yufala i mekem tok ya blong God i nating nomo, blong bambae yufala i save holem kastom blong yufala.” (Matiu 15:6) Taem ol man Jiu oli aot long Babilon oli fri, oli gohom mo oli stanemap trufala wosip blong Jeova bakegen. Be ol pris oli kam flas mo oli stat ting se oli stretgud. Oli stap mekem ol lafet we Jeova i askem olgeta blong mekem long wosip blong hem, be oli mekem olsem wan kastom nomo, oli no moa mekem wetem ona long God we i kamaot long hat blong olgeta. (Malakae 1:​6-8) Taem Jisas i kamtru, ol tija blong Loa mo ol Farisi oli bin ademap plante tumas smosmol kastom long Loa ya blong Moses. Jisas i talemaot long klia ples se ol man ya oli gat fasin tu fes, from we oli no moa luksave ol stretfala rul blong God we Loa ya i stanap long hem. (Matiu 23:​23, 24) Ol trufala Kristin oli mas lukaot se oli no letem ol kastom we man nomo i stanemap long saed blong wosip, i lidim olgeta oli gowe long wosip ya we i klin long fes blong Jeova.

“Luk God Ya We Man i No Save Luk”

13. ?Long wanem tufala rod, Moses i luk haf blong bigfala paoa blong God?

¹³ Taem Moses i stap antap long hil, hem i askem God blong i soem paoa blong hem, mo hem i bin luk wan haf blong bigfala laet ya we i kamaot long paoa blong Jeova. Taem Moses i go long haos tapolen, hem i no putum wan kaliko blong kavremap fes blong hem. Moses i wan man we bilif blong hem i strong mo hem i wantem tumas blong mekem wok olsem we God i wantem. Hem i gat nambawan blesing ya blong luk wan haf blong paoa blong Jeova long wan vison. Be bifo long samting ya finis hem i gat strong bilif, mekem se i olsem we hem i luk God finis. Baebol i talem se Moses “i stap gohed olwe nomo, olsem we i stap luk God ya we man i no save luk long ae blong hem.” (Hibrus 11:27; Eksodas 34:​5-7) Mo hem i soemaot glori blong God, i no long taem ya nomo we laet i saenaot long fes blong hem blong  smoltaem, be taem hem i traehad tu blong givhan long ol man Isrel blong oli save Jeova mo mekem wok blong hem.

14. ?Olsem wanem Jisas i luk glori blong God, mo hem i harem gud tumas long wanem samting?

¹⁴ Taem Jisas i stap long heven, hem i stap luk glori blong God blong plante plante yia, bifo we God i wokem skae mo wol ya tu. (Ol Proveb 8:​22, 30) Long olgeta yia ya, Jisas mo papa blong hem, tufala i kam gudfala fren. Lav we tufala i gat long tufala i gru. Jeova God i lavem tumas mo i kea bigwan long fasbon ya blong hem. Jisas tu i lavem tumas God ya we i givim laef long hem. (Jon 14:31; 17:24) Lav blong tufala i wan lav we i stretgud olgeta bitwin wan Papa mo Pikinini blong hem. Taem Jisas i tijim ol man, hem i laekem tumas blong soemaot bigfala paoa blong Jeova, olsem we Moses i bin mekem.

15. ?Long wanem fasin ol Kristin oli save luk glori blong God?

¹⁵ Ol Witnes blong God long wol tede tu oli wantem tumas blong luk glori blong Jeova, olsem Moses mo Jisas i bin luk. Oli no gowe long nambawan gud nius ya. Aposol Pol i raetem se: “Taem man i tanem tingting blong hem blong kam man blong Hae God, Hae God i save tekemaot kaliko ya.” (2 Korin 3:16) Yumi stadi long Baebol from we yumi wantem mekem ol samting we God i wantem yumi blong mekem. Yumi tinghae long fasin blong Jisas Kraes we hem i soemaot glori blong Papa blong hem, Jeova, we i putumap hem i King, mo yumi folem eksampol blong hem. Olsem Moses mo Jisas tu, yumi kasem blesing ya se yumi save tijim ol man long saed blong nambawan God ya we yumi stap wosip long hem.

16. ?From wanem trutok i wan blesing?

¹⁶ Jisas i prea se: “Papa. Yu yu Hae God, yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli save gud.” (Matiu 11:25) Taem wan man i rili wantem save mo i gat tingting daon, Jeova i givim save blong ol stamba tingting blong hem mo ol fasin blong hem long man ya. (1 Korin 1:​26-28) Yumi stap long han blong Jeova, i min se hem i stap protektem gud yumi, mo hem i stap tijim yumi blong mekem i gud long yumi, blong yumi kasem ol gudgudfala samting long laef. I gud yumi tekem evri janis we yumi gat blong kam klosap long Jeova. Yumi mas tangkiu long hem from olgeta samting we hem i givim blong mekem we yumi save frengud wetem hem.

17. ?Olsem wanem blong save moa ol fasin blong Jeova?

¹⁷ Pol i raet i go long ol tabu Kristin i se: “Yumi  evriwan i stap soemaot paoa blong Masta blong yumi bakegen, olsem bigfala laet we i stap saenaot long fes blong yumi, mo i no gat samting olsem kaliko, we i stap blokem. Oltaem hem i stap jenisim yumi blong mekem yumi kam olsem pija blong hem stret, mo oltaem paoa blong hem i stap saenaot moa long yumi.” (2 Korin 3:18) Nating se hop blong yumi i blong go long heven no i blong laef long wol, be moa we yumi kasem save long ol fasin mo tingting blong Jeova olsem we Baebol i soemaot, moa we bambae yumi tekem ol fasin ya blong hem. Sipos yumi tingting plante mo yumi gat tangkiu from laef blong Jisas Kraes wetem wok blong hem blong prij, mo ol tijing we hem i givim, bambae yumi naf blong soemaot moa ol fasin olsem Jeova. !Yumi glad bigwan blong save se, taem yumi mekem olsem, yumi stap presem God ya blong yumi, we yumi wantem tumas blong soemaot ol fasin blong Hem long laef blong yumi!

[Futnot]

?Yu Yu Rimemba?

• ?From wanem ol man Isrel oli fraet blong luk paoa blong God we i stap saenaot long fes blong Moses?

• ?Olsem wanem gud nius i stap “olsem samting we i haed” long faswan handred yia? mo long taem blong yumi?

• ?Olsem wanem yumi save soemaot glori blong God?

[Kwestin]

[Tok blong pija long pej 19]

Ol man Isrel oli no save luk fes blong Moses

[Tok blong pija long pej 21]

Plante man oli olsem Pol we bifo i agensem trutok blong God be biaen i mekem wok blong Hem

[Tok blong pija long pej 23]

Ol man blong Jeova oli glad blong soemaot glori blong God