Oli Presem Fasin Blong Ol Yangfala Ya We Oli Intres Long Baebol

MARIANA i wan Witnes blong Jeova we i stap long saot blong Itali. Hem i gat 18 yia mo hemia laswan yia blong hem long hae skul. Hem i go long semfala skul we sam narafala yangfala Witnes tu oli go long hem.

Mariana i raetem se: “Blong plante yia nao, mifala ol yangfala Witnes we i stap long skul ya, mifala i stap ridim vas blong dei tugeta long buk ya Ridimgud Ol Tok Blong Baebol Evri Dei. Mifala i mekem olsem long taem we mifala i spel smol. Wan ples nomo we mifala i save mekem vas blong dei long hem hemia long wan korido klosap long ofis blong ol tija. Ples ya i no kwaet tumas. Plante tija oli luk mifala taem oli stap pas i go mo kam mo samfala oli stop blong luk wanem we mifala i stap mekem. Ale taem i olsem, mifala i gat janis blong ansa long ol kwestin we oli askem. Taem mifala i stap mekem vas blong dei, oltaem i mas gat wan tija we i stop smol blong toktok wetem mifala. Sam long olgeta oli stap wetem mifala blong lesin taem mifala i tokbaot vas ya blong Baebol mo oli talem se oli laekem tumas fasin ya we ol Witnes oli gat blong intres long ol samting long saed blong spirit. Wan dei, wan man we i wok wetem hedmasta i singaot mifala blong go storian insaed long ofis blong ol tija.

“Taem tija blong mi i luk we mifala i stap tokbaot vas ya insaed long ofis ya, hem i askem hedmasta sipos mifala i save go tokbaot vas ya insaed long wan long ol klasrum we i no gat noes long hem. Hedmasta i agri mo tija blong mi i talem ol gudfala toktok long saed blong mifala long fored blong ol yangfala long klasrum blong mi from gudfala eksampol we mifala i soem. Mifala evriwan i hapi tumas from bigfala janis ya we Jeova i givim long mifala.”