“Oli Save Kam Fri Kwiktaem Nomo”

GENEVIÈVE DE GAULLE, we angkel blong hem i presiden blong Franis bifo, hemia Charles de Gaulle, i save ol Witnes blong Jeova long rabis kalabus blong ol Nasi long Ravensbruck, hemia long not blong Jemani. Hem i raetem ol tok ya antap, long wan leta blong hem long Ogis 1945.

Long Jenuware 27, 1945, ol man we oli stap long rabis kalabus ya Auschwitz, long Polan, oli gofri. Ale, stat long 1996, ol man long Jemani oli makem dei ya, Jenuware 27, blong tingbaot ol man we rul blong Hitler i mekem i nogud long olgeta.

Long Jenuware 27, 2003, Peter Straub we i presiden blong Palemen blong Baden-Württemberg, i givim wan tok blong tingbaot olgeta ya we oli ded, mo hem i se: “I stret nomo we yumi respektem ol man blong skul mo politik we rul blong Hitler i mekem i nogud long olgeta mo we oli rere blong ded from we oli no wantem obei long rul blong Hitler. Respek ya yumi no save talemaot long toktok nomo. Wan skul nomo we i no wantem nating blong obei long rul blong Hitler, hemia ol Witnes blong Jeova. Oli no salut long Hitler. Oli no wantem talem tok ya se bambae oli stap tru long ‘Führer mo Gavman,’ sem mak olsem we oli no wantem mekem enikaen wok blong ami. Ol pikinini blong olgeta oli no joen long grup ya we oli kolem Ol Yut Blong Hitler.”

Jisas Kraes i talem tok ya long saed blong ol man blong hem se: “Mi mi no man blong wol ya, mo long sem fasin, olgeta tu oli no man blong wol ya.” (Jon 17:16) Taswe, desisen ya we ol Witnes blong Jeova oli tekem, i stanap long bilif blong olgeta. Masta Straub i gohed i se: “Taem ol Witnes blong Jeova oli laef long rabis kalabus ya, oli mas pinim wan smol kaliko we i gat trikona long hem mo we kala blong hem i pepol long klos blong olgeta. Olgeta nomo oli save jus blong blokem fasin safa ya mo ronwe long ded. Hemia nomo se oli mas saenem wan pepa blong talem se oli lego bilif blong olgeta.”

Bighaf blong ol Witnes oli no wantem lego bilif blong olgeta, mo tingting blong olgeta i no hafhaf nating long saed ya. Taswe, raonabaot 1,200 Witnes oli ded long taem blong ol Nasi. Gavman blong ol Nasi i kilim i ded 270 Witnes from we oli no joen long ami. Oli no talem nomo long maot, be oli tekem aksin folem ol tok ya se: “Mifala i mas obei long God, mifala i no save obei long man.”​—Ol Wok 5:29.

Ulrich Schmidt, presiden blong Palemen blong Not Rhine-Westphalia, i talem se ol Witnes blong Jeova oli sem mak nomo olsem ol narafala man. Buk ya, Landtag Intern, i tokbaot wanem we presiden ya i talem, i se: “Ol Witnes blong Jeova oli man olsem yumi nomo. Oli wantem holem tingting we i klin long fes blong God, oli holemstrong long ol tijing we oli lanem, oli no fraet, mo oli no agri long tingting blong ol Nasi from we tingting blong olgeta i strong long Kristin bilif blong olgeta.” Yumi sua se Jeova God i glad long ol man we oli stap tru long hem, nating we oli kasem plante traem. Ol Proveb 27:11 i talem se: “Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.”

[Foto Credit Line Image blong pija long pej 30]

Courtesy of United States Holocaust Memorial Museum