Wan Kwestin

?Long Isrel bifo, wanem mining blong laet ya we i olsem wan merikel we samtaem oli kolem Sekina mo we i stap saen insaed long Rum ya we i Tabu we i Tabu long haos tapolen mo long haos tempol?

Jeova, Papa ya we i gat lav mo we i Protektem ol man blong hem, i soemaot klia long ol man Isrel se Hem i stap. Wan rod we hem i mekem olsem, hemia tru long wan klaod we i saen we i saen, we i laenap wetem ples blong wosip blong hem.

Nating se ol man Isrel oli no luk Jeova stret long ae blong olgeta be laet ya we i saen i soemaot long olgeta se Jeova i stap. Samting ya i hapen insaed long haos tapolen long Rum ya we i Tabu we i Tabu mo long haos tempol we Solomon i wokem. Laet ya we i olsem wan merikel i no minim se Jeova i kamdaon blong stap long ples ya. God i no save stap long eni haos we man nomo i wokem. (2 Kronikel 6:18; Ol Wok 17:24) Laet ya we i saen we i saen long haos tempol blong God i save mekem se hae pris i trastem Jeova mo from we hem i mekem olsem, ol man Isrel tu oli save trastem Jeova se Hem i save protektem olgeta mo givhan long olgeta.

Afta long taem we oli raetem Baebol, laet ya oli kolem long lanwis Arameik se Sekina (shekhi·nahʹ) we i minim “ples we [God] i stap long hem.” Baebol i no yusum tok ya be yumi faenem tok ya long ol Targum, hemia Hibru haf blong Baebol we oli tanem i go long Arameik lanwis.

Taem Jeova i givim plan blong haos tapolen long Moses, hem i talem long Moses se: “Yu tekem tufala flat ston ya we bambae mi givim long yu, yu putum i go insaed, nao yu tekem Lid ya blong hem, yu satem. Bambae mi mi kam stap antap long Lid blong Bokis ya, long medel blong tufala jerubim ya, nao bambae mi stap mit wetem yu long ples ya.” (Eksodas 25:​21, 22) Oli putum Bokis ya insaed long Rum ya we i Tabu we i Tabu. Insaed mo afsaed long Bokis ya oli kavremap wetem gol. Antap long lid blong Bokis ya i gat tu jerubim we oli wokem long gol.

?Bambae Jeova i toktok long Moses olsem wanem? Jeova i givim ansa long kwestin ya taem Hem i talem long Moses se: “Insaed long klaod we i stap kam long Rum ya, hemia nao ples we mi mi stap kamtru long yufala long hem.” (Levitikas 16:2) Klaod ya we i no muv nating i stap antap long tabu Bokis ya long medel blong tufala jerubim ya we oli wokem long gol. Baebol i no talem long yumi se klaod ya i bigwan no i hae olsem wanem antap long tufala jerubim ya.

Klaod ya we i saen we i saen i stap givim laet long Rum ya we i Tabu we i Tabu. Yes, laet ya nomo i mekem se rum ya i klia. Hae pris i nidim laet ya taem hem i kam insaed long rum ya long Dei blong Fogivim Sin. Taem hae pris i stap long rum ya i olsem we hem i stap stanap fored long Jeova.

?Olsem wanem? ?Laet ya we i olsem wan merikel i gat mining long ol Kristin tede? Aposol Jon i luk long wan vison, wan taon we “i no gat naet” long hem. Taon ya hemia Niufala Jerusalem we i pija blong olgeta tabu Kristin we oli laef bakegen long ded blong rul wetem Jisas. Taon ya i no wan trufala taon mo hem i no nidim san mo mun blong i givim laet long hem. Paoa blong Jeova God nomo i givim laet long ogenaesesen ya olsem we Sekina i givim laet long Rum ya we i Tabu we i Tabu. Mo tu, smol sipsip ya Jisas Kraes i olsem “laet” blong taon ya. Ale, “taon” ya i mekem laet blong hem i saen i kamdaon long ol man blong olgeta kantri we hem i pemaot olgeta, mo laet ya i stap lidim olgeta.​—Revelesen 21:​22-25.

From we Jeova i givim bigfala blesing ya long ol man blong hem, olgeta ya oli save sua se Jeova bambae i protektem olgeta olsem wan Man blong Lukaot long Sipsip we i protektem gud ol sipsip blong hem. Mo tu oli save sua se Jeova i wan Papa we i lavem olgeta.