?Yu Yu Soemaot Paoa Blong God Olsem Bigfala Laet We i Saenaot?
?Yu Yu Soemaot Paoa Blong God Olsem Bigfala Laet We i Saenaot?
“Yumi evriwan i stap soemaot paoa blong [Jeova] . . . olsem bigfala laet we i stap saenaot long fes blong yumi.”—2 KORIN 3:18.
1. ?Moses i luk wanem samting, mo wanem i hapen biaen?
TAEM Moses i stap hem wan antap long bigfala hil ya Sinae, hem i askem wan samting long God, we i no gat man yet i askem. God i letem Moses i luk wan vison we i mekem hem i harem se hem i smol tumas fored long God. Long olgeta vison we God i givim long man, i no gat wan we i olsem hemia we Moses i luk. Yes, Jeova God i letem Moses i luk bigfala laet, no glori, blong Hem. I tru se Moses i no luk Jeova stret. Laet we i kamaot long God i saen we i saen, mekem se sipos man i luk God stret, man ya bambae i ded. Jeova i blokem fes blong Moses long “han” blong hem, nao hem i kam pas long fes blong hem. I klia se i no Jeova hem wan we i kamdaon long wol, be hem i yusum wan enjel we i kam long nem blong hem. Afta we Jeova i pas finis, hem i letem Moses i luk laet blong hem we i stap mo we i soemaot bigfala paoa blong Hem. Mo tu, Jeova i yusum wan enjel blong toktok wetem Moses. Baebol i talem wanem we i hapen afta long samting ya i se: “Nao taem Moses i aot long hil ya, i kamdaon bakegen, . . . fes blong hem i stap saen, from we hem i bin toktok wetem [Jeova].”—Eksodas 33:18–34:7, 29.
2. ?Aposol Pol i raetem wanem long saed blong bigfala laet ya we ol Kristin oli save soemaot?
2 Tingbaot sipos yu yu bin stap long hil ya wetem Moses. !Ating bambae yu sapraes tumas blong luk bigfala laet ya blong God we i gat Olgeta Paoa, mo blong harem tok blong hem! !Ating bambae yu glad tumas sipos yu gat janis blong wokbaot i godaon long hil ya Sinae wetem Moses, man ya we God i yusum blong tekem Loa i go long ol man Isrel! ?Be yu yu save se ol trufala Kristin oli soemaot laet blong God i bigwan moa i bitim laet we i saenaot long fes blong Moses? Save long saed ya i stap long wan leta we aposol Pol i raetem. Long leta ya, hem i talem se ol Kristin we tabu spirit i makemaot olgeta, oli ‘soemaot paoa blong [Jeova] olsem bigfala laet we i stap saenaot long fes blong olgeta.’ (2 Korin 3:7, 8, 18) Ol Kristin we oli gat hop blong laef long wol ya tu oli save soemaot laet blong God.
Ol Kristin Oli Save Soemaot Paoa Blong God Olsem Laet We i Saenaot
3. ?Olsem wanem yumi gat save long saed blong Jeova we Moses i no gat?
3 ?Olsem wanem yumi save soemaot paoa blong God olsem bigfala laet we i saenaot? Yumi no luk paoa blong Jeova no harem voes blong hem olsem Moses. Be yumi gat save long saed blong Jeova we Moses i no gat. Klosap 1,500 yia afta we Moses i ded, Jisas i kamtru olsem Mesaea. Mo tu, Moses i no save olsem wanem olgeta tok blong Loa bambae oli kamtru long Jisas, we hem i ded blong pemaot ol man long sin mo ded. (Rom 5:20, 21; Galesia 3:19) Antap long samting ya, Moses i no luksave fulwan ol nambawan stamba tingting blong Jeova we bambae Kingdom blong Mesaea i mekem i kamtru, mo Paradaes we Kingdom ya tu bambae i mekem long wol. Taswe yumi save luk paoa blong Jeova, i no wetem prapa ae blong yumi, be tru long bilif blong yumi we i stanap long ol tijing blong Baebol. Mo tu, yumi save harem voes blong Jeova, i no tru long wan enjel, be tru long Baebol, antap moa ol Gospel we oli tokbaotgud ol tijing mo wok blong Jisas long wol ya.
4. (a) ?Olsem wanem ol tabu Kristin oli soemaot paoa blong God we i olsem bigfala laet? (b) ?Olsem wanem olgeta we oli gat hop blong laef long wol oli save soemaot paoa blong God we i olsem bigfala laet?
4 I no gat prapa laet we i saenaot long fes blong ol Kristin blong soemaot glori blong God. Be taem olgeta ya oli stap talemaot long ol narafala man, wanem ol fasin mo ol plan blong Jeova, oli smael mo oli glad tumas, i olsem we fes blong olgeta i saen. Profet Aesea i tokbaot se long taem blong yumi, ol man blong God bambae ‘oli go long ol kantri longwe, we ol man oli no luk paoa blong [Jeova] yet, nao bambae oli save talemaot hae nem blong hem.’ (Aesea 66:19) Long 2 Korin 4:1, 2 yumi ridim se: “God i . . . givim wok ya long mifala blong mifala i mekem, mo from samting ya, tingting blong mifala i no save foldaon. Mifala i lego finis ol fasin blong haed, mo blong sem. Mifala i no save mekem ol giaman fasin, mo mifala i no save tanem tok blong God i kam narafala. Mifala i stap talemaot trutok long klia ples. Mo long fes blong God, mifala i stap traem soemaot mifala long olgeta man, blong bambae long tingting blong olgeta, oli save glad long mifala.” Pol i stap tokbaot ol tabu Kristin fastaem, we olgeta ya oli ol “minista blong niufala kontrak.” (2 Korin 3:6, NW ) Be wok blong ol tabu Kristin ya i gat paoa long plante plante narafala man we hop blong olgeta i blong laef olwe long wol ya. Nao taem ol tabu Kristin mo bigfala kampani, oli mekem wok blong tij, mo taem oli mekem ol gudfala fasin evri dei, tufala grup ya tugeta oli soemaot paoa blong Jeova olsem wan bigfala laet we i saenaot. !Yes, i wok blong yumi wanwan mo hem i blesing blong yumi wanwan, blong soemaot glori blong God ya we i Hae Olgeta!
5. ?Ol gudgudfala samting we yumi gat long saed blong spirit oli pruvum wanem?
5 Tede, ol man oli stap talemaot gud nius blong Kingdom blong God long olgeta ples long wol, olsem we Jisas i bin talem. (Matiu 24:14) Plante man blong evri kala, kantri, laen, mo lanwis oli lesin long gud nius ya, mo oli jenisim laef blong olgeta blong mekem ol samting we God i wantem. (Rom 12:2; Revelesen 7:9) Olgeta ya oli olsem ol faswan Kristin bifo, we oli no save stap kwaet, be oli gohed blong talemaot evri samting we oli luk mo we oli harem. (Ol Wok 4:20) Bitim sikis milian man tede, oli stap soemaot paoa blong God olsem bigfala laet we i stap saen. Namba ya i bigwan moa i bitim ol narafala taem bifo. ?Yu yu wan long olgeta ya? Ol man blong God oli gat plante samting long saed blong spirit. Hemia wan pruf se Jeova i stap blesem olgeta mo i stap lukaotgud long olgeta. Yumi luksave moa se tabu spirit blong Jeova i stap wetem yumi taem yumi tingbaot ol strongfala paoa ya we oli stap wantem spolem yumi. Naoia i gud yumi tokbaot olsem wanem yumi save se yumi gat tabu spirit blong Jeova.
I No Gat Samting i Save Satem Maot Blong Ol Man Blong God
6. ?From wanem i nidim bilif mo strong tingting blong stanap long saed blong Jeova?
6 Tingbaot sipos oli askem yu blong stanap long kot mo talemaot rong blong wan rabis man we i no gat sore nating from samting we hem i mekem. Yu yu save se rabis man ya i gat plante man we oli wok blong hem mo hem i save yusum plante rod blong blokem yu blong witnes long kot. Blong stanap long kot blong tok agensem rabis man ya, yu mas gat strong tingting mo yu mas suagud tu se ol polis bambae oli protektem yu, blong man ya i no kilim yu yu ded. Yumi stap fesem wan samting we i klosap sem mak. Taem yumi tokbaot Jeova mo ol stamba tingting blong hem, yumi stap agensem Devel Setan from we yumi soemaot se hem i wan man blong kilim man mo wan man blong giaman we i stap lidim ful wol i gorong. (Jon 8:44; Revelesen 12:9) Yumi nidim strong bilif mo strong tingting tu blong stanap long saed blong Jeova mo agensem Devel Setan.
7. ?Setan i gat wanem paoa, mo hem i traem mekem wanem?
7 Yumi save se Jeova i God ya we i Hae we i Hae. Paoa blong hem i antap we i antap olgeta long paoa blong Setan. Taswe yumi save sua se Jeova i naf blong protektem yumi taem yumi strong blong mekem wok blong hem, mo yumi save sua tu se hem i wantem mekem olsem. (2 Kronikel 16:9) Nating se i olsem, Setan nao i stap rul long ol rabis enjel blong hem mo long ol rabis man long wol ya we oli no laekem God. (Matiu 12:24, 26; Jon 14:30) God i blokem Setan blong i stap raonabaot long wol ya nomo. Setan i “kros tumas,” i stap wok strong agensem ol man blong Jeova mo i yusum ol man blong wol ya we oli stap long han blong hem, blong traem satem maot blong olgeta we oli talemaot gud nius. (Revelesen 12:7-9, 12, 17) ?Hem i mekem samting ya olsem wanem? Hem i yusum tri defren rod.
8, 9. ?Olsem wanem Setan i yusum giaman lav, mo from wanem yumi mas lukaotgud long wanem kaen fren we yumi jusum?
8 Wan rod we Setan i stap yusum blong traem pulum yumi blong no moa prij, hemia ol samting blong laef evri dei. Long ol las dei ya, ol man oli lavem mane, oli lavem olgeta nomo, mo oli laekem ol pleplei. Oli no lavem God. (2 Timoti 3:1-4) Ol man oli stap bisi tumas long ol bisnes blong laef evri dei, mekem se bighaf blong olgeta oli ‘no wantem save’ taem yumi karem gud nius ya i go long olgeta. Oli no intres nating blong save ol trutok blong Baebol. (Matiu 24:37-39, NW ) Fasin blong olgeta i save gat paoa long tingting blong yumi tu, nao i save pulum yumi blong yumi slip long saed blong spirit. Sipos sloslo, yumi kam olsem we yumi lavem mane mo ol pleplei, be bambae yumi no moa lavem God.—Matiu 24:12.
9 From risen ya nao, ol Kristin oli mas lukaot gud long wanem kaen man we oli stap kampani plante wetem olgeta. King Solomon i raetem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” (Ol Proveb 13:20) I gud yumi “joen” wetem ol man we oli wantem soemaot paoa blong God olsem bigfala laet we i saenaot. !Mo hemia wan samting we i gud tumas! Taem yumi joen wanples wetem ol Kristin brata sista blong yumi long ol miting mo long ol narafala taem tu, ale, lav blong olgeta wetem bilif, glad, mo waes fasin blong olgeta tu, i save leftemap tingting blong yumi. Ol gudfala kampani ya oli save mekem tingting blong yumi i strong moa blong gohed long wok blong prij we yumi stap mekem.
10. ?Olsem wanem Setan i yusum tok jik blong daonem tingting blong ol man we oli soemaot bigfala laet blong God?
10 Namba tu rod we Setan i yusum blong blokem ol Kristin blong soemaot paoa blong God, hemia fasin blong tok jik. Yumi no mas sapraes long fasin ya. Taem Jisas Kraes i stap mekem wok blong prij long wol ya, ol man oli jikim hem tu. Oli laf long hem, oli daonem hem, oli mekem plei long hem, mo oli spet long hem. (Mak 5:40; Luk 16:14; 18:32) Ol faswan Kristin oli kasem tok jik plante taem tu. (Ol Wok 2:13; 17:32) Ol man blong Jeova tede oli fesem sem samting bakegen. Aposol Pita i talem se ol man bambae oli talem se oli ol “giaman profet.” Hem i talemaot se: “Long taem blong Lasdei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, oli talem se, ‘?Olsem wanem nao? ?Hem i promes finis blong kam, be hem i stap wea? . . . i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.’ ” (2 Pita 3:3, 4) Ol man oli jikim ol man blong God se oli stap drim nomo. Oli talem se ol rul blong Baebol long saed blong wanem fasin i gud, oli blong ol man bifo nomo. Long tingting blong plante man, toktok ya we yumi stap prijimaot hem i krangke. (1 Korin 1:18, 19) Ol narafala long skul, long wok, mo insaed long famle, oli jikim yumi from yumi Kristin. Be yumi no letem samting ya i daonem tingting blong yumi. Yumi gohed nomo blong soemaot bigfala laet ya blong God long wok blong prij, from we yumi save se Tok blong God hem i trutok, olsem Jisas i bin talem.—Jon 17:17.
11. ?Olsem wanem Setan i yusum ol man blong agens blong traem satem maot blong ol Kristin?
11 Namba tri samting we Setan i yusum blong traem satem maot blong yumi, hemia taem hem i pulum ol man blong oli agensem mo kilim yumi. Jisas i talem long ol man blong hem se: “Bambae sam man oli holem yufala, oli mekem i nogud long yufala, gogo oli kilim yufala i ded. Bambae olgeta man oli no laekem yufala nating, oli agens long yufala, from we yufala i holem nem blong mi.” (Matiu 24:9) Ol Witnes blong Jeova raon long wol oli kasem plante trabol mo kil long ol man. Yumi save se longtaem finis, Jeova i bin talem se ol man blong God mo ol man blong Setan bambae oli enemi. (Jenesis 3:15) Mo tu, yumi save se taem yumi stanap strong nomata wanem traem i kasem yumi, yumi pruvum se Jeova nomo i gat raet blong rulum heven mo wol. Save ya i save mekem yumi strong nating se traem we yumi kasem i strong olsem wanem. I no gat wan traem no trabol we bambae i naf blong satem maot blong yumi olwe, sipos yumi mekem tingting blong yumi i strong blong soemaot paoa blong God olsem bigfala laet we i stap saen.
12. ?From wanem yumi mas glad taem yumi stanap strong, nating se Setan i agensem yumi bigwan?
12 ?Yu yu stap agensem ol trik blong wol ya we i stap traem pulum yu, mo yu stap tru long God nating se ol man oli jikim yu no kilim yu? Ale be i stret we yu glad. Jisas i talem long ol man we oli biaen long hem se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. Yufala i mas harem gud yufala i glad, from we i gat bigfala pei blong yufala i stap long heven. Ol profet bifo, ol man oli mekem i nogud long olgeta long sem fasin ya nomo.” (Matiu 5:11, 12) Taem yu stanap strong longtaem, samting ya i givim pruf se tabu spirit blong Jeova i stap long yu, i stap givim paoa long yu blong yu soemaot paoa blong hem we i saenaot olsem bigfala laet.—2 Korin 12:9.
Jeova Nomo i Save Mekem We Yumi Stanap Strong Longtaem
13. ?Wanem wan stamba risen from wanem yumi gohed strong long Kristin wok blong prij?
13 Wan stamba risen from wanem yumi gohed strong long wok blong God, hemia se yumi lavem Jeova mo yumi glad blong soemaot paoa blong hem olsem bigfala laet we i saen. Plante taem ol man oli folem fasin blong wan man we oli lavem mo respektem hem, mo long saed ya i no gat wan man we i moagud blong yumi folem fasin blong hem i bitim Jeova. From bigfala lav blong hem, hem i sanem Pikinini blong hem i kam long wol ya blong givim witnes long saed blong trutok mo blong pemaot ol man we oli obei oli kam fri long sin. (Jon 3:16; 18:37) Olsem God, yumi wantem we olkaen man oli tanem tingting blong olgeta from sin blong olgeta mo blong oli kasem laef. From samting ya, yumi prij long olgeta. (2 Pita 3:9) Taem yumi wantem samting ya, mo tingting blong yumi i strong tu blong folem fasin blong God, ale samting ya i save pusum yumi blong gohed blong soemaot paoa blong God long wok blong prij.
14. ?Olsem wanem Jeova i givhan long yumi blong gohed strong long wok blong prij?
14 Be bigfala samting we i halpem yumi blong gohed strong long Kristin wok blong prij, hemia paoa we Jeova i givim. Jeova i yusum tabu spirit blong hem, ogenaesesen blong hem, mo Tok blong hem Baebol, blong givhan long yumi mo blong givim paoa we yumi nidim. Jeova i “mekem tingting blong man i longfala” taem man i rere mo i wantem soemaot paoa blong God olsem bigfala laet we i saen. Hem i ansa long ol prea blong yumi mo i givim waes we yumi nidim blong winim ol traem. (Rom 15:5; Jemes 1:5) Antap long hemia, Jeova i no save letem wan traem i kasem yumi sipos traem ya i bigwan tumas blong yumi winim. Sipos yumi trastem Jeova, bambae hem i wokem rod blong yumi save gohed blong soemaot bigfala paoa blong hem.—1 Korin 10:13.
15. ?Wanem i halpem yu blong stanap strong?
15 Fasin blong yumi blong gohed strong long wok blong prij i pruvum se tabu spirit blong God i stap long yumi. Tingbaot sipos wan man i askem yu blong go long olgeta haos wanwan blong givim wan spesel kaen bred long ol man, be bambae ol man oli no pem bred ya. Hem i talem se wok ya yu save mekem long fri taem blong yu mo bambae yu spenem mane blong yu wan nomo blong mekem wok ya. Antap long hemia, taem yu mekem wok ya yu luk se smol man nomo oli glad blong tekem bred ya we yu stap serem, mo i gat sam man tu we oli no glad nating long ol traehad we yu mekem blong karem bred ya i go long olgeta. ?Olsem wanem? ?Yu ting se bambae yu gohed blong mekem wok ya evri manis gogo plante yia i pas? Ating nogat. Be nao, tingbaot wok blong prij. Ating yu givim ful paoa blong yu i go long wok blong talemaot gud nius, yu spenem prapa taem blong yu mo mane blong yu blong plante plante yia finis. ?From wanem yu mekem olsem? !I sua se wan risen nomo i pusum yu, hemia lav we yu gat long Jeova, mo hem i blesem ol traehad ya blong yu taem hem i givim tabu spirit blong halpem yu blong stanap strong!
Wan Wok Blong Rimemba
16. ?Sipos yumi gohed strong long wok blong prij, yumi wetem hemia we i lesin long yumi, i save kasem wanem?
16 Wok we niufala kontrak ya i mekem, hem i wan presen we i sas tumas, yumi no save skelem wetem nara samting. (2 Korin 4:7) Long sem fasin, Kristin wok blong prij we ol narafala sipsip oli stap mekem raon long wol, hem i wan sas samting. Taem yu gohed long wok ya, yu save “sevem yu, wetem ol man we oli stap lesin long yu,” olsem we Pol i raetem long Timoti. (1 Timoti 4:16) Tingbaot mining blong tok ya. Gud nius we yu talemaot, i givim janis long ol narafala blong oli save kasem laef we i no save finis. Samting ya i save mekem we yu mo hemia we yu stap halpem hem long saed blong spirit, yutufala i save kam gudfala fren. !Tingbaot glad we bambae yu kasem taem yu laef olwe long Paradaes wetem olgeta ya we yu bin halpem olgeta blong oli save God! I sua se bambae oli neva fogetem traehad we yu yu bin mekem blong halpem olgeta. !Hemia i rili save mekem yu yu harem gud!
17. ?From wanem taem blong yumi i spesel moa i bitim ol narafala taem?
17 Yu yu stap laef long wan taem we i spesel tumas. I no gat wan narafala taem bakegen we gud nius bambae i goaot long ol man blong wol ya we oli no laekem God. Noa i bin laef long wan taem we ol man oli olsem, mo hem i luk we God i spolem ol man ya. !Ating Noa i glad we i glad tumas blong save se hem i mekem samting we God i wantem, taem hem i wokem sip ya we i sevem hem wetem famle blong hem! (Hibrus 11:7) Yu tu yu save kasem semfala glad ya. Taem bambae yu stap long niufala wol mo yu tingting bak long olgeta wok we yu bin mekem long taem ya blong ol las dei, bambae yu glad se yu bin givim bes blong yu long ol wok blong Kingdom.
18. ?Wanem samting we yumi sua long hem mo we Jeova i talem blong leftemap tingting blong ol man blong hem?
18 Taswe, i gud yumi gohed blong soemaot paoa blong God olsem bigfala laet we i stap saenaot. Fasin blong yumi blong mekem olsem, bambae yumi rimemba blong olwe. Jeova i no save fogetem wok we yumi mekem tu. “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet. Mo mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem. Mifala i no wantem we bambae yufala i kam slak. Mifala i wantem we yufala bambae i folem fasin blong olgeta ya we oli bilif strong, mo we tingting blong olgeta i longfala, nao oli save kasem ol samting we God i promes blong givim long olgeta.”—Hibrus 6:10-12.
?Yu Yu Save Eksplenem?
• ?Olsem wanem ol Kristin oli save soemaot bigfala paoa blong God olsem wan laet we i saenaot?
• ?Wanem sam rod we Setan i yusum blong traem satem maot blong ol man blong God?
• ?Wanem i pruvum se spirit blong God i stap long yumi?
[Kwestin]
[Tok blong pija long pej 15]
Fes blong Moses i soemaot bigfala paoa blong God
[Tok blong pija long pej 16]
Yumi soemaot bigfala paoa blong God taem yumi prij