Bambae Yumi Wokbaot Long Nem Blong Jeova, God Blong Yumi

“Yumi, bambae yumi wokbaot olwe long nem blong Jeova, God blong yumi, yes, gogo i no save finis.”​—MAEKA 4:​5, NW.

1. ?Wanem fasin blong ol man long taem blong Noa, mo olsem wanem Noa i defren?

 FASWAN man we Baebol i tokbaot se hem i wokbaot wetem God, hemia Inok. Sekenwan hemia Noa. Stori long Baebol i talem se, Noa “i wan stret man, we ol man oli no save jajem hem, mo oltaem hem i stap fren gud [“wokbaot,” NW ] wetem God.” (Jenesis 6:9) Long taem blong Noa, klosap olgeta man evriwan oli gowe finis long trufala wosip. Mo wanem we i mekem laef long taem ya i moa nogud yet, hemia se sam nogud enjel oli tekem ol woman long wol ya, nao oli gat pikinini wetem ol woman ya. Ol man oli stap singaot ol pikinini blong ol enjel ya se ol Nefilim from we oli bigbigfala man mo “oli lariken man blong faet” mo “olgeta man oli savegud nem blong olgeta.” !Taswe, yumi no sapraes we wol long taem ya i fulap long raf fasin! (Jenesis 6:​2, 4, 11) Nating se i olsem, Noa i wan stret man mo hem i wan “prija we i stap talemaot stret fasin.” (2 Pita 2:5) Taem God i givim oda long hem blong bildim wan bigfala sip we i save sevem sam man mo anamol, Noa i obei wantaem nomo, hem i “mekem olgeta samting ya olsem we God i talem.” (Jenesis 6:22) Yes, Noa i wokbaot wetem God.

2, 3. ?Wanem nambawan eksampol we Noa i soem long yumi tede?

² Pol i tokbaot Noa taem hem i tokbaot olgeta gudfala witnes blong God blong bifo, hem i se: “From we Noa i stap bilif strong long God, taswe hem i obei long tok blong God long taem ya we God i talemaot ol samting ya long hem fastaem, we i no gat man i luk yet. Taswe hem i obei long God, nao i wokem wan bigfala sip blong sevem olgeta famle blong hem. Long fasin ya, i olsem we Noa i jajem ol man, mo from fasin ya, hem i kasem stret laef ya we God i stap givim long olgeta we oli stap bilif long hem.” (Hibrus 11:7) !Hemia wan nambawan eksampol! From we Noa i sua se ol promes blong Jeova bambae oli kamtru, ale hem i yusum taem, paoa mo olting we hem i gat, blong obei long ol oda blong God. Long sem fasin, plante man tede oli tanem baksaed long ol gudgudfala samting we wol ya i save givim, mo oli yusum taem, paoa, mo mane blong olgeta blong folem oda blong Jeova. Bilif blong olgeta i wan gudfala eksampol we narafala i save folem. Mo from bilif we oli soem, bambae oli sevem olgeta wetem ol man ya tu we oli bin lesin long olgeta.​—Luk 16:9; 1 Timoti 4:16.

³ Ating i no isi nating long Noa mo famle blong hem blong holemstrong long bilif blong olgeta, olsem we i no bin isi tu long Inok, bubu blong papa blong Noa, we yumi bin tokbaot hem long faswan stadi. Taem blong Noa i sem mak long taem blong Inok. I no gat plante man we oli wosipim Jeova​—tru ya, eit man nomo oli bilif, nao God i sevem olgeta taem Bigfala Wota i ron. Noa i stap prijimaot stret fasin long wan taem we ol man oli gat raf fasin mo oli mekem ol rabis fasin long saed blong seks. Mo tu, hem mo famle blong hem, oli stap katem ol tri mo bildim wan bigfala sip blong rere from wan bigfala wota we bambae i kavremap ful wol. Be long taem ya, ol man oli neva luk bigfala wota we i kavremap ples. Maet oli ting se Noa mo famle blong hem oli narakaen lelebet.

4. ?Jisas i makem klia se ol man long taem blong Noa oli mestem wanem samting?

⁴ Wan samting we i gud blong makem se, taem Jisas i tokbaot taem blong Noa, hem i no tokbaot raf fasin, ol giaman skul, mo ol rabis fasin blong seks we oli plante tumas. Nogat. Jisas i makem klia se mastik we ol man long taem ya oli mekem, hemia  se oli no wantem lesin long woning we oli kasem. Hem i se “oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip.” I no rong blong kakae, dring, mo mared. !Ol man ya oli stap mekem ol samting ya nomo we i pat blong laef blong yumi ol man! Yes i tru, be oli mestem wan samting, se bigfala wota bambae i kavremap ples, mo Noa i stap prijimaot stret fasin. Ol tok blong hem mo ol fasin blong hem, oli sud stap olsem wan woning blong olgeta. Be nogat. Olgeta ya “oli no [“wantem,” NW ] save se bambae trabol i kam, gogo wota i ron bigwan, i tekemaot olgeta.”​—Matiu 24:​38, 39.

5. ?Wanem ol fasin we Noa mo famle blong hem oli nidim?

⁵ Taem yumi tingtingbak long laef long taem blong Noa, yumi luksave klia nomo se rod we Noa i jusum hemia nao rod we i waes. Be, bifo we Bigfala Wota i ron, i nidim fasin no fraet blong stap defren long ol narafala man. Yes, Noa mo famle blong hem oli nidim strong tingting blong bildim bigfala sip ya mo fulumap wetem ol defdefren kaen anamol. ?Yu ting se maet samtaem, sam long ol eit man ya blong Jeova oli taed blong stap defren long ol narafala man? ?Maet oli wantem joen long ol samting ya we ol man oli stap mekem, we oli olsem pat blong laef nomo? Nating se maet oli gat ol tingting olsem, be oli holemstrong long Jeova. Noa i stanap strong blong plante yia​—longtaem moa i bitim ol yia we yumi mas laef long rabis wol blong naoia​—ale taem Bigfala Wota i ron, God i sevem hem. Be Jeova i jajem olgeta we oli bin gohed blong mekem ol samting ya we oli pat blong laef, olgeta we oli no wantem save long woning we oli kasem.

Raf Fasin i Kam Fulap Bakegen Long Wol

6. ?Afta we Bigfala Wota i ron, laef blong ol man i kam olsem wanem?

⁶ Afta we Bigfala Wota i godaon, ol man oli statem wan niufala fasin blong laef. Be oli sinman yet, mo oli gat fasin ya yet we ‘tingting blong olgeta i stap long ol rabis fasin stat taem oli smol pikinini.’ (Jenesis 8:21) Mo antap long hemia, ol rabis enjel oli stap mekem wok blong olgeta yet, nating se oli no moa save tekem bodi olsem man. Taswe, kwiktaem nomo ol man we oli no obei long God oli soemaot klia se “oli stap long paoa blong Setan,” mo ol trufala man blong God oli mas faet agensem ‘ol giaman trik blong Setan,’ olsem we ol man blong God oli stap mekem tede tu.​—1 Jon 5:19; Efesas 6:​11, 12.

7. ?Olsem wanem raf fasin i kam bigwan moa afta we Bigfala Wota i ron?

⁷ Ale, stat long taem blong man ya Nimrod, hemia afta we Bigfala Wota i ron, wol i fulap bakegen wetem raf fasin. Ol man oli kam plante mo save blong olgeta tu i kam antap, ale samting ya i mekem we raf fasin i kam bigwan moa. Long taem bifo, taem ol man oli faet oli yusum naef, spia, bonara, mo kat we hos i pulum. Ale, klosap moa long taem blong yumi, ol man oli stat yusum masket mo bigfala kanon we i save sutum bolet i go longwe. Be long stat blong ol yia 1900 i gat ol niufala tul blong faet we oli strong moa. Long taem blong Wol Wo Wan ol man oli wokem sam niufala tul blong faet we oli moa nogud yet, olsem ol plen, ol bigfala trak ya we oli kolem tank, ol sip we oli save ron aninit long solwota hemia sabmarin, mo posen gas. Long Wol Wo Wan ya, ol tul ya oli tekemaot laef blong plante milian man. ?Yumi sapraes long ol samting ya? Nogat.

8. ?Olsem wanem Revelesen 6:​1-4 i kamtru?

⁸ Long 1914, Jisas i kam King long Kingdom blong God long heven, mo ‘dei blong Masta’ i stat. (Revelesen 1:10) Long wan vison we buk blong Revelesen i tokbaot, King ya Jisas i stap sidaon long wan waet hos, i stap ron olsem we hem i win long faet finis. Biaen long hem, i gat sam narafala hos oli  ron i kam we man i sidaon long olgeta. Wanwan long olgeta ya oli minim ol defdefren trabol we oli kasem ol man. Wan hos, kala blong hem i red olsem faea. Man we i sidaon long hem i kasem raet blong “mekem pis i finis long wol, bambae faet nomo i gohed, we ol man oli stap kilkilim olgeta oli ded. Mo [“hem i kasem,” NW ] . . . wan bigfala naef blong faet.” (Revelesen 6:​1-4) Hos ya mo man we i sidaon long hem, i pija blong ol faet long wol ya. Mo bigfala naef blong faet ya i soemaot se trabol we i kamaot long ol faet tede wetem ol tul blong faet tu oli moa nogud, mo oli spolem plante moa samting, bitim bifo. Ol tul blong faet we oli yusum tede, hemia ol niuklia bom, we wan nomo i naf blong kilim i ded plante taosen man. Oli wokem ol roket we oli save sutum ol bom ya i go plante taosen kilometa longwe, long narafala kantri. Mo tu oli wokem ol rabis tul blong faet we oli save sakem posen mo ol rabis jem no vaeras blong kilim fulap man i ded wantaem.

Yumi Lesin Long Ol Woning Blong Jeova

9. ?Olsem wanem ol man tede oli sem mak long ol man bifo we Bigfala Wota i ron?

⁹ Long taem blong Noa, Jeova i spolem ol man from raf fasin blong olgeta we i plante tumas, mo we i kam bigwan tumas tu from ol Nefilim. ?Olsem wanem tede? ?Raf fasin i godaon lelebet? !Nogat! Olsem ol man long taem blong Noa, ol man tede tu oli ronem ol prapa bisnes blong olgeta nomo, oli mekem ol samting ya nomo we i olsem pat blong laef blong man. Oli no wantem nating blong harem woning we oli stap kasem. (Luk 17:​26, 27) ?Taswe, yu ting se bambae Jeova i no save spolem ol man nogud bakegen? Si bambae i mas mekem olsem.

10. (a) ?Wanem woning we ol profet tok blong Baebol oli givim bakegen mo bakegen? (b) ?Wanem rod nomo we i waes blong folem tede?

¹⁰ Plante handred yia bifo we Bigfala Wota i ron, Inok i talem profet tok ya se God bambae i spolem ol rabis man long taem blong yumi. (Jud 14, 15) Jisas tu i bin tokbaot “bigfala trabol” ya we bambae i kam. (Matiu 24:21) I gat sam narafala profet tu we oli givim woning long saed ya. (Esikel 38:​18-23; Daniel 12:1; Joel 2:​31, 32) Mo long buk blong Revelesen, yumi ridim toktok we i talemaot klia se laswan faet ya blong God bambae i olsem wanem. (Revelesen 19:​11-21) Yumi wanwan i folem fasin blong Noa mo yumi stap bisi long wok blong prijimaot stret fasin. Yumi lesin long ol woning blong Jeova mo halpem ol man raonabaot blong yumi wetem lav, blong olgeta tu oli lesin long ol woning. Taswe, olsem Noa, yumi tu, yumi wokbaot wetem God. Yes, i impoten tumas we ol man oli gohed blong wokbaot wetem God sipos oli wantem gat laef. ?Olsem wanem yumi save mekem samting ya taem yumi fesem ol traem evri dei? Yumi mas gat strong bilif se God bambae i mekem ol stamba tingting blong hem oli kamtru.​—Hibrus 11:6.

Gohed Blong Wokbaot Wetem God Long Trabol Taem Ya

11. ?Olsem wanem yumi folem eksampol blong ol Kristin long faswan handred yia?

¹¹ Long faswan handred yia, Baebol i tokbaot ol Kristin we tabu spirit i makemaot olgeta, se oli stap folem “Rod blong Masta.” (Ol Wok 9:2) Fulwan laef blong olgeta i stanap long bilif long Jeova mo  Jisas Kraes. Oli wokbaot long rod we Masta blong olgeta i bin wokbaot long hem. Tede, ol trufala Kristin oli mekem sem mak.

12. ?Wanem i hapen afta we Jisas i mekem wan merikel blong givim kakae long wan bigfala hip man?

¹² Bilif i wan impoten samting. Yumi luksave samting ya long wan samting we i bin hapen long laef blong Jisas. Wan taem, Jisas i wokem wan merikel blong givim kakae long wan bigfala hip man, woman mo pikinini, we oli kaontem se namba blong ol man nomo i kasem 5,000. Hip man ya i sapraes long merikel ya mo oli glad tu long hem. Be i gud yu makem wanem we i hapen biaen. Yumi ridim se: “Nao taem ol man ya oli luk merikel ya we Jisas i mekem, oli talem se, ‘Tru, hemia Profet ya nao, we bifo oli bin talem se bambae hem i kam long wol.’ Nao Jisas i save we ol man ya oli wantem kam tekem hem blong fosem hem, blong i kam King blong olgeta. Nao hem i aot long olgeta, i go wokbaot long hil, hem wan.” (Jon 6:​10-15) Ale taem tudak i kam, hem i wokbaot i go long wan narafala ples. Ating plante man oli harem nogud from we Jisas i no wantem kam king blong olgeta. Ol man ya oli luksave se Jisas i gat waes we i mekem se hem i naf blong stap olsem king, mo hem i gat paoa blong givim samting we ol man oli nidim long saed blong bodi. Be i no taem yet we Jeova i makem blong hem i rul olsem King. Antap long hemia, Kingdom ya we Jisas bambae i rul long hem, hem i stap long heven, i no stap long wol.

13, 14. ?Ol man oli soemaot se wanem i stap long tingting blong olgeta, mo olsem wanem Jisas i traem bilif blong olgeta?

¹³ Nating se i olsem, ol man oli strong yet blong biaenem Jisas, mo Jon i talem se oli faenem hem “narasaed bigfala lugun ya.” ?From wanem oli gohed blong lukaotem hem afta we hem i talem finis se hem i no wantem kam king? Plante long olgeta oli tingbaot tumas ol samting long saed blong bodi. Oli tokbaot ol kakae mo ol narafala samting we Jeova i bin givim long ol man Isrel long taem blong Moses, taem oli stap wokbaot long draeples. Olgeta ya oli wantem minim se bambae Jisas i mas gohed blong givim kakae long olgeta. Jisas i luksave rong tingting blong olgeta, nao hem i stat tijim olgeta long saed blong spirit blong halpem olgeta blong oli stretem tingting blong olgeta. (Jon 6:​17, 24, 25, 30, 31, 35-40) Ale, samfala oli toktok smol agensem hem, antap moa taem hem i talem pijatok ya: “Tru mi talem long yufala, mi mi Pikinini blong Man. Sipos yufala i no kakae mit blong bodi blong mi, mo yufala i no dring blad blong mi, bambae yufala i no gat laef long yufala. Man we i kakae mit blong mi mo i dring blad blong mi, hem i gat laef we i no save finis, mo long Lasdei, mi bambae mi mekem hem i laef bakegen.”​—Jon 6:​53, 54.

¹⁴ Plante taem, ol pijatok blong Jisas oli pulum ol man blong soem sipos oli rili wantem wokbaot wetem God. Taswe, pijatok ya tu i pulum olgeta blong soemaot filing blong olgeta. Yumi ridim se: “Plante man blong Jisas oli harem tok ya, nao oli talem se, ‘!Man! !Tok ya i strong tumas! ?Hu i save harem tok olsem?’ ” Nao Jisas i gohed i stap eksplenem se oli mas traem kasem save mining blong tok blong hem long saed blong spirit. Hem i se: “Tabu Spirit nomo i save mekem man i laef. Bodi blong man i no save mekem samting ya. Ol tok ya we mi mi talem long yufala, oli blong Tabu Spirit, mo oli save givim laef long man.” Be plante man yet oli no wantem lesin, mo stori blong Baebol i talem se: “Biaen long tok ya plante man blong hem oli gowe long hem, oli no moa biaen long hem bakegen.”​—Jon 6:​60, 63, 66.

15. ?Wanem stret tingting we sam long ol man blong Jisas oli gat?

¹⁵ Be i no olgeta disaepol blong Jisas we oli mekem olsem. I gat sam we oli stap tru long hem. Ating olgeta tu oli no rili kasem save long ol tok blong Jisas. Be nating se i olsem, tras we oli gat long  hem i stap strong yet. Pita, we i wan long ol disaepol ya, i talemaot filing blong olgeta evriwan taem hem i se: “Masta. ?Bambae mifala i save go long hu? Yu nomo yu gat ol tok blong laef ya we i no save finis.” (Jon 6:68) !Fasin blong olgeta ya i nambawan, mo i wan gudfala eksampol blong yumi folem!

16. ?Wanem samting we maet i traem yumi, mo wanem gudfala tingting we yumi mas traem kasem?

¹⁶ Tede tu, yumi save kasem traem we i sem mak long ol disaepol ya bifo. Maet traem ya hemia se tingting blong yumi i foldaon from we ol promes blong Jeova oli no kamtru kwik olsem we yumi wantem. Maet yumi harem se mining blong sam vas blong Baebol we oli stap long ol buk blong yumi oli hadwok tumas blong kasem save. No maet yumi harem nogud long fasin blong wan Kristin brata no sista. ?Yu ting se i stret blong no moa wokbaot wetem God from ol risen olsem? !I no stret nating! Ol disaepol we oli lego Jisas oli soemaot se tingting blong olgeta i stap nomo long ol samting blong bodi. Yumi mas lukaot blong no mekem olsem olgeta ya.

“Yumi No Save Tanemraon Blong Gobak”

17. ?Wanem i save halpem yumi blong gohed blong wokbaot wetem God?

¹⁷ Aposol Pol i raetem se: “Olgeta tok blong Baebol oli kamaot long God.” (2 Timoti 3:16) Jeova i yusum Baebol blong tok klia long yumi se: “Hemia rod. Yufala i folem.” (Aesea 30:21) Fasin blong obei long Tok blong God i halpem yumi blong ‘lukaot gud long ol fasin blong yumi [“rod we yumi stap folem,” NW ] .’ (Efesas 5:15) Taem yumi stadi long Baebol mo yumi tingting dip long hem, samting ya i save halpem yumi blong ‘folem trutok oltaem long laef blong yumi.’ (3 Jon 3) Yes, olsem Jisas i bin talem, “tabu spirit nomo i save mekem man i laef. Bodi blong man i no save mekem samting ya.” Beswan samting we i save lidim yumi hemia ol samting long saed blong spirit we yumi kasem long Tok blong Jeova, tabu spirit blong hem, mo ogenaesesen blong hem.

18. (a) ?Samfala oli no waes taem oli mekem wanem? (b) ?Wanem kaen bilif we yumi mas wokem?

¹⁸ Tede, sam Kristin oli stat harem nogud from we tingting blong olgeta i no moa stap long ol samting long saed blong spirit, no from we ol samting oli no kamaot olsem we olgeta i wantem. Ale, oli go lukaot wanem gudgudfala samting we wol ya i save givim long olgeta. Oli no moa tingbaot se taem we yumi laef long hem naoia i impoten. Oli no ting se oli “mas lukaot gud,” nao oli stat ronem ol samting we olgeta nomo i wantem bitim we oli putum ol wok blong Kingdom fastaem. (Matiu 24:42) I no waes nating blong wokbaot long wan rod olsem. Tingbaot ol tok ya we aposol Pol i raetem: “Yumi no save tanemraon blong gobak, nao yumi lus, nogat. Yumi man blong bilif long God, mo hem bambae i sevem yumi.” (Hibrus 10:39) Olsem Inok mo Noa, yumi laef long trabol taem, be olsem tufala ya, yumi tu yumi gat janis blong wokbaot wetem God. Taem yumi mekem olsem, yumi save sua fulwan se bambae yumi luk ol promes blong Jeova oli kamtru. Yes, bambae yumi luk we ol rabis fasin oli lus, mo niufala wol ya we stret fasin nomo i stap long hem bambae i kamtru. !Hemia wan nambawan fiuja tru!

19. ?Maeka i tokbaot rod we ol trufala man blong God oli folem, se i olsem wanem?

¹⁹ Profet tok blong Maeka i tokbaot ol neson blong wol se bambae olgeta ya oli “wokbaot long nem blong god blong olgeta.” Nao hem i tokbaot hem wan wetem ol narafala man blong wosip, i se: “Be yumi, bambae yumi wokbaot olwe long nem blong Jeova, God blong yumi, yes, gogo i no save finis.” (Maeka 4:​5, NW ) Sipos yu gat strong tingting olsem Maeka, i gud yu stap klosap long Jeova nomata se trabol taem ya i strong olsem wanem. (Jemes 4:8) !I gud sipos long hat blong yumi evriwan, yumi wantem tumas blong wokbaot wetem Jeova, God blong yumi, naoia, gogo i no save finis, yes foreva!

Bambae Yu Yu Ansa Olsem Wanem?

• ?Olsem wanem taem blong Noa i sem mak long taem blong yumi?

• ?Wanem rod we Noa mo famle blong hem i folem, mo olsem wanem yumi save gat bilif olsem olgeta ya?

• ?Sam long ol man we oli biaenem Jisas, oli soemaot se tingting blong olgeta i stap long wanem samting?

• ?Ol trufala Kristin oli gat strong tingting blong mekem wanem?

[Kwestin]

[Tok blong pija long pej 20]

Olsem long taem blong Noa, ol man tede oli bisi wetem ol bisnes blong olgeta blong evri dei laef

[Tok blong pija long pej 21]

Yumi ol man blong talemaot Kingdom, yumi “no save tanemraon blong gobak”