“Fasin Blong Fraetgud Long Jeova—Hemia Nao Waes”

“ORAET, taem mi harem finis olgeta toktok, mi mi tok olsem, se: ‘Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.’ ” (Prija 12:​13, NW ) !Tabu spirit i pulum King Solomon blong Isrel bifo blong talem tok ya we i gat bigfala mining! Man ya Job, hem tu i luksave se i impoten blong fraetgud long God, hem i raetem tok blong Jeova we i se: “Mi mi Hae God. Sipos yufala i wantem kasem waes, bambae yufala i mas ona [“fraetgud,” NW ] long mi, mo sipos yufala i wantem kasem gudfala tingting, yufala i mas tanem baksaed long ol fasin nogud.”​—Job 28:28.

Baebol i soem se i impoten blong gat fasin ya blong fraetgud long Jeova. ?From wanem man i save kam waes taem hem i fraetgud long Jeova? ?Olsem wanem fasin ya blong fraetgud long God i save mekem i gud long wanwan man no wan grup blong ol man we oli wosip long God? Vas blong Ol Proveb 14:​26-35 bambae i ansa long ol kwestin ya. *

Stamba Blong Fasin Ya Blong “Trastem God Fulwan”

Solomon i talem se: “Fasin fraetgud long Jeova i mekem man i trastem God fulwan. Mo man ya wetem ol pikinini blong hem bambae oli gat ples blong haed.” (Ol Proveb 14:​26, NW) Man we i fraetgud long God i mas putum tras blong hem long Jeova God we hem nomo i hae olgeta mo we i gat fasin ya blong stap tru long ol man blong hem. !Hemia nao from wanem wan man olsem, i no wari long saed blong fiuja from we hem i trastem God! Man olsem i gat wan fiuja we i longfala mo i hapi.

?Yumi save talem wanem long saed blong fiuja blong olgeta we oli putum ful tras blong olgeta long ol plan, ol ogenaesesen, ol save mo ol gudgudfala samting blong wol ya? Baebol i talem se ol samting ya we ol man ya oli putum tras blong olgeta long hem oli blong smoltaem nomo, hem i se: “Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) I stret nomo we yumi no “laekem ol fasin blong wol mo ol samting we oli stap long hem.”​—1 Jon 2:15.

?Ol papa mo mama we oli fraetgud long God oli mas mekem wanem blong meksua se ‘olgeta oli save kam olsem wan sefples blong ol pikinini blong olgeta’? Man blong raetem Ol Sam i singsing se: “Yufala ol yang fren blong mi, yufala i kam, yufala i lesin long mi. Bambae mi tijim yufala blong yufala i ona [“fraetgud,” NW ] long Hae God.” (Ol Sam 34:11) Taem ol papa mo mama oli soem gudfala eksampol mo oli tijim ol pikinini blong olgeta blong oli fraetgud long God, bambae ol pikinini ya oli kam ol man mo woman we oli trastem Jeova fulwan.​—Ol Proveb 22:6.

Solomon i gohed i se: “Fasin fraetgud long Jeova i olsem wan springwota blong laef, blong ronwe long ol trap blong ded.” (Ol Proveb 14:​27, NW ) Fasin blong fraetgud long Jeova i olsem “wan springwota blong laef” from we Jeova i olsem “springwota, we i save givim laef.” (Jeremaea 2:13) Yumi save kasem laef we i no save finis sipos yumi savegud Jeova mo Jisas Kraes. (Jon 17:3) Fasin blong fraetgud long God i save lukaotgud long yumi blong yumi no kasem wan trabol we i save mekem yumi ded. ?Olsem wanem fasin ya i lukaotgud long yumi? Ol Proveb 13:14 i talem se: “Ol samting ya  we waes man i stap tijim ol man long hem, hem i olsem springwota blong laef. Springwota ya i save sevem man we i stap long rod blong ded.” Sipos yumi fraetgud long Jeova, yumi obei long ol loa blong hem mo yumi letem Tok blong hem i lidim yumi, samting ya i blokem yumi blong no kasem trabol we i kamaot from ol rabis fasin blong laef no olkaen filing we oli stap lidim man blong i ded bifo we hem i kam olfala.

‘Wan King we i gat haenem’

Taem King Solomon i stap rul, oltaem hem i fraetgud long Jeova mo i obei long Hem. From samting ya rul blong hem i gud. ?Wanem samting i soemaot se wan King i rul gud? Ol Proveb 14:28 i ansa se: “King i gat hae nem from we hem i stap rul long plante man, be king we i stap rul long fiu man nomo, hem i olsem nating nomo.” Yumi luksave se wan king i rul gud hemia long namba blong ol man we hem i rul long olgeta. Sipos wan bigfala namba blong ol man oli wantem blong stap aninit long rul blong hem, samting ya i soem se rul blong king ya i gud. King Solomon “i king long olgeta ples, i stat long solwota narasaed [Red Si], i go kasem solwota narasaed [Mediterenian Si], i stat long Yufretes Reva, i go kasem en blong wol.” (Ol Sam 72:​6-8) Man i luksave rul blong King Solomon from neson ya we hem i rul long hem i gat pis mo i harem gud long plante samting. (1 King 4:​24, 25) Rul blong King Solomon i nambawan. Defren olgeta, taem i no gat plante man we oli wantem stap aninit long rul blong wan King, samting ya i givim sem long king ya.

?Yumi save talem wanem long saed blong paoa blong Bigfala Solomon, hemia Mesaea King Jisas Kraes? Tingbaot hamas man we oli biaen long hem tede. Raon long wol, bitim sikis milian man mo woman we oli fraetgud long God oli jusum blong stap aninit long rul blong Kraes. Oli soemaot bilif blong olgeta long Jisas mo oli joen long trufala wosip blong God ya we i laef i stap. (Jon 14:1) Long en blong wan Taosen Yia Rul, olgeta man we God i tingbaot olgeta bambae oli laef bakegen long ded. Wol ya we bambae i kam wan paradaes, bambae i fulap gud long ol man we oli glad mo oli stretgud mo we oli soemaot se oli laekem king blong olgeta. !Hemia i pruvum se Kraes i rili wan gudfala rula! Yumi mas holemstrong long nambawan hop ya blong yumi long saed blong Kingdom.

Ol Blesing Long Saed Blong Spirit Mo Bodi

Fasin ya blong fraetgud long God from we yumi ona bigwan long hem, i save mekem se hat mo tingting blong yumi i kwaet. Hemia from we sam long ol nambawan fasin we i kamaot long waes hemia fasin blong skelemgud ol samting mo fasin luksave. Ol Proveb 14:29 i talem se: “Man we i no save kros kwik, hem i waes we i waes, be man we i stap faerap kwiktaem nomo, hem i soemaot we hem i no gat hed nating.” Fasin luksave i halpem yumi blong luksave se fasin ya blong faerap from kros i save spolem yumi long saed blong spirit. Ol fasin olsem ‘kam enemi, faet, jalus, kros, rao oltaem’ oli stap long lis blong ol fasin we oli save blokem yumi blong “go insaed long niufala wol ya we God i king long hem.” (Galesia 5:​19-21) Yumi kasem advaes blong agensem fasin ya blong kros, nating sipos yumi kros from wan risen we i stret. (Efesas 4:​26, 27) Mo taem wan man i no gat longfala tingting, samting ya i save lidim hem blong talem ol rabis tok mo blong mekem sam fasin we biaen hem i sore from.

King blong Isrel i tokbaot trabol we i kamaot long bodi blong man taem man i kros i se: “Sipos tingting blong man i stap kwaet oltaem, hemia bambae i mekem bodi blong hem i stap gud. Be jalus i olsem sik ya kansa we i save spolem bodi blong man.” (Ol Proveb 14:30) Fasin blong kros bigwan mo faerap long kros i save mekem man i gat trabol ya blong pulum gud win, blad presa i go antap, leva i no wokgud, mo i save spolem pankreas [konkon leva]. Ol dokta oli talem tu se fasin ya i save givim ol sik ya, no mekem ol sik ya i kam mowas, olsem sotwin, skin i skras, bel i no tantanem gud kakae, ol soa insaed long bel. Defren olgeta, “wan hat we i stap long pis, i givim laef long bodi.” (Ol Proveb 14:​30, New International Version) Yumi waes taem yumi “strong blong folem ol fasin we i save mekem pis, mo we i save givhan long yumi, blong leftemap yumi.”​—Rom 14:19.

Fraetgud Long God i Halpem Yumi Blong Mekem i Sem Mak Long Evri man

Solomon i talem se: “Man we i stap mekem i nogud long ol puaman, hem i stap mekem i nogud long Hae God we i mekem olgeta. Be taem we man i stap kaengud long ol puaman, hemia i olsem we hem i stap mekem wosip long Hae God.” (Ol Proveb 14:31) Wan man we i fraetgud long God i luksave se Jeova God  i wokem olgeta man. From samting ya, wan puaman i wan man olsem eni narafala man mo fasin we man i mekem long puaman ya i olsem we hem i mekem long Jeova stret. Blong presem God, yumi mas mekem i stret mo i sem mak long evri man. Ol Kristin we oli pua oli mas kasem semfala kea long saed blong spirit olsem olgeta we oli rij. Yumi mas karem gud nius blong Kingdom blong God i go long ol puaman mo long olgeta we oli rij tu.

Waes King Solomon i tokbaot narafala gudfala frut we i kamaot taem man i fraetgud long God i se: “Ol man nogud oli stap foldaon from ol samting nogud we oli stap mekem, be ol gudfala man, nating we ded i kam, be tingting blong olgeta i no save foldaon.” (Ol Proveb 14:32) ?Olsem wanem ol man nogud oli stap foldaon? Sam man blong stadi long Baebol oli talem se tok ya i minim se nogud man ya i mestem eni janis blong haremgud bakegen taem hem i kasem trabol. Be defren olgeta long wan man we i fraetgud long God. Man olsem i stap sef taem trabol i kam from fasin blong hem blong holemstrong long God. Man ya i putum ful tras blong hem long Jeova nating se maet hem i mas ded, mo i soemaot strong tingting olsem Job we i talem se: “!Go kasem taem we mi mi ded, bambae mi no save lego fasin blong mi blong holemstrong long God!”​—Job 27:​5, NW.

Blong holemstrong long God oltaem, man i mas fraetgud long God mo kam waes. ?Weples man i save faenem waes? Ol Proveb 14:33 (NW ) i ansa se: “Man we i gat hed, hat blong hem i fulap long waes, mo long medel blong ol krangke man, waes ya i kam klia.” Yes, waes i stap long hat blong wan man we i gat hed. ?Olsem wanem waes ya i kam klia long medel blong ol krangke man? Wan buk i talem se “wan krangke man i wantem tumas blong soem se hem i waes, hem i talem ol tok blong soem se hem i waes be ol samting ya oli krangke nomo.”

“Leftemap Laef Blong Kantri i Kam Antap”

Traem tingbaot olsem wanem wan man we i fraetgud long God i save gat paoa long wan ful kantri. King blong Isrel i talem se: “Stret fasin i stap leftemap laef blong kantri i kam antap, be sin i stap mekem ol man blong kantri oli sem.” (Ol Proveb 14:34) !Tok ya i tru nomo taem yumi tingbaot kantri blong Isrel bifo! Ol man Isrel oli winim plante kantri raonabaot long olgeta from we oli folem ol rul blong God. Be, from we ol man Isrel oli no moa gohed blong obei long Jeova, ale Jeova i sakemaot olgeta fulwan mo samting ya i mekem oli sem. Toktok ya i stret tu long ol man blong Jeova tede. Kristin kongregesen i defren long wol from we hem i folem ol stret rul blong God. Blong mekem kongregesen i stap strong yumi wanwan i mas gat wan fasin blong laef we i klin. Fasin blong mekem sin i karem sem long yumi nomo, long kongregesen, mo long God tu.

King Solomon i tokbaot samting we i mekem wan king i glad i se: “King i stap glad long ol haeman blong hem we oli gat save, mo we oli stap wok gud, be olgeta we oli stap mekem hem i sem, hem i stap panisim olgeta.” (Ol Proveb 14:35) Mo Ol Proveb 16:13 i talem se: “Fasin blong king, hem i wantem harem ol trutok nomo, mo oltaem hem i glad long olgeta we oli stap talemaot ol samting we i stret.” Yes, Lida mo King blong yumi Jisas Kraes, i glad taem yumi mekem ol samting we oli stret mo we hat blong yumi i pusum yumi blong mekem. Hem i glad tu taem yumi yusum maot blong yumi blong mekem wok blong talemaot gud nius blong Kingdom mo tijim man. I gud yumi gohed blong stap bisi long ol wok ya mo blong haremgud long ol blesing we yumi kasem from fasin blong yumi blong fraetgud long trufala God.

[Futnot]

[Tok blong pija long pej 15]

Man i save lanem fasin ya blong fraetgud long God