Gohed Blong Wokbaot Folem Jisas

“Sipos wan man i stap talem se laef blong hem i stap joen gud long laef blong God, fasin blong hem i mas stret gud wetem fasin blong [“hem i mas wokbaot folem,” NW ] Jisas Kraes.”​—1 JON 2:6.

1, 2. ?Man we i lukluk i go long Jisas, i traehad blong mekem wanem?

 APOSOL POL i raetem se: “Yumi mas mekem tingting blong yumi i strong, blong yumi resis long rod ya we i stap long fes blong yumi. Mo oltaem yumi mas [“lukluk i go stret,” NW ] long Jisas we hem nomo i stamba blong bilif blong yumi, i stat long stat blong hem gogo i kasem en blong hem.” (Hibrus 12:​1, 2) Blong holemtaet bilif, yumi mas lukluk i go long Jisas Kraes nomo.

² Long Grik haf blong Baebol, tok ya we long Bislama yumi tanem i kam “lukluk i go stret,” i minim we “man i putum tingting mo ae blong hem long wan samting mo i no letem nara samting i pulumaot hem long samting ya,” no i “tanem hed blong hem i gowe long wan samting blong lukluk i go long narafala samting,” no i “putum tingting blong hem i stap strong long wanem we hem i luk.” Wan buk i talem se: “Taem wan man Gris i joen long wan resis long bigfala stad, hem i no mas lukluk i gowe long rod we hem i stap resis long hem mo long mak ya tu we hem i mas kasem. Sipos tingting blong hem i stap long ol man we oli stap wajem resis ya, samting ya i save mekem we hem i lusum spid blong hem. Sem samting ya i save hapen long wan Kristin.” Ol samting raonabaot long yumi oli save pulum tingting blong yumi mo blokem yumi blong gru long saed blong spirit. Yumi mas lukluk i go stret long Jisas Kraes nomo. ?Be taem yumi stap lukluk i go long Jisas we i stamba blong bilif blong yumi, yumi wantem luk wanem? Grik tok ya we oli tanem i kam “stamba” i minim “bigfala lida, man we i lidim narafala long evri samting mo i soem eksampol blong man i folem.” Taswe, man we i lukluk i go long Jisas, hem i traehad tu blong folem eksampol blong hem.

3, 4. (a) ?Sipos yumi wokbaot folem Jisas Kraes, yumi mekem wanem? (b) ?Wanem sam kwestin we yumi mas tingbaot?

³ Baebol i talem se: “Sipos wan man i stap talem se laef blong hem i stap joen gud long laef blong God, fasin blong hem i mas stret gud wetem fasin blong [“hem i mas wokbaot folem,” NW ] Jisas Kraes.” (1 Jon 2:6) Yumi save mekem we yumi joengud wetem God, taem yumi folem ol tok blong Jisas olsem we hem i folem ol tok blong Papa blong hem.​—Jon 5:10.

⁴ Taswe, sipos yumi wokbaot folem Jisas, i min se yumi lukluk i go long hem olsem Bigfala Lida blong yumi mo yumi folemgud eksampol blong hem. Ol impoten kwestin we yumi mas tingbaot long saed ya hemia: ?Olsem wanem Jisas Kraes i lidim yumi tede? ?Laef blong yumi i mas olsem wanem sipos yumi wokbaot folem hem? ?Wanem ol blesing we yumi save kasem sipos yumi folem eksampol blong Jisas Kraes?

?Jisas i Lidim Ol Man Blong Hem Olsem Wanem?

5. ?Bifo we Jisas i go long heven, hem i mekem wanem promes long ol man blong hem?

⁵ Jisas Kraes i laef bakegen long ded, nao bifo we hem i go antap long heven, hem i  kamtru long ol disaepol blong hem mo i givim wan impoten wok long olgeta. Hem i se: “Yufala i mas go long ol man long olgeta ples long wol, blong pulum olgeta oli kam man blong mi.” Mo long taem ya, Jisas, we i bigfala Lida blong yumi, i mekem promes tu se bambae hem i stap wetem olgeta, taem oli mekem wok ya, hem i se: “Yufala i mas save se mi bambae mi stap wetem yufala oltaem, gogo wol ya i finis.” (Matiu 28:​19, 20) ?Olsem wanem Jisas Kraes i stap wetem ol man blong hem long taem ya we i klosap en blong wol?

6, 7. ?Olsem wanem Jisas i yusum tabu spirit blong lidim yumi tede?

⁶ Jisas i talem se: ‘Spirit ya blong givhan, we hem i tabu spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.’ (Jon 14:26) Tabu spirit we Jeova i sanem long nem blong Jisas, i lidim yumi mo i givim paoa long yumi tede. Hem i givim save blong God long yumi mo i halpem yumi blong kasem save ol “tingting blong God we man i no save faenemaot.” (1 Korin 2:10) Mo tu, ol gudfala fasin ya hemia “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem,” hemia ol “frut blong spirit.” (Galesia 5:​22, 23, NW ) Tabu spirit i save halpem yumi blong wokem ol fasin ya.

⁷ Taem yumi stadi long Baebol mo yumi traem wokem wanem we yumi lanem, tabu spirit blong Jeova i halpem yumi blong gru long waes, fasin luksave, dip save, save, fasin blong skelem ol samting, mo fasin blong tingtinggud. (Ol Proveb 2:​1-11) Mo tu, tabu spirit i halpem yumi blong stanap strong taem yumi kasem ol traem. (1 Korin 10:13; 2 Korin 4:7; Filipae 4:13) Olgeta Kristin oli mas folem advaes ya blong ‘traehad blong mekem fasin blong olgeta i klin, i tabu, from we oli stap ona gud long God, mo oli man blong hem nomo.” (2 Korin 7:1) Sipos tabu spirit i no halpem yumi, yumi no save kasem mak we God i putum blong stap tabu, no klin. Jeova God i givim raet long Pikinini blong hem, Jisas, blong yusum tabu spirit blong lidim yumi tede.​—Matiu 28:18.

8, 9. ?Olsem wanem Jisas i yusum “slef ya we i stret mo waes” blong lidim yumi?

⁸ I gat wan narafala samting we Kraes i yusum blong lidim kongregesen tede. Taem Jisas i tokbaot taem we bambae hem i kam king mo klosap rabis fasin blong wol ya i finis, hem i talem se: “?Hu ya i rili slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem? Sipos masta blong hem i kamtru i faenem se hem i stap mekem wok ya, slef ya i save harem gud. Tru ya, Masta bambae i putumap hem blong lukaot long olgeta samting blong hem.”​—Matiu 24:​3, 45-47, NW.

⁹ “Masta” ya hemia Jisas Kraes. “Slef” ya hem i grup blong ol tabu Kristin we oli stap yet long wol. Jisas i putum wok long han blong slef ya, blong i lukaot long ol bisnes blong hem long wol ya, mo i givim kakae blong spirit long stret taem. Wan smol grup blong brata we oli blong “slef ya we i stret mo waes,” oli mekemap Hed Kampani. Olgeta ya oli wok long nem blong slef ya. Oli lidim wok blong talemaot Kingdom long fulwol mo oli givim kakae long saed blong spirit we ol man blong God oli nidim long stret taem blong hem. Yes, Kraes i stap lidim kongregesen tru long “slef ya we i stret mo waes” mo Hed Kampani.

10. ?Yumi mas tingting wanem long saed blong ol elda, mo from wanem?

¹⁰ Wan narafala samting we i soemaot se Jisas Kraes i stap lidim ol man blong hem, hemia ol Kristin elda we hem i givim olsem ‘presen i go nomo long ol man.’ Kraes i givim ol man ya blong “olgeta man blong hem bambae oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.” (Efesas 4:​8, 11, 12) Hibrus 13:7 (NW ) i tokbaot olgeta i se: “Bambae yufala i mas tingbaot ol man ya we oli stap lidim yufala, we oli stap talemaot Tok blong God long yufala. Yufala i mas stap lukluk fasin blong olgeta, we laef blong olgeta i olsem wanem, mo i karem wanem kaen frut. Nao yufala i mas biaenem olgeta, long fasin blong bilif blong olgeta.” Ol elda oli soem eksampol long kongregesen. From we olgeta ya oli folem Jisas Kraes, i stret nomo we yumi folem fasin blong bilif blong olgeta. (1 Korin 11:1) Yumi save soem tangkiu from plan ya we i blong givhan long yumi, taem yumi obei mo ona long ol man ya we oli olsem presen.​—Hibrus 13:17.

11. ?Tede, Kraes i stap lidim ol man blong hem olsem wanem? ?Mo yumi mas mekem wanem blong wokbaot folem eksampol blong hem?

¹¹ Yes, Jisas Kraes i lidim ol man blong hem tede  tru long tabu spirit, “slef ya we i stret mo waes,” mo ol elda long kongregesen. Blong wokbaot folem Kraes, yumi mas kasem save long fasin blong hem blong lidim yumi, mo yumi mas letem hem i lidim yumi. I minim tu se yumi tekem ol fasin olsem hem. Aposol Pita i raetem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) ?Laef blong yumi i mas olsem wanem sipos yumi folem nambawan eksampol we Jisas i soemaot?

No Mekem i Strong Tumas Long Man We Yu Gat Paoa Antap Long Hem

12. ?Wanem wan fasin blong Jisas we ol elda long kongregesen oli mas intres moa long hem?

¹² Nating se God i givim bigfala paoa long Jisas, Jisas i no mekem i strong tumas long narafala. Evriwan insaed long kongregesen​—antap moa ol elda—​oli mas “soemaot long olgeta man, we [oli] kwaet man.” (Filipae 4:5; 1 Timoti 3:​2, 3) From we ol elda oli kasem paoa blong lukaot ol wok insaed long kongregesen, i impoten tumas we oli folem fasin blong Jisas taem oli yusum paoa ya.

13, 14. ?Olsem wanem ol elda oli save folem fasin blong Kraes taem oli wantem pulum ol memba blong kongregesen blong mekem wok blong God?

¹³ Jisas i tingbaot wanem samting we ol disaepol blong hem oli no save mekem. Hem i no askem olgeta blong mekem moa i bitim wanem we oli naf blong mekem. (Jon 16:12) Jisas i no fosem olgeta, be hem i pulum tingting blong olgeta blong oli wantem “traehad” long wok blong God. (Luk 13:24) Blong mekem olsem, hem i soem eksampol mo i tajem hat blong olgeta. Long sem fasin, ol Kristin elda tede oli no yusum ol tok we oli mekem man i fraet mo i sem, blong pulum olgeta blong mekem wok blong God. Defren olgeta, oli leftemap tingting blong olgeta blong mekem wok blong Jeova from we oli lavem hem wetem Jisas, mo from we oli lavem tu ol man raonabaot long olgeta.​—Matiu 22:​37-39.

¹⁴ Jisas i no yusum hae posisen blong hem blong bos long laef blong ol man. Hem i no stanemap sam mak we oli hae tumas blong kasem mo hem i no mekem plante smosmol rul blong folem. Nogat. Hem i pulum ol man blong wantem mekem wok, taem hem i mekem oli tingbaot wanem gudfala fasin i stap biaen long ol wanwan loa blong Moses. (Matiu 5:​27, 28) Sipos ol elda oli folem fasin blong Jisas Kraes, bambae oli no stanemap ol strong rul mo bambae oli no strong blong leftemap tingting blong olgeta wan se i moagud. Taem ol elda oli mas givim advaes long saed blong klos, hea no pleplei, oli traem yusum ol stamba rul blong Baebol blong tajem hat blong ol brata sista. Sam long ol stamba rul ya i stap long Maeka 6:8; 1 Korin 10:​31-33; mo 1 Timoti 2:​9, 10.

Gat Sore Mo Fogivim Narafala

15. ?Jisas i mekem wanem taem ol disaepol blong hem oli mestem?

¹⁵ Kraes i soem eksampol we yumi save folem, taem ol disaepol blong hem oli mekem mastik. I gud yumi tingbaot tu samting we oli hapen long laswan naet we Jisas i stap long wol ya. Afta we hem i kamtru long Getsemane, hem i “tekem Pita mo Jemes mo Jon, trifala i go wetem hem,” mo i talem long olgeta se oli “mas waj.” Nao “hem i wokbaot smol moa i go, mo i foldaon long graon blong i prea.” Taem hem i kambak, hem “i luk we trifala i slip finis.” ?Jisas i mekem wanem? Hem i talem se: “Tru, tingting blong yufala i strong be bodi blong yufala i slak.” (Mak 14:​32-38) !Jisas i no tok strong long Pita, Jemes mo Jon, be hem i soem sore! Long semfala naet ya nomo, Pita i talem tri taem se hem i no save Jisas. (Mak 14:​66-72) ?Jisas i mekem wanem long Pita? Afta we hem ‘i laef bakegen, Saemon [Pita] i luk hem’ fastaem. (Luk 24:34) Baebol i talem se: “Hem i kamtru long Pita, mo biaen, hem i kamtru long ol twelef man blong hem.” (1 Korin  15:5) Jisas i no kros. Hem i fogivim mo leftemap tingting blong Pita we i tanem tingting from rong blong hem. Biaen, Jisas i putum bigfala wok long han blong Pita.​—Ol Wok 2:14; 8:​14-17; 10:​44, 45.

16. ?Olsem wanem yumi save wokbaot folem Jisas taem wan Kristin brata no sista i mekem yumi harem nogud?

¹⁶ Yumi ol sinman, samtaem yumi save mekem tingting blong narafala i foldaon no mekem i nogud long narafala long sam samting. Sipos wan Kristin brata no sista i mekem olsem long yumi, ating i stret we yumi soem sore mo yumi rere blong fogif olsem Jisas. Pita i talem long ol Kristin brata blong hem se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon. Sipos man i mekem i nogud long yufala, bambae yufala i no givimbak long hem bakegen. Taem man i tok nogud long yufala, bambae yufala i no tok nogud long hem bakegen. Yufala i mas askem long God blong hem i mekem i gud long ol man olsem.” (1 Pita 3:​8, 9) ?Olsem wanem sipos narafala i no mekem long yumi olsem Jisas i mekem, maet i no sore mo i no wantem fogif? Long taem ya tu, yumi mas traem bes blong yumi blong folem fasin blong Jisas mo mekem olsem we hem bambae i mekem sipos i stap long ples blong yumi.​—1 Jon 3:16.

Putum Ol Wok Blong Kingdom Long Fasples

17. ?Wanem i soem se Jisas i putum wok blong God long fasples?

¹⁷ I gat wan narafala rod bakegen blong wokbaot folem Jisas Kraes. Wok blong talemaot gud nius blong Kingdom blong God, hem i nambawan wok long laef blong Jisas. Afta we hem i prij long wan woman Sameria klosap long taon blong Saeka, hem i talem long ol disaepol blong hem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Wok blong Papa blong hem i wan samting we i givim paoa long hem olsem we kakae i givim paoa long bodi, i mekem man i harem gud mo i strong. Yu tu yu save gat wan laef we i hapi mo i gat mining, sipos yu folem Jisas mo yu putum ol wok blong God olsem faswan samting long laef blong yu.

18. ?Wanem blesing i kamaot from we samfala oli pulum pikinini blong olgeta blong tingbaot wok blong Jeova?

¹⁸ Taem ol papa mama oli leftemap tingting blong ol pikinini blong olgeta blong mekem wok blong Jeova fultaem, olgeta wetem ol pikinini blong olgeta oli save kasem plante blesing. Wan papa we i gat tu boe we tufala i twin, i leftemap tingting blong tufala taem tufala i pikinini yet, blong tufala i tingbaot wok blong paenia. Afta we tufala twin ya i finis long sekendri skul, tufala i mekem wok blong paenia. Papa ya i tokbaot glad we hem i kasem from desisen blong tufala boe ya, hem i raetem se: “Mitufala i neva sem long fasin blong tufala boe blong mitufala. Mitufala i glad tumas blong talem se, ‘ol pikinini ya oli rili wan presen we Jeova i givim.’ ” (Ol Sam 127:3) ?Olsem wanem wok blong Jeova fultaem i save mekem i gud long ol pikinini? Wan mama we i gat faef pikinini i talem se: “Wok blong paenia i halpem ol pikinini blong mi blong oli frengud wetem Jeova. Wok ya i mekem tu se oli kamgud moa long fasin blong stadi Baebol olgeta wan, mo i halpem olgeta blong lanem olsem wanem oli save yusum taem blong olgeta long waes fasin. Mo i halpem olgeta tu blong oli lanem blong putum ol wok blong spirit long fasples long laef blong olgeta. I tru se blong mekem wok ya, oli mas mekem sam jenis long laef blong olgeta, be i no gat wan long olgeta faef ya we i sore long desisen ya we oli tekem.”

19. ?Wanem plan blong fiuja we i waes blong ol yangfala oli tingbaot?

¹⁹ ?Ol yangfala, wanem plan blong yufala long saed blong fiuja? ?Yu yu wantem gat wan gudfala  wok long wol ya? ?No yu yu putum mak blong joen long wok blong Jeova fultaem? Pol i givim advaes ya se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa.” Mo hem i talem tu se: “Bambae yufala i no krangke. Yufala i mas traem save olgeta samting we Masta blong yumi i wantem blong yufala i mekem.”​—Efesas 5:​15-17.

Stap Tru

20, 21. ?Long wanem fasin Jisas i stap tru, mo olsem wanem yumi save folem fasin blong hem blong stap tru?

²⁰ Sipos yumi wokbaot folem Jisas, bambae yumi folem fasin blong hem blong stap tru. Baebol i tokbaot fasin ya blong Jisas i se: “Fastaem, bifo olgeta, hem i olsem God nomo, be hem i no ting se hem i mas [“traehad blong kam,” futnot] sem mak wetem God. Hem nomo i lego olgeta fasin ya, nao i kam olsem man blong wok nomo. Hem i bon long wol ya, i kam man. Hem i karem fasin blong man, mo i mekem tingting blong hem i stap daon blong i obei long God gogo i ded. Mo hem i ded long fasin ya we ol man oli nilim hem long [“pos,” NW ].” Jisas i stap tru long Jeova taswe hem i rere blong mekem samting we God i wantem, mo long rod ya hem i sapotem hae rul blong God. Jisas i obei fulwan long God gogo kasem we hem i safa mo i ded long pos. I gud sipos ‘tingting blong yumi i kam stret gud wetem tingting blong Jisas Kraes,’ mo yumi stap tru long God mo yumi rere oltaem blong mekem wok blong Hem.​—Filipae 2:​5-8.

²¹ Mo tu, Jisas i stap tru long ol gudfala aposol blong hem. Nating se oli gat sam slak fasin mo oli mestem plante taem, Jisas i lavem olgeta “olwe.” (Jon 13:1) Long sem fasin, yumi no mas letem ol slak fasin blong ol Kristin brata blong yumi i mekem we yumi stat tingting nogud long evri samting we oli stap mekem.

Wokbaot Oltaem Folem Jisas

22, 23. ?Wanem ol blesing we oli kamaot taem yumi folem eksampol we Jisas i soem?

²² From we yumi sinman, taem yumi wokbaot folem Jisas, yumi no naf blong putum leg blong yumi stret long mak blong leg blong Jisas. Be yumi save traem bes blong yumi blong wokbaot folem hem. Blong mekem olsem, yumi mas kasem save long fasin blong Kraes blong lidim yumi, letem hem i lidim yumi, mo fas strong long rod we hem i soemaot.

²³ Taem yumi folem eksampol blong Kraes, yumi save kasem plante blesing. Laef blong yumi i gat mining mo yumi hapi from we tingting blong yumi i stap long wok blong God, i no long ol prapa bisnes blong yumi nomo. (Jon 5:30; 6:38) Tingting blong yumi i no stikim yumi. Fasin blong laef blong yumi i kam olsem wan eksampol long ol narafala tu. Jisas i singaot evriwan we oli stap karem ol hevi samting mo we oli stap hadwok tumas, se oli kam long hem nao bambae hem i mekem we oli spel gud. (Matiu 11:​28-30) Taem yumi folem eksampol blong Jisas, yumi save mekem ol narafala we oli kampani wetem yumi oli harem gud. Taswe, i gud yumi gohed blong wokbaot olsem we Jisas i wokbaot.

?Yu Yu Tingbaot?

• ?Olsem wanem Kraes i lidim ol man blong hem tede?

• ?Olsem wanem ol elda oli save folem fasin blong Jisas taem oli holem wok ya we God i putum long han blong olgeta?

• ?Olsem wanem yumi save folem eksampol blong Jisas taem narafala i mekem yumi harem nogud?

• ?Olsem wanem ol yangfala oli save putum ol wok blong Kingdom long fasples?

[Kwestin]

[Tok blong pija long pej 23]

Ol Kristin elda oli halpem yumi blong folem Kraes olsem Lida blong yumi

[Tok blong pija long pej 24]

?Ol yangfala, wanem ol plan we yufala i stap mekem blong gat wan Kristin laef we i karem frut?