?Hem i God No Man?

“MI NAO, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12) Ol tok ya oli kamaot long Jisas Kraes. Long faswan handred yia, wan man we i gat bigfala save i talem long saed blong Jisas se: “God i haedem ol gudgudfala samting blong waes mo save blong hem long Kraes, mo long Kraes nomo, man i save faenem ol samting ya.” (Kolosi 2:3) Mo Baebol i talem tu se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Blong kasem ol samting we yumi nidim long saed blong spirit, i impoten we yumi gat stret save long saed blong Jisas.

Plante man long wol oli save long saed blong Jisas. Tru long histri, hem i gat bigfala paoa long laef blong ol man. Blong talem stret, ol kalenda we bighaf blong ol man long wol oli yusum, oli kaontem taem i stat long yia we ol man oli ting se Jisas i bon long hem. Wan buk (The World Book Encyclopedia) i eksplenem se: “Long saed blong ol yia bifo we Jisas Kraes i bon, oli raetem se B.C., no bifo Kraes. Long saed blong ol yia afta long taem ya oli raetem se A.D., no anno Domini (long yia blong Masta blong yumi).”

Be plante man oli konfius yet long saed blong Jisas se hem i hu. Long tingting blong sam man, Jisas i wan spesel man nomo we i pulum tingting blong ol man long ol yia we oli pas. Be sam narafala oli wosipim hem olsem we hem i God ya we i Hae Olgeta. Sam man long skul Hindu, oli talem se Jisas Kraes i sem mak long god ya blong ol man Hindu, nem blong hem Krishna. Oli bilif se hem i wan god we i laef long wol. ?Olsem wanem? ?Jisas i wan man nomo, no hem i wan god we yumi mas wosip long hem? ?Hem i hu stret? ?Hem i kamaot long weples? ?Wanem ol fasin blong hem? ?Mo tede hem i stap long weples? Long haf we i kam biaen, bambae yumi luk se buk we i tokbaot Jisas plante, i givim ol trufala ansa long ol kwestin ya.