?Jisas Kraes Hem i Hu?

!TINGBAOT olsem wanem wan yangfala man Jiu we nem blong hem Andru, i glad tumas long faswan taem we hem i lesin long ol tok blong Jisas blong Nasaret! Baebol i tokbaot se, wantaem nomo Andru i go luk brata blong hem, mo i talem long hem se: “Ei, mifala i faenem Mesaea [we i minim Kraes] finis.” (Jon 1:41) Long Hibru mo Grik lanwis, tok we yumi tanem i kam “Mesaea” mo “Kraes,” i minim “Man we God i Makemaot.” Jisas nao i Man ya we God i Makemaot, no Man we God i Jusumaot​—Lida ya we Baebol i promes se bambae i kam. (Aesea 55:4) I gat plante profet tok long Baebol we oli tokbaot Mesaea, mo ol man Jiu we oli laef long taem bifo oli wet blong luk hu nao Mesaea ya.​—Luk 3:15.

?Olsem wanem yumi save se Jisas nao hem i Man ya we God i Jusumaot? Bambae yumi tokbaot wanem samting i bin hapen long yia 29 K.T. taem Jisas i gat 30 yia blong hem. Hem i go luk Jon Baptaes long Jodan Reva blong Jon i baptaesem hem. Baebol i talem se: “Taem Jon i baptaesem Jisas finis, Jisas i kamaot long wota, nao wantaem nomo skae i open long hem, mo hem i luk Spirit blong God i stap kamdaon olsem wan sotleg, i kam sidaon long hem. Nao God i tok i talem se, ‘Hemia pikinini blong mi, we mi lavem hem tumas. Mi mi glad tumas long hem.’ ” (Matiu 3:​16, 17) Taem Jon i harem ol tok ya we i soemaot se God i agri long Jisas, hem i mas sua se Jisas nao i Man ya we God i Jusumaot. Taem Jeova God i kafsaedem tabu spirit blong hem long Jisas, Hem i makemaot Jisas, no i jusumaot hem, blong i kam King long Kingdom blong Hem long fiuja. Taswe, Jisas i kam Kraes, no Hemia we God i Makemaot. ?Be from wanem oli singaot Jisas se Pikinini blong God? ?Jisas i kamaot long weples?

Laef Blong Hem i Stat “Bifo We Bifo Olgeta”

Yumi save seraotem laef blong Jisas long tri haf. Faswan haf i stat longtaem bifo, taem hem i no bon long wol yet. Maeka 5:2 (NW ) i talem se laef blong hem i stat “longtaem bifo, bifo we bifo olgeta.” Mo Jisas i talem klia se: “Mi mi aot long ples ya antap”​—hemia heven. (Jon 8:23) Fastaem, hem i laef long heven olsem wan spirit man we i gat bigfala paoa.

Evri samting oli stat taem God i wokem olgeta, taswe bifo long taem ya God i stap hem wan nomo. Ale, God i stat blong wokem ol samting. ?Hu ya faswan man we hem i wokem? Laswan buk blong Baebol i tokbaot Jisas se hem i “faswan long olgeta samting we God i wokem.” (Revelesen 3:​14, NW ) Yes, Jisas i “fasbon long olgeta samting we God i mekem.” Hemia from we, taem “God i wokem olgeta narafala samting long heven mo long wol, olgeta samting we yumi save luk mo olgeta samting we yumi no save luk, . . . God i wokem olgeta tru long hem [Jisas], mo oli blong hem tu.” (Kolosi 1:​15, 16, NW ) Yes, Jisas nomo we God hem wan i wokem. Taswe, hem i karem nem ya se ‘stret Pikinini blong God,’ wan nomo we hem i gat. (Jon 3:16) Fasbon Pikinini ya i karem nem ya tu se “Tok.” (Jon 1:14) ?From wanem? From we wok blong Jisas long heven, bifo we hem i kamdaon long wol ya, hemia blong talemaot ol tok we God i givim long hem.

“Bifo we bifo olgeta, . . . ‘Tok blong God’ ” i stap wetem Jeova God taem “God i mekem skae mo graon.” Hem nao we God i toktok long hem, i se: “I gud yumi mekem man, mo i gud yumi mekem we hem i tekem fasin blong yumi.” (Jon 1:1; Jenesis 1:​1, 26) Fasbon Pikinini blong Jeova i stap klosap long Papa blong hem, i wok wetem hem. Ol Proveb 8:​22-31 i talemaot tok blong hem se: “Mi stap stanap long saed blong hem [God ya we i Wokem olgeta samting], [“mi olsem nambawan man blong wok blong hem,” NW ]. Evri dei, mi stap mekem hem i glad, mo oltaem nomo, mi harem gud blong stap wetem hem.”

 !Taem Jeova God mo Pikinini blong hem tufala i stap wok tugeta, tufala i mas fren gud mo save gud tufala! Fasin joen we Pikinini blong God i gat wetem Jeova blong plante plante taosen yia we tufala i stap tugeta, i gat bigfala paoa long laef blong Jisas. Pikinini ya we i gat fasin obei, i karem gud ol fasin blong Papa blong hem, Jeova. Kolosi 1:15 (NTB) i talem se Jisas i “pija blong God ya we yumi no save luk.” Taswe, sipos yumi wantem kasem ol samting we yumi nidim long saed blong spirit mo sipos yumi wantem kasem save long God, i impoten tumas we yumi kasem save long saed blong Jisas. Evri samting we Jisas i mekem taem hem i stap long wol, oli sem mak long ol samting we Jeova i wantem hem blong mekem. Taswe, taem yumi kasem save moa long Jisas, hemia i min se yumi kasem save moa long Jeova tu. (Jon 8:28; 14:​8-10) ?Be olsem wanem Jisas i kam long wol ya?

Laef Blong Hem Long Wol Ya

Namba tu haf blong laef blong Jisas i stat taem God i sanem Pikinini ya blong hem i kam long wol. Blong mekem olsem, Jeova i mekem wan merikel, nao i tekemaot laef blong Jisas long heven, i putum i go long bel blong wan yangfala gel Jiu we nem blong hem Meri. Jisas i no bon wetem sin, from we hem i no kamaot long wan papa long wol ya. Jeova i mekem wan merikel nao tabu spirit, no paoa blong hem, i kam long Meri, i “kavremap” hem, ale hem i gat bel. (Luk 1:​34, 35) Taswe Meri i bonem wan pikinini we i stretgud olgeta. Kapenta Josef i tekem Jisas i kam olsem pikinini blong hem, nao Jisas i gruap long wan famle we i no rij, mo hem i faswan long plante pikinini long famle ya.​—Aesea 7:14; Matiu 1:​22, 23; Mak 6:3.

Yumi no save plante samting long saed blong Jisas taem hem i smol, be i gat wan stori we yumi intres long hem. Taem Jisas i gat 12 yia blong hem, papa mama blong hem tufala i tekem hem i go long Jerusalem blong mekem lafet blong Pasova, olsem we oli stap mekem evri yia. Taem oli stap long taon ya, Jisas i spenem plante taem long haos tempol, “i stap sidaon long medel blong ol tija blong ol laen blong Isrel. Hem i stap lesin long tok blong olgeta, mo i stap askem kwestin long olgeta.” Mo tu, “olgeta evriwan we ol harem hem oli sapraes tumas long save blong hem, mo long ol ansa blong hem.” I tru, yangfala Jisas i save askem ol dip kwestin long saed blong spirit, be hem i save givim ol ansa tu we oli waes mo we oli mekem ol narafala oli sapraes. (Luk 2:​41-50) Taem Jisas i stap gruap long Nasaret, hem i lanem wok blong kapenta, ating Josef nao we i adoptem hem, i tijim hem long wok ya.​—Matiu 13:55.

Jisas i laef long Nasaret gogo kasem we hem i gat 30 yia blong hem. Biaen hem i go luk Jon Baptaes. Afta we Jisas i baptaes, hem i stat blong wok strong blong prij. Blong tri yia haf, hem i wokbaot long olgeta ples long kantri blong hem blong talemaot gud nius blong Kingdom blong God. Mo hem i givim pruf se God i sanem hem i kam. ?Olsem wanem hem i mekem samting ya? Hem i mekem plante merikel​—ol bigbigfala wok we ol man nomo oli no naf blong mekem.​—Matiu 4:17; Luk 19:​37, 38.

Jisas i kaen tu mo i gat dip filing long ol man. Long ol tingting we hem i gat long ol narafala mo fasin we hem i mekem long olgeta, hem i soemaot klia se hem i kaen long olgeta. From we Jisas i go storian long ol man mo i soem kaen fasin long  olgeta, ol man oli glad blong kam long hem. Ol pikinini tu oli laekem blong stap klosap long hem. (Mak 10:​13-16) Long taem blong Jisas, sam man oli ting nating long ol woman, be Jisas i soem respek long olgeta. (Jon 4:​9, 27) Hem i givhan long ol puaman mo olgeta we ol narafala oli mekem i nogud long olgeta, blong oli ‘faenem pis long laef blong olgeta.’ (Matiu 11:​28-30) Fasin blong hem blong tij i kliagud, i isi blong kasem save long hem, mo i rili givhan long laef blong ol man. Mo samting we hem i tijim, i soemaot se hem i wantem tumas we ol man oli kasem save long trufala God, Jeova.​—Jon 17:​6-8.

Jisas i gat sore long olgeta we oli sik mo we oli safa, ale hem i yusum tabu spirit blong God blong mekem merikel long olgeta, blong oli kamgud bakegen. (Matiu 15:​30, 31) Olsem nao, wan man we i gat leprosi i kam long hem mo i talem se: “Sipos yu yu wantem, yu save mekem mi mi gud bakegen.” ?Jisas i mekem wanem? Hem i stretem han blong hem, i tajem man ya, mo i talem long hem se: “Mi mi wantem. Bodi blong yu i klin.” !Nao sik man ya i kamgud bakegen!​—Matiu 8:​2-4, NTB.

Tingbaot tu, wan taem we plante man oli kam long Jisas mo oli stap tri dei wetem hem, be oli no gat kakae nating. Jisas i sore long olgeta nao hem i mekem merikel blong givim kakae long olgeta, we oli “fo taosen man, be oli no kaontem ol woman mo ol pikinini.” (Matiu 15:​32-38) Wan narafala taem, Jisas i kwaetem wan bigfala win we klosap i mekem bot we ol fren blong hem oli stap long hem, i draon. (Mak 4:​37-39) Hem i girapem ol dedman, i mekem olgeta oli laef bakegen. * (Luk 7:22; Jon 11:​43, 44) Mo tu, Jisas i glad nomo blong givim laef blong hem we i stretgud olgeta blong mekem se ol sinman oli save gat wan hop long fiuja. !Tru ya, Jisas i gat bigfala lav long ol man!

?Tede Jisas i Stap Long Weples?

Taem Jisas i gat 33 yia haf, hem i ded long wan pos. * Be ded ya i no finisim laef blong hem blong olwe. Namba tri haf blong laef blong hem i stat tri dei afta, taem Jeova God i mekem Pikinini blong hem i laef bakegen olsem wan spirit man. Afta we Jisas i laef bakegen, hem i kamtru long plante handred man. (1 Korin 15:​3-8) Biaen long hemia, hem “i go sidaon long raet saed blong God” mo i wet blong God i givim paoa long hem blong rul olsem King. (Hibrus 10:​12, 13) Taem Jisas i kasem paoa ya, hem i kam King. ?Taswe tede yumi mas tingbaot Jisas olsem wanem? ?Yumi mas tingbaot hem olsem wan man we i stap safa we klosap hem i ded? ?No yumi mas tingbaot hem olsem wan man we yumi mas wosipim? Tede, Jisas i no wan man mo hem i no God ya we i gat Olgeta Paoa tu. Hem i wan spirit man we i gat bigfala paoa, hem i wan King we i stap rul. Klosap nao, bambae hem i soemaot rul blong hem long wol ya we naoia i gat fulap trabol long hem.

Revelesen 19:​11-16 i yusum ol saen blong tokbaot Jisas Kraes. Hem i talem se Jisas i olsem wan king we i sidaon long wan waet hos, mo i stap ron i kam blong jajem ol man mo blong mekem wan faet long fasin we i stret nomo. Hem i “gat wan naef blong faet we i sap gud . . . we bambae hem i yusum blong kilim ol man blong evri kantri.” Yes, bambae Jisas i yusum bigfala paoa blong hem blong finisim ol rabis man. ?Be wanem bambae i hapen long olgeta ya we oli stap traehad blong folem eksampol blong hem taem hem i stap long wol? (1 Pita 2:21) Jisas mo Papa blong hem tufala bambae i sevem olgeta tru long “faet long bigfala Dei blong God ya we i gat olgeta paoa” we nem blong hem Amagedon. Ol man ya oli save laef blong olwe long wol, aninit long Kingdom blong God we i stap long heven.​—Revelesen 7:​9, 14; 16:​14, 16; 21:​3, 4.

!Long taem ya we Jisas i rul long pis, bambae hem i mekem plante nambawan merikel long ol man! (Aesea 9:​6, 7; 11:​1-10) Bambae hem i tekemaot sik mo ded. God bambae i yusum Jisas blong mekem plante bilian dedman oli laef bakegen, mo givim janis long olgeta blong oli laef blong olwe long wol. (Jon 5:​28, 29) Yumi no naf blong kasem save fulwan olsem wanem bambae laef blong yumi i gud tumas aninit long rul blong Kingdom ya. !Taswe, i impoten we yumi gohed blong kasem save long Baebol mo blong save gud Jisas Kraes!

[Ol Futnot]

 [Bokis blong pija long pej 7]

?JISAS I GOD YA WE I GAT OLGETA PAOA?

Plante man blong jos oli talem se Jisas hem i God. Sam narafala oli talem se God i wan Triniti. Folem tijing ya, “Papa hem i God, Pikinini hem i God, mo Tabu Spirit hem i God. Oli no tri God, be wan nomo.” Oli talem se trifala “oli no save lus samtaem mo oli sem mak.” (The Catholic Encyclopedia) ?Ol tingting ya oli stret?

Jeova God hem i Man we i Wokem olgeta samting. (Revelesen 4:11) I no gat stat blong hem, mo bambae i no gat en blong hem, mo hem i gat olgeta paoa. (Ol Sam 90:2) Be long saed blong Jisas, i gat stat blong hem. (Kolosi 1:​15, 16, NW ) Jisas i tokbaot God olsem Papa blong hem, i se: ‘Papa blong mi, hem i hae moa long mi.’ (Jon 14:28) Mo tu, Jisas i eksplenem se i gat sam samting we Papa blong hem nomo i save, be hem wetem ol enjel oli no save.​—Mak 13:32.

Antap moa, Jisas i prea long Papa blong hem se: “Yu no mekem olsem we mi mi wantem, yu mekem olsem we yu nomo yu wantem.” (Luk 22:42) ?Sipos Jisas i no stap prea long Wan we i Hae moa long hem, ale hem i stap prea long hu? Mo tu, God nao i mekem Jisas i laef bakegen long ded, be i no Jisas we i mekem hem wan i laef bakegen. (Ol Wok 2:32) I klia se, Papa mo Pikinini tufala i no sem mak bifo we Jisas i kam long wol mo taem we hem i stap long wol tu. ?Be olsem wanem taem Jisas i laef bakegen mo i go long heven? Fas Korin 11:3 i talem se: “God, hem i hed blong Kraes.” Blong talem stret, Pikinini bambae i stap oltaem aninit long God. (1 Korin 15:28) Taswe Baebol i soemaot se Jisas i no God ya we i gat Olgeta paoa. Defren olgeta, hem i Pikinini blong God.

Tabu spirit we oli talem se i namba tri man blong Triniti, hem i no wan man. Taem man blong raetem Ol Sam i prea long God, hem i talem se: “Taem yu givim win [“spirit,” NW ] blong yu long olgeta, yu mekem olgeta oli laef.” (Ol Sam 104:30) Spirit ya i no God; be hem i paoa we God i sanem no i yusum blong mekem ol samting we hem i wantem oli kamtru. God i yusum spirit ya blong wokem skae, wol, mo olgeta laef samting. (Jenesis 1:2; Ol Sam 33:6) God i yusum tabu spirit blong hem blong putum tingting blong hem i go long ol man we oli raetem Baebol. (2 Pita 1:​20, 21) Taswe, Triniti i no wan tijing we i kamaot long Baebol. * Baebol i talem se: “Hae God [Jeova] i God blong yumi, mo hem wan nomo i God.”​—Dutronome 6:4.

[Futnot]

[Tok blong pija long pej 5]

Taem Jisas i baptaes, hem i kam Man we God i Makemaot

[Tok blong pija long pej 7]

Jisas i yusum paoa blong hem blong mekem ol wok we God i givim long hem

[Tok blong pija long pej 7]

Tede, Jisas i wan King we i gat bigfala paoa