‘Jeova i Stap Givhan Long Mi’

Plante Man Oli Kam Wosipim Jeova

OL PROFET tok long Baebol oli soemaot se long taem blong yumi ol man long olgeta kantri bambae oli kam long trufala wosip blong Jeova we i hae olgeta. Eksampol, tru long profet ya Hagae, Jeova God i talem se: “Bambae mi mi mekem olgeta neson oli seksek, nao bambae ol gudgudfala samting blong olgeta neson oli mas kam insaed. Mo bambae mi mi fulumap haos ya wetem glori.” (Hagae 2:​7, NW ) Aesea mo Maeka i talemaot finis se long taem blong yumi​—“laswan haf blong ol dei”​—ol neson mo ol man bambae oli wosipim Jeova long rod we hem i wantem.​—Aesea 2:​2-4, NW; Maeka 4:​1-4, NW.

?Yu ting se ol profet tok ya oli kamtru tede? I gud yumi lukluk long ol tru samting we i stap hapen. Long ten yia we oli pas, bitim 3,110,000 niufala Witnes oli givim laef blong olgeta long Jeova long bitim 230 kantri. Yes, 6 long evri 10 Witnes blong Jeova we oli stap mekem wok blong God raon long wol tede, oli tekem baptaes long ol ten yia we oli jes pas. !Long 2004, klosap evri tu minit i gat wan niuwan i givim laef blong hem long God mo i joen long Kristin kongregesen! *

Olsem long faswan handred yia, tede tu i gat ‘plante man oli bilif mo oli biaen long Masta.’ I no bigfala namba blong man nomo we i pruvum se God i stap blesem ol man blong hem, be i tru se ol namba ya oli soemaot se “paoa blong [Jeova]” i stap wetem ol man blong hem. (Ol Wok 11:21) ?Wanem samting we i pulum plante milian man blong wosip long Jeova? ?Mo taem yu luk we plante man oli stap kam, samting ya i gat paoa long laef blong yu olsem wanem?

Ol Man We Hat Blong Olgeta i Stret Oli Stap Kam

Jisas i talem klia se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Yes, Jeova nomo i pulum ol man “we oli stret blong kasem laef blong olwe.” (Ol Wok 13:​48, NW ) Spirit blong God i save wekemap tingting blong man blong luksave ol nid we hem i gat long saed blong spirit. (Matiu 5:3) Wan man we i nidim hop, wan man we tingting blong hem i stikim hem, no wan bigfala trabol i save pulum sam man blong lukaot God mo lanem ol stamba tingting blong God.​—Mak 7:​26-30; Luk 19:​2-10.

Plante man oli stap kam wosip long Jeova from tijing blong Baebol we oli kasem long Kristin kongregesen i givhan long olgeta blong faenem ansa long ol kwestin we i mekem tingting blong olgeta i fasfas.

Wan man blong salem drag long Itali, nem blong hem Davide, i tingting oltaem long kwestin ya se: “?Sipos i gat wan God i stap, from wanem ol man oli gohed blong safa from we narafala i mekem i no stret long olgeta?” Hem i no intres tumas long ol samting long saed blong jos, taswe hem i askem kwestin ya blong agiu nomo. Hem i talem se: “Mi no ting se bambae mi mi kasem wan stret mo klia ansa, be Witnes we i toktok wetem mi i gat longfala tingting mo i yusum ol vas long Baebol blong pruvum wanem we hem i stap talem. Storian blong mitufala i tajem hat blong mi.” Naoia Davide i stretem laef blong hem mo i wosipim Jeova.

 Plante man oli kam long ogenaesesen blong Jeova long wol ya, blong faenem mining mo mak long laef. Long Kroasia, wan woman dokta we i stap tritim ol trabol we man i kasem taem tingting blong olgeta i foldaon olgeta, hem tu i harem nogud long tingting blong hem. Ale, hem i go luk wan narafala fren blong hem we i dokta, blong i givhan long hem. Be hem i sapraes taem fren ya i givim telefon namba blong ofis blong ol Witnes blong Jeova long Zagreb, mo nem blong wan Witnes we hem i save hem. Man ya i talem long woman ya se: “Yu luk, ating ol man ya nao bambae oli save givhan long yu. Sipos mi sanem yu yu go long wan jos, bambae yu luk ol aedol nomo​—i no gat man i toktok, mo evri samting i tudak nomo. Mi no ting se jos i save givhan long yu. Mi sanem sam narafala man finis blong oli go luk ol Witnes blong Jeova, mo ating i gud blong yu tu yu mekem olsem.” Ol Witnes oli glad blong kam luk woman dokta ya mo statem wan Baebol stadi wetem hem. Long sam wik nomo, woman ya i glad blong talemaot se save we hem i kasem long saed blong stamba tingting blong God i mekem laef blong hem i gat mining.​—Prija 12:13.

Taem wan trabol i kamaot, plante man oli faenemaot se trutok long Baebol i save givhan long olgeta. Long Gris, wan boe we i gat seven yia blong hem i foldaon long ruf blong bilding long skul, nao hem i ded. Sam manis i pas, tu Witnes sista oli luk mama blong boe ya mo oli leftemap tingting blong hem taem oli tokbaot hop ya blong laef bakegen. (Jon 5:​28, 29) Taem woman i harem samting ya, hem i krae. Ale sista i askem hem se: “?Sipos yu wantem save moa long saed blong Baebol, wetaem mifala i save kam luk yu?” Woman ya i ansa se: “Naoia.” Ale hem i tekem tufala i go long haos blong hem, mo hem i stat stadi Baebol. Tede, ful famle blong hem oli wosip long Jeova.

?Yu Yu Joen Long Wok Ya?

Ol stori olsemia i hapen oltaem raonabaot long wol. Jeova i stap hivimap mo trenem wan bigfala hip blong ol man long plante defdefren kantri blong wosip long hem. Bigfala grup blong ol man ya oli glad from we oli gat hop blong laef tru long taem we rabis wol ya i lus mo go long niufala wol we stret fasin nomo i stap long hem.​—2 Pita 3:13.

From ol blesing blong Jeova, bigfala wok ya blong hivimap ol man i stap gohed yet blong kasem fulmak blong hem. (Aesea 55:​10, 11; Matiu 24:​3, 14) ?Yu yu gohed strong blong joen long wok ya blong talemaot Kingdom? Sipos yes, yu save trastem paoa blong God mo talem ol tok ya blong man we i raetem sam we i se: ‘Jeova i stap givhan long mi.’​—Ol Sam 121:2.

[Futnot]

[Tok blong pija long pej 9]

“I no gat man i save kam long mi, sipos Papa blong mi we i sanem mi mi kam, hem i no pulum hem i kam.”​—JON 6:44

[Bokis blong pija long pej 8]

?HU I MEKEM SE WOK YA I GRU?

“Sipos Hae God i no givhan long man blong wokem haos, wok blong man ya i blong nating nomo.”​—Ol Sam 127:1.

“God nomo i stap mekem kakae ya i gru gud. Man we i planem kakae, mo man we i klinim garen, tufala i olsem nating nomo. Stamba blong wok ya i stap long God, from we hem nomo i stap mekem ol kakae i gru.”—1 Korin 3:​6, 7.