?Ponjes Paelat Hem i Hu?

“PAELAT i wan man we i laef long taem bifo, be hem i stap pulum tingting blong plante man yet. Hem i no gat respek long eniman mo i no trastem eniman. Samfala oli ting se hem i wan gudfala man, samfala oli ting se hem i wan slak man blong politik we i rere blong kilim man i ded blong mekem se ol narafala oli no agensem hem.”​—Pontius Pilate, we Ann Wroe i raetem.

Maet yu tu yu holem wan tingting olsem no maet wan narafala tingting bakegen. Nating se i olsem wanem, be i tru se klosap evri man oli save long Ponjes Paelat from fasin we hem i mekem long Jisas Kraes. ?Ponjes Paelat hem i hu? ?Yumi save wanem long saed blong hem? Sipos yumi kasem save long posisen blong hem, bambae yumi kasem save moa long sam samting we oli bin hapen long wol we oli moa impoten i bitim ol narafala samting.

Posisen, Wok, Mo Paoa

Long yia 26 K.T., Taebirias we i empera blong Rom, i putumap Paelat i kam haeman we i lukaot long provins blong Judia. Ol haeman olsemia, oli kamaot long kampani blong ol ami we oli ron long hos. Oli daon moa long ol haeman we oli kamaot long ol impoten famle mo we oli gat wan posisen long gavman. Taem Paelat i joen long ami, ating hem i no impoten nating, maet hem i wan yangfala nomo we i lukaot long wan kampani blong soldia. Be taem hem i gohed blong mekem ol wok we ami i givim long hem, sloslo hem i kam hae moa, gogo, bifo we hem i gat 30 yia, hem i lukaot long wan provins.

Yunifom blong Paelat, hemia wan sot kot we oli wokem long skin blong buluk mo i no gat han blong hem, wetem aean klos blong blokem jes blong hem. Taem hem i no werem yunifom, hem i putum klos blong ol man Rom we oli kolem toga. Klos ya i waet mo oli flasem long kala ya pepol. Hea blong hem i sot mo i no gat mustas. Samfala oli ting se hem i kamaot long Spen, be ating nem blong hem i soemaot se hem i kamaot long laen blong Pontii​—hemia ol haeman blong ol Samnaet long saot Itali.

Klosap oltaem oli sanem ol man we oli gat posisen olsem Paelat oli go long ol provins we ol man oli wael. Ol man Rom oli ting se Judia i wan provins olsem. Paelat i mas mekem se ol man oli stap kwaet, mo i mas lukaot long wok blong tekem mane blong takis we oli ademap long samting we man i pem, mo takis blong ol eleksen. Ol kot blong ol man Jiu nomo oli lukluk long ol trabol we i stap kamaot evri dei, be ol trabol we kot i save givim panis blong ded from, Paelat nao i harem, from we hem i jaj we i hae moa.

Paelat mo woman blong hem tufala i stap long taon ya Sisaria klosap long solwota, wetem sam sekretari, sam fren, mo sam man blong karem mesej i go long ol narafala. Paelat i stap bos long faef kampani blong soldia, wanwan kampani i gat 500 no 1,000 soldia long hem. Mo tu, hem i bos long wan kampani blong soldia we oli ron long hos, maet 500 man i stap long kampani ya. Ol soldia blong hem oli stap kilim i ded ol man blong brekem loa, oli hangem olgeta long pos. Taem i no gat faet, oli mekem wan smol kot long ol man ya bifo we oli kilim olgeta i ded. Be long taem blong faet, oli kilim ol rebol i ded wantaem nomo, mo oli kilim fulap wantaem. Blong finisim rebelian we Spartacus i lidim, ol man Rom oli hangem 6,000 slef long ol pos blong kilim olgeta i ded. Sipos trabol i stat long Judia, Paelat i save askem help blong haeman we Rom i putumap blong lukaot long Siria, we  hem tu i bos long ol kampani blong soldia. Be long bighaf blong ol yia we Paelat i bos long ol soldia, haeman we i lukaot long Siria i no stap, ale Paelat i mas finisim kwik ol trabol we i stat.

Ol haeman olsem Paelat oli sanem toktok oltaem i go long empera. Oli mas ripotem enikaen bisnes we i spolem empera no eni trabol we i kamaot agensem ol haeman blong Rom, nao biaen, empera i talem long olgeta wanem blong mekem. Maet haeman blong wan provins i hareap blong talemaot long empera tingting blong hem long samting we i hapen, bifo we sam narafala oli komplen. From we klosap bambae trabol i kamaot long Judia, Paelat i tinghevi long ol samting ya we ol man oli save komplen from.

Ol Gospel, mo tufala man blong histri, Flavius Josephus mo Philo, oli givim save long saed blong Paelat. Man Rom ya Tacitus, we i wan man blong raetem histri, hem tu i talem se Paelat i kilim Christus i ded, hemia i minim Kraes we ol Kristin oli tekem nem blong olgeta long hem.

Ol Man Jiu Oli Kam Kros Tumas

Oltaem ol ami blong Rom oli karem ol aedol blong empera i go wetem olgeta taem oli go faet. Be Josephus i talem se ol haeman blong Rom oli no letem ol ami oli karem ol aedol ya oli go wetem olgeta taem oli go long Jerusalem, from we skul blong ol man Jiu i agensem ol aedol. Be Paelat i no kea long tingting blong ol man Jiu. From samting ya, ol man Jiu oli kros tumas nao oli hareap blong go long Sisaria blong komplen. Faef dei i pas be Paelat i no mekem wan samting. Long namba sikis dei, hem i givim oda long ol soldia blong hem blong oli raonem ol man we oli stap komplen, mo blong oli talem long olgeta se bambae oli kilim olgeta i ded sipos oli no stop. Taem oli mekem olsem, ol man Jiu oli talem se i moagud we oli ded i bitim we oli letem ol ami ya oli brekem loa blong olgeta. Nao Paelat i jenisim tingting blong hem, ale i talem long ol soldia blong oli tekem ol aedol ya oli go longwe.

Paelat i gat fasin ya we hem i save pulum ol narafala blong folem tingting blong hem. Josephus i tokbaot wan taem we Paelat i stat putum wan bigfala paep blong karem wota saplae i kam long Jerusalem. Blong pem samting ya, hem i yusum mane blong haos blong God. Paelat i no tekem mane ya hem wan, from we hem i save se sipos i mekem olsem, ol man Jiu bambae oli kam kros from we hem i no soem respek long tabu ples ya, nao bambae oli talem long Taebirias blong sakemaot hem long wok blong hem. Taswe, i luk olsem we Paelat i pulum ol haeman long haos blong God blong oli gat wan tingting wetem hem. Ol mane we ol man oli givim i go long God, we oli kolem “koban,” oli gat raet blong yusum blong mekem ol wok we i givhan long taon ya. Be plante taosen Jiu oli kros from samting ya, mo oli kam wanples blong soemaot kros blong olgeta.

Nao Paelat i talem long ol soldia blong oli wokbaot long medel blong ol man ya. Oli no mas yusum naef blong faet agensem olgeta, be oli mas kilim olgeta wetem stik nomo. I luk olsem se hem i wantem soem long ol man ya se hem i bos, be i no wantem kilim olgeta i ded. Ating samting ya i wokgud, sam man nomo oli ded. Maet samfala oli stap tokbaot samting ya, taem oli talem long Jisas se ol soldia blong Paelat oli kilim i ded sam man Galili we oli stap mekem sakrefaes blong wosip long God.​—Luk 13:1.

“?Wanem Ya Trutok Ya?”

Nogud samting we Paelat i mekem we ol man oli save hem from, hemia taem we hem i lesin long ol jif pris mo ol elda blong ol man Jiu we oli talem se Jisas i stap leftemap hem wan olsem King. Jisas i talem long Paelat se hem i kam long wol blong talemaot trutok. Long taem ya, Paelat i luksave se Jisas i no wantem agens long gavman blong Rom. Nao Paelat i askem long hem se: “?Wanem ya trutok ya?” Ating Paelat i ting se i westem taem blong tokbaot trutok, from we hemia wan samting we i had tumas blong faenem. ?Afta we Paelat i harem ol tok blong Jisas, hem i talem wanem? Hem i se: “Mi mi no faenem se man ya i brekem loa.”​—Jon 18:​37, 38, NTB; Luk 23:4.

I stret nomo se kot kes blong Jisas i finis long ples ya. Be ol man Jiu oli gohed blong talemaot strong se Jisas i stap traem blong pulum ol man blong oli agensem gavman. Fasin jalus nao i lidim ol jif pris blong  putum Jisas i go long han blong ol man Rom. Paelat i save samting ya. Hem i save tu se sipos hem i letem Jisas i go fri, trabol bambae i kamaot. Hem i no wantem moa trabol. I gat naf trabol finis. Barabas mo sam narafala oli stap long kalabus finis from we oli traem blong faet agens long gavman mo oli kilim sam man i ded. (Mak 15:​7, 10; Luk 23:2) Mo tu, ol rao we oli kamaot finis wetem ol man Jiu oli mekem se Taebirias i no moa tinghae long Paelat olsem fastaem. Taebirias i bin panisim strong sam haeman we oli lukaot long ol provins, from we oli no bin mekem gud wok blong olgeta. Nating se i olsem, be sipos Paelat i folem tingting blong ol man Jiu, bambae hem i soem se hem i wan slak man. Paelat i no moa save nao se bambae hem i mekem wanem.

Taem Paelat i harem weples Jisas i kamaot long hem, hem i traem blong pasem hem i go long Herod Antipas we i rul long Galili. Be samting ya i no wok. Ale Paelat i traem blong pulum ol man we oli hivap afsaed long haos blong hem, blong oli talem se Jisas i mas go fri, folem kastom blong olgeta blong letem wan prisena i go fri long taem blong Pasova. Be ol man ya oli talem se Barabas nao i mas go fri.​—Luk 23:5-19.

Maet Paelat i wantem mekem i stret, be hem i wantem tu blong lukaotgud long posisen blong hem mo blong mekem ol man oli glad. Taswe, hem i no lesin long tingting blong hem we i stap stikim hem, mo i no tingbaot stret fasin blong jajem man. Hem i tingbaot posisen blong hem fastaem. Ale hem i singaot ol man blong oli karem wan besin wota i kam long hem, nao hem i wasem han blong hem, olsem wan saen blong soemaot se hem i no gat poen from ded blong Jisas. * Paelat i luksave se Jisas i no mekem wan rong. Nating se i olsem, hem i givim oda blong oli wipim Jisas, mo hem i letem ol soldia oli mekem plei long hem, kilim hem, mo spet long hem.​—Matiu 27:​24-31.

Wan moa taem bakegen, Paelat i traem blong faenem rod blong letem Jisas i go fri. Be ol man oli singaot bigwan se sipos hem i mekem olsem, hem i no fren blong Sisa. (Jon 19:12) Taem Paelat i harem tok ya, hem i no moa wantem letem Jisas i go fri. Wan man blong hae save i tokbaot desisen ya blong Paelat, i se: “Long tingting blong hem, rod blong stretem problem ya i isi nomo: Kilim man ya i ded. Laef blong wan man Jiu i nating nomo, ale i krangke blong letem trabol i kamaot from.”

?Wanem i Hapen Long Paelat?

Laswan samting we ol man oli raetemdaon long saed blong wok blong Paelat, hemia wan faet bakegen. Josephus i talem se wan bigfala hip blong ol man Samaria we oli karem ol tul blong faet, oli hivap long Hil ya Gerisim, blong traem digimaot ol sas samting we oli ting se Moses i bin berem long ples ya. Be Paelat i blokem olgeta, mo ol soldia blong hem oli kilim plante long olgeta i ded. Ol man Samaria oli komplen long bos blong Paelat, nem blong hem Lucius Vitellius, we hem i haeman long provins blong Siria. Ol buk oli no talem sipos Vitellius i ting se Paelat i bitim mak taem hem i blokem olgeta. Be hem i girap i sanem Paelat i go long Rom, blong i talemaot ol samting we hem i mekem long empera. Be bifo we Paelat i kamtru long Rom, Taebirias i ded.

Wan buk i talem se: “Afta long taem ya, ol buk blong histri oli no moa talem wan samting long saed blong Paelat, ol kastom stori nomo oli tokbaot hem.” Plante man oli traem talem sam smosmol samting long saed blong Paelat we ol buk oli no talem. Samfala oli talem se hem i kam wan Kristin, mo se ol “Kristin” long Itiopia oli mekem hem i kam wan “tabu man.” Long buk we Eusebius i raetem long en blong ol yia 200 mo long stat blong ol yia 300, hem i fas man blong talem se Paelat i kilim hem wan i ded, olsem Judas Iskariot. Biaen, plante narafala man tu oli talem samting ya. Be yumi no save stret wanem i hapen long Paelat, ol man oli taltalem tingting blong olgeta nomo.

Samtaem Paelat i stronghed, samtaem hem i no tinghevi long ol impoten samting, mo samtaem hem i mekem i strong tumas long ol narafala. Nating se i olsem, hem i holem posisen blong hem blong ten yia. Hemia i longtaem moa i bitim plante narafala haeman we oli bin lukaot long Judia. From samting ya, ol man Rom oli ting se Paelat i wokgud. Sam man oli talem se Paelat i wan man blong fraet, we i mekem Jisas i safa mo i kilim hem i ded, jes blong protektem hem wan nomo. Sam narafala oli talem se bigfala wok blong Paelat i no blong jajem man long stret fasin, be i blong mekem pis i stap mo blong lukaotgud long gavman blong Rom.

Taem blong Paelat i defren olgeta long taem blong yumi. Nating se i olsem, eni jaj we i givim panis long wan man we i no mekem rong, hem i mekem i no stret. Sipos Ponjes Paelat i no bin save Jisas, ating nem blong hem i no impoten nating. Long ol buk blong histri, nem blong hem bambae i stap wetem ol man we oli man nating nomo.

[Futnot]

[Tok blong pija long pej 11]

Oli faenem ston ya long Sisaria, we ol hanraet long hem i talem se Ponjes Paelat nao i haeman long Judia