Wan Kwestin

?Olsem wanem? ?Ol kompiuta gem we oli raf tumas, oli save spolem fasin fren we man i gat wetem Jeova?

King Deved blong Isrel bifo i raetem se: “God i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet.” (Ol Sam 11:5) Long lanwis Hibru, tok ya “no laekem nating” i save minim “wan man we i wan enemi.” Taswe man we i laekem raf fasin i mekem hem wan i kam enemi blong God. Kwestin we yumi mas tingbaot se: ?Olsem wanem?  ?Sam kompiuta gem i save pulum man blong, sloslo, hem i stat laekem raf fasin?

Ol kompiuta gem we oli raf oli leftemap fasin blong yusum ol tul blong faet. Plante taem oli trenem ol man we oli plei blong save gud olsem wanem blong faet. Magasin ya The Economist i talem se: “Ol ami blong Amerika oli yusum plante ol kompiuta gem taem oli mekem ol trening blong olgeta. Sam long ol gem ya we ol ami oli yusum, oli ol niufala gem we i kamaot naoia long ol stoa.”

I tru, olgeta we oli plei long ol kompiuta gem we i raf oli no givim kil long ol trufala man. ?Be, pleplei we oli jusum i soemaot wanem long hat blong olgeta? (Matiu 5:​21, 22; Luk 6:45) ?Wanem tingting blong yu long wan man we i laekem stikim man long naef, sutum man, spolem bodi blong narafala, mo kilim man i ded long ol gem ya? ?Olsem wanem sipos man ya i plei plante aoa evri wik long raf fasin, nao i kam man blong laekem tumas ol gem ya? Ating bambae yu talem se man ya i mekem fasin blong laekem faet i gru long hat blong hem, i sem mak olsem man we i lukluk ol rabis pija blong seks i mekem ol nogud filing long saed blong seks i kam antap.​—Matiu 5:​27-29.

?Wanem filing blong Jeova long man we i laekem ol raf fasin? Deved i talem se Jeova “i no laekem nating” man olsem. Long taem blong Noa, Jeova i soemaot olsem wanem hem i no laekem nating ol man we oli laekem raf fasin. Jeova i talem long Noa se: “Bambae mi spolem wol ya wetem olgeta man ya evriwan, from we olbaot long evri ples, ol man ya oli stap faet mo oli stap kilim man i ded.” (Jenesis 6:13) Trufala God i spolem ol man we oli laef long wol long taem ya from ol raf fasin we oli mekem. Hem i sevem Noa mo famle blong hem​—olgeta eit nomo we oli no laekem nating raf fasin.​—2 Pita 2:5.

Ol man we oli wantem kam ol fren blong Jeova oli “tanem ol naef blong faet blong olgeta oli kam aean blong brekem graon long garen, mo ol spia blong olgeta oli kam sisis blong katem han blong tri.” Bitim we oli laekem raf fasin, “oli no moa lanem fasin blong faet.” (Aesea 2:​4, NW ) Blong stap fren blong God, bitim we yumi kam enemi blong hem, yumi mas ‘lego ol fasin nogud mo mekem ol samting nomo we i gud.’ Yumi mas “wok had blong mekem pis.”​—1 Pita 3:11.

?Olsem wanem sipos yumi stat finis blong pleplei long ol raf video gem? Ale, yumi mas gat strong tingting blong mekem Jeova i glad, taem yumi lego ol fasin we hem i no laekem nating. Yes, yumi mas prea long God blong i sanem tabu spirit, blong i halpem yumi blong stopem nogud fasin ya we i save spolem laef blong yumi long saed blong spirit. Yumi save stopem fasin ya sipos yumi letem ol fasin olsem pis, gud fasin, mo longfala tingting we oli kamaot long God, oli gat paoa long laef blong yumi.​—Luk 11:13; Galesia 5:​22, 23.