!Wokbaot Folem Bilif, i No Folem Samting We Yu Luk!

“Yumi stap wokbaot folem bilif, i no folem ol samting we yumi stap luk.”—2 KORIN 5:​7, NW.

1. ?Wanem i soem se aposol Pol i stap wokbaot folem bilif, i no long samting we hem i luk?

 LONG yia 55 K.T. aposol Pol i raetem wan leta i go long ol tabu Kristin we oli gat hop blong go long heven. Hemia i mekem twanti yia finis we Pol i kam wan Kristin, i no moa holem nem ya Sol mo i no moa stap kilim i ded ol Kristin man. Be nating se plante yia oli pas, bilif blong hem long God i no kam slak. Pol i no save luk wetem prapa ae blong hem, ol samting long heven, be bilif blong hem i strong we i strong. Taswe, long leta blong hem, hem i raetem se: “Yumi stap wokbaot folem bilif, i no folem ol samting we yumi stap luk.”​—2 Korin 5:​7, NW.

2, 3. (a) ?Olsem wanem yumi soemaot se yumi stap wokbaot folem bilif? (b) ?Man we i wokbaot folem samting we hem i luk hem i olsem wanem?

² Sipos yumi wokbaot folem bilif, hemia i min se yumi trastem God fulwan se hem i naf blong lidim yumi. Yumi mas sua fulwan se God i rili save wanem rod yumi mas folem blong karem gudfala frut long laef blong yumi. (Ol Sam 119:66) Taem yumi mas mekem wan desisen long laef, mo yumi folem desisen ya, yumi mas tingbaot tu “olgeta samting ya we yumi no save luk, be oli stap.” (Hibrus 11:1) Sam long ol samting ya, hemia “niufala skae mo niufala wol” we God i promes blong mekem. (2 Pita 3:13) Defren olgeta, sipos yumi wokbaot folem samting we yumi stap luk, hemia i min se ol samting we yumi harem, lukluk, mo filim, oli bos long laef blong yumi. Hemia wan denja from we i save mekem we yumi no moa tingbaot ol wok we God i wantem yumi blong mekem.​—Ol Sam 81:12; Prija 11:9.

³ Maet yumi blong “smol kampani” we hop blong yumi i blong go long heven, no maet yumi blong grup blong “ol narafala sipsip,” we oli gat hop blong laef long wol ya. Nomata se yumi stap long wanem grup, yumi mas tinghevi long advaes ya blong wokbaot folem bilif mo i no folem samting we yumi luk. (Luk 12:​32, NW; Jon 10:16) Bambae yumi luk olsem wanem advaes ya i save blokem yumi blong yumi no foldaon long trap blong ‘sin we i save mekem yumi hapi blong smoltaem nomo,’ blong no foldaon long trap ya blong ronem mane, mo blong no fogetem se en i klosap. Mo tu, bambae yumi luk wanem denja i stap taem man i wokbaot folem samting we hem i save luk nomo.​—Hibrus 11:25.

Sakemaot ‘Sin We i Save Mekem Yumi Hapi Blong Smoltaem Nomo’

4. ?Wanem jus we Moses i mekem, mo from wanem?

⁴ Tingbaot wanem kaen laef we Moses, pikinini blong Amram, i save gat. Hem i gruap wetem ol pikinini blong king long Ijip, hemia i min se hem i save kasem paoa, mane, mo haenem tu. Maet Moses i save gat tingting olsem se: ‘Mi mi skulgud long save mo waes blong ol man Ijip, mo mi kam wan strong man blong toktok mo wok tu. !Sipos mi stap gud long famle blong king bambae mi save yusum posisen blong mi blong halpem ol Hibru brata blong mi we oli stap wok slef!’ (Ol Wok 7:22) Be Moses i no tingting olsem. Hem i wantem “go joen long ol man blong God blong harem nogud wetem olgeta.” ?From wanem? ?Wanem i pulum Moses blong lego olgeta gudfala samting we hem i save kasem long kantri ya Ijip? Baebol i ansa se: “From we Moses i stap bilif strong long God, taswe hem i aot long Ijip, we i no fraet long king ya we i kros tumas. Hem i no save tanemraon blong gobak, i stap gohed olwe nomo, olsem we i stap luk God ya we man i no save luk long ae blong hem.” (Hibrus 11:​24-27) Moses i bilif fulwan se Jeova bambae i blesem man we i folem stret fasin. Ale samting ya i halpem Moses blong faet agensem sin, mo hem i no wantem harem gud long ol samting blong bodi we oli blong smoltaem nomo.

5. ?Eksampol blong Moses i pulum yumi blong mekem wanem?

⁵ Plante taem, yumi mas mekem desisen long  sam impoten samting olsem: ‘?I gat sam fasin no kastom we mi mas lego from we oli no rili laenap wetem ol rul blong Baebol? ?I stret we mi tekem wan wok we i save givim gudfala pei long mi be maet i blokem mi blong gohed strong long saed blong spirit?’ Eksampol blong Moses i pulum yumi blong mekem desisen we i defren long ol man blong wol ya we oli tingbaot naoia nomo. Yumi mas bilif long waes blong “God ya we man i no save luk long ae blong hem”​—hemia Jeova God—​we i pulum yumi blong lukluk i go longwe long fiuja. Olsem Moses, yumi tinghae moa long fasin fren blong yumi wetem Jeova i bitim eni samting we wol ya i save givim.

6, 7. (a) ?Olsem wanem Esao i soemaot se hem i laekem moa blong wokbaot folem samting we hem i luk? (b) ?Eksampol blong Esao i givim woning long yumi long saed blong wanem?

⁶ Skelem eksampol blong Moses wetem hemia blong Esao, wan pikinini blong olfala Aesak. Esao i wantem haremgud naoia nomo. (Jenesis 25:​30-34) Esao i “ting nating long ol samting we oli tabu” (NW ), taswe hem i salem raet blong hem olsem fasbon blong kasem “kakae we hem i kakae wan taem nomo.” (Hibrus 12:16) Hem i no tingbaot se desisen ya we hem i mekem blong salem raet blong hem olsem fasbon bambae i mekem wanem long fasin fren blong hem wetem Jeova. Mo hem i no tingbaot tu se desisen ya bambae i mekem wanem long ol pikinini mo ol smol bubu we oli kamaot biaen long hem. Tingting blong hem i no stap long ol samting long saed blong spirit. Esao i ting nating long ol nambawan promes blong God. Yes, hem i wokbaot folem samting we hem i save luk nomo, i no folem bilif.

⁷ Eksampol blong Esao i olsem wan woning long yumi tede. (1 Korin 10:11) Taem i gat sam desisen blong mekem, nomata we oli bigwan no smol, yumi no mas letem waes blong wol ya blong Setan i pulum yumi. Wol ya i save pulum yumi blong ting se samting we yumi wantem yumi mas kasem naoia nomo. I gud yumi traem skelem tingting blong yumi wan se: ‘?Ol desisen we mi stap mekem naoia oli soemaot se mi stat blong tekem fasin blong Esao? ?Sipos mi jusum blong mekem samting we mi mi wantem, bambae ol wok long saed blong spirit oli stap long seken ples? ?Ol samting we mi stap jusum naoia oli save spolem fasin fren blong mi wetem God mo pei we bambae mi kasem long fiuja? ?Wanem kaen eksampol we mi mi stap soem long ol narafala?’ Sipos ol samting we yumi jusum oli soemaot se yumi tinghae long ol samting long saed blong spirit, bambae Jeova i blesem yumi.​—Ol Proveb 10:22.

Lukaot Long Trap Ya Blong Ronem Mane

8. ?Wanem woning i go long ol Kristin long Laodisia, mo from wanem yumi intres long woning ya?

⁸ Klosap long en blong faswan handred yia, aposol Jon i luk wan vison we hem i raetem long buk blong Revelesen. Long vison ya, Jisas Kraes we i stap finis long heven, i toktok i kam long kongregesen blong Laodisia, hemia long Esia Maena. Toktok blong hem i wan woning long saed blong fasin blong ronem mane. Ol Kristin blong Laodisia oli rij, be long saed blong spirit oli pua we oli pua. Olgeta ya oli no moa wokbaot folem bilif, be oli letem mane, no ol sas samting, oli blaenem olgeta blong oli no moa lukluk klia ol samting long saed blong spirit. (Revelesen 3:​14-18) Fasin blong ronem mane i mekem sem samting ya long ol man tede. Hem i save mekem bilif blong yumi i slak, mo i save mekem we tingting blong yumi i no moa strong blong “resis long rod ya” we i go kasem laef. (Hibrus 12:1) Sipos yumi no lukaot gud, fasin blong wantem “gat  gud taem long laef” i save tekem ples blong ol wok long saed blong spirit, gogo i “blokem” ol wok ya fulwan.​—Luk 8:14.

9. ?Olsem wanem fasin blong harem gud long samting we yu yu gat mo tangkiu from kakae long saed blong spirit i save protektem yu?

⁹ Blong lukaotgud se yumi no kam slak long saed blong spirit, yumi mas lanem fasin ya blong harem gud nomo long wanem samting we yumi gat. I nogud yumi tingbaot ol bisnes blong wol olsem samting we i impoten bigwan, mo yumi traem kam rijman. (1 Korin 7:31; 1 Timoti 6:​6-8) Taem yumi wokbaot folem bilif i no folem samting we yumi luk, yumi harem gud long paradaes long saed blong spirit we yumi stap long hem naoia. Taem yumi tekem ol kakae long saed blong spirit, yumi harem se yumi ‘hapi mo yumi stap singsing from.’ (Aesea 65:​13, 14) Mo tu, yumi harem gud blong kampani wetem ol narafala man mo woman we oli stap wokem ol frut blong tabu spirit blong God long laef blong olgeta. (Galesia 5:​22, 23) !I impoten tumas we yumi tekem ol samting long saed blong spirit we Jeova i givim, nao yumi fulapgud mo yumi harem gud tu long ol samting ya!

10. ?Wanem ol kwestin we oli gud blong tingbaot?

¹⁰ I gud yumi tingting long ol kwestin ya: ‘?Ol sas samting oli moa impoten i bitim ol narafala samting long laef blong mi? ?Mi mi yusum ol sas samting blong mi blong harem gud nomo long laef no blong givhan long trufala wosip? ?Wanem samting i rili mekem mi mi harem gud? ?Mi mi harem gud moa taem mi stadi Baebol mo kam long ol Kristin miting, no mi haremgud moa taem mi spenem ful wiken blong spel long ol Kristin wok? ?Mi mi yusum klosap evri wiken blong pleplei no mi yusum blong mekem wok blong prij mo ol narafala wok blong sapotem tru wosip?’ Man we i wokbaot folem bilif hem i stap bisi long ol wok blong Kingdom, mo i trastem fulwan ol promes blong Jeova.​—1 Korin 15:58.

No Fogetem Se En i Klosap

11. ?Olsem wanem man we i wokbaot folem bilif i no fogetem se en i klosap?

¹¹ Sipos yumi wokbaot folem bilif, bambae yumi sakemaot ol tingting blong man nomo se en i longwe yet, mo tingting ya se bambae en i neva kam. Man we bilif blong hem i hafhaf, hem i ting nating long ol profet tok blong Baebol. Be yumi no mas olsem. Yumi luksave se ol samting we oli stap hapen long wol oli laenap wetem wanem we Baebol i talem se bambae i hapen. (2 Pita 3:​3, 4) ?Yu yu no ting se fasin blong bighaf blong ol man i soem klia se yumi stap long taem blong “ol las dei”? (2 Timoti 3:​1-5, NW ) From we yumi bilif, yumi luksave se ol samting we oli stap hapen long wol oli neva hapen bifo. Ol samting ya oli mekemap ‘saen ya we i soemaot se [Jisas] i kam finis mo rabis fasin blong wol ya i kasem en blong hem.’​—Matiu 24:​1-14, NW.

12. ?Olsem wanem ol tok blong Jisas long Luk 21:​20, 21 oli kamtru long faswan handred yia?

¹² Tingbaot wan samting we i hapen long faswan handred yia, we i laenap wetem wanem we yumi fesem tede. Taem Jisas Kraes i stap long wol, hem i givim woning ya long ol man blong hem se: “Taem we yufala i luk ol soldia oli stap kam plante raonabaot long taon ya Jerusalem, blong oli blokem ol  man oli stap insaed, yufala i mas save we bambae i no longtaem oli save spolemgud ples ya. Taem yufala i luk samting ya, yufala we i stap long Judia, yufala i mas ronwe blong go haed long ol hil. Mo yufala we i stap insaed long taon ya, yufala i mas aot.” (Luk 21:​20, 21) Profet tok ya i kamtru long 66 K.T., taem ol ami blong Rom we Cestius Gallus i lidim, oli raonem Jerusalem. Be wantaem nomo ol ami ya oli aot. Hemia wan saen mo wan janis tu long ol Kristin we oli stap long taon ya blong oli ‘ronwe i go haed long ol hil.’ Long 70 K.T., ol ami blong Rom oli kambak bakegen, mo long taem ya oli jes spolemgud taon blong Jerusalem wetem tempol blong hem. Man ya Josephus i raetem se bitim wan milian man Jiu oli ded, mo oli tekem 97,000 narafala man Jiu oli go kalabus. Yes, jajmen blong God i kamtru long neson blong ol man Jiu. Olgeta we oli bin wokbaot folem bilif mo oli tekem aksen folem woning blong Jisas, oli ronwe long trabol ya.

13, 14. (a) ?Wanem sam samting we bambae oli hapen long fiuja? (b) ?From wanem yumi mas wekapgud mo luksave ol profet tok blong Baebol we oli stap kamtru?

¹³ Wan samting we i klosap sem mak long hemia, bambae i kamtru long taem blong yumi. Sam haf blong Yunaeted Neson bambae i givhan blong mekem jajmen blong God i kamtru. Ol ami blong Rom long faswan handred yia oli gat wok blong putum wanem we oli kolem Pax Romana (Pis blong Rom). Nating se oli traem mekem ol man long taem ya oli harem sef, be olgeta nao we biaen oli spolem Jerusalem fulwan. Tede tu, Yunaeted Neson i gat wok blong putum pis long wol. Be ol profet tok blong Baebol oli soemaot se sam grup blong man insaed long Yunaeted Neson, we oli rere blong faet blong sapotem ogenaesesen ya, bambae oli luk ol skul olsem wan nogud samting we i spolem pis. Nao bambae oli girap, oli spolem Krisendom we i olsem Jerusalem bifo, wetem ol narafala skul we oli mekemap Bigfala Babilon. (Revelesen 17:​12-17) Yes, olgeta giaman skul blong wol oli stap klosap tumas long taem ya we bambae oli lus.

¹⁴ Taem ol giaman skul oli lus, hemia i min se bigfala trabol i stat nao. Ale long las haf blong bigfala trabol ya, olgeta narafala samting we oli mekemap rabis wol bambae oli lus evriwan. (Matiu 24:​29, 30; Revelesen 16:​14, 16) Taem yumi wokbaot folem bilif, yumi wekapgud mo yumi luksave olsem wanem ol profet tok blong Baebol oli stap kamtru. I no gat samting i save trikim yumi blong ting se God bambae i yusum wan ogenaesesen blong man nomo, olsem Yunaeted Neson, blong putum pis mo seftaem long wol. Taswe, fasin blong laef blong yumi i mas soemaot se yumi bilif fulwan se “Bigfala Dei ya blong [Jeova] i kam klosap finis.”​—Sefanaea 1:14.

I Denja Blong Wokbaot Folem Samting We Yumi Save Luk

15. ?Nating se ol man Isrel oli kasem blesing long God, biaen oli foldaon long wanem trap?

¹⁵ Stori blong ol man Isrel bifo i soemaot se i denja taem man i stat wokbaot folem samting we hem i luk nao i letem bilif blong hem i kam slak. Ol man Isrel oli luk ten trabol ya we oli daonemgud ol giaman god blong Ijip, mo oli luk bigfala merikel ya we God i mekem blong oli krosem Red Si. Nating se i olsem, ol man Isrel oli mekem stronghed, oli wokem wan bul long gol mo oli stat wosipim bul ya. Oli no gat longfala tingting mo oli taed blong wet long Moses, we “i stap longtaem tumas antap long hil ya.” (Eksodas 32:​1-4) From we oli no gat longfala tingting, oli wosipim wan aedol we oli save luk stret long ae blong olgeta. Fasin ya i mekem Jeova i kros mo hem i kilim samwe long “tri taosen man oli ded.” (Eksodas 32:​25-29) !Sore tumas taem wan man blong Jeova tede i mekem ol desisen we oli soemaot se hem i no trastem Jeova, mo i no bilif strong tu se hem i save mekem ol promes blong hem oli kamtru!

16. ?Wanem i hapen long ol man Isrel from we oli folem nomo samting we oli save luk?

¹⁶ I gat sam narafala nogud frut i kamaot tu from fasin ya we ol man Isrel oli folem samting we oli  luk. Samting ya i mekem se oli fraet long ol enemi blong olgeta. (Namba 13:​28, 32; Dutronome 1:28) I mekem tu we oli tok agensem Moses mo raet we God i givim long hem blong lidim neson blong Isrel. Mo tu, i mekem se oli komplen plante from ol samting long laef blong olgeta. From we oli sot long bilif, oli laekem moa Ijip we i fulap long wok blong ol devel i bitim we oli laekem Promes Lan. (Namba 14:​1-4; Ol Sam 106:24) !Ating Jeova i harem nogud tumas taem hem i luk olsem wanem ol man ya blong hem oli no gat respek nating long King blong olgeta we oli no save luk!

17. ?Wanem i mekem se ol man Isrel oli sakemaot Jeova long taem blong Samuel?

¹⁷ Long taem blong profet Samuel, neson blong Isrel we i bin kasem plante blesing, i foldaon long trap bakegen from we oli wokbaot folem samting we oli save luk nomo. Oli stat wantem wan king olsem ol narafala kantri. Jeova i soemaot klia se hem nao i King blong olgeta, be samting ya i no naf blong mekem se oli wokbaot folem bilif. (1 Samuel 8:​4-9) Olsem man we i no gat hed, ol man Isrel ya oli sakemaot Jeova we i stap lidimgud olgeta from we oli wantem folem fasin blong ol kantri raonabaot long olgeta. Mo fasin ya i spolem olgeta nomo.​—1 Samuel 8:​19, 20.

18. ?Wanem lesen we yumi lanem long saed blong denja blong wokbaot folem samting we yumi save luk?

¹⁸ Yumi we yumi ol man blong Jeova tede, yumi tinghae long fasin fren we yumi gat wetem God. Yumi rere blong folem ol lesen we yumi lanem long ol stori blong Baebol. (Rom 15:4) Taem ol man Isrel oli wokbaot folem samting we oli luk, oli fogetem se i no Moses we i stap lidim olgeta, be Jeova nomo. Sipos yumi no lukaotgud, yumi save fogetem tu se Jeova God mo Bigfala Moses, hemia Jisas Kraes, tufala nao i stap lidim Kristin kongregesen tede. (Revelesen 1:​12-16) Yumi mas lukaot se yumi no karem tingting blong man nomo long saed blong ogenaesesen blong Jeova we i stap long wol. Sipos yumi mekem olsem, yumi save stat komplen oltaem mo yumi no gat tangkiu from ol man we Jeova i stap yusum mo from kakae long saed blong spirit we yumi kasem long ‘slef we i stret mo waes.’​—Matiu 24:​45, NW.

Mekem Tingting Blong Yu i Strong Blong Wokbaot Folem Bilif

19, 20. ?Yu yu gat strong tingting blong mekem wanem, mo from wanem?

¹⁹ Baebol i talem se: “Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.” (Efesas 6:12) Bigfala enemi blong yumi hemia Devel Setan. Hem i wantem nomo blong spolem bilif we yumi gat long Jeova. Hem i kwik blong yusum eni samting we hem i luk se i save pulum yumi i gowe long desisen blong yumi blong mekem wok blong God. (1 Pita 5:8) ?Wanem i save protektem yumi blong yumi no letem ol samting blong wol ya blong Setan i trikim yumi? !Yumi mas wokbaot folem bilif, i no folem samting we yumi save luk! Sipos yumi trastem mo bilif strong long ol promes blong Jeova, samting ya i save blokem yumi blong ‘bilif blong yumi i no foldaon.’ (1 Timoti 1:19) I gud yumi mekem tingting blong yumi i strong blong gohed blong wokbaot folem bilif, nao yumi save sua fulwan se Jeova bambae i blesem yumi. Mo i gud yumi gohed blong prea blong yumi save ronwe long ol trabol we bambae oli kamtru yet long fiuja.​—Luk 21:36.

²⁰ Taem yumi wokbaot folem bilif, i no folem samting we yumi save luk, i gat wan nambawan eksampol i stap. Baebol i talem se: “Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Nekis stadi bambae i tokbaot olsem wanem yumi save wokbaot folem eksampol we Jisas i soemaot.

?Yu Yu Tingbaot?

• ?Yumi lanem wanem long eksampol blong Moses mo Esao long saed blong fasin blong wokbaot folem bilif i no folem samting we yumi save luk?

• ?Olsem wanem blong no foldaon long trap blong ronem mane mo ol sas samting?

• ?Olsem wanem fasin blong wokbaot folem bilif i save halpem yumi blong no fogetem se en i klosap?

• ?From wanem i denja blong wokbaot folem samting we yumi save luk?

[Kwestin]

[Tok blong pija long pej 17]

Moses i wokbaot folem bilif

[Tok blong pija long pej 18]

?Samtaem spel mo pleplei we yu tekem i mekem we yu no joen long ol tiokratik wok?

[Tok blong pija long pej 20]

?Olsem wanem fasin blong tingbaotgud ol tok blong Baebol i save protektem yu?