Luksave Mining Blong Ol Saen—!Hemia Wan Impoten Samting!

“Fastaem mi ting se hed blong boe blong mitufala, Andreas, i soa nomo. Be Andreas i no wantem kakae, mo hem i gat strong fiva. Taem hasban blong mi i kamhom, mitufala i karem Andreas i go long dokta. Dokta i jekem hem mo i sanem hem i go stret long hospital. Problem ya i moa bigwan, i no jes hed i soa nomo. Andreas i kasem sik ya meningitis. Ol dokta oli givim tritmen long hem mo biaen hem i kamgud bakegen.”​—Gertrud, wan mama long Jemani.

PLANTE papa mo mama oli fesem klosap semfala samting olsem Gertrud. Oli luksave ol saen we oli soem se maet pikinini blong olgeta i sik. I tru se i no olgeta sik evriwan we oli strong, be trabol i save kamaot sipos ol papa mo mama oli no tinghevi long ol smosmol saen we oli soemaot se pikinini blong olgeta i sik. Fasin ya blong luksave ol saen mo tekem aksin kwiktaem i save givhan blong trabol i no kam bigwan. Yes fasin blong luksave ol saen i impoten tumas.

Fasin blong luksave ol saen mo tekem aksin kwiktaem i impoten long ol narafala samting long laef tu. Wan eksampol hemia disasta we bigfala wef i mekem long Disemba 2004 long ol ples raonabaot long Indian Si. Sam ogenaesesen blong gavman long Ostrelia mo long Hawai oli bin mekem wan stadi mo oli faenemaot se bambae graon i seksek bigwan long not blong Sumatra mo oli bin talemaot denja we bambae i kamaot from seksek ya. Be nating se i olsem, ol man oli no wokem rod blong givim woning i go long ol man we oli stap long ol ples we i denja mo blong givhan tu long olgeta blong stap sef. From samting ya, bitim 220,000 man oli ded long taem ya.

Ol Saen We Oli Moa Impoten

Taem Jisas i bin stap long wol, hem i tijim wan lesen long ol man we oli lesin long hem blong oli luksave ol saen mo tekem aksin folem ol saen ya. Hem i tokbaot wan samting we i impoten tumas. Baebol i talem se: “Sam Farisi wetem sam Sadusi oli kam luk Jisas. Olgeta oli wantem traem hem, nao oli askem long hem blong i mekem wan saen, blong soemaot we paoa blong hem i kamaot long God. Be Jisas i talem long olgeta se, ‘Taem san i godaon, yufala i save talem se, “Bambae i gud taem tumora, from we skae i red.” Mo long eli moning, yufala i save talem se, “Bambae i gat ren tede, from we skae i red, mo i gat klaod.” Yufala i save luksave  ol saen long skae blong makem se taem bambae i olsem wanem. ?Be olsem wanem yufala i no save luksave ol saen blong taem ya blong mi?’ ”​—Matiu 16:​1-3.

Taem Jisas i stap talemaot ‘ol saen blong taem ya blong hem’, hem i soemaot se ol man Jiu we oli lesin long hem long faswan handred yia ya, oli mas save finis se taem we oli stap long hem i impoten tumas. I no longtaem bambae fasin blong laef blong ol man Jiu i kasem bigfala trabol we i spolem gud olgeta. Sam dei nomo bifo we Jisas i ded, Jisas i tokbaot wan narafala saen long ol disaepol blong hem​—hemia saen we bambae i soemaot se hem i stap finis olsem king. Samting we hem i bin talem long ol man blong hem i impoten tumas long evri man tede.